3 Ix lajvi chiꞌ ix yalanbꞌat vin̈ dꞌa vin̈aj Hiram sreyal Tiro icha tic: ¿Tzam acꞌcot teꞌ cꞌuteꞌ dꞌayin icha ix a cꞌulej yedꞌ vin̈ in mam ayic ix sbꞌoanqꞌue spalacio vin̈ bꞌaj cajnajnac? 4 A ticnaic ol in bꞌoqꞌue jun templo bꞌaj ol on̈ och ejmelal dꞌa Jehová co Diosal a on̈ israel on̈ tic, yicn̈ej ol ajoc. Ataꞌ ol n̈uschajtzꞌa incienso sucꞌuqꞌui sjabꞌ yuj quicꞌanchaan̈ Jehová chiꞌ. Ol empax tzolan ixim pan dꞌa yichan̈. Ol n̈usjoc pax tzꞌa silabꞌ dꞌa qꞌuin̈ibꞌalil, dꞌa yemcꞌualil yedꞌ pax dꞌa scꞌual icꞌoj ip, dꞌa yic tzꞌalji qꞌuen uj yedꞌ dꞌa juntzan̈xo qꞌuin̈ tzꞌoch yuj quicꞌanchaan̈ Jehová co Diosal icha syal schecnabꞌil acꞌbꞌilcan dꞌayon̈ israel on̈ tic, yic sco cꞌanabꞌajej dꞌa masanil tiempo. 5 A jun templo ol in bꞌo chiꞌ, te nivan ol ajoc, yujto a co Diosal chiꞌ, yelxo ecꞌal snivanil yelcꞌoch dꞌa yichan̈ masanil juntzan̈ comon dios. 6 Palta jun, ¿tom ay junoc mach ol yal sbꞌoanqꞌue jun templo chiꞌ? Inatax satchaan̈ nivan, palta max yabꞌlaj bꞌaj tzꞌaj Dios chiꞌ. ¿Tas vaj a in tic, yuj chiꞌ ol in bꞌoqꞌue jun templo bꞌaj syal scajnaj Jehová chiꞌ? An̈ej am junoc lugar bꞌaj sn̈uschajtzꞌa incienso dꞌa yichan̈ syal in bꞌoani. 7 Yuj chiꞌ acꞌcot junoc vin̈ vinac yojtac val smunlaj dꞌa qꞌuen oro, dꞌa qꞌuen plata, dꞌa qꞌuen bronce yedꞌ dꞌa qꞌuen hierro yedꞌ dꞌa an̈ chꞌal qꞌuicꞌmutzꞌinac, yaxmaquinac yedꞌ chacchac, to syalpax sbꞌoanoch yechel yaln̈ej tastac vin̈. A vin̈ ol colvaj yedꞌ ebꞌ cꞌaybꞌabꞌil dꞌa juntzan̈ chiꞌ ay dꞌa Judá yedꞌ dꞌa Jerusalén tic, aton ebꞌ ix sicꞌchajcanoch yuj vin̈ in mam. 8 An̈ejtonaꞌ tzacꞌanpaxcot te teꞌ ay dꞌa Líbano dꞌayin, aton teꞌ cꞌuteꞌ, teꞌ tzicap yedꞌ teꞌ sándalo, yujto vojtac to a ebꞌ a munlajvum, te jelan ebꞌ dꞌa chꞌacoj teꞌ dꞌa Líbano chiꞌ. Axo ebꞌ in munlajvum tic, ol colvaj ebꞌ yedꞌ ebꞌ ic chiꞌ, 9 yic nivan teꞌ syaqꞌuel ebꞌ, yujto a jun templo ol in bꞌoqꞌue chiꞌ te nivan ol ajoc, satubꞌtac pax ol aj yilji. 10 Ol vacꞌbꞌat svael ebꞌ a munlajvum chiꞌ. Ol vacꞌbꞌat 60 mil quintaloc ixim trigo, an̈ejaꞌ icha chiꞌ pax ixim cebada. Ol vacꞌpaxbꞌat 110 mil galónoc vino, icha pax chiꞌ aceite, xchibꞌat vin̈aj Salomón chiꞌ.

11 Ix lajvi chiꞌ ix yacꞌancot jun chꞌan̈ carta vin̈aj Hiram sreyal Tiro chiꞌ dꞌa vin̈aj rey Salomón chiꞌ bꞌaj syal vin̈ icha tic: Ach rey Salomón, a Jehová ix ach acꞌanoch reyal dꞌa Israel chiꞌ, yujto te xajan schon̈abꞌ chiꞌ yuuj. 12 Yuj chiꞌ, alchajocabꞌ vachꞌ lolonel dꞌa Jehová e Diosal, aton bꞌoannac satchaan̈ yedꞌ sat luum tic, yujto ach yacꞌoch reyal sqꞌuexuloc vin̈aj rey David a mam. Te n̈ican ach, te cꞌaybꞌabꞌil ach dꞌa jelanil, a ach ol a bꞌoqꞌue jun stemplo Jehová chiꞌ yedꞌ a palacio bꞌaj ol ach ajoc. 13 A ticnaic svacꞌbꞌat jun vin̈ vinac te jelan spensar, te yojtac pax vin̈, aton vin̈aj Hiram-abi. 14 A jun vin̈ tic, yuneꞌ vin̈ jun ix ix yin̈tilal Dan, axo vin̈ smam vin̈, aj chon̈abꞌ Tiro vin̈. A jun vin̈ tic, yojtac val vin̈ smunlaj dꞌa qꞌuen oro, dꞌa qꞌuen plata, dꞌa qꞌuen bronce, dꞌa qꞌuen hierro yedꞌ dꞌa qꞌuen qꞌueen. Syal pax smunlaj vin̈ dꞌa te teꞌ, dꞌa an̈ chꞌal qꞌuicꞌmutzꞌinac, yaxmaquinac yedꞌ dꞌa an̈ chacchac chꞌal yedꞌ dꞌa an̈ lino. Te jelan vin̈ sbꞌoanoch yechel yaln̈ej tastac. Syal snaanel vin̈ tas tzꞌaj junoc munlajel, yaln̈ej tas scꞌanchaj dꞌay. Ol munlaj vin̈ yedꞌ ebꞌ a munlajvum jelan, aton ebꞌ smunlajtaxon yedꞌ vin̈ a mam, vin̈ te xajan vuuj. 15 Yuj chiꞌ svalaꞌ: Acꞌcot ixim trigo chiꞌ dꞌayon̈, ixim cebada, aceite yedꞌ vino ix alaꞌ to ol acꞌ chiꞌ. 16 Yacbꞌan chiꞌ, a on̈ tic ol caqꞌuel te teꞌ dꞌa Líbano tic. Jantac teꞌ ol a cꞌanaꞌ, junn̈ej ol cutej teꞌ, ol quicꞌanbꞌat teꞌ dꞌa yibꞌan̈ aꞌ mar, masanto ol cꞌoch teꞌ dꞌa Jope. Axo ebꞌ a munlajvum ol icꞌanbꞌat teꞌ dꞌa Jerusalén, xchicot vin̈aj Hiram sreyal Tiro chiꞌ.

17 Ix lajvi chiꞌ, ix yicꞌanchaan̈ sbꞌisul masanil ebꞌ chꞌoc chon̈abꞌil cajan dꞌa chon̈abꞌ Israel vin̈aj Salomón chiꞌ, chꞌoc pax bꞌischajnac ebꞌ yuj vin̈aj rey David. A sbꞌisul ebꞌ, 153 mil 600 dꞌa smasanil. 18 Ix acꞌjioch 70 mil ebꞌ cuchoj icatz, 80 mil pax ebꞌ ix och tzeyoj qꞌueen dꞌa tzalquixtac, axo 3 mil 600 xo ebꞌ ix och yil ebꞌ smunlaj chiꞌ.