5
Axo yic ix lajvi masanil munlajel ix schec bꞌojoc vin̈aj Salomón dꞌa stemplo Jehová chiꞌ, ix icꞌjibꞌat masanil juntzan̈ yamcꞌabꞌ chiꞌ bꞌaj sicꞌchaj tas tzꞌacꞌji yicoc Jehová dꞌa yol templo chiꞌ, aton juntzan̈ yamcꞌabꞌ nabꞌa oro, nabꞌa plata yedꞌ juntzan̈xo tastac yic Jehová yajcan yuj vin̈aj rey David smam vin̈aj Salomón chiꞌ.Ix icꞌchajbꞌat teꞌ scaxail trato dꞌa templo
2-4 Ix lajvi chiꞌ axo dꞌa scꞌual qꞌuin̈ te nivan yelcꞌoch dꞌa yuquil uj dꞌa yol abꞌil chiꞌ, ix schecan vin̈aj Salomón chiꞌ smolbꞌej sbꞌa masanil ebꞌ yichamtac vinaquil chon̈abꞌ Israel chiꞌ dꞌa Jerusalén yedꞌ masanil ebꞌ yajal yaj dꞌa junjun in̈tilal yedꞌ ebꞌ nivac yelcꞌoch dꞌa scal ebꞌ scꞌabꞌ yoc. Ix smolbꞌej sbꞌa ebꞌ, yic tzꞌicꞌchajcot teꞌ scaxail strato Jehová yuj ebꞌ levita dꞌa Sion, aton schon̈abꞌ vin̈aj David. 5 Ix yicꞌancot jun mantiado ebꞌ sacerdote yedꞌ ebꞌ levita, aton jun bꞌaj schꞌox sbꞌa Jehová. Ix javi ebꞌ yedꞌoc dꞌa templo chiꞌ yedꞌ masanil syamcꞌabꞌil. 6 A vin̈aj rey Salomón yedꞌ masanil ebꞌ yetisraelal molanecꞌ chiꞌ, bꞌabꞌel scot ebꞌ dꞌa yichan̈ teꞌ scaxail strato Dios chiꞌ, sn̈usan nocꞌ silabꞌ ebꞌ, aton nocꞌ calnel yedꞌ nocꞌ vacax. Man̈ jantacoc nocꞌ ix yacꞌ ebꞌ, man̈xo bꞌischajbꞌenoc nocꞌ. 7 Ix lajvi chiꞌ, ix bꞌat yacꞌanoch teꞌ scaxail strato Jehová chiꞌ ebꞌ sacerdote dꞌa yol templo chiꞌ dꞌa yichochcꞌochi, aton dꞌa jun lugar Yicn̈ej Jehová Yaji, dꞌa yalan̈ scꞌaxil juntzan̈ yechel querubín. 8 A juntzan̈ yechel querubín chiꞌ, jen̈anbꞌat scꞌaxil dꞌa yibꞌan̈ bꞌaj ix can teꞌ caxa chiꞌ yedꞌ dꞌa yibꞌan̈ teꞌ sbꞌachnubꞌal. 9 A teꞌ sbꞌachlabꞌil teꞌ caxa chiꞌ, najat steel teꞌ, chequel teꞌ dꞌa jun lugar ay dꞌa snan̈al yol templo chiꞌ, jun ay dꞌa sat elta jun lugar Yicn̈ej Dios Yaji, palta man̈ chequeloc teꞌ dꞌa stiꞌ. A dꞌa jun lugar chiꞌ ix cann̈ej teꞌ caxa chiꞌ. 10 A tas ayem dꞌa yol teꞌ, an̈ej chabꞌ pachan̈ qꞌuen qꞌueen yacꞌnaccanem vin̈aj Moisés dꞌa Horeb. A dꞌa qꞌuen tzꞌibꞌabꞌilcanoch strato Jehová sbꞌonac yedꞌ chon̈abꞌ Israel ayic van scot ebꞌ dꞌa yol bꞌe ayic yelnaccot ebꞌ dꞌa Egipto.
11 Ix elta ebꞌ sacerdote dꞌa jun lugar ay dꞌa snan̈al yol templo chiꞌ. Toxo ix sacbꞌitej sbꞌa ebꞌ smasanil, vachꞌchom manto cꞌoch stzolal yoch ebꞌ dꞌa yopisio. 12 Axo masanil ebꞌ levita acꞌbꞌiloch yic sbꞌitani, aton vin̈aj Asaf, vin̈aj Hemán, vin̈aj Jedutún, ebꞌ yuninal ebꞌ vin̈ yedꞌ ebꞌ scꞌabꞌ yoc ebꞌ vin̈, lin̈jabꞌoch ebꞌ vin̈ dꞌa stojolal bꞌaj sjavi cꞌu dꞌa stzꞌey altar dꞌa yamaqꞌuil templo chiꞌ. Nabꞌa lino spichul ebꞌ vin̈ ayochi, yedꞌnac platillo ebꞌ vin̈, salterio yedꞌ arpa. Ay pax 120 ebꞌ vin̈ sacerdote spuꞌan qꞌuen trompeta.
13 Junn̈ej ix aj spuꞌan qꞌuen trompeta chiꞌ ebꞌ vin̈ smasanil. Junn̈ej ix aj sjaj ebꞌ vin̈ sbꞌitani, yic syalan vachꞌ lolonel ebꞌ vin̈ yuj yacꞌan yuj diosal ebꞌ vin̈ dꞌa Jehová. Yacbꞌan van sbꞌitan ebꞌ vin̈ chiꞌ, ix puchaj qꞌuen trompeta, ix tzin̈ji platillo yedꞌ juntzan̈xo yamcꞌabꞌ yic bꞌit chiꞌ. Sbꞌitan ebꞌ vin̈ icha tic: Calec vachꞌ lolonel dꞌa Jehová, yujto te vachꞌn̈ej, tzon̈ xajanej dꞌa masanil tiempo, xchi ebꞌ. A dꞌa jun rato chiꞌ ix bꞌudꞌjiel yol templo chiꞌ yuj jun asun. 14 Majxo yal-laj yoch ebꞌ vin̈ sacerdote yil yopisio, yujto ix bꞌudꞌjiel yol templo chiꞌ yuj stziquiquial Jehová.