Ix bꞌochaj templo yuj vin̈aj Salomón
3
Ix schael yich vin̈aj Salomón sbꞌoanqꞌue stemplo Jehová dꞌa Jerusalén, aton dꞌa span̈anil sjolom lum tzalan Moriah, bꞌaj ix schꞌox sbꞌa Jehová dꞌa vin̈aj David smam vin̈aj Salomón chiꞌ. A jun luum chiꞌ stecꞌlabꞌ trigo vin̈aj Ornán aj Jebús, manbꞌilcan lum yuj vin̈aj David chiꞌ yicoc stemplo Dios. 2 Ix schael yich munlajel chiꞌ dꞌa schabꞌil cꞌual yoch schabꞌil uj, ayic schan̈il abꞌil yoch vin̈aj Salomón chiꞌ reyal.3 A yechel yich templo ix schec vin̈aj Salomón acꞌchajemoc, aton tic: 27 metro scꞌatul, 9 metro yol schiquin. 4 Axo pax scorredoral, 9 metro paxi, lajan yedꞌ yol schiquin chiꞌ. Axo schaan̈il, 9 metro paxi. Ix acꞌjioch qꞌuen oro dꞌa sattac scorredoral chiꞌ. 5 Ix acꞌjioch te chemteꞌ dꞌa sattac yol templo chiꞌ, aton teꞌ tzicap. Ix lajvi chiꞌ ix acꞌjioch qꞌuen oro te vachꞌ dꞌa sattac teꞌ yedꞌ dꞌa yechel yochꞌbꞌiloch dꞌa teꞌ, aton yechel teꞌ palma yedꞌ yechel qꞌuen cadena. 6 Ix och qꞌuen qꞌueen te vachꞌ yilji yelvanubꞌoc templo chiꞌ. A qꞌuen oro ix scꞌan ebꞌ chiꞌ, aton qꞌuen scot dꞌa Parvaim. 7 Ix acꞌjioch qꞌuen oro dꞌa sattac teꞌ chemteꞌ dꞌa yool chiꞌ smasanil yedꞌ dꞌa spatzabꞌil yedꞌ dꞌa smarcoal puerta yedꞌ dꞌa spuertail chiꞌ. Ix och pax yechel querubín dꞌa sattac teꞌ chemteꞌ chiꞌ.
8 Ix schecan vin̈ macchaj jun cuarto dꞌa yol templo chiꞌ, aton jun cuarto Yicn̈ej Jehová Yaji. 9 metro ix ajcan chabꞌ spacꞌultac jun cuarto chiꞌ. Lajan yedꞌ yol schiquin templo chiꞌ, 9 metro pax ix aj chabꞌxo spacꞌultac. Ix acꞌjipaxoch oro te vachꞌ dꞌa sattac yool chiꞌ. 500 quintal qꞌuen oro ix och dꞌa sattac yool chiꞌ. 9 A qꞌuen lavux ix och dꞌa yool chiꞌ, 20 onza qꞌuen oro ix och dꞌa qꞌueen. Ix och pax qꞌuen oro dꞌa sattac yol juntzan̈ cuarto ay dꞌa chaan̈.
10 A dꞌa yol jun cuarto Yicn̈ej Dios yaj chiꞌ, ix schec bꞌojoc chabꞌ teꞌ yechel querubín vin̈aj Salomón chiꞌ, ix acꞌjioch qꞌuen oro dꞌa spatictac. 11-13 A slevanil yajel scꞌaxil chabꞌ yechel querubín chiꞌ, 9 metro, jen̈anel scꞌaxil junjun. Chabꞌ metro yedꞌ 25 centímetro junjun scꞌaxil chiꞌ. Scꞌoch jen̈an jun scꞌaxil junjun yechel chiꞌ dꞌa spacꞌultac yol cuarto chiꞌ, axo junjunxo scꞌaxil, schalaj sbꞌa dꞌa snan̈al. A juntzan̈ yechel querubín chiꞌ, lin̈jabꞌ elta, qꞌueljabꞌ elta dꞌa snan̈al yol templo chiꞌ. 14 Ix schecpax bꞌochaj jun cꞌapac cortina nabꞌa lino vin̈, ix och yechel querubín dꞌay yedꞌ an̈ chꞌal qꞌuicꞌmutzꞌinac, yaxmaquinac yedꞌ an̈ chacchac chꞌal.
A chabꞌ nivac oy
15 Ix schecanpax vin̈aj Salomón chiꞌ bꞌojoc chabꞌ nivac oy nabꞌa bronce, 16 metro ix aj steel junjun, ix och dꞌa sat templo chiꞌ. Axo jun ayqꞌue dꞌa schon junjun oy chiꞌ, 2 metro yedꞌ 25 centímetro spimal. 16 Ix bꞌo pax qꞌuen cadena, icha chimpa ix aji, ix och qꞌuen dꞌa spatictac schon oy chiꞌ. Ix bꞌo pax 100 yechel teꞌ granada, ix och dꞌa qꞌuen cadena chiꞌ. 17 Ix acꞌjioch juntzan̈ nivac oy chiꞌ dꞌa sat templo chiꞌ, jun dꞌa stojolal sur, junxo dꞌa stojolal norte. A jun dꞌa sur chiꞌ, Jaquín ix sbꞌiej, axo jun dꞌa norte chiꞌ, Boaz ix sbꞌiej.