2 Ix lajvi chiꞌ ix yalan Jehová dꞌa vin̈aj Elías chiꞌ icha tic:

3 —Elan̈ dꞌa tic, bꞌat cꞌubꞌejcanel a bꞌa dꞌa schꞌolanil stiꞌ aꞌ Querit, aton aꞌ scꞌochcan dꞌa aꞌ Jordán dꞌa stojolal bꞌaj sjavi cꞌu. 4 A jun a aꞌ chiꞌ ol uqꞌuej, a inxo ol val dꞌa nocꞌ joj yic ol bꞌat nocꞌ yacꞌcan a vael, xchi dꞌa vin̈.

5 Ix scꞌanabꞌajej vin̈aj Elías tas ix yal Jehová chiꞌ, ix bꞌat scꞌubꞌanel sbꞌa vin̈ dꞌa schꞌolanil stiꞌ aꞌ Querit chiꞌ. 6 Junjun qꞌuin̈ibꞌalil yedꞌ junjun yemcꞌualil syicꞌanbꞌat svael vin̈ nocꞌ joj chiꞌ yedꞌ schibꞌej, axo jun a aꞌ chiꞌ syucꞌ vin̈. 7 Palta ix cꞌoch stiempoal ix tup a aꞌ chiꞌ yujto maxtzac yacꞌlaj n̈abꞌ.

8 Ix lajvi chiꞌ, ix yalan Jehová dꞌa vin̈aj Elías chiꞌ:

9 —Elan̈ dꞌa tic, ixiccan dꞌa chon̈abꞌ Sarepta dꞌa yol yic Sidón, tzach can taꞌ junoc tiempoal. Toxo ix val dꞌa jun ix ix chamnacxo yetbꞌeyum to a ix ol acꞌan a vael, xchi dꞌa vin̈.

10 Ix el vin̈aj Elías chiꞌ, ix bꞌatcan vin̈ dꞌa Sarepta chiꞌ. Ayic ix cꞌoch vin̈ dꞌa stiꞌ chon̈abꞌ, ix yilanbꞌat jun ix ix vin̈, chamnacxo yetbꞌeyum ix, van smolan chabꞌ teꞌ bꞌolobꞌ ix. Ix yavtancot ix vin̈, ix yalan vin̈ icha tic:

—Mamax el dꞌa a cꞌool, bꞌat icꞌ junoc vaso aꞌ vuqꞌuej, xchi vin̈.

11 Vanxo sbꞌat ix yicꞌcot aꞌ, ix avajxi vin̈ dꞌa ix:

—Tzin tevipax dꞌayach to tzicꞌcot jabꞌoc pan in vaꞌa, xchi vin̈.

12 Ix tacꞌvi ix:

—Val dꞌa yichan̈ Jehová a Diosal svalaꞌ, malaj jabꞌoc ixim pan bꞌobꞌil vuuj, axon̈ej val jun bꞌech jabꞌ varina yaabꞌilcan vuj dꞌa yol jun xalu yedꞌ jabꞌ vaceite ay dꞌa yol yedꞌtal. An̈ej ol in cꞌochxoc yedꞌ chabꞌ in bꞌolobꞌ tic, ol in vachꞌ bꞌoan jabꞌ varina chiꞌ in va yedꞌ tzun vuneꞌ tic, ol lajvoc chiꞌ, ol co tan̈van cham co bꞌa yuj vejel, xchi ix.

13 Ix yalan vin̈aj Elías chiꞌ dꞌa ix icha tic:

—Man̈ ach xivoc. Ixic, bꞌat bꞌo ixim icha ix aj alan chiꞌ, palta to tza bꞌabꞌlaj bꞌoej junoc vic dꞌa jabꞌ harina chiꞌ, tzicꞌancot dꞌayin, slajvi chiꞌ ol a bꞌoan ic ol a va yedꞌ vin̈ unin chiꞌ. 14 Yujto toxo ix yal Jehová co Diosal a on̈ israel on̈ tic to man̈ ol lajvoc jabꞌ harina ayem dꞌa yol a xalu chiꞌ yedꞌ jabꞌ aceite ayem dꞌa yol yedꞌtal chiꞌ, masanto yic ol yacꞌanxicot n̈abꞌ Jehová, xchi vin̈ dꞌa ix.

15 Ix lajvi chiꞌ, ix bꞌat ix sbꞌo icha ix aj yalan vin̈ chiꞌ. Jantacn̈ej tiempo ix yacꞌ jun vejel chiꞌ, ix va vin̈ yedꞌ ix yedꞌ pax ebꞌ ayecꞌ yedꞌ ix dꞌa spat chiꞌ. 16 Maj lajviel-laj jabꞌ yarina ix chiꞌ yedꞌ jabꞌ yaceite chiꞌ, icha ix aj yalan vin̈aj Elías chiꞌ yuj Jehová.

17 Ix ecꞌ jun tiempoal, ix ilyaan jun yuneꞌ ix chiꞌ. Te ov ix aj jun syaelal chiꞌ, ix chami. 18 Ix yalan ix dꞌa vin̈aj Elías chiꞌ icha tic:

—Ach schecabꞌ Dios, ¿tas alan ic dꞌayin? ¿Tom yuj snachajcot in mul yedꞌ scham tzun vuneꞌ tic, yuj chiꞌ ach javi? xchi ix.

19 —Icꞌcot vin̈ uneꞌ chiꞌ dꞌayin, xchi vin̈aj Elías chiꞌ dꞌa ix.

Ix schaanecꞌ vin̈ unin chiꞌ vin̈ dꞌa ix, ix yicꞌanqꞌue vin̈ dꞌa yol scuarto, ix yacꞌanecꞌ jichan vin̈ dꞌa sat schꞌat. 20 Val chiꞌ ix yalan vin̈ dꞌa Jehová icha tic: Mamin Jehová in Diosal, ¿tas yuj tzacꞌcot cuscꞌolal dꞌa yibꞌan̈ ix ix tzꞌacꞌan in posado tic, tza chaan cham vin̈ yuneꞌ ix tic? xchi vin̈.

21 Ix lajvi chiꞌ, oxel ix bꞌat lachan vin̈ dꞌa yibꞌan̈ vin̈ unin chiꞌ, ix yalan vin̈ dꞌa Jehová: Mamin Jehová in Diosal, tzin cꞌan dꞌayach to tzacꞌxi sqꞌuinal vin̈ unin tic, xchi vin̈.

22 Ix yabꞌan Jehová tas ix yal vin̈ chiꞌ, ix jax scꞌool vin̈ unin chiꞌ. 23 Elan̈chamel ix yiqꞌuemta vin̈ unin chiꞌ vin̈ bꞌaj aycan ix snun chiꞌ, ix yacꞌanxi vin̈ dꞌa ix, ix yalan vin̈:

—Ilnabꞌi, toxo ix jax scꞌool vin̈ uneꞌ tic, xchi vin̈.

24 Ix yalan ix dꞌa vin̈:

—A ticnaic svacꞌoch dꞌa in cꞌool to yel schecabꞌ ach ton Jehová Dios, a tas schec alaꞌ, tzꞌeln̈ejcꞌochi, xchi ix.