5 A jantacto yabꞌixal vin̈aj Baasa chiꞌ yedꞌ jantac oval ix yacꞌ ganar vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 6 Axo yic ix cham vin̈, ix mucji vin̈ dꞌa Tirsa, axo jun vin̈ yuninal vin̈ scuchan Ela ix ochcan reyal sqꞌuexuloc.

7 Ix yalanxi Jehová dꞌa vin̈aj Jehú schecabꞌ, aton vin̈ yuninal vin̈aj Hanani, tastac yaelal ol javoc dꞌa yibꞌan̈ vin̈aj Baasa yedꞌ ebꞌ yin̈tilal yedꞌ scꞌabꞌ yoc, yujto te chuc tas ix scꞌulej vin̈ dꞌa yichan̈ Jehová. Yuj chiꞌ ix stzuntzejcot yoval scꞌol Jehová chiꞌ vin̈, icha scꞌulejnac vin̈aj Jeroboam. Ix cotpax yaelal dꞌa yibꞌan̈ vin̈ yujto ix satel yin̈tilal vin̈aj Jeroboam chiꞌ vin̈.

8 Ayic 26 abꞌilxo yoch vin̈aj Asa reyal dꞌa Judá, ix schaanel yich vin̈aj Ela yuninal vin̈aj Baasa yacꞌan reyal dꞌa Israel dꞌa chon̈abꞌ Tirsa. Chabꞌ abꞌil ix yacꞌ reyal chiꞌ vin̈. 9 Ay jun vin̈ Zimri sbꞌi, yajal vin̈ dꞌa nan̈al ebꞌ soldado tzꞌecꞌ yedꞌ carruaje yic oval, a vin̈ ix och ajcꞌolal dꞌa vin̈aj Ela chiꞌ. Ay jun cꞌual ayecꞌ vin̈aj Ela chiꞌ dꞌa Tirsa, dꞌa spat vin̈aj Arsa, vin̈ tzꞌilan spalacio vin̈ rey. Axo ix aji, ix yucꞌ an̈ vin̈ rey chiꞌ, ix qꞌue an̈ dꞌa sjolom vin̈. 10 Elan̈chamel ix cꞌoch vin̈aj Zimri chiꞌ, ix smilancham vin̈ rey chiꞌ vin̈, axo vin̈ ix ochcan reyal sqꞌuexuloc vin̈. Ix uji jun tic ayic 27 abꞌilxo yoch vin̈aj Asa reyal dꞌa Judá.

11 An̈ej val yic ix och vin̈aj Zimri chiꞌ reyal, ix smilancham masanil yin̈tilal vin̈aj Baasa chiꞌ vin̈. Man̈xa junoc vinac ix cani, man̈xa pax junoc scꞌabꞌ yoc vin̈, ma junoc yamigo vin̈ ix cani. 12 Icha val chiꞌ ix aj satel masanil yin̈tilal vin̈aj Baasa chiꞌ, icha val ix aj yalan Jehová dꞌa vin̈aj Jehú yuj vin̈aj Baasa chiꞌ. 13 A tas ix scꞌulej vin̈aj Baasa chiꞌ yedꞌ vin̈aj Ela yuninal vin̈, ix och smul ebꞌ vin̈ yuj scuchbꞌanbꞌat ebꞌ israel yic tzꞌoch ebꞌ ejmelal dꞌa juntzan̈ comon dios. Yuj chiꞌ ix stzuntzejcot yoval scꞌool Jehová ebꞌ.

14 A jantacto yabꞌixal vin̈aj Ela chiꞌ yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.

15 Ayic 27 abꞌilxo yoch vin̈aj Asa reyal dꞌa Judá, ix schaanel yich vin̈aj Zimri yacꞌan reyal dꞌa Tirsa, palta uquen̈ej cꞌual ix yacꞌ reyal chiꞌ vin̈. A dꞌa juntzan̈ cꞌual chiꞌ ayecꞌ ebꞌ soldado yic Israel yacꞌ oval dꞌa Gibetón dꞌa yol yic ebꞌ filisteo. 16 Axo yic ix yabꞌan ebꞌ soldado chiꞌ to ix miljicham vin̈ rey yuj vin̈aj Zimri, yuj chiꞌ val dꞌa jun cꞌu chiꞌ ix yacꞌanoch vin̈aj Omri ebꞌ sreyaloc, aton vin̈ yajalil ebꞌ. 17 Yuj chiꞌ ix yactej vin̈aj Omri chiꞌ yacꞌan oval yedꞌ ebꞌ soldado dꞌa Gibetón chiꞌ, axo dꞌa chon̈abꞌ Tirsa ix cꞌoch ebꞌ yacꞌ oval.

18 Axo ix yilan vin̈aj Zimri chiꞌ to van yacꞌji ganar jun chon̈abꞌ chiꞌ, ix och vin̈ dꞌa yol scuartel dꞌa yol spalacio, ix yacꞌanoch scꞌacꞌal vin̈. Icha chiꞌ ix aj scham vin̈. 19 Icha chiꞌ ix aji yujto te chuc tas ix scꞌulej vin̈ dꞌa yichan̈ Jehová, to a val sbꞌeybꞌal vin̈aj Jeroboam vin̈ cuchbꞌannacbꞌat ebꞌ yetisraelal dꞌa chucal, a ix sbꞌeybꞌalej vin̈.

20 A jantacto yabꞌixal vin̈aj Zimri chiꞌ yedꞌ tas ix snachaan̈ vin̈ dꞌa spatic vin̈aj Ela, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel.

21 Ix spoj sbꞌa chon̈abꞌ Israel, cha poj ix aj ebꞌ: Jun macan̈ ebꞌ, a vin̈aj Tibni yuninal vin̈aj Ginat snibꞌej ebꞌ tzꞌoch reyal. Axo junxo macan̈ ebꞌ, ix can ebꞌ yedꞌ vin̈aj Omri. 22 Axo ix aji, a ebꞌ ix can yedꞌ vin̈aj Omri chiꞌ, más jelan ebꞌ dꞌa yichan̈ ebꞌ ix och yedꞌ vin̈aj Tibni chiꞌ, yuj chiꞌ ix miljicham vin̈aj Tibni chiꞌ yuj ebꞌ, axo vin̈aj Omri chiꞌ ix ochcan reyal.

23 Ayic 31 abꞌilxo yoch vin̈aj Asa reyal dꞌa Judá, ix schaanel yich vin̈aj Omri chiꞌ yacꞌan reyal dꞌa Israel. 12 abꞌil ix yacꞌ reyal vin̈, vaqueꞌ abꞌil ix ecꞌ vin̈ dꞌa Tirsa. 24 Ix lajvi chiꞌ ix smanan jun lum tzalan vin̈ dꞌa Samaria dꞌa vin̈aj Semer. Nan̈al schabꞌil quintal qꞌuen plata ix yacꞌ vin̈ stojoloc luum. Axo taꞌ ix sbꞌoqꞌue jun chon̈abꞌ vin̈, Samaria ix yacꞌ vin̈ sbꞌiej, yujto Semer sbꞌi vin̈ bꞌaj ix sman lum luum chiꞌ vin̈.

25 A tas ix scꞌulej vin̈aj Omri chiꞌ, te chuc dꞌa yichan̈ Jehová, ecꞌbꞌal schucal dꞌa yichan̈ juntzan̈xo ebꞌ vin̈ rey ecꞌnac. 26 Ix sbꞌeybꞌalej sbꞌeybꞌal vin̈aj Jeroboam yuninal vin̈aj Nabat vin̈, vin̈ cuchbꞌannacbꞌat ebꞌ yetisraelal dꞌa chucal yic tzꞌoch ebꞌ ejmelal dꞌa juntzan̈ comon dios, yuj chiꞌ stzuntzejnaccot yoval scꞌool Jehová Dios ebꞌ.

27 A jantacto yabꞌixal vin̈aj Omri yedꞌ tas ix scꞌulej yedꞌ tastac ix yacꞌ ganar vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 28 Ayic ix cham vin̈, ix mucji vin̈ dꞌa Samaria, axo jun vin̈ yuninal vin̈ scuchan Acab ix ochcan reyal sqꞌuexuloc.

29 Ayxo 38 abꞌil yoch vin̈aj Asa reyal dꞌa Judá, ayic ix och vin̈aj Acab yuninal vin̈aj Omri reyal dꞌa Israel. 22 abꞌil ix yacꞌ reyal vin̈ dꞌa chon̈abꞌ Samaria. 30 Te chuc tas ix scꞌulej vin̈ dꞌa yichan̈ Jehová, ecꞌbꞌal chucal ix scꞌulej vin̈ dꞌa yichan̈ juntzan̈xo ebꞌ vin̈ rey ecꞌnac. 31 Malaj yalan sbꞌeybꞌal vin̈aj Jeroboam yuninal vin̈aj Nabat dꞌa vin̈. Ecꞌbꞌal te chuc tas ix scꞌulej vin̈ chiꞌ, ix yicꞌ ix Jezabel yisil vin̈aj Et-baal sreyal Sidón vin̈ yetbꞌeyumoc, ix ochpax vin̈ ejmelal dꞌa jun comon dios scuch Baal. 32 Ix sbꞌoqꞌue stemploal Baal chiꞌ vin̈ yedꞌ jun altar dꞌa Samaria. 33 Ix sbꞌoanpaxqꞌue jun yechel comon dios scuch Asera vin̈. Ix ste tzuntzejcot yoval scꞌol Jehová sDiosal Israel vin̈, yujto ecꞌbꞌal chuc ix scꞌulej vin̈ dꞌa yichan̈ juntzan̈xo ebꞌ vin̈ sreyal Israel ecꞌnac.

34 Ayic ayoch vin̈aj Acab chiꞌ reyal, axo vin̈aj Hiel aj Betel ix bꞌoanxiqꞌue chon̈abꞌ Jericó. Ayic ix yacꞌanxiem yich jun chon̈abꞌ chiꞌ vin̈, ix cham jun sbꞌabꞌel yuninal vin̈ scuch Abiram. Axo yic ix och spuertail, ix cham vin̈aj Segub slajvubꞌ yuninal vin̈. Ix elcꞌoch icha tas yalnaccan Jehová dꞌa vin̈aj Josué yuninal vin̈aj Nun.