3 Ix lajvi chiꞌ ix meltzajbꞌat qꞌuelan vin̈ rey chiꞌ bꞌaj ayecꞌ masanil ebꞌ yetisraelal chiꞌ, lin̈jabꞌ qꞌue ebꞌ smasanil, ix yalan vachꞌ lolonel vin̈ dꞌa yibꞌan̈ ebꞌ. 4 Ix yalan vin̈ icha tic: Calec vachꞌ lolonel dꞌa Jehová co Diosal a on̈ israel on̈ tic, yujto ix elcꞌoch bꞌaj yacꞌnaccan stiꞌ dꞌa vin̈aj David in mam, ayic yalannac icha tic: 5 Atax yic vicꞌannaquelta in chon̈abꞌ dꞌa Egipto, malaj junocxo chon̈abꞌ ix in siqꞌuel dꞌa scal yin̈tilal Israel bꞌaj sbꞌo junoc templo bꞌaj tzin aji, yic tzꞌicꞌjichaan̈ in bꞌi. Malaj pax junoc vinac ix in siqꞌueli yic scuchbꞌan in chon̈abꞌ Israel tic. 6 Palta a ticnaic jun, ix in siqꞌuel chon̈abꞌ Jerusalén, yic vachꞌ ataꞌ ol bꞌinaj in bꞌi. Ix ach in sicꞌpaxeli yic tzach och reyal dꞌa in chon̈abꞌ Israel tic, xchi Jehová dꞌa vin̈ in mam chiꞌ. 7 A vin̈aj David in mam chiꞌ, snibꞌejnac vin̈ sbꞌoqꞌue junoc templo yic syicꞌanchaan̈ Jehová co Diosal vin̈. 8 Palta yalnac Jehová dꞌa vin̈: Te vachꞌ tas tza na chiꞌ, yujto tza na a bꞌoqꞌue junoc in templo. 9 Man̈oc ach ol a bꞌoqꞌuei, palta a junoc uninal ol bꞌoanqꞌueoc, xchi dꞌa vin̈.

10 Axo ticnaic jun, toxo ix elcꞌoch bꞌaj yacꞌnac stiꞌ Jehová chiꞌ. Icha val yutejnac yalan chiꞌ, icha chiꞌ ix aj voch reyal dꞌa co chon̈abꞌ tic sqꞌuexuloc vin̈ in mam chiꞌ. Toxo ix in bꞌoqꞌue jun stemplo Jehová co Diosal. 11 Toxo pax ix vacꞌoch teꞌ scaxail strato Jehová sbꞌonac quedꞌoc dꞌa yool, xchi vin̈.

12-13 Ay jun tecꞌnubꞌ nabꞌa bronce ix schec vin̈aj Salomón chiꞌ bꞌojoc, a dꞌa snan̈al yamaqꞌuil templo chiꞌ ay, chabꞌ metro yedꞌ 25 centímetro ix aj schan̈il pacꞌan̈. Axo schaan̈il ix ajqꞌuei, jun metro yedꞌ 35 centímetro. Ix qꞌue vin̈ dꞌa yibꞌan̈ jun tecꞌnubꞌ chiꞌ dꞌa yichan̈ altar yic Jehová, qꞌuelanoch masanil ebꞌ chon̈abꞌ israel chiꞌ ix em cuman vin̈, ix yicꞌanchaan̈ scꞌabꞌ vin̈, ix lesalvi vin̈. 14 Ix yalan vin̈ icha tic: Mamin Jehová co Diosal a on̈ israel on̈ tic, malaj junocxo Dios dꞌa satchaan̈ yedꞌ dꞌa sat luum tic lajan edꞌoc, yujto tzaqꞌuelcꞌoch a trato, tza chꞌoxan a vachꞌcꞌolal dꞌa mach tzach cꞌanabꞌajan dꞌa smasanil scꞌool. 15 Toxo ix aqꞌuelcꞌoch bꞌaj acꞌnac a tiꞌ dꞌa vin̈aj David in mam. A val ticnaic van yelcꞌochi. 16 Yuj chiꞌ, Mamin Jehová co Diosal, elocabꞌpaxcꞌoch bꞌaj acꞌnac a tiꞌ dꞌa vin̈ a checabꞌ aj David chiꞌ to ol ochn̈ej yin̈tilal vin̈ reyal dꞌa chon̈abꞌ Israel tic tato tzach scꞌanabꞌajej ebꞌ icha ajnac ach scꞌanabꞌajan vin̈ in mam chiꞌ. 17 Yuj chiꞌ, Mamin Jehová co Diosal, elocabꞌcꞌoch bꞌaj acꞌnac a tiꞌ dꞌa vin̈ in mam a checabꞌ chiꞌ.

18 Palta jun, ¿tom syal a cajnaj dꞌa sat lum tic yedꞌ ebꞌ anima? Inatax satchaan̈, yelxo te nivan, palta max yabꞌlaj bꞌaj tzach aji, ocxom jabꞌ templo ix in bꞌoqꞌue tic. 19 Palta jun Mamin, cha abꞌ in lesal ayic tzin tevi dꞌayach a in a checabꞌ in tic, ayic tzin cꞌanan a vachꞌcꞌolal. 20 Man̈ iqꞌuel a sat dꞌa jun templo tic dꞌa cꞌual yedꞌ dꞌacꞌvalil, aton dꞌa jun lugar to ix alaꞌ to ol ach bꞌinajn̈ej. Yuj chiꞌ abꞌval tas svalaꞌ. 21 Ayic tzin lesalvi dꞌayach yedꞌ pax ebꞌ a chon̈abꞌ Israel tic dꞌa jun lugar tic, cha abꞌ co lesal tic. Ato dꞌa satchaan̈ bꞌaj cajan ach, tza maclej abꞌ co lesal chiꞌ, tzacꞌval nivancꞌolal co mul.

22 Qꞌuinaloc ay junoc mach tzꞌacꞌjioch dꞌa yibꞌan̈ to ix och smul dꞌa junoc yetanimail, tzꞌicꞌchajcoti, tzul yacꞌan stiꞌ dꞌa yichan̈ altar dꞌa jun a templo tic, 23 ato dꞌa satchaan̈ chiꞌ, tzabꞌ tas syalaꞌ, tza bꞌeycꞌolej dꞌa stojolal, tzacꞌoch syaelal mach tzꞌoch smul chiꞌ icha syal smul tzꞌochi, tza bꞌo pax yaj mach malaj smul.

24 Qꞌuinaloc tzon̈ acꞌji ganar a on̈ a chon̈abꞌ on̈ tic yuj ebꞌ cajcꞌool, yujto tzꞌoch co mul dꞌayach, tato sna sbꞌa co cꞌool, scalan co bꞌa dꞌayach, tzon̈ tevi dꞌayach dꞌa jun templo tic, 25 tzabꞌval co lesal dꞌa satchaan̈ chiꞌ, tzacꞌval nivancꞌolal co mul, tzon̈ acꞌ meltzaj dꞌa lum co luum acꞌnac dꞌa ebꞌ co mam quicham tic.

26 Qꞌuinaloc man̈xo ol yacꞌ n̈abꞌ dꞌa chon̈abꞌ tic yuj co mul tzꞌoch dꞌayach, tzacꞌanoch co yaelal. Palta tato tzon̈ javi ul ach cacꞌ bꞌinaj dꞌa lesal, qꞌuelan on̈ cot dꞌa jun lugar tic snaan sbꞌa co cꞌool dꞌa co chucal yuj jun yaelal chiꞌ, 27 tzabꞌval dꞌa satchaan̈ chiꞌ ayic tzon̈ tevi dꞌayach. Tzacꞌval nivancꞌolal co chucal, tza chꞌox jun a bꞌeybꞌal vachꞌ yic sco bꞌeybꞌalej. Slajvi chiꞌ tzacꞌancot n̈abꞌ dꞌa yibꞌan̈ lum luum acꞌnac tic dꞌayon̈.

28 Qꞌuinaloc tzꞌem vejel, ma ilya dꞌa co chon̈abꞌ tic, ma stacji cavbꞌen yuj cꞌacꞌ, ma sjavi junoc syabꞌil cavbꞌen chiꞌ, ma sjavi nocꞌ cꞌulubꞌ dꞌay, ma junocxo macan̈ nocꞌ cotac nocꞌ slajanel cavbꞌen chiꞌ, ma jun, sjavi oyan ebꞌ ajcꞌol yacꞌan oval dꞌa junoc chon̈abꞌ dꞌa yol co macbꞌen tic, ma yaln̈ej tas yaelal tzon̈ icꞌani, 29-30 tzabꞌval co lesal ayic tzon̈ tevi dꞌayach. Yaln̈ej mach sna sbꞌa scꞌool ayic syilani to ayoch dꞌa syaelal, tato smojbꞌejcot scꞌabꞌ dꞌayach dꞌa stojolal jun templo tic, tzabꞌval tas syal chiꞌ dꞌa satchaan̈, tzacꞌval spac dꞌa junjun icha sbꞌeybꞌal, yujto a ach tic ojtac val tas ay dꞌa co pensar yedꞌ tas sco na junjun on̈. 31 Tato icha chiꞌ, ol yal sbꞌa masanil a chon̈abꞌ dꞌayach, ol ach co cꞌanabꞌajani yacbꞌan pitzan on̈ dꞌa sat jun luum acꞌnac tic dꞌa ebꞌ co mam quicham.

32 Qꞌuinaloc ay junoc anima chꞌoc chon̈abꞌil scot dꞌa junoc lugar najat yic scajnaj dꞌa co cal a on̈ a chon̈abꞌ on̈ tic yujto te nivan a bꞌinaji, te nivan a poder, tato slesalvi dꞌayach dꞌa stojolal jun a templo tic, 33 tzabꞌval tas syal chiꞌ dꞌa satchaan̈ bꞌaj ayach, tzacꞌ masanil tas scꞌan chiꞌ dꞌayach, yic vachꞌ tzach yojtaquejel masanil nación dꞌa yolyibꞌan̈qꞌuinal tic, yic vachꞌ tzach scꞌanabꞌajej ebꞌ icha tzach co cꞌanabꞌajej a on̈ a chon̈abꞌ Israel on̈ tic. Icha chiꞌ ol aj yojtacanel ebꞌ to a jun templo ix in bꞌoqꞌue tic, ic yaji.

34 Qꞌuinaloc yaln̈ej bꞌaj tzon̈ a checbꞌat a on̈ a chon̈abꞌ on̈ tic cacꞌ oval yedꞌ ebꞌ ajcꞌool, tato tzon̈ lesalvi dꞌayach dꞌa stojolal jun chon̈abꞌ ix a sicꞌcanel tic, bꞌaj ay jun templo ix in bꞌoqꞌue tic, 35 tzabꞌval dꞌa satchaan̈ chiꞌ ayic tzon̈ tevi dꞌayach, tzach och quedꞌoc yic scacꞌ ganar.

36 Qꞌuinaloc tzꞌoch co mul dꞌayach, (yujto malaj junoc anima max och smul) scot yoval a cꞌol dꞌayon̈, yuj chiꞌ tzon̈ acꞌoch dꞌa yol scꞌabꞌ ebꞌ ajcꞌool, tzon̈ yicꞌanbꞌat ebꞌ dꞌa chꞌoc chon̈abꞌil najat, ma lacꞌan. 37 Tato sna sbꞌa co cꞌool dꞌa jun chon̈abꞌ bꞌaj ayon̈ecꞌ chiꞌ, tzach co naanxicoti, tzon̈ tevi dꞌayach, sco chaan co mulej dꞌayach, tzabꞌval co lesal. 38 Tato yedꞌ smasanil co cꞌool yedꞌ smasanil co pensar tzach co naxicoti, ayic ayon̈ ecꞌ dꞌa jun chon̈abꞌ bꞌaj icꞌbꞌilon̈bꞌat chiꞌ, tzon̈ lesalvicot dꞌa stojolal jun lum acꞌnac tic dꞌa ebꞌ co mam quicham yedꞌ jun chon̈abꞌ sicꞌbꞌilel uuj tic yedꞌ dꞌa stojolal jun templo ix in bꞌo tic, 39 tato icha chiꞌ, ato dꞌa satchaan̈ bꞌaj ayach eqꞌui, tzabꞌval co lesal, tzach och quedꞌoc yic tzon̈ meltzajxi, tzacꞌval nivancꞌolal co mul tzꞌoch chiꞌ dꞌayach.

40 Ach in Diosal, tza maclej val abꞌ lesal tzꞌochn̈ej dꞌayach dꞌa jun lugar tic.

41 Ach Jehová co Diosal, canan̈n̈ej cajan dꞌa jun lugar tic yedꞌ scaxail schꞌoxanel a poder. Mamin, coln̈ej ebꞌ sacerdote tzach acꞌan servil, axo ebꞌ icoꞌ, tzalajocabꞌ ebꞌ yuj a vachꞌcꞌolal. 42 Man̈ in a patiquejel a in rey in ix in a sicꞌcanel tic. Nacot bꞌaj a xajanejnac vin̈aj David a checabꞌ, xchi vin̈aj rey Salomón chiꞌ dꞌa Jehová.