3 A dꞌa jun cꞌu chiꞌ, ix yal vin̈ schecabꞌ Dios chiꞌ tas ol ujoc yic schꞌoxaneli to schecabꞌ Jehová yaj vin̈. Ix yalan vin̈ icha tic: A jun altar tic ol pojbꞌatoc, axo qꞌuen taan̈ ayecꞌ dꞌa yibꞌan̈ tic, ol tobꞌcanbꞌat qꞌueen, xchi Jehová, xchi vin̈.

4 Ayecꞌ vin̈aj rey Jeroboam dꞌa stzꞌey altar chiꞌ, ayic ix yabꞌan vin̈ masanil tas ix yal vin̈ schecabꞌ Dios yuj jun altar chiꞌ, ix yacꞌanbꞌat jecan scꞌabꞌ vin̈ schꞌoxan vin̈ schecabꞌ Dios chiꞌ, ix yalan vin̈: Yamec jun vin̈ tic, xchi vin̈. Palta a scꞌabꞌ vin̈ ix bꞌat jecan chiꞌ, ix tzatzbꞌicanel lian, majxo yal-laj spacan sbꞌa. 5 A val dꞌa jun rato chiꞌ ix pojbꞌat jun altar chiꞌ, axo jantac qꞌuen taan̈ ay dꞌa yibꞌan̈, ix tobꞌcanbꞌat qꞌueen. Ix elcꞌoch icha ix schec Jehová yal vin̈ schecabꞌ chiꞌ. 6 Yuj chiꞌ ix yal vin̈ rey chiꞌ dꞌa vin̈ schecabꞌ Dios chiꞌ:

Sval dꞌayach to tzach tevi dꞌa Jehová a Diosal vuuj, yic sbꞌoxican in cꞌabꞌ tic, xchi vin̈.

Yuj chiꞌ ix lesalvi vin̈ checabꞌ chiꞌ dꞌa Jehová, ix bꞌoxican scꞌabꞌ vin̈ rey chiꞌ ichataxon yaji. 7 Ix lajvi chiꞌ, ix yalan vin̈ rey chiꞌ dꞌa vin̈ schecabꞌ Dios chiꞌ:

—Con̈ vedꞌ dꞌa in pat, ol ach va jabꞌoc yacbꞌan tzin bꞌo jabꞌoc tas ol in siej dꞌayach, xchi vin̈.

8 Palta ix tacꞌvi vin̈ schecabꞌ Dios chiꞌ dꞌa vin̈ icha tic:

—Vachꞌchom nan̈al tas ay dꞌayach tzacꞌ dꞌayin, man̈ ol in bꞌatlaj edꞌoc, max yalpax in vaꞌi, ma vucꞌan a aꞌ dꞌa jun lugar tic. 9 Yujto a Jehová ix alan dꞌayin icha tic: Malaj jabꞌoc tas ol a vaꞌa, man̈ ol uqꞌuejpax jabꞌoc a aꞌ, man̈ ol ach meltzaj dꞌa bꞌe bꞌaj ol ach bꞌatoc, xchi dꞌayin, xchi vin̈ checabꞌ chiꞌ.

10 Chꞌocxo jun bꞌe bꞌaj ix meltzaj vin̈ schecabꞌ Dios chiꞌ, man̈xooclaj dꞌa jun bꞌe bꞌaj ix cꞌoch vin̈ dꞌa Betel chiꞌ.

11 A dꞌa jun tiempoal chiꞌ ay jun vin̈ schecabꞌ Dios te icham vinacxo cajan dꞌa Betel chiꞌ. A ebꞌ yuninal vin̈ ix alan dꞌay tas ix scꞌulej vin̈ schecabꞌ Dios dꞌa Betel dꞌa jun cꞌu chiꞌ, aton vin̈ ix cot dꞌa Judá. Ix yalanpax ebꞌ dꞌa vin̈ smam chiꞌ tas ix yal vin̈ checabꞌ chiꞌ dꞌa vin̈ rey chiꞌ. 12 Ix scꞌanbꞌan vin̈ icham chiꞌ dꞌa ebꞌ yuninal chiꞌ icha tic:

—¿Tas bꞌeal bꞌaj ix bꞌat vin̈ schecabꞌ Dios chiꞌ? xchi vin̈.

Ix yalan ebꞌ vin̈ bꞌaja bꞌe bꞌaj ix bꞌat vin̈ chiꞌ. 13 Ix yalan vin̈ dꞌa ebꞌ vin̈ yuninal chiꞌ:

—Aqꞌuecoch stzꞌum nocꞌ in bꞌuru, xchi vin̈.

Ix lajvi yoch stzꞌum nocꞌ yuj ebꞌ, ix qꞌue vin̈ dꞌa yibꞌan̈ nocꞌ, 14 ix bꞌat tzacꞌan vin̈ dꞌa spatic vin̈ schecabꞌ Dios aj Judá chiꞌ. Ix cꞌoch vin̈ dꞌa spatic vin̈ ayic cꞌojanem vin̈ dꞌa yich jun teꞌ machꞌ, ix scꞌanbꞌan vin̈ dꞌa vin̈:

—¿Tom a ach tic schecabꞌ ach Dios ach cot dꞌa Judá? xchi vin̈.

—A in toni, xchi.

15 —Con̈ vedꞌ vaꞌel dꞌa in pat, xchi vin̈ icham vinac chiꞌ.

16 Ix tacꞌvi vin̈ schecabꞌ Dios chiꞌ: Max yal-laj in bꞌati yic tzin va edꞌoc, ma vucꞌan aꞌ edꞌ dꞌa jun lugar tic. 17 Yujto icha tic ix aj yalan Jehová dꞌayin: Malaj jabꞌoc tas ol a vaꞌa, man̈ ol uqꞌuejpax jabꞌoc a aꞌ, man̈ ol ach meltzaj dꞌa bꞌe bꞌaj ol ach bꞌatoc, xchi dꞌayin, xchi vin̈.

18 Palta ix yalanxi vin̈ icham vinac chiꞌ dꞌa vin̈ icha tic:

—A in tic schecabꞌ in pax Dios icha ach tic. A jun yángel Jehová ix alan dꞌayin to tzach vicꞌbꞌat vaꞌel dꞌa in pat, svacꞌanpax aꞌ uqꞌuej, xchi vin̈.

Palta ton̈ej ix yesej vin̈ icham vinac chiꞌ dꞌa vin̈. 19 Yuj chiꞌ ix bꞌat vin̈ schecabꞌ Dios chiꞌ yedꞌ vin̈ icham vinac chiꞌ dꞌa spat, ix va vin̈, ix yucꞌan aꞌ vin̈. 20 Vanto sva ebꞌ vin̈, ix lolon Jehová dꞌa vin̈ schecabꞌ icham vinacxo chiꞌ, ix yalani:

21 —Ix a pitej a bꞌa, maj a cꞌanabꞌajej tas ix yal Jehová dꞌayach, 22 yujto ix ach meltzaji, ix ach vaꞌi, ix ucꞌanpax aꞌ dꞌa jun lugar bꞌaj ix yal Jehová to max yal-laj. Yuj chiꞌ jun, man̈ ol mucchaj a nivanil bꞌaj mucan ebꞌ a mam icham, xchi vin̈ icham vinac chiꞌ dꞌa vin̈.

23 Ayic ix lajvi svaꞌi yedꞌ yucꞌan aꞌ vin̈ schecabꞌ Dios ix cot dꞌa Judá chiꞌ, ix yacꞌanoch stzꞌuum jun nocꞌ sbꞌuru vin̈ icham vinac chiꞌ, ix yacꞌan nocꞌ vin̈ dꞌa vin̈ schecabꞌ Dios chiꞌ. 24 Ix pax vin̈ schecabꞌ Dios chiꞌ, palta axo dꞌa yol bꞌe ix elta jun nocꞌ choj dꞌa vin̈, ix miljicham vin̈ yuj nocꞌ. Ataꞌ ix can telan snivanil vin̈, axo nocꞌ bꞌuru yedꞌ nocꞌ choj chiꞌ, ayecꞌ nocꞌ dꞌa stzꞌey snivanil vin̈ chiꞌ. 25 Ay juntzan̈ ebꞌ vin̈ vinac ix ecꞌ taꞌ, ix yilan ebꞌ vin̈ to telanecꞌ snivanil jun chamnac dꞌa yol bꞌe chiꞌ, axo nocꞌ choj chiꞌ ayecꞌ nocꞌ dꞌa stzꞌey. Ix bꞌat ebꞌ vin̈ bꞌaj cajan vin̈ icham vinac schecabꞌ Dios chiꞌ, ix yalan ebꞌ vin̈ tas ix yil ebꞌ vin̈ dꞌa yol bꞌe chiꞌ. 26 Ayic ix yabꞌan vin̈ icham vinac chiꞌ, vin̈ ix bꞌat icꞌan meltzaj vin̈ schecabꞌ Dios dꞌa yol bꞌe chiꞌ, ix yalan vin̈: Aton vin̈ schecabꞌ Dios maj cꞌanabꞌajan tas ix yal Dios chiꞌ, yuj chiꞌ ix acꞌjioch vin̈ dꞌa yol scꞌabꞌ nocꞌ choj chiꞌ, ix tzilchitajbꞌat vin̈ yuj nocꞌ, icha ix aj yalan Jehová, xchi vin̈.

27 Ix yalan vin̈ dꞌa ebꞌ yuninal to syacꞌoch stzꞌuum junoc nocꞌ bꞌuru ebꞌ. Ix yacꞌanoch stzꞌuum nocꞌ ebꞌ. 28 Ix bꞌat vin̈ icham vinac chiꞌ, ix cꞌoch vin̈ bꞌaj telan ecꞌ snivanil vin̈ schecabꞌ Dios chiꞌ dꞌa yol bꞌe chiꞌ. A nocꞌ bꞌuru yedꞌ nocꞌ choj chiꞌ, ayecꞌ nocꞌ dꞌa stzꞌey snivanil vin̈ chiꞌ. Mantalaj jabꞌoc snivanil vin̈ schi nocꞌ choj chiꞌ, malaj pax ix utaj nocꞌ bꞌuru chiꞌ yuj nocꞌ. 29 Ix lajvi chiꞌ, ix yicꞌanqꞌue vaan snivanil vin̈ schecabꞌ Dios aj Judá vin̈ icham vinac chiꞌ. Ix yacꞌanqꞌue vin̈ dꞌa yibꞌan̈ nocꞌ sbꞌuru chiꞌ, ix yicꞌanbꞌat vin̈ dꞌa schon̈abꞌ chiꞌ, yic tzꞌoch vin̈ dꞌa cuscꞌolal yuuj, yic smucanpax vin̈. 30 A bꞌaj ijan ix mucji vin̈ icham chiꞌ, ataꞌ ix yacꞌoch snivanil vin̈ schecabꞌ Dios chiꞌ vin̈. Ix te cus vin̈ yedꞌ ebꞌ vin̈ yuninal, ix yalan ebꞌ: Ay, ach cucꞌtac, obꞌiltac ach, xchi ebꞌ vin̈.

31 Ayic toxo ix lajvi yacꞌancanoch snivanil vin̈ chiꞌ vin̈ icham chiꞌ, ix yalan vin̈ dꞌa ebꞌ yuninal chiꞌ:

—Ayic ol in chamoc, ol eyacꞌoch in nivanil bꞌaj ix ochcan snivanil vin̈ schecabꞌ Dios tic, junn̈ej tzeyutejcanoch in nivanil tic yedꞌoc. 32 Yujto yovalil ol elcꞌoch tas ix schec Jehová yal vin̈ dꞌa jun altar dꞌa Betel tic yedꞌ dꞌa juntzan̈ lugar chaan̈ ay dꞌa yol yic Samaria tic, aton bꞌaj syaqꞌuem sbꞌa ebꞌ anima, xchi vin̈.

33 Vachꞌchom ix uji juntzan̈ chiꞌ, palta a vin̈aj rey Jeroboam chiꞌ, maj yactejcan masanil schuc bꞌeybꞌal vin̈, ix yacꞌn̈ejoch ebꞌ comon anima vin̈ sacerdoteal dꞌa juntzan̈ comon dios dꞌa juntzan̈ lugar chaan̈. Yaln̈ej mach snibꞌej vin̈ tzꞌoch sacerdoteal, syacꞌn̈ejoch yopisio ebꞌ vin̈ dꞌa juntzan̈ lugar chiꞌ. 34 Ichaton chiꞌ ix aj yochn̈ej smul vin̈aj Jeroboam yedꞌ ebꞌ yin̈tilal, yuj chiꞌ ix satel ebꞌ smasanil.