Juntzan̈ yamcꞌabꞌ yic templo
4
Ix schecpax vin̈aj Salomón chiꞌ bꞌojoc jun altar nabꞌa bronce, 9 metro ix aj scꞌatul, 9 metro ix aj sat, nan̈al yoil metro ix ajqꞌue schaan̈il. 2 Ix bꞌochaj pax jun nivan pila yedꞌtal a aꞌ nabꞌa bronce, setansetan ix aji, nan̈al yoil metro ix aj slevanil sat, 2 metro yedꞌ 25 centímetro ix ajqꞌue steel stitac, axo jantac ix aj setan chiꞌ, 13 metro yedꞌ nan̈alxo. 3 A dꞌa yalan̈ stiꞌ dꞌa spatictac jun pila chiꞌ, ayecꞌ cha tzol yechel nocꞌ toro yelvanubꞌoc. Lajun̈eꞌ ayoch dꞌa junjun 45 centímetro, yaman yaj yedꞌ jun pila chiꞌ. 4 Ay pax lajchaveꞌ yechel nivac toro nabꞌa bronce ayoch sbꞌachnubꞌoc yalan̈ jun pila chiꞌ. A juntzan̈ chiꞌ, oxeꞌ qꞌuelanbꞌat dꞌa stojolal norte, oxeꞌ pax dꞌa sur, oxeꞌ pax dꞌa stojolal bꞌaj sjavi cꞌu yedꞌ oxeꞌ dꞌa stojolal bꞌaj tzꞌem cꞌu. A yoc juntzan̈ yechel vacax chiꞌ dꞌa spatic, aꞌ ayoch dꞌa yalan̈ jun pila chiꞌ. Axo dꞌa yibꞌan̈ bꞌachanemi. 5 A jun pila chiꞌ, 8 centímetro spimal. Pechꞌanel stiꞌ icha xumaquil an̈ chochol. 15 mil galón a aꞌ sbꞌat dꞌa yool.6 Ix bꞌo pax lajun̈eꞌ yunetac pila nabꞌa bronce bꞌaj sjucꞌchaj masanil tas scꞌanchaji ayic sn̈uschaj silabꞌ. Oyeꞌ ix can dꞌa stojolal sur, oyexo dꞌa stojolal norte. Axo dꞌa jun nivan pila chiꞌ sbꞌic sbꞌa ebꞌ vin̈ sacerdote.
7 Ix bꞌo pax lajun̈eꞌ bꞌachnubꞌ candil nabꞌa oro, icha ix aj yalan Dios. Ix acꞌchajoch dꞌa yol templo chiꞌ, oyeꞌ dꞌa stojolal sur, oyeꞌ dꞌa stojolal norte. 8 Ix bꞌo pax lajun̈eꞌ mexa, ix acꞌchajoch dꞌa yol templo chiꞌ, oyeꞌ dꞌa stojolal sur, oyeꞌ pax dꞌa stojolal norte. Ix bꞌo pax 100 nivac ucꞌabꞌ nabꞌa oro.
9 Ix bꞌo pax jun amacꞌ yic ebꞌ sacerdote yedꞌ junxo amacꞌ nivaquil yic masanil anima. Ix och qꞌuen bronce dꞌa spatictac jun puerta ay dꞌa scal chabꞌ amacꞌ chiꞌ. 10 A jun nivan pila ix bꞌo chiꞌ, a dꞌa stojolal sur dꞌa schiquin templo chiꞌ ix cani, dꞌa stojolal bꞌaj sjavi cꞌu.
11 Ix sbꞌopax juntzan̈ qꞌuen chen vin̈aj Hiram chiꞌ, qꞌuen pala yedꞌ qꞌuen nivac ucꞌabꞌ, icha chiꞌ ix aj sbꞌoelcꞌoch munlajel dꞌa stemplo Dios ix schec bꞌojoc vin̈aj Salomón chiꞌ. 12 A juntzan̈ munlajel ix laj bꞌo chiꞌ: Aton chabꞌ nivac oy, chabꞌ sjolom oy chiꞌ ayqꞌuei, setansetan yaji, ayoch qꞌuen cadena dꞌa spatictac. 13 Ix och 400 yechel teꞌ granada dꞌa qꞌuen cadena chiꞌ, cha tzol ix ajoch dꞌa junjun qꞌueen. 14 Ay pax lajun̈eꞌ yunetac pila, lajun̈eꞌ sbꞌachnubꞌ yich ayoch dꞌa yalan̈, 15 jun nivan pila yic a aꞌ, 12 yechel toro ayoch dꞌa yalan̈, 16 qꞌuen qꞌueen chen, qꞌuen pala yedꞌ qꞌuen tenedor.
Masanil juntzan̈ yamcꞌabꞌ ix sbꞌo vin̈aj Hiram chiꞌ yuj vin̈aj Salomón, yic stemplo Jehová yaji, a qꞌuen bronce te copopi ix och dꞌay. 17 A juntzan̈ yamcꞌabꞌ nabꞌa bronce ix bꞌo chiꞌ, a dꞌa yol lum bꞌaqꞌuech luum dꞌa stiꞌ aꞌ Jordán ix bꞌoi, dꞌa snan̈al Sucot yedꞌ Saretán. 18 Yujto te nivan juntzan̈ yamcꞌabꞌ nabꞌa bronce ix schec vin̈aj Salomón chiꞌ bꞌojoc, maxtzac echtaj jantac qꞌuen bronce ix och dꞌay.
19 Ix schecanpax vin̈aj Salomón chiꞌ bꞌojoc juntzan̈xo yamcꞌabꞌ yic stemplo Dios chiꞌ, nabꞌa oro ix aji: Aton jun altar yedꞌ juntzan̈ mexa bꞌaj tzꞌacꞌchajem ixim pan dꞌa yichan̈ Jehová, 20 yedꞌ juntzan̈ sbꞌachnubꞌ candil yedꞌ candil tzꞌoch scꞌacꞌal dꞌa yichan̈ jun lugar Yicn̈ej Jehová Yaji, icha yaj yalan Jehová chiꞌ. 21 Ix bꞌo pax juntzan̈ yechel xumac ayoch dꞌa sbꞌachnubꞌ candil chiꞌ yedꞌ qꞌuen tenaza, 22 qꞌuen tzꞌicꞌanel stan̈il bꞌaj tzꞌoch scꞌacꞌal candil, qꞌuen nivac ucꞌabꞌ, qꞌuen nivac cuchara yedꞌ qꞌuen yedꞌtal tzacꞌacꞌ. Masanil juntzan̈ qꞌueen chiꞌ, an̈ej dꞌa qꞌuen oro te vachꞌ bꞌaj ix bꞌoi. Ix och pax qꞌuen oro dꞌa spatictac puerta bꞌaj tzon̈ och dꞌa yol templo chiꞌ. Ix och pax qꞌueen dꞌa spuertail jun lugar Yicn̈ej Dios Yaji.