2 — E niha bâ, asiré 're inomro mono norĩ hã te te 're 'madâ'â pese za'ra mono õ di, wahi'rata norĩ hawi wahâimanazé hã. 'Re sisimisõ za'ra mono õ di, 're saihuri mono wana ré hã.

3 Tawamhã Zezusi hã ma ãma sada'âbâ za'ra, ãne:

— E niha bâ bété, a norĩ wa'aba zama 'Re ihâimana u'âsi mono nhimiroti zahi hã 're 'madâ'â za'ra wa'aba mono õ di, aihi'rata hawi aihâimanazé u'âbâ wa'aba hã. 4 'Re ihâimana u'âsi mono hã ma tô tinha, ãne: “Aimama 're wazé pese za'ra wa'aba mono, ana zama.” Ãne duré isimiroti amo hã: “Ni'wa hã timama ma, duré tina ma nherẽ, iwasédé hã te te pisutu wamhã, da te iwĩrĩ da si, i'ru zahi.” 5 Tane nherẽ, te ãne dama 're iroti za'ra wa'aba mo, ni'wa hã ãne timama ma, duré tina ma, te te nharĩ wamhã: “Ai'ãma ĩsime waihu'u õ di, uburé marĩ hã ĩma ihâimana hã 'Re ihâimana u'âsi mono ma si, wa tô ãma ĩnhopru.” 6 Ãne wamhã, te tãma 're iroti za'ra wa'aba mo, timama norĩ hã te te oto 're upari waihu'u za'ra mono tõ da. Ãne wamhã, 'Re ihâimana u'âsi mono nhimiroti hã 're 'madâ'â pese za'ra wa'aba mono õ di, aihi'rata hawi aihâimanazé u'âbâ wa'aba. 7 Aihâimana si'amoi pese na 're i'aihâimana za'ra wa'aba mono norĩ! Izaias hã ma tô i'uwaibaba na ai'ãma rob'ui'éré siromo za'ra wa'wa, ãne:

10 Tawamhã Zezusi hã da'ahâ uptabi na idahâimana za'ra zô ma tô sima dazô hâ. Ãne te dama tinha:

— Ma'ãpé, ĩwapari pese za'ra wa'aba. Duré ma'ãpé sadaihu'u za'ra wa'aba. 11 Marĩ hã dazadawa na 're isisisi mono na, dapẽ'ẽ 'remhã ãma 're dasiwasété za'ra mono õ di za. Tazahã, marĩ dazadawa hawi 're iwairébé mono na si te za ãma 're dasiwasété za'ra.

12 Tawamhã isiré 're inomro mono norĩ hã ma tô Zezusihi u 'râwi ubumro. Ãne ma tô siwi sadanha:

— Rowahutu'wa. E ma tô iwaihu'u za'ra, farizeu norĩ te te siwi i'aimreme wẽ'õ na hã te te aiwapari za'ra wa.

13 Tawamhã Zezusi hã ma sada'âbâ za'ra, ãne:

— Ĩmama, hâiwa ãma 're isãmra mono hã uburé rob're te te i'a're õ hã te za isari hawi aza'o'o. 14 Ãma aihâtâ'â za'ra wa'aba tõ, farizeu norĩ ãma hã. Ta norĩ hã dazaprõni'wa, tob'a za'ra nherẽ. Itob'a zahuré sisaprõni zahuré wamhã, te za siré tiwaptã'ã zahuré, ab're wa.

15 Tawamhã Pedru hã ma tô tiwi waptẽ:

— Ma'ãpé wama waihu'u za'ra na, dawana ré ãma irowasu'uzé hã romnhimiré'é na.

16 Tane nherẽ, Zezusi hã ma tô ãne tãma nharĩ za'ra:

— E a norĩ wa'aba zama zahadu sadaihu'u za'ra wa'aba ã bâ. 17 Marĩ hã dazadawa na 're isisisi mono hã, danomo u te za 're sisisi. Taha pari te za dahâiba hawi 're wairébé. 18 Tazahã, marĩ hã dazadawa na 're iwairébé mono hã, dapẽ'ẽ hawi te 're wairébé. Ta hã te te 're dahâiba wamnarĩ za'ra. 19 E marĩ wa. Dapẽ'ẽ hawi 're wairébé mono wa, rosa'rata wasédé hã, dapãrĩ hã, damro na danhimisaihuri hã, dasina danhipsaihuri hã, danhimisaihuri hã, dazadawa nhipe, duré da'ãma iwasétézé hã. 20 Ã norĩ hã te tô te te 're dahâiba wamnarĩ za'ra. Tazahã, ni'wa hã sisib'rata upsõi ãna sai wamhã, ta hã te te hâiba wamnarĩ dai õ di.

21 Tawamhã Zezusi hã ta hawi ma tô mo, Tiru na 'ri nho'õmo nhisi niwĩ, duré Sidõ^a na 'ri nho'õmo nhisi niwĩ, danhipti'a nho'õmo u. 22 Tawamhã pi'õ Cana'ã hawi tame danhipti'ai ãma 're isãmra mono hã ma tô itẽme sina rotété. Hârâ 'rãihâ na ma tô 'mahâ, ãne:

— Apito, Davihi nhihudu, ma'ãpé ĩ'ãma aipẽ'ẽzé na. Ĩ'ra sipi'õ hã, wa'uburé ré te tihâiba. Te robzépata za'ẽtẽ.

23 Tane nherẽ, Zezusi hã te te sada'âbâ õ di. Tahawa isiré 're inomro mono norĩ hã ma tô itẽme sina rotété za'ra. Ãne te tãma nharĩ za'ra:

— Ma'ãpé satõrĩ, ã hã pi'õ hã. Wazarina za'ra te wei mo, hârâ 'rãihâ na wei hârâ mono sina.

24 Tawamhã Zezusi hã ma sada'âbâ za'ra, ãne:

— 'Re ihâimana u'âsi mono hã Izaraéu nhihudu norĩ u si, ma tô we ĩzatõ. Ta norĩ hã te pone'ẽrebâ isimani, siwa'ru 're ihâimana za'ra mono ne, 're hâimana za'ra.

25 Tawamhã pi'õ hã ma tô itẽme sina rotété. Hi'rãtitõ ma tô ãma tiwata. Ãne te tãma tinha:

— Apito, ma'ãpé ĩ'ãma aime na.

26 Tawamhã Zezusi hã ma sada'â, ãne:

— I'uwaibaba õ di, i'u'ẽtẽ wapu hã da'ra norĩ wi da te 're iwaibui mono da hã, wapsã ma, da te 're sãmra mono da.

27 Tane nherẽ, pi'õ hã ma tô ãne sada'â asa:

— Apito, ta hã tô i'uwaibaba. Tane nherẽ, wapsã 'rare norĩ zama te te 're huri, meza hawi itede'wa norĩ sai'a'a hã.

28 Tawamhã Zezusi hã ãne hã te te wapari wamhã, ma tô tinha, pi'õi ma:

— Pi'õ, siptete di, asina ĩ'umnhasi za'ẽtẽ zé hã. Ihâimana da si tô, asima iwẽzéb zarina.

Tawamhã awa'awi pesere ma tô i'ra sipi'õ hã tipese.

29 Tawamhã Zezusi hã ta hawi ma tô mo, Galiléia na isõ'u zapoto nhisi u. Ta hawi ma tô sai'u, ẽtẽ 'rãihâ na. Tame ma tô nhamra. 30 Tawamhã da'ahâ uptabi na ma tô ai'aba'ré ni, Zezusihi u. Ma tô itẽme ãwisi za'ra ni, imorĩ'õ norĩ hã, i'rãtẽire norĩ hã, itob'a norĩ hã, imreme'õ norĩ hã duré aimawi hã dahâzé da'ãma 're ihâimana za'ra mono norĩ zama. Ta norĩ hã ma tô nasi sõré ni, ipapara. Tame ma uburé apese. 31 Tawamhã ma tô ãma tatob'uzu za'ra ni, imreme'õ norĩ hã imreme ré wa oto, imorĩ'õ norĩ hã pese za'ra wa, i'rãtẽire norĩ hã morĩ wẽ za'ra wa, duré itob'a norĩ hã te te oto rob'madâ'â za'ra wa. Tawamhã Izaraéu nhihudu norĩ te, 'Re ihâimana u'âsi mono ãma ma tô tawata za'ra ni.

32 Tawamhã Zezusi hã isiré 're inomro mono norĩ zô ma tô hâ. Ãne ma tô tãma nharĩ za'ra:

— Wa da'ãma aiwamri pese, ã hã uburé idahâimana za'ra norĩ ãma hã. Si'ubdatõ bâdâ ma tô da'ãma ai'utõ, ĩsiré idahâimana za'ra na hã. Tane nherẽ, marĩ õ di, da te ihuri da hã. Te ĩsima wẽ õ di, dasa hã te tãma sõmri za'ra õ ré, te dama irob'ru da hã, bâdâdi na danhimiza'rese'õ si'utõrĩ za'ra õ'umnhasite.

33 Tawamhã isiré 're inomro mono norĩ hã ma tô siwi sadanha, ãne:

— E niha wa za dasa hã wasiwi 'masãmri ni, ãme a'ubuniwimhã, ã hã uburé idahâimana za'ra norĩ ma hã.

34 Tawamhã Zezusi hã te sadanharĩ za'ra, ãne:

— E niha i'u'ẽtẽ wapu hã te aima tihâimana za'ra wa'wa.

— 7 na te wama tihâimana za'ra. Duré pe'a hã umrore na. — Ãne ma tô siwi sada'â.

35 Tawamhã Zezusi hã ma tô dama rob'ru, ti'ai wa, dasi'ubumroi mono da. 36 Taha pari, ma tô waibu, 7 na i'u'ẽtẽ wapu hã duré pe'a zama. 'Re ihâimana u'âsi mono ãma te tiwata. Tawamhã ma tô te te wẽ'ẽ. Taha pari isiré 're inomro mono norĩ ma, ma tô te te sõmri. Ta norĩ hã ma tô te te dama sõmri za'ra. 37 Tawamhã uburé ma tô tasaihuri ni, da te i'mahâpãrĩ mono zéb u. Tawamhã isiré 're inomro mono norĩ hã, iwẽ'ẽi ré hã 7 na si'õno hã ma tô ubumro za'ra, isi'atarẽme ré hã. 38 Aibâ norĩ si hã tisa te te ihuri hã 4 miu na ihâiba za'ra hã. Pi'õ norĩ duré ai'uté norĩ za'rata zamai ãna hã.

39 Tawamhã Zezusi hã ma tô oto dama rob'ru, oto dasi'aba'ré da. Taha pari, ma tô uba're wa ãzé, Magadã na ti'a nhisi u te te saprĩ da.