Ix yal vin̈aj Ahías to ol satel vin̈aj Jeroboam
14
A dꞌa jun tiempoal chiꞌ, ix ilyaan vin̈aj Abías yuninal vin̈aj Jeroboam. 2 Ix yalan vin̈aj Jeroboam chiꞌ dꞌa ix yetbꞌeyum icha tic:—A ticnaic ixic dꞌa Silo. Ataꞌ cajan vin̈aj Ahías, vin̈ schecabꞌ Dios, aton vin̈ aljinac to a in ol in ochcan reyal dꞌa jun chon̈abꞌ tic. Qꞌuexel a pichul yic vachꞌ malaj mach ol naanoc to vetbꞌeyum ach. 3 Icꞌbꞌat lajun̈eoc ixim nivac pan yedꞌ juntzan̈ ixim cꞌoxox pan yedꞌ junoc xalu yal chabꞌ. Ixic, cꞌanbꞌej dꞌa vin̈ yic syalan vin̈ dꞌayach tas ol aj vin̈ unin tic, xchi vin̈ dꞌa ix.
4 Icha chiꞌ ix yutej sbꞌa ix. Ix sqꞌuexel spichul ix, ix bꞌat ix dꞌa Silo chiꞌ. Ix cꞌoch ix dꞌa spat vin̈aj Ahías chiꞌ. A vin̈aj Ahías chiꞌ, maxtzac yal-laj yilan vin̈, te icham vinacxo vin̈. 5 Palta toxo ix yal Jehová dꞌa vin̈ to ol cꞌoch ix yetbꞌeyum vin̈aj Jeroboam scꞌanbꞌej yuj jun yuneꞌ chuc scꞌool. Ix yalanpax Jehová dꞌa vin̈ tas ol yutoc vin̈ yalan dꞌa ix. Ix acꞌji yojtaquejel vin̈ to ol sqꞌuexel sbꞌa ix.
6 Ayic ix yabꞌan vin̈ scꞌan̈ scꞌoch ix dꞌa tiꞌ pat, ix yalan vin̈:
—Ach yetbꞌeyum vin̈aj Jeroboam, ochan̈, ¿tas yuj ix a qꞌuexel a bꞌa? Te cuscꞌolal tas ix checji val dꞌayach. 7 Yuj chiꞌ meltzajan̈, al dꞌa vin̈ etbꞌeyum chiꞌ to a Jehová co Diosal tzꞌalan dꞌa vin̈ icha tic: Ix ach in siqꞌuelta dꞌa scal ebꞌ chon̈abꞌ, ix ach vacꞌanoch yajalil dꞌa yibꞌan̈ ebꞌ. 8 A in ix viqꞌuecꞌ yopisio ebꞌ yin̈tilal vin̈aj David, ix vacꞌan dꞌayach, palta man̈ ichoc yutejnac sbꞌa vin̈ in checabꞌ aj David chiꞌ tzutej a bꞌa. Scꞌanabꞌajejnac in checnabꞌil vin̈ yedꞌ smasanil scꞌool, a masanil tas scꞌulejnac vin̈, vachꞌn̈ej dꞌa vichan̈. 9 Palta a achxo pax tic, yelxo val te chuc tas tza cꞌulej dꞌa yichan̈ juntzan̈xo ebꞌ yajal ecꞌnac ayic mantzac ach ochi. A ach tic ix a tzuntzej val cot voval, ix a bꞌo juntzan̈ qꞌuen qꞌueen a diosaloc, ix in a paticaneli. 10 Yuj chiꞌ ol vacꞌcot yaelal dꞌa yibꞌan̈ ebꞌ in̈tilal. Ol in satel masanil ebꞌ vinac dꞌa scal in̈tilal dꞌa scal ebꞌ israel tic, vachꞌchom checabꞌ yaji, ma yic sbꞌa, man̈xa junoc ol canoc. Pilan ol in satel in̈tilal chiꞌ, icha tzꞌaj sn̈usjitzꞌa stzaꞌ nocꞌ nocꞌ. 11 A ebꞌ ol cham dꞌa yol chon̈abꞌ, a nocꞌ tzꞌiꞌ ol chianbꞌat ebꞌ. Axo ebꞌ ol cham dꞌa spatictaquel chon̈abꞌ chiꞌ jun, a nocꞌ ostoc ol chianbꞌat ebꞌ, xchi Jehová.
12 A achxo pax tic ach ix, paxan̈ dꞌa a pat. An̈ej yic ol ach ochcꞌoch tecꞌnaj dꞌa yol stiꞌ a chon̈abꞌ ol cham vin̈ unin chiꞌ. 13 Axo masanil ebꞌ israel, ol cus ebꞌ yuj vin̈, ol smucan vin̈ ebꞌ, an̈ej val jun yin̈tilal vin̈aj Jeroboam chiꞌ ol mucjoc, yujto an̈ej jun chiꞌ vachꞌtac val dꞌa yichan̈ Jehová co Diosal dꞌa scal ebꞌ yin̈tilal vin̈. 14 Ato yic bꞌaqꞌuin̈ ol yacꞌanxioch Jehová junocxo rey dꞌa co cal tic, aꞌ ol satanel masanil yin̈tilal vin̈aj Jeroboam dꞌa jun cꞌual chiꞌ. 15 Ol on̈ tzicubꞌtan̈aj a on̈ israel on̈ tic yuj Jehová, icha val tzꞌaj stzicubꞌtan̈aj teꞌ velecꞌ yuj a aꞌ. Ol on̈ icꞌjoquel dꞌa jun lum luum man̈ jantacoc svachꞌil acꞌbꞌil tic dꞌa ebꞌ co mam quicham. Ichato ol on̈ yumjoccanbꞌat dꞌa scꞌaxepalbꞌat aꞌ Éufrates, yujto ix co bꞌo yechel jun comon dios scuchan Asera. Yuj chiꞌ sco tzuntzejcot yoval scꞌol Jehová dꞌa quibꞌan̈. 16 A Jehová ol on̈ acꞌanbꞌat dꞌa yol scꞌabꞌ junxo nación yujn̈ej smul vin̈aj Jeroboam syacꞌoch chiꞌ. A vin̈ scuchbꞌanbꞌat co chon̈abꞌ tic dꞌa chucal, xchi vin̈aj Ahías chiꞌ dꞌa ix.
17 Ix lajvi chiꞌ ix pax ix yetbꞌeyum vin̈aj Jeroboam chiꞌ, ix cꞌoch ix dꞌa Tirsa. A val yochcꞌoch ix dꞌa yol stiꞌ spat, ix cham vin̈ unin chiꞌ. 18 Masanil ebꞌ israel ix mucan vin̈, ix och ebꞌ dꞌa cuscꞌolal yuj vin̈ icha ix aj yalan Jehová dꞌa vin̈aj Ahías schecabꞌ.
19 A juntzan̈xo yabꞌixal vin̈aj rey Jeroboam, ayic ix yacꞌan oval vin̈ yedꞌ juntzan̈xo tas ix scꞌulej vin̈ dꞌa yol stiempoal, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 20 A vin̈aj Jeroboam chiꞌ, 22 abꞌil ix yacꞌ reyal vin̈. Axo yic ix cham vin̈, a jun vin̈ yuninal vin̈ scuchan Nadab ix ochcan reyal sqꞌuexuloc.
Ochnac vin̈aj Roboam reyal dꞌa Judá
21 A dꞌa Judá ix yacꞌ reyal vin̈aj Roboam yuninal vin̈aj Salomón. 41 abꞌil sqꞌuinal vin̈ ayic ix och vin̈ reyal chiꞌ. 17 abꞌil ix yacꞌ reyal chiꞌ vin̈ dꞌa Jerusalén, aton val jun chon̈abꞌ chiꞌ ix siqꞌuel Jehová dꞌa scal masanil chon̈abꞌ dꞌa yol yic Israel yic tzꞌoch ejmelal dꞌay taꞌ. Naama sbꞌi ix snun vin̈, amonita ix.
22 A vin̈aj Roboam chiꞌ yedꞌ ebꞌ aj Judá, te chuc tas ix scꞌulej ebꞌ dꞌa yichan̈ Jehová. Ix ste tzuntzejcot yoval scꞌol Jehová ebꞌ dꞌa yichan̈ tas scꞌulejnac ebꞌ smam yicham ebꞌ, 23 yujto ix laj sbꞌoxi juntzan̈ lugar chaan̈ ebꞌ, aton bꞌaj tzꞌoch ebꞌ ejmelal yedꞌ pax dꞌa yichtac te teꞌ cꞌayum xiil. Ix laj sbꞌoanpaxqꞌue qꞌuen qꞌueen ebꞌ yechel comon dios Asera. 24 Ay pax ebꞌ vin̈ vinac ix cꞌulan ajmulal yedꞌ yetvinaquil yic tzꞌoch ebꞌ ejmelal dꞌa scomon diosal chiꞌ. Ix sbꞌeybꞌalej ajmulal ebꞌ te yajbꞌentac, icha scꞌulejnac ebꞌ chꞌoc chon̈abꞌil yicꞌnaquel Jehová dꞌa yichan̈ ebꞌ israel chiꞌ.
25 Ayic yoilxo abꞌil yoch vin̈aj Roboam chiꞌ reyal, ix javi vin̈aj Sisac sreyal Egipto yacꞌ oval dꞌa Jerusalén. 26 Ix yicꞌanbꞌat masanil bꞌeyumal vin̈ ay dꞌa stemplo Jehová, masanil bꞌeyumal ay dꞌa spalacio vin̈ rey yedꞌ masanil juntzan̈ qꞌuen maclabꞌ jul-labꞌ nabꞌa oro bꞌobꞌilcan yuj vin̈aj Salomón. 27 Ix lajvi chiꞌ, axo qꞌuen bronce ix schec bꞌojoc vin̈aj Roboam chiꞌ sqꞌuexuloc juntzan̈ maclabꞌ jul-labꞌ nabꞌa oro chiꞌ, ix yacꞌancan vin̈ dꞌa ebꞌ yajalil ebꞌ soldado ayoch stan̈vumaloc stiꞌ spalacio vin̈. 28 Juntaquel sbꞌat vin̈ rey chiꞌ dꞌa stemplo Jehová, a ebꞌ soldado chiꞌ, syicꞌbꞌat qꞌuen maclabꞌ jul-labꞌ chiꞌ ebꞌ, axo smeltzajxi ebꞌ syacꞌanxican qꞌuen ebꞌ dꞌa yedꞌtal.
29 A yabꞌixal juntzan̈xo tas scꞌulejnac vin̈aj Roboam chiꞌ, tzꞌibꞌabꞌilcan bꞌaj aycan yabꞌixal masanil ebꞌ vin̈ sreyal Judá.