7
Ayic ix lajvi slesalvi vin̈aj rey Salomón chiꞌ, ix cot cꞌacꞌ dꞌa satchaan̈, ix tzꞌabꞌat jun silabꞌ sn̈usjitzꞌa smasanil yedꞌ juntzan̈xo silabꞌ, ix bꞌudꞌjiel yol templo chiꞌ yuj stziquiquial Jehová. 2 Yuj chiꞌ majxo yal-laj yoch ebꞌ sacerdote dꞌa yool chiꞌ. 3 Ayic ix yilan jun cꞌacꞌ chiꞌ masanil ebꞌ israel yedꞌ stziquiquial Jehová ix emul dꞌa yibꞌan̈ jun templo chiꞌ, ix em cumnaj ebꞌ masanto ix emcꞌoch snan̈al sat ebꞌ dꞌa sat luum, ix lesalvi ebꞌ, ix yacꞌan yuj diosal ebꞌ dꞌa Jehová. Ix yalan ebꞌ icha tic: Yelxo te vachꞌ Dios, yujto tzon̈ xajanej dꞌa masanil tiempo, xchi ebꞌ.4 Ayic ix lajvi juntzan̈ chiꞌ, ix yacꞌan silabꞌ vin̈aj rey Salomón yedꞌ ebꞌ chon̈abꞌ chiꞌ dꞌa Jehová. 5 Ix yacꞌ 22 mil nocꞌ vacax ebꞌ yedꞌ 120 mil nocꞌ calnel silabꞌil.
Icha chiꞌ ix aj yacꞌancanoch jun templo chiꞌ ebꞌ dꞌa yol scꞌabꞌ Dios.
6 Lin̈anqꞌue masanil ebꞌ israel chiꞌ, axo ebꞌ sacerdote ayecꞌ ebꞌ dꞌa yedꞌtal bꞌaj ix cani, spuꞌan qꞌuen strompeta ebꞌ. Axo ebꞌ levita qꞌuelcꞌumbꞌa yaj ebꞌ yedꞌ ebꞌ sacerdote chiꞌ, van sbꞌitan ebꞌ yedꞌ juntzan̈ yamcꞌabꞌ bꞌobꞌilcan yuj vin̈aj rey David yic tzꞌoch ejmelal dꞌa Jehová. Van sbꞌitan ebꞌ icha tic: A Jehová, ayn̈ej svachꞌcꞌolal dꞌa masanil tiempo, xchi ebꞌ.
7 Ix yacꞌanpaxoch yopisio snan̈al amacꞌ vin̈aj Salomón chiꞌ, aton jun ay dꞌa yichan̈ stemplo Jehová chiꞌ, yic ataꞌ sn̈usjitzꞌa silabꞌ yedꞌ xepual nocꞌ silabꞌ yic juncꞌolal yedꞌ Dios, yujto a jun altar nabꞌa bronce ix schec vin̈ bꞌojoc, max yabꞌlaj yic sqꞌue nocꞌ silabꞌ chiꞌ dꞌa yibꞌan̈ yedꞌ ofrenda dꞌa tas svaji yedꞌ xepual nocꞌ nocꞌ chiꞌ.
8 A dꞌa jun tiempoal chiꞌ, a vin̈aj Salomón yedꞌ ebꞌ yetisraelal ix yacꞌoch qꞌuin̈ chinama ebꞌ dꞌa uqueꞌ cꞌual. Te nivan sbꞌisul ebꞌ, ix cotn̈ej ebꞌ bꞌaj tzꞌochcꞌoch bꞌe dꞌa Hamat dꞌa norte, masanto dꞌa aꞌ elumaꞌ yic Egipto dꞌa sur. 9 Uqueꞌ cꞌual ix yacꞌoch sqꞌuin̈al jun altar chiꞌ ebꞌ, axo dꞌa junxo uqueꞌ cꞌual, ix yacꞌanoch qꞌuin̈ chinama chiꞌ ebꞌ. Axo dꞌa jun slajvubꞌ cꞌual chiꞌ ix yacꞌanoch jun nivan qꞌuin̈ ebꞌ. 10 A dꞌa 23 yoch yuquil uj chiꞌ, ix spuclan sbꞌa vin̈aj rey Salomón chiꞌ yedꞌ masanil anima ayecꞌ chiꞌ. Ix lajvi chiꞌ ix paxcan ebꞌ dꞌa spat dꞌa tzalajcꞌolal. Ix te tzalaj ebꞌ yuj jantac tas vachꞌ acꞌbꞌil yuj Jehová dꞌa vin̈aj David, dꞌa vin̈aj Salomón chiꞌ yedꞌ dꞌa masanil chon̈abꞌ Israel.
Ix sbꞌo strato Dios yedꞌ vin̈aj Salomón
(1R 9.1-9)
11 Ayic toxo ix bꞌoel stemplo Jehová yuj vin̈aj rey Salomón chiꞌ yedꞌ spalacio vin̈ yedꞌ masanil tastac ix snaꞌ vin̈ to sbꞌochaji, 12 ix schꞌoxan sbꞌa Jehová dꞌa vin̈ dꞌacꞌvalil, ix yalan dꞌa vin̈ icha tic: Ix vabꞌ val a lesal, ix in sicꞌanpaxel jun lugar tic vicoc yic tzꞌoch in cajnubꞌoc bꞌaj stzꞌa silabꞌ dꞌayin. 13 Yuj chiꞌ, qꞌuinaloc svacꞌcot cꞌacꞌ, maxtzac yacꞌ n̈abꞌ, ma svacꞌcot nocꞌ cꞌulubꞌ scꞌuxanbꞌat avbꞌen, ma svacꞌcot junoc ilya dꞌa eyibꞌan̈ a ex in chon̈abꞌ ex tic, 14 tato a ex ojtacabꞌil to vic ex, tzex lesalvi dꞌayin, slajvi chiꞌ tzeyactancan e chuc bꞌeybꞌal chiꞌ, tato icha chiꞌ, svabꞌ e lesal chiꞌ dꞌa satchaan̈, svacꞌan nivancꞌolal e mul, svacꞌanxi tastac ay dꞌa e chon̈abꞌ chiꞌ. 15 A ticnaic yedꞌ yic ol bꞌeyn̈ejbꞌatoc, ol vabꞌn̈ej lesal ol och dꞌayin dꞌa jun templo tic, 16 yujto toxo ix in sicꞌcaneli yic tzꞌochcan vicoc. Ol in ajn̈ej cajan dꞌay, ol in tan̈vej. 17 A ticnaic jun, tato vachꞌn̈ej ol utej a bꞌa dꞌayin icha val yutejnac sbꞌa vin̈ a mam, tato ol a cꞌanabꞌajej in checnabꞌil yedꞌ masanil tas ix val dꞌayach, 18 ol vacꞌn̈ejelcꞌoch opisio tic, icha val in trato in bꞌonac yedꞌ vin̈ a mam chiꞌ, ayic valannac to ol ochn̈ej yin̈tilal vin̈ reyal dꞌa chon̈abꞌ Israel tic. 19 Palta tato a ex tic ol eyiqꞌuel e bꞌa dꞌayin, man̈ ol e cꞌanabꞌajej in cꞌaybꞌubꞌal yedꞌ in checnabꞌil ix vacꞌ dꞌayex, axo dꞌa juntzan̈ comon dios bꞌaj ol eyaqꞌuem e bꞌa, ol ex och pax ejmelal dꞌay, 20 ol ex viqꞌuel dꞌa sat lum luum vacꞌnac tic dꞌayex. A jun templo ix ochcan vicoc tic, ol vicꞌcanel dꞌa vichan̈, ol vacꞌan bꞌuchjoc yuj masanil nación. 21 A jun templo man̈xo jantacoc svachꞌil yilji tic, toxon̈ej ol qꞌuecan bꞌulan spojelal. Masanil mach ol ecꞌ dꞌa stzꞌey, ol te sat scꞌol ebꞌ yilani, ol scꞌanbꞌan ebꞌ, ¿tas yuj icha tic ix yutej jun chon̈abꞌ tic Jehová yedꞌ jun templo tic? xcham ebꞌ. 22 Axo ol aj yalji dꞌa ebꞌ: Icha tic ix aji yujto ix yactejcan Jehová sDiosal smam yicham ebꞌ, aton Dios icꞌjinaquelta ebꞌ dꞌa Egipto, axo juntzan̈ comon dios bꞌaj ix yaqꞌuem sbꞌa ebꞌ. Yuj val chiꞌ ix yacꞌcot jun nivan yaelal tic dꞌa yibꞌan̈ ebꞌ, xcham ebꞌ, xchi Jehová dꞌa vin̈aj Salomón chiꞌ.