Ix el yich sbꞌo stemplo Jehová
6
Ayic 480 abꞌilxo yelta ebꞌ israel dꞌa Egipto, chan̈exo abꞌil yoch vin̈aj Salomón reyal, yic schabꞌilxo ujal yoch jun abꞌil chiꞌ, aton dꞌa uj scuch Zif, ix el yich sbꞌochaj stemplo Jehová. 2 A jun templo chiꞌ, a vin̈aj Salomón ix alani to sbꞌoi yic tzꞌicꞌjichaan̈ Jehová. 27 metro ix aj scꞌatul, bꞌalun̈eꞌ metro ix aj yol schiquin, 13 metro yedꞌ nan̈alxo ix ajqꞌue schaan̈il. 3 Axo yolxoelul stiꞌ, ay junxo macan̈ yool, bꞌalun̈eꞌ metro sat, lajan icha yol schiquin templo chiꞌ, axo jantac ayeluli, nan̈al yoil metro. 4 A sventenail templo chiꞌ, levnic ix ajcan sat dꞌa yool, axo dꞌa spatic lodꞌan. 5 Ix bꞌochajpaxoch lotzan jun pat, ix oymaj dꞌa scostiltac templo chiꞌ yedꞌ dꞌa junxo yol schiquin. Macquiltac ix aj yool, ataꞌ sicꞌchaj tastac tzꞌacꞌji dꞌa Jehová. 6 Oxeꞌ piso ix ajqꞌuei: A bꞌabꞌel piso, chabꞌ metro yedꞌ 25 centímetro ix aj slevanil sat. Axo schabꞌil piso, chabꞌ metro yedꞌ 70 centímetro ix aj sat. Axo yoxil piso, oxeꞌ metro yedꞌ 15 centímetro ix aj sat. Jabꞌjabꞌil ix utzꞌ spimal scajonal scꞌatul templo chiꞌ dꞌa spatiqueli, yujto bꞌachquiltac ix ajcani yic vachꞌ max olji spacꞌul templo chiꞌ bꞌaj tzꞌoch spatzabꞌil jun pat chiꞌ. 7 A jantac qꞌuen qꞌueen ix och dꞌa templo chiꞌ, tzeybꞌil qꞌuen smasanil. Vachꞌxo yaj qꞌuen ayic ix javi qꞌueen, yuj chiꞌ man̈xalaj bꞌaj ix abꞌchaj scꞌan̈ junoc qꞌuen macꞌumpoj qꞌueen, ma junoc qꞌuen tzeylabꞌ qꞌuen, ma yaln̈ej tas qꞌuenal. 8 A spuertail jun pat chiꞌ, a dꞌa stojolal co qꞌuexan̈ yic tzon̈ och dꞌa yol templo chiꞌ ix cani. Axo scꞌoochal sqꞌue dꞌa juntzan̈xo piso chiꞌ tzꞌecꞌ oyoyoc.9 Ayic ix bꞌoel scajonal templo chiꞌ, ix och spatzabꞌil, axo teꞌ nivac chemteꞌ nabꞌa cꞌuteꞌ ix em dꞌa yibꞌan̈ teꞌ. 10 Ayic ix bꞌochaj jun pat dꞌa spatictac templo chiꞌ, chabꞌ metro yedꞌ 25 centímetro ix ajqꞌue schan̈il junjun piso. Ix och spatzabꞌil, ix cꞌoch tenan teꞌ dꞌa templo chiꞌ, nabꞌa cꞌuteꞌ teꞌ patzabꞌ chiꞌ. 11 Ix lajvi chiꞌ, ix yalan Jehová dꞌa vin̈aj Salomón chiꞌ icha tic: 12 Yuj jun templo van a bꞌoan tic, sval dꞌayach, tato tzach ochn̈ej tzacꞌan dꞌa spatic in cꞌaybꞌubꞌal yedꞌ in checnabꞌil, tza cꞌanabꞌajan smasanil, ol elcꞌoch masanil tas valnac dꞌa vin̈aj David vin̈ a mam. 13 Ol in ajn̈ejecꞌ dꞌa e cal a ex israel ex tic, man̈ ol ex vactejcani, xchi Jehová chiꞌ.
14 Ayic ix lajvi sbꞌoel templo ix schec bꞌojoc vin̈aj Salomón chiꞌ, 15 te vachꞌ ix ajoch teꞌ chemteꞌ dꞌa sattac schan̈il pacꞌan̈ dꞌa yool, nabꞌa cꞌuteꞌ teꞌ chemteꞌ chiꞌ. Ix bꞌatn̈ej teꞌ dꞌa yich masanto ix qꞌuecꞌoch teꞌ dꞌa yalan̈ teꞌ patzabꞌ. Ix empax teꞌ chemteꞌ nabꞌa taj dꞌa yool. 16 A dꞌa yol templo chiꞌ dꞌa yichochi, ix macchaj jun cuarto, bꞌalun̈eꞌ metro ix aj yool dꞌa schan̈il pacꞌan̈. A teꞌ chemteꞌ ix och chiꞌ dꞌay, nabꞌa cꞌuteꞌ teꞌ. Ix bꞌatn̈ej teꞌ dꞌa yich masanto ix qꞌuecꞌoch teꞌ dꞌa yalan̈ teꞌ patzabꞌ. A jun cuarto chiꞌ, aton jun lugar Yicn̈ej Jehová Yaji. 17 Axo junxo macan̈ yol templo dꞌa yichan̈elta jun cuarto chiꞌ, 18 metro ix ajcan spacꞌultac. 18 A teꞌ chemteꞌ ix och dꞌa yol templo chiꞌ, nabꞌa a teꞌ cꞌuteꞌ. Yochꞌbꞌiloch yechel sat te teꞌ yedꞌ teꞌ xumac yelvanubꞌoc sattac teꞌ. Malaj junoc qꞌuen qꞌueen chequel dꞌa yool chiꞌ. 19 Te vachꞌ ix aj sbꞌo jun lugar Yicn̈ej Jehová Yaji, yujto ataꞌ ix och teꞌ scaxail strato Jehová chiꞌ. 20 A spacꞌultac yool chiꞌ schan̈il, bꞌalun̈eꞌ metro ix aj junjun, bꞌalun̈eꞌ metro pax ix ajqꞌue schaan̈il. Ix acꞌchajoch qꞌuen oro jay yaj stenchaj dꞌa sattac spacꞌul chiꞌ dꞌa yool. Ix bꞌojipax jun altar nabꞌa cꞌuteꞌ, ix ochpax qꞌuen oro chiꞌ dꞌay. 21 Ix ochpax qꞌuen oro chiꞌ dꞌa teꞌ chemteꞌ ayoch dꞌa yol templo chiꞌ smasanil. Axo qꞌuen cadena ix och dꞌa spuertail jun lugar Yicn̈ej Jehová Yaji, nabꞌa oro qꞌueen. 22 Syalelcꞌochi, masanil yol templo chiꞌ, nabꞌa oro ix aji. Nabꞌa oro pax ix aj jun altar ay dꞌa spatiquelta stiꞌ jun lugar Yicn̈ej Dios Yaj chiꞌ.
23 Ix yacꞌpax bꞌojoc chabꞌ yechel querubín vin̈ dꞌa teꞌ olivo, ix ochcan dꞌa jun lugar Yicn̈ej Jehová Yaji. Nan̈al yoil metro ix ajqꞌue schaan̈il junjun. 24 Chabꞌ metro yedꞌ 25 centímetro ix ajel jen̈an junjun scꞌaxil, yuj chiꞌ nan̈al yoil metro ix ajel jen̈an scꞌaxil junjun ebꞌ querubín chiꞌ schabꞌil. 25 Lajann̈ej yajel jen̈an scꞌaxil ebꞌ chiꞌ schavan̈il, lajan pax yilji ebꞌ. 26 Nan̈al yoil metro ix ajqꞌue schaan̈il steel junjun ebꞌ. 27 Ix acꞌjioch yechel ebꞌ querubín chiꞌ dꞌa yol jun lugar Yicn̈ej Jehová Yaji. Jen̈anel scꞌaxil junjun ebꞌ, yuj chiꞌ junjun sn̈iꞌ scꞌaxil ebꞌ scꞌoch tenan dꞌa junjun spacꞌul yool chiꞌ. Axo junjunxo scꞌaxil ebꞌ schalaj sbꞌa dꞌa snan̈al yol jun lugar chiꞌ. 28 Ix acꞌchajoch qꞌuen oro jay yaj stenchaj dꞌa spatictac ebꞌ querubín chiꞌ. 29 Dꞌa masanil sattac spacꞌul yol chabꞌ cuarto ay dꞌa yol templo chiꞌ, ix acꞌjioch yechel querubín, yechel teꞌ palma yedꞌ yechel xumaac yelvanubꞌoc. 30 Ix acꞌjipaxem qꞌuen oro jay yaj dꞌa yibꞌan̈ teꞌ chemteꞌ ayem dꞌa yol cuarto chiꞌ schabꞌil. 31-32 A teꞌ spuertail jun lugar Yicn̈ej Jehová Yaj chiꞌ, chabꞌ yaj teꞌ. Bꞌobꞌil teꞌ dꞌa teꞌ olivo, axo yelvanubꞌ teꞌ yochꞌbꞌilochi, aton yechel querubín, teꞌ palma yedꞌ xumaac. A teꞌ puerta chiꞌ yedꞌ yelvanubꞌ, ix acꞌjioch qꞌuen oro dꞌa teꞌ yedꞌ dꞌa teꞌ smarcoal teꞌ lin̈jabꞌqꞌuei yedꞌ dꞌa chabꞌ teꞌ utzꞌel tzꞌaj schaan sbꞌa dꞌa yibꞌan̈ teꞌ puerta chiꞌ. 33-34 Ix acꞌjipaxoch teꞌ smarcoal stiꞌ templo chiꞌ, an̈ejaꞌ a dꞌa teꞌ olivo bꞌobꞌil teꞌ, tojol ix ajecꞌ cꞌatan teꞌ. Axo teꞌ spuertail ix och chiꞌ, a dꞌa teꞌ taj ix bꞌoji teꞌ, chabꞌ jen̈an ix aj teꞌ. Junjun jen̈an teꞌ, an̈ejtonaꞌ lin̈anpax tzꞌaj spacchaj snan̈al teꞌ. 35 Ix yochꞌjipaxoch yelvanubꞌ teꞌ: Aton yechel querubín, yechel teꞌ palma yedꞌ yechel xumaac. Ix acꞌjipaxoch qꞌuen oro dꞌa teꞌ. 36 Ix bꞌochajpaxoch smuroal templo chiꞌ, ix ecꞌ oyan dꞌa spatictac. Ox tzol qꞌuen qꞌueen tzeybꞌil slatzꞌjiqꞌuei, axo dꞌa yibꞌan̈ qꞌueen tzꞌecꞌ teꞌ cꞌuteꞌ, ichan̈ej chiꞌ ix aj sqꞌuei. 37 Ix el yich yacꞌjiem yich stemplo Jehová dꞌa uj Zif ayic schan̈il abꞌil yoch vin̈aj Salomón reyal. 38 Axo dꞌa svajxaquil uj scuchan Bul, ayic yuxluchil abꞌil yoch vin̈ reyal, ix bꞌoel jun templo chiꞌ smasanil, icha val yaj yechel bꞌobꞌilcani. Uqueꞌ abꞌil ix yacꞌ sbꞌoi.