8 Axo pax bꞌaj cajan vin̈aj Salomón chiꞌ dꞌa spalacio, a dꞌa spatic jun pat bꞌaj schꞌolbꞌitaj ebꞌ anima chiꞌ ay. Lajann̈ej ix aj sbꞌo icha ix aj sbꞌo juntzan̈ pat chiꞌ. Ix yacꞌanpax bꞌojoc junxo pat yic ix yetbꞌeyum vin̈, aton ix yisil vin̈ sreyal Egipto. Lajan ix aj sbꞌo icha ix aj yic vin̈. 9 A masanil juntzan̈ pat chiꞌ, icha ix aj scot dꞌa yich, icha chiꞌ ix aj sqꞌuecꞌoch dꞌa schon. Icha chiꞌ ix ajpax yamaqꞌuil. A qꞌuen qꞌueen ix laj och dꞌay te vachꞌ yaj qꞌuen stzeychaji icha yaj yechel. A qꞌuen ix checlajcan dꞌa spatic yedꞌ dꞌa yool, polbꞌil qꞌuen dꞌa qꞌuen polum qꞌueen. 10 An̈ejaꞌ qꞌuen ix can dꞌa yich, a qꞌuen qꞌueen te vachꞌ yaj sbꞌoi, a qꞌuen ix can dꞌay, te nivac qꞌueen. Ay qꞌuen nan̈al yoil metro scꞌatul, ay pax qꞌuen oxeꞌ metro yedꞌ 60 centímetro scꞌatul. 11 A dꞌa yibꞌan̈ qꞌuen yich chiꞌ, ix och qꞌuen qꞌueen tzeybꞌil icha val yaj yechel. Ix ochpax teꞌ cꞌuteꞌ jochbꞌil yedꞌ qꞌuen qꞌueen. 12 A dꞌa spatictac jun nivan amacꞌ chiꞌ, ix och ox tzol qꞌuen qꞌueen. Axo dꞌa yibꞌan̈ qꞌueen ix ochpax jun tzol teꞌ patzabꞌ nabꞌa cꞌuteꞌ. Ichan̈ej chiꞌ ix aj sqꞌue dꞌa chaan̈, icha ix aj sbꞌo jun ix och dꞌa spatictac templo yedꞌ pax jun ix bꞌo dꞌa yolelul stiꞌ templo chiꞌ.

13 Ay jun vin̈ aj Tiro scuch Hiram ix yavtejcot vin̈aj rey Salomón chiꞌ. 14 A jun vin̈ chiꞌ, yuneꞌ vin̈ jun ix chamnac yetbꞌeyum dꞌa yin̈tilal Neftalí, aj Tiro vin̈ smam vin̈, te jelan vin̈ sbꞌoan qꞌuen bronce. An̈ejtonaꞌ te jelan pax spensar vin̈, yojtac vin̈ sbꞌoan yaln̈ej tas munlajelal dꞌa qꞌuen bronce chiꞌ. Yuj chiꞌ ix avtajcot vin̈ yic smunlaj vin̈ dꞌa vin̈aj rey Salomón sbꞌoan juntzan̈ tas nabꞌa bronce. 15 Ix sbꞌo chabꞌ nivac oy vin̈, nabꞌa bronce ix aji, vajxaqueꞌ metro steel junjun, nan̈al svaquil metro ix aj bꞌalan spatic junjun. 16 Ix sbꞌoanpax chabꞌ sjolom chabꞌ oy chiꞌ vin̈. A steel juntzan̈ sjolom chiꞌ, chabꞌ metro yedꞌ 25 centímetro ix aji. 17 A dꞌa spatictac chabꞌ sjolom chiꞌ ix acꞌjioch qꞌuen cadena bronce, icha qꞌuen malla yaj qꞌuen sbꞌoi. Uqueꞌ ayoch dꞌa junjun sjolom chiꞌ. 18 Ix sbꞌopax cha tzol icha yechel sat teꞌ granado vin̈. Ix och dꞌa juntzan̈ cadena chiꞌ yic tzꞌoch dꞌa spatic junjun sjolom oy chiꞌ. Lajann̈ej ix aj schabꞌil. 19 A juntzan̈ jolom oy chiꞌ, ay am chabꞌoc metro ayqꞌuei, lajan yilji icha an̈ chochol. 20 A chabꞌ sjolom juntzan̈ oy chiꞌ cꞌolan cꞌolan yaji. Axo dꞌa yibꞌan̈, ataꞌ ayqꞌue junxo icha an̈ chochol chiꞌ. A bꞌaj tzꞌemul qꞌuen cadena dꞌa spatictac jun cꞌolan cꞌolan chiꞌ, ataꞌ ayoch 200 yechel sat teꞌ granado, cha tzol yajochi. 21 Ix yacꞌoch chabꞌ oy vin̈aj Hiram chiꞌ dꞌa sat templo chiꞌ. Ayic ix yacꞌanem vin̈ dꞌa yedꞌtal, ay jun ix can dꞌa co qꞌuexan̈ ayic tzon̈ och dꞌa yol templo chiꞌ, Jaquín ix yacꞌ vin̈ sbꞌiej. Axo junxo oy chiꞌ ix can dꞌa co vachꞌ, Boaz ix yacꞌ vin̈ sbꞌiej.^* 22 A sjolom juntzan̈ oy chiꞌ, lajan yilji icha xumaquil an̈ chochol. Icha chiꞌ ix aj juntzan̈ oy chiꞌ sbꞌoan vin̈aj Hiram chiꞌ.

23 Ix lajvi chiꞌ, ix sbꞌoan jun nivan pila nabꞌa bronce vin̈aj Hiram chiꞌ, yic bꞌaj smolchaj a aꞌ. Suyansuyan ix aji, nan̈al yoil metro ix aj slevanil sat. Axo ix ajqꞌue schaan̈il steel, chabꞌ metro yedꞌ 25 centímetro ix aji, axo ix aj setan smasanil, 13 metro yedꞌ nan̈alxo. 24 A dꞌa yalan̈ stiꞌ jun pila chiꞌ, ayoch chabꞌ tzol yechel sattac te teꞌ icha yilji teꞌ tzima. Lajun̈eꞌ ix och dꞌa junjun 45 centímetro, junn̈ej ix aj sbꞌo yedꞌ jun pila chiꞌ. 25 A jun pila chiꞌ bꞌachanem dꞌa yibꞌ snan̈al juntzan̈ yechel nocꞌ mam vacax nabꞌa bronce. A juntzan̈ yechel nocꞌ chiꞌ, oxeꞌ qꞌuelanbꞌat dꞌa stojolal sur, oxeꞌ qꞌuelanbꞌat dꞌa stojolal norte, oxeꞌ qꞌuelanbꞌat dꞌa stojolal bꞌaj sjavi cꞌu, oxeꞌ pax qꞌuelanbꞌat dꞌa stojolal bꞌaj tzꞌem cꞌu. A yoc juntzan̈ yechel vacax chiꞌ aycanoch dꞌa yalan̈ jun pila chiꞌ. 26 A jun pila chiꞌ nabꞌa bronce ix aji, chan̈ecꞌabꞌil spimal. Nivan yajel pechan stiꞌ icha yilji xumaquil an̈ chochol. A dꞌa yol jun pila chiꞌ, tzꞌem 44 mil litro a aꞌ.

27 Ix sbꞌoanpax lajun̈eꞌ carreta vin̈, nabꞌa bronce ix aj junjun. Jun metro yedꞌ 80 centímetro ix aj spacꞌul schan̈il, jun metro yedꞌ 35 centímetro ix ajqꞌue steel. 28 A juntzan̈ carreta chiꞌ, icha tic yaji: Ay chan̈eꞌ smarcoal, macan yoltac sat smarcoal chiꞌ. 29 A dꞌa sat juntzan̈ chiꞌ ayoch yechel nocꞌ choj, nocꞌ toro yedꞌ yechel querubín. A dꞌa yibꞌan̈ yedꞌ dꞌa yalan̈ juntzan̈ yechel chiꞌ, ataꞌ ayoch yelvanubꞌ smarcoal chiꞌ. 30 Junjun carreta chiꞌ ay chan̈eꞌ syantail nabꞌa bronce, chabꞌ qꞌuen qꞌueen cꞌatanecꞌ dꞌa yalan̈ syaman syantail chiꞌ. A dꞌa schan̈il schiquintac juntzan̈ carreta chiꞌ dꞌa yibꞌan̈, ay syamnubꞌal nabꞌa bronce, a syaman jun yuneꞌ pila ayem dꞌa yol jun carreta chiꞌ. A juntzan̈ syamnubꞌ chiꞌ ayoch yelvanubꞌ. 31 Axo dꞌa yol jun carreta chiꞌ, ayem jun icha nivan tubo, 45 centímetro schaan̈il ayqꞌueta dꞌa yibꞌan̈ stiꞌ juntzan̈ carreta chiꞌ. Aypaxoch yelvanubꞌ spatictac jun nivan tubo chiꞌ, axo schan̈ pacꞌan̈il jun carreta chiꞌ, man̈ setansetanoclaj. 32 A chan̈eꞌ syantail chiꞌ ayoch dꞌa schiquintac schan̈il. Axo pax juntzan̈ qꞌuen qꞌueen syaman syantail chiꞌ, yaman yaj qꞌuen yedꞌ smarcoal chiꞌ. A syantail chiꞌ, 70 centímetro yaj setan. 33 Lajan yaj sbꞌo juntzan̈ syantail chiꞌ icha yic carruaje yic oval. A junjun syantail chiꞌ yaman yaj yedꞌ qꞌuen qꞌueen ayoch bꞌaj ay yolanil, nabꞌa bronce, junn̈ej yaj setan. 34 A chan̈eꞌ syamnubꞌal dꞌa schiquintac carreta chiꞌ, junn̈ej yaj yedꞌ smarcoal junjun carreta. 35 A dꞌa yibꞌan̈ carreta chiꞌ, ay junxo setanoch dꞌa spatic stiꞌ, 23 centímetro yajqꞌue schaan̈il. A jantac tas ayoch dꞌa junjun carreta chiꞌ, junn̈ej yaj sbꞌo smasanil. 36 A dꞌa spacꞌultac yoltac smarcoal chiꞌ, ix yacꞌoch yechel querubín vin̈aj Hiram chiꞌ dꞌay, nocꞌ choj yedꞌ teꞌ palma. Ix ochn̈ej yelvanubꞌ chiꞌ dꞌa spatictac smasanil. 37 Icha chiꞌ ix aj sbꞌo lajun̈eꞌ carreta chiꞌ, lajann̈ej ix aj smasanil, lajann̈ej yechel, lajann̈ej pax yilji.

38 Ix sbꞌoanpax lajun̈eꞌ yedꞌtal aꞌ yic juntzan̈ carreta chiꞌ vin̈, nabꞌa bronce ix aji. Lajann̈ej yechel smasanil. Jun metro yedꞌ 80 centímetro yool junjun, 800 litro am aꞌ tzꞌem dꞌa yool. Junjun ay qꞌue dꞌa yibꞌan̈ scarretail. 39 Oyeꞌ juntzan̈ carreta chiꞌ ix can dꞌa stojolal co vachꞌ dꞌa templo, oyeꞌ pax ix can dꞌa stojolal co qꞌuexan̈. Axo jun nivan pila, a dꞌa co qꞌuexan̈ coch dꞌa templo chiꞌ ix cani, dꞌa stojolal bꞌaj sjavi cꞌu.

40 Ix lajvi chiꞌ ix sbꞌoanpax juntzan̈ chen, qꞌuen pala yedꞌ nivac ucꞌabꞌ vin̈aj Hiram chiꞌ. Icha val chiꞌ ix aj slajvi sbꞌo smasanil juntzan̈ ix schec vin̈aj rey Salomón bꞌojoc yicoc stemplo Jehová. 41 Aton masanil juntzan̈ tic ix checji sbꞌo vin̈aj Hiram: Chabꞌ nivac oy, chabꞌ sjolom oy chiꞌ, juntzan̈ qꞌuen cadena icha qꞌuen malla nabꞌa bronce ayoch dꞌa spatictac jolom oy chiꞌ, 42 yedꞌ pax 400 yechel sat teꞌ granado ayoch dꞌa juntzan̈ cadena chiꞌ. Cha tzol yajoch dꞌa spatictac chabꞌ jolom oy chiꞌ. 43 Lajun̈eꞌ carreta cuchjinac lajun̈eꞌ yedꞌtal aꞌ, 44 jun nivan pila, lajchaveꞌ yechel mam vacax cuchjinac, 45 juntzan̈ qꞌuen chen, juntzan̈ qꞌuen pala yedꞌ juntzan̈ qꞌuen nivac ucꞌabꞌ.

Masanil juntzan̈ yamcꞌabꞌ tic ix sbꞌo vin̈aj Hiram dꞌa vin̈aj rey Salomón yicoc stemplo Jehová, nabꞌa bronce to copopi yilji. 46 Ix schec vin̈ rey chiꞌ bꞌojoc dꞌa moldeal dꞌa yacꞌlical stiꞌ aꞌ Jordán dꞌa lum bꞌaqꞌuech luum, dꞌa scal snan̈al Sucot yedꞌ Saretán. 47 Te tzijtum yamcꞌabꞌ nabꞌa bronce, yuj chiꞌ majxo yechtej vin̈aj rey Salomón chiꞌ jantac yalil qꞌuen bronce chiꞌ ix cꞌanchaji.

48 Ix schecanpax vin̈ rey chiꞌ bꞌojoc masanil juntzan̈xo yamcꞌabꞌ nabꞌa oro dꞌa yol stemplo Jehová: Jun altar, jun mexa bꞌaj tzꞌacꞌjiem ixim pan dꞌa yichan̈ Jehová, 49 juntzan̈ bꞌachnubꞌ candil yedꞌ yelvanubꞌ icha yechel xumaac, aton ayoch dꞌa yichan̈ lugar Yicn̈ej Jehová Yaji. Ay oyeꞌ dꞌa stojolal co vachꞌ, ay oyexo dꞌa stojolal co qꞌuexan̈, juntzan̈ candil, juntzan̈ yamlabꞌ, 50 juntzan̈ copa, juntzan̈ qꞌuen icꞌlabꞌel stan̈il bꞌaj ayoch scꞌacꞌal candil, juntzan̈ nivac ucꞌabꞌ, juntzan̈ nivac cuchara yedꞌ juntzan̈ chaynubꞌ yic incienso. Masanil juntzan̈ chiꞌ nabꞌa oron̈ej. Axo qꞌuen visagre ayoch dꞌa spuertail jun lugar Yicn̈ej Jehová Yaji, aton dꞌa yol templo yedꞌ pax yic spuertail templo chiꞌ, nabꞌa oron̈ej.

51 Ayic ix bꞌoel masanil tas ix schec vin̈aj Salomón bꞌojoc yic stemplo Jehová, ix schecan vin̈ icꞌjocbꞌat masanil qꞌuen oro, qꞌuen plata yedꞌ juntzan̈ yamcꞌabꞌ yacꞌnaccan vin̈aj David smam vin̈ dꞌa Jehová. Ix schecan vin̈ sicꞌchajcan dꞌa yol juntzan̈ pat ay dꞌa spatictac templo bꞌaj sicꞌchaj tas tzꞌochcan yicoc Jehová.