2 — Wa da'ãma aiwamri pese, ã hã uburé idahâimana za'ra norĩ ãma hã. Si'ubdatõ bâdâ ma tô da'ãma ai'utõ, ĩsiré idahâimana za'ra na hã. Tane nherẽ, marĩ õ di, da te ihuri da hã. 3 Mram nherẽ, te dama rob'rui wamhã, bâdâdi na te za simiza'rese'õ hai'utõrĩ za'ra ni, ni'wam norĩ hã romhâ hawi we sihutu wa.

4 Tawamhã isiré 're inomro mono norĩ hã ma tô siwi sada'â, ãne:

— E niha wa za dasa hã wasiwi 'masãmri ni, ã hã uburé idahâimana za'ra norĩ ma hã, ãme a'ubuniwimhã.

5 Tawamhã Zezusi hã te sadanharĩ za'ra, ãne:

— E niha te i'u'ẽtẽ wapu hã aima tihâimana za'ra wa'wa.

— 7 na te wama tihâimana za'ra. — Ãne ma tô siwi sada'â.

6 Tawamhã Zezusi hã ma tô dama rob'ru, ti'ai wa, dasi'ubumroi mono da. Taha pari, ma tô waibu 7 na i'u'ẽtẽ wapu hã. 'Re ihâimana u'âsi mono ãma te tiwata. Tawamhã ma tô te te wẽ'ẽ. Taha pari isiré 're inomro mono norĩ ma, ma tô te te sõmri, te te dama sõmri za'ra mono da. 7 Tebe ĩsurure zama duré tãma 'maihâimana wa, taha na te duré 'Re ihâimana u'âsi mono ãma tiwata. Taha pari, isiré 're inomro mono norĩ ma, te ti'ru, te te duré dama sõmri za'ra mono da. 8 Tawamhã uburé ma tô tasaihuri ni, da te i'mahâpãrĩ mono zéb u. Tawamhã isiré 're inomro mono norĩ hã, iwẽ'ẽi ré hã 7 na si'õno hã ma tô ubumro za'ra, isi'atarẽme ré hã. 9 Tawamhã aibâ norĩ hã 4 miu na ihâiba za'ra, isaihuri hã.

Taha pari Zezusi hã ma tô dama rob'ru. 10 Te te dama rob'rui parimhã, uba're wa, ma tô asisi, Daumanuta na ti'a nhisi u te te saprĩ za'ra da.

11 Farizeu norĩ hã Zezusihi u ma tô aihutu. Tawamhã ma tô siwi sada'â. Te sima wẽ za'ra, te te siwi pibu da. Tahawa ma tô tiwi waptẽrẽ za'ra, marĩ te te 'manharĩ da, iwaihu'u'õ hâiwa hawimhã sõ'awi. 12 Tawamhã Zezusi hã, ma sa'ẽtẽ pẽ'ẽwaze. Tahawa te ãne tãma nharĩ za'ra:

— Pra. E marĩ da bâ, te awa'awi na a'uwẽ norĩ hã siwi ĩwada'u, marĩ dama i'manharĩ waihu'u'õ hã, te 'manharĩ da. Tô sena wa za aima waihu'u za'ra wa'wa, ãne: Marĩ dama i'manharĩ waihu'u'õ hã te aima i'manharĩ za'ra wa'aba da hã, mare uptabi di.

13 Taha pari, ihawib za'ra ma tô mo. Uba're wa, ma ãzé, zara u te te saprĩ da apâ.

14 Tawamhã isiré 're inomro mono norĩ hã ma po're ha'âri za'ra i'u'ẽtẽ wapu na. Te te siré 'mai'âri za'ra õ di. Uba're 'rep si te misire nomro, i'u'ẽtẽ wapu hã. 15 Tawamhã Zezusi hã ma po're pu'u za'ra, ãne:

— Ma'ãpé asimiza'rese sina 're aihâimana za'ra wa'aba mono. Duré ãma 're pibui pese za'ra wa'aba mono, farizeu norĩ te i'u'ẽtẽ wapu mapuzé wi, duré Erodihi te i'u'ẽtẽ wapu mapuzé wib zama.

16 Tawamhã isiré 're inomro mono norĩ hã te sima nharĩ za'ra, ãne:

— I'u'ẽtẽ wapu hã wama hâimana za'ra õ wa, ma ãne hã wama waihu'u za'ra.

17 Tawamhã Zezusi hã ma tô wapa, te te sima inharĩ za'ra zé hã. Tahawa, te sadanharĩ za'ra, ãne:

— E marĩ da, te asima inharĩ za'ra wa'wa, i'u'ẽtẽ wapu ihâimana õ na hã aima za'ra wa'aba. E ãma rob'madâ'â waihu'u za'ra wa'aba õ di. E duré asiwi ĩzadaihu'u aba õ di. E aipẽ'ẽ tete za'ra wa'aba di. 18 Atõmo ré nherẽ, e 'madâ'â waihu'u za'ra wa'aba õ di. Aipo're ré nherẽ, e wapari waihu'u za'ra wa'aba õ di. E ãma aipo're pu'u za'ra wa'aba ã bâ, 19 imrotõ na i'u'ẽtẽ wapu te iwẽ'ẽi mono na hã, 5 miu na dahâiba ma hã. E niha si'õno ma i'ubumro za'ra wa'wa, isi'azazâri ré hã.

Tawamhã ma sada'âbâ za'ra, ãne:

— 12 na si'õno hã.

20 Tawamhã Zezusi hã te duré sadanharĩ za'ra, ãne:

— Duré, 7 na i'u'ẽtẽ wapu te iwẽ'ẽi mono hã 4 miu na dahâiba ma hã, e niha si'õno i'masi isi'azazâri ré hã ma tô i'ubumro za'ra wa'wa.

— 7 na si'õno hã. — Ãne ma sada'âbâ za'ra.

21 Tawamhã Zezusi hã te duré tãma nharĩ za'ra, ãne:

— E niha bâ bété zahadu sadaihu'u za'ra wa'aba õ di.

22 Tawamhã Zezusi hã duré isiré 're inomro mono norĩ me, ma tô aihutu, Betisaida u. Tame ma tô itẽme dasiwi ãwisi ni, aibâ itob'a hã. Tawamhã Zezusihi wi, ma tô waptẽrẽ za'ra, te te upi da. 23 Tawamhã Zezusi hã itob'a ma pa'â. 'Ri wa'õtõ nhiti ma tô saprõ. Tame tizadaipro na ma tõmo u'ré zahuré. Tinhib'rada hã ma duré ãma tihi. Taha pari, te sadanha, ãne:

— E ma tô marĩ hã i'madâ.

24 Tawamhã aibâ hã ma tô rob'madâ'â. Tahawa te Zezusihi ma tinha, ãne:

— Wa da'a'madâ oto. Tane nherẽ, wede norĩ isi'aba'ré ne hã.

25 Tahawa, Zezusi hã tinhib'rada ma tô duré ãma tino, itõmo ãma. Itob'a hã ma tô oto rob'madâ wẽ. Ma tô oto tipese. Tahawa te te oto rob'madâ'â wẽ uptabi di. 26 Taha pari Zezusi hã te aibâ ma rob'ru, tinhorõwa u morĩ da. Ãne te tãma tinha:

— 'Ri wa'õtõ u hã apâ aimorĩ tõ, datẽme!

27 Taha pari, Zezusi hã duré isiré 're inomro mono norĩ me, ma tô ai'aba'ré, apito Filipihi te Cézaréia 'rata 'ri wa'õno 're isimasa mono u. Tawamhã bâdâdi na si'aba'ré sina, te Zezusi hã sina sadanharĩ za'ra, ãne:

— E 'wa hã, wa hã 're ĩmorĩ na te da te dasima 're ĩwasu'u za'ra.

28 Tawamhã isiré 're inomro mono norĩ hã ma sada'âbâ za'ra, ãne:

— Ni'wam norĩ ma hã, a hã u, Zuwã Batista. Duré u a hã, Elias. Duré ni'wam norĩ ma hã, a hã u, nima hã 'Re ihâimana u'âsi mono zadawa 'mahârâ'wa.

29 Tawamhã Zezusi hã te sina sadanharĩ za'ra, ãne:

— A norĩ wa'wa hã bété, e niha ma tô asima 're ĩwasu'u za'ra wa'aba mo.

Tawamhã Pedru hã ma tô sada'â, ãne:

— A hã Cristu^a.

30 Tawamhã Zezusi hã ma tô sina sadawa uwati pese za'ra, te te dama wasu'u za'ra tõ da.

31 Tawamhã Zezusi hã isiré 're inomro mono norĩ ma, te siwasu'u, ãne:

— Ti'ai ãma Dasiré Ipodo hã te za robzépata za'ẽtẽ. Zudeu norĩ dama roti'wa norĩ hã te za siwi wẽ'õ. Sasedoti dama ipire norĩ zama, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama, te za siwi wẽ'õ za'ra. Tahawa te za dasiwi wĩrĩ ni. Tane nherẽ, si'ubdatõ bâtâ pari, te za apâ hâiwa'udu.

32 Zezusi hã sõ'awi ma tô ãne hã tãma siwasu'u za'ra. Tawamhã Pedru hã ma tô saprõ, tisiré norĩ nhiti. Tame ma tô mreme tete na tãma tinha, siwasu'u zahu tõ da. 33 Tawamhã Zezusi hã ma aipi'ra. Ma tô 'madâ'â za'ra, isiré 're inomro mono norĩ hã. Tahawa te Pedruhu ma, mreme tete na tinha, ãne:

— Satanasi, ĩnhiti aimorĩ! A hã 'Re ihâimana u'âsi mono nhimirosa'rata zarina rosa'rata õ di. Ti'ai ãma danhimirosa'rata na te irosa'ra.

34 Taha pari, te Zezusi hã duré sima dazô hâ, isiré 're inomro mono norĩ zô zama. Ãne te dama tinha:

— Ni'wa hã ĩzarina 're morĩ da, te te sima wẽ wamhã, po're si'âri te te sima 're iwẽ mono zéb zarina 're ihâimana mono zém na hã, wedepo'o nhonhi'rãmi te te âri, ĩzarina morĩ da. 35 E marĩ wa. Ni'wa hã sisõ'reptu da wamhã, tihâimanazé hã te za simini. Tane nherẽ, ni'wa hã ĩ'u'âbâ duré Rowasu'u wẽ itéb u'âbâ, tihâimanazé te te simini wamhã, ta hã te za sõ'reptu, tihâimanazé hã. 36 E marĩ da bâ, ni'wai ma uburé marĩ ti'ai 'remhã tãma 're hâimana za'ra mono nherẽ, tô sena dahâimanazé hã te te simini wamhã. 37 E marĩ na te te wa'âbâ da bâ, te te isiminizé, apâ ihâimanazé tãma 're hâimana mono da hã. 38 Ni'wa hã ã hã dapoto téb 're, senai'õ duré dawasété na si 're idahâimana za'ra mono 're, ĩma 're sisé mono wamhã, duré ĩmreme ma sisé wamhã, Ti'ai ãma Dasiré Ipodo hã te za tãma asé za, niwa apâ wei morĩ wamhã, Timama te rowa'a ré, duré tite hâiwa hawi romhuri'wa norĩ wẽ u'âsi 're ihâimana za'ra mono norĩ siré.