— Ã hã Zuwã Batista, apâ ihâiwa'udu. Tahawa, tãma waihu'u pese di, marĩ dama i'manharĩ waihu'u'õ te te 're i'ab'manharĩ mono da hã.

3 Erodi hã ma tô ti'ru, Zuwã hã da te pawasisi da, duré dazazéb 're, da te sẽrẽ da. Erodiaha u'âbâ ma tô ãne hã 'manha. Ta hã, isisãnawã Filipihi mro. 4 Zuwã Batista hã ma tô aré te te tãma 're waihu'u u'âsi, ãne: “'Re ihâimana u'âsi mono nhimiroti zahi na Mozési te te irob'ui'érézém na hã, ãma aimro waihu'u õ di, Erodizaha ãma hã.” 5 Tahawa apito Erodi hã te te aré iwĩrĩ da si, Zuwã Batista hã. Tane nherẽ, dama hã pahi di, Zuwã Batista hã da te dasiwi 're 'madâ'â za'ra mono wa, 'Re ihâimana u'âsi mono zadawa 'mahârâ'wa na. 6 Tawamhã apito Erodihi waptã'ãzém na dato da te dasiwi i'manharĩzém na hã, Erodiaha 'ra sipi'õ hã ma tô apese^a, uburé danho're. Tawamhã Erodihi ma, te te tãma rowẽ pese wa, 7 ma tô ropisutu zahi hã tãma 'manha, siwa'ru marĩ hã te te tiwi waptẽrẽ wamhã, za te te tãma isõmri na hã.

8 Tawamhã ina hã te te tãma irotizéb zarina, ma tô tiwi rowaptẽ, ãne:

— Wa ĩsima wẽ, Zuwã Batistaha 'rã hã ĩma sõmri da, pratu wa, ãhã na awa'awi.

9 Tawamhã apito Erodihi wi ma tô tirobzei'õ pese. Tane nherẽ, ropisutu zahi isiré isaihuri norĩ nho'a te te tãma 'manharĩ wa, ma tô ti'ru, te te iwaptẽrẽzéb uwaibaba, da te tãma 'manharĩ da. 10 Ma tô ti'ru, Zuwã Batista hã da te 'rãnhizâri da, dazazéb 're sab ré. 11 Tawamhã Zuwãhã 'rã hã ma tô azarutu ma dasiwi âri ni, pratu wa. Ta hã ma tô ti'â, tina ma. 12 Tawamhã Zuwãhã siré 're inomro mono norĩ hã ma tô ihâiba hâ zô ai'aba'ré. Ma tô siwi ti'â. Ma tô duré ãma siwi ti'a. Taha parimhã ma tô ai'aba'ré, Zezusihi ma, ãne na te te rowasu'u za'ra da.

13 Tawamhã Zuwãhã ma iromhâimanazém na, Zezusi hã te te waihu'u wamhã, ma tô danhiti siwaprosi mo uba're na, a'ubuni u. Tane nherẽ, da'ahâ uptabi hã isãmrazé, da te waihu'u za'ra wamhã, 'ri wa'õtõ mono hawimhã ma tô itẽme ai'aba'ré ni, ti'ai baba daza na. 14 Tawamhã Zezusi hã uba're hawi watobro wamhã, duré da'ahâ uptabi hã te te da'a'madâ'â wamhã, ma tô da'ãma aiwamri pese. Tahawa ihâzé ré norĩ hã ma tô apese, dawazari ihâimana za'ra hã.

15 Tawamhã hâiwahâ pesere wa oto, Zezusihi siré 're inomro mono norĩ hã ma tô itẽme sina rotété za'ra. Ãne te tãma nharĩ za'ra:

— Rowahutu'wa. Ãme a'ubuni wi, wa wahâimana za'ra ni. Ma tô duré oto tihâiwahâ pesere. Ma'ãpé dazatõrĩ za'ra na, 'ri wa'õno isimasa mono u dasi'aba'ré da, dasa hã da te dasima uipra za'ra da.

16 Tane nherẽ, Zezusi hã ma tô ãne ãma sada'âbâ za'ra:

— Mare di. Dasi'aba'réi õ di za. Ma'ãpé a norĩ wa'wa hã, dasa dama aza'ra wa'aba.

17 Tawamhã ma siwi sada'â, ãne:

— I'u'ẽtẽ wapu hã imrotõ na, te wama tihâimana za'ra, duré maparanere pe'a hã.

18 Tawamhã Zezusi hã ma ãma sada'âbâ za'ra, ãne:

— Pé we ĩma waibui wa'aba, i'u'ẽtẽ wapu hã, pe'a zama.

19 Tawamhã ma tô dama rob'ru, duiroire wa dasi'ubumro da. Taha pari ma tô waibu, imrotõ na i'u'ẽtẽ wapu norĩ hã duré maparane pe'a hã. Hâiwa u ma tô rob'madâ. 'Re ihâimana u'âsi mono ãma te duré tiwata. Taha pari i'u'ẽtẽ wapu hã ma tô te te wẽ'ẽ. Isiré 're inomro mono norĩ ma, ma tô te te sõmri. Ta norĩ hã ma tô te te dama sõmri za'ra. 20 Uburé ma tô tasaihuri ni. Ma tô duré da te 'mahâpãrĩ. Tawamhã isiré 're inomro mono norĩ hã 12 na si'õno hã ma tô ubumro za'ra, iwẽ'ẽ isi'atarẽme ré hã. 21 Tawamhã dasiré isaihuri hã 5 miu na aibâ norĩ si hã, pi'õ norĩ duré ai'uté norĩ za'rata zamai ãna hã.

22 Tawamhã ãma ronomro õ ré, Zezusi hã ma tô rob'ru, isiré 're inomro mono norĩ ma, uba're wa sisisi da, iwana sisa'rei mono da â zara u, te te da'azatõrĩ ré, oto dasi'aba'ré da hã. 23 Tawamhã te te da'azatõrĩ parimhã, Zezusi hã ma tô sai'u ẽtẽ 'rãihâ u, siwaprosi te te rowaptẽrẽ da. Mara wamhã oto, tame te tihâiba siwaprosi. 24 Taha ré hã, uba're hã te oto tihâiba, â wa'wa. Â sisasi hã ma tô uba're hã te te ahâri, rowa'u hã iwa'rãmi te te rowapõrĩ wa. 25 Tawamhã robza'rã ré, Zezusi hã ma tô itẽme timorĩ za'ra, â nhisi baba. 26 Tawamhã â nhisi baba itẽme imorĩ za'ra na te te 'madâ'â za'ra wamhã, isiré 're inomro mono norĩ hã ma tô tãma a'rãmi pese za'ra. Ãne ma tô hârâ 'rãihâ na sima 'mahârâ za'ra:

— Dahâiba warõ te wei mo.

Tawamhã pahi te, ma tô duré tizadari za'ra. 27 Tane nherẽ, Zezusi hã awa'awi ma tô ãne 'mahârâ za'ra:

— A'rãmi za'ra wa'aba tõ! Wa hã! Aipahi za'ra wa'aba tõ!

28 Tawamhã Pedru hã ma tô ãne 'mahâ:

— Uburé Danhib'apito, tô a hã wamhã, ma'ãpé ĩma 'ru na, ãma atẽme ĩmorĩ da, â nhisi baba.

29 Tawamhã Zezusi hã ma sada'â, ãne:

— Ma'ãpé we aimorĩ!

Tawamhã Pedru hã uba're hawi ma tô si'ra. Â nhisi baba ma tô mo, Zezusihi nho'õmoi baba. 30 Tane nherẽ, rowa'u te te i'âsisasisizé hã te te 'madâ'â wamhã, ma tô tãma tipahi. Tahawa, ma tô aré ãzé. Tawamhã, hârâ 'rãihâ na ma tô sina 'mahâ, ãne:

— Wanhib'apito, ma'ãpé ĩnho'reptu na!

31 Tawamhã awa'awi pesere, ma tô Zezusi hã sô mawẽ. Ma tô pa'â. Ãne te tãma tinha:

— E niha bâ, asina ĩ'umnhasizé hã surure di. E marĩ wa, ma tô asiwawã.

32 Tawamhã uba're wa, ma tô tizasi zahuré. Zasi wi, ma tô rowa'u hã sazâ. 33 Tawamhã isiré 're inomro mono norĩ hã ma tô ãma tiwata za'ra, Zezusihi ãma, ãne:

— Tô sena uptabi, a hã 'Re ihâimana u'âsi mono 'ra!

34 Tawamhã Zezusi hã isiré 're inomro mono norĩ me, isõ'u na zara u te te saprĩ za'ra wamhã, ma tô aihutu, Zenezaré na ti'a nhisi u. 35 Tamemhã, Zezusi hã da te dasiwi waihu'u wamhã, iwasu'u na ma tô ãma dasima ropé za'ra ni, daro mono bâ. Tahawa ma tô itẽme ãwisi za'ra ni, ihâzé ré norĩ hã. 36 Tawamhã ma tô tiwi waptẽrẽ za'ra ni, ihâzé ré norĩ hã i'uza nhisutu si te te tiwi upi za'ra da. Tawamhã i'uza hâ nhisutu si te te nasi i'upi za'ra hã ma tô uburé tipese za'ra.