— Pra! E mame ma tô uburé marĩ hã awaihu'u. E niha hã te rowaihu tãma 're hâimana, marĩ dama i'manharĩ waihu'u'õ te te dama 're i'ab'manharĩ mono da hã. 3 E ã hã wede'é na romhuri'wai ã bâ. E Mariaha 'ra ã bâ. Duré e ino norĩ hã Tiagu, Zuzé, Zudasi, duré Simau norĩ ã bâ. E duré ihidiba norĩ hã ãme 're si'ubumroi mono ã bâ.

Tahawa ãne u'âbâ, ma tô siwi wẽ'õ, Zezusi hã. 4 Tawamhã Zezusi hã te tãma nharĩ za'ra ãne:

— 'Re ihâimana u'âsi mono zadawa 'mahârâ'wa hã daro mono bâ dama wazé pese di. Isipti'ai ãma si sô datob'uzu waihu'u õ di, isisãnawãi 'remhã duré isõrõwa 'reb zama.

5 Tahawa, Nazaré ãma hã marĩ dama i'manharĩ waihu'u'õ hã te te a'manharĩ waihu'u õ di. Ni'wam norĩ ãma si, ma tô tinhib'rada hã aza'ra, te te apese da. 6 Tahawa, Zezusi hã ma tô da'ãma titob'uzu, da te dasiwi i'umnhasi'õzém na hã.

Tawamhã Zezusi hã Nazaré 'rata 're idahâimana za'ra mono norĩ ma, te te 're rowahutu oto, 'ri wa'õtõ mono bâ. 7 Tawamhã 12 na ihâiba za'ra isiré 're inomro mono norĩ zô, te tihârâ za'ra. Taha pari, maparane si siré ma tô satõrĩ za'ra. Isimiroti pire hã ma tô tãma sõmri za'ra, wa'uburé hã te te dama sãmra za'ra mono da. 8 Te duré tãma roti pese za'ra, marĩ hã te te siré 'wasari tõ da, bâdâdi na da hã, tisiwazusizép si te te siré 'wasari da, mra hã, romramizé duré rob'uiprazé hã te te 'wasari tõ da, 9 tipara'uza ré si si'aba'ré da, duré da'uza ihâpa isõ'utu'u ré si si'aba'ré da, isapari'wa hã te te 'wasari tõ da. 10 Te duré tãma nharĩ za'ra, ãne:

— Danhorõwa u, asô dahârâ za'ra wa'aba mono wa, asisisi aba mono wamhã, tamep si aihâimana za'ra wa'aba mono, ta hawi i'aiwairébé aba zéb u. 11 Tazahã nimame da te aiwaibui wẽ wa'aba õ wamhã, duré da te aiwapari za'ra wa'aba õ wamhã, dahawi aiwairébé su'u aba mono. Duré oto ta hawi aiwairébé aba zéb u, aipara zapru hã asisa'u tata'a za'ra wa'aba mono, ti'ai u rere'e da.

12 Tawamhã isiré 're inomro mono norĩ hã ma tô oto datẽme ai'aba'ré, te te dama sadawa wasu'u za'ra da, dawasété na dasisãmri za'ra wa, 'Re ihâimana u'âsi mono ma dasiwẽ'õ za'ra da. 13 Tawamhã Wa'uburé hã ahâ uptabi na te te dama sãmra za'ra. Duré azeite 'rãi wa'ui wam na, te te da'rãi u'ré za'ra mono pari, ma tô da'ahâ na te te dapese za'ra, dahâzé ré 're idahâimana za'ra mono hã.

14 Tawamhã Apito Erodi hã ma tô ãne hã rowasu'u wapa, Zezusihi wasu'u hã daro mono bâ dama sa'rese wa oto. Ãne te ni'wam norĩ hã Zezusihi ãma nasi romnomri za'ra:

— Ã hã aibâ hã, Zuwã Batista apâ ihâiwa'udu. Tahawa, waihu'u pese di, marĩ dama i'manharĩ waihu'u'õ hã te te 're i'ab'manharĩ mono da hã.

15 Tawamhã ni'wam norĩ hã te te duré ãma 're romnomri za'ra, ãne:

— Õ hã Elias.

Ni'wam norĩ hã te te duré ãma 're romnomri za'ra, ãne:

— Õ hã 'Re ihâimana u'âsi mono zadawa 'mahârâ'wa, duréihã isadawa 'mahârâ'wa norĩ ne hã.

16 Tawamhã Apito Erodi ãne hã te te wapari wamhã, ma tô ãne tinha:

— Õ hã Zuwã Batista, wa hã te i'ru, da te butu nhizâri da, apâ ihâiwa'udu.

17 Erodi hã tô te te dama 'rui wa, Zuwã Batista da te pawasisi da, da te dasiwi sẽrẽ da hã, dazazéb 're. Ãne hã ma tô 'manha, Erodiaha ma rowẽ da, ãma isi'ré, tisisãnawã Filipihi mro nherẽ. 18 Ãma mro wa, Zuwã hã ma tô nasi tinha, Erodihi ma, ãne: “'Re ihâimana u'âsi mono nhimiroti zahi na Mozési te te irob'ui'érézém na hã, ãma aimro waihu'u õ di, Erodizaha ãma hã.”

19 Tahawa, Erodiaha ma 'ru ti, Zuwã hã. Te te iwĩrĩ da si. Tane nherẽ, te te wĩrĩ waihu'u õ di. 20 Erodi hã te te tiwi 're 'madâ'â pese, Zuwã Batistaha ma 're pahi mono wa, te te waihu'u pese wa, iwẽ na hã, duré 'Re ihâimana u'âsi mono ma si 're ihâimana mono na hã. Tahawa, ma tô te te 're 'madâ'â pese, Zuwã hã. Zuwãhã nhimirowasu'u te te 're wapari mono wamhã, te tiwi 're rowaihu'u'õ. Tane nherẽ, ma tô te te 're wapari ze.

21 Tawamhã bâdâ ma tô oto wi, Erodiza te te sima iwẽzé hã. Iwaptã'ãzém na Erodi hã dasa isa'ẽne ma tô 'manha dama ipire norĩ ma, te te 're ida'a'madâ'â mono zéb 'remhã, dasi'wapéi 'manharĩ'wa norĩ nhib'apito norĩ ma, duré Galiléia ãma dama ipire norĩ 're ihâimana za'ra mono ma. 22 Tawamhã dasaihuri ré hã, Erodiaha 'ra sipi'õ hã ma ãzé, 'ri para u. Tame ma tô aipese. Tawamhã Erodi duré isiré isaihuri norĩ ma, ma tô rowẽ pese, tisipese na. Tahawa, te apito hã azarutu ma tinha, ãne:

— Marĩ ĩwi waptẽrẽ, asima iwẽzéb uwaibaba. Wa za aima tisõ.

23 Tawamhã ma tô tãma ropisutu zahi:

— Marĩ hã asima iwẽzéb uwaibaba waptẽrẽ wamhã, wa za aima tisõ. Te 're ida'a'madâ'â mono zé ĩwi waptẽrẽ wamhã, aiwa wa za ãma wasima aipo'o ni.

24 Tahawa, te tina u a'â mo, marĩ hã apito wi te te iwaptẽrẽ da hã, te te tãma waihu'u da. Tawamhã ina ma ãma sada'â, ãne:

— Ma'ãpé waptẽrẽ, Zuwã Batistaha 'rã hã.

25 Tahawa, si'aba'ré na ma apâ ãzé apito u, azarudu hã. Ãne te tiwi waptẽ:

— Wa ĩsima wẽ, Zuwã Batistaha 'rã hã ĩma sõmri da, pratu wa, ãhã na awa'awi.

26 Tawamhã apito Erodihi wi ma tô tirobzei'õ pese. Tane nherẽ, ropisutu zahi isaihuri norĩ nho'a te te 'manharĩ wa, isiré azarudu hã te te tiwi iwaptẽrẽzé te te wẽ'õ waihu'u õ di. 27 Tahawa ma tô ti'ru, dasi'wapéi 'manharĩ'wa hã Zuwãhã 'rã te te tãma âri da. Tawamhã awa'awi te sô mo, dazazéb u. Tame ma tô 'rãnhizâ, Zuwã Batista hã. 28 Ma tô ti'â, pratu wa. Azarutu ma, ma tô tisõ. Ta hã tina ma, ma oto tisõ. 29 Tawamhã Zuwã Batistaha siré 're inomro mono norĩ hã ãne hã te te waihu'u za'ra wamhã, ihâiba hâ zô ma tô ai'aba'ré. Ma tô siwi ti'â. Taha pari ma tô ãma siwi ti'a.

30 Tawamhã Zezusihi siré 're inomro mono norĩ hã apâ sihutu wamhã, ma tô tãma siwasu'u pese za'ra, uburé marĩ hã te te i'manharĩ za'ra mono zém na hã, duré te te dama irowasu'u za'ra mono zém na zama. 31 Tamemhã da'ahâ uptabi na dasiwa'rãmi itẽme dasisamarĩ pese wa, saihuri waihu'u õ di, Zezusi norĩ hã. Tahawa, ma tô isiré 're inomro mono norĩ ma tinha, ãne:

— We ĩsiré ai'aba'réi wa'aba a'ubuni u, wawa'utu za'ra da a'â.

32 Tawamhã hâiba pisutu ma tô sisa're uba're na, a'ubuni u. 33 Tane nherẽ, da'ahâ na da te 'madâ'â za'ra wamhã, da te waihu'u za'ra wa, ma tô isõ'rãmib za'ra dasisa're, â zada'réi baba, uburé 'ri wa'õtõ na 're idahâimana za'ra mono hã. Ma tô iwana za'ra aihutu ni. 34 Tawamhã Zezusi hã uba're hawi watobro wamhã, da'ahâ uptabi na ma tô da'a'madâ. Tahawa, ma tô da'ãma tipẽ'ẽzé, pone'ẽrebâ norĩ, 'madâ'â'wai ãna 're inomro mono ne, 're danomro mono wa. Tame ma tô tinhimirowahudu iwẽ na, ahâ uptabi na ãma da'apawapto.

35 Tawamhã hâiwahâ pesere wa oto, ma tô Zezusihi siré 're inomro mono norĩ hã itẽme sina rotété za'ra. Ãne te tãma nharĩ za'ra:

— Ma tô tihâiwahâ. A'ubuni wi wa wahâimana za'ra ni. 36 Ma'ãpé a'â dama rob'ru na, dasi'aba'ré da, marĩ dasazéb da, da te dasima uipra za'ra da, uridi dama isimasa mono u, niwamhã 'râwi 're idasi'ubumroi mono u zama.

37 Tane nherẽ, Zezusi hã ma tô ãne sada'âbâ za'ra:

— Ma'ãpé a norĩ wa'wa hã dama aza'ra wa'aba, dasaihuri da.

Tawamhã isiré 're inomro mono norĩ hã te ãne tãma nharĩ za'ra:

— I'u'ẽtẽ wapu wa te dama uipra za'ra da wamhã, 200 na rob'uiprazé isapotore ẽtẽ waipo prã prata na hã^a, wama hâimana za'ra wapsi, aré dahâiba wamhã.

38 Tawamhã Zezusi hã te sadanharĩ za'ra, ãne:

— E niha i'u'ẽtẽ wapu hã te aima tihâimana za'ra wa'wa. Ma'ãpé sabu za'ra wa'aba.

Tawamhã isiré 're inomro mono norĩ hã te te sabu za'ra parimhã, te ãne tãma wasu'u za'ra:

— Imrotõ na te i'u'ẽtẽ wapu hã wama tihâiba, duré tebe hã maparane.

39 Tawamhã Zezusi hã ma tô dama rob'ru, dawa'õtõ mono bâ dasi'ubumroi mono da, duiroire wa. 40 Tahawa, ma tô dasi'ubumro, dawa'õtõ mono bâ, 100 na dahâiba na, duré 50 na dahâiba na zama. 41 Tawamhã Zezusi hã ma tô waibu imrotõ na i'u'ẽtẽ wapu hã, duré maparane tebe hã. Hâiwa u te rob'madâ. 'Re ihâimana u'âsi mono ãma te tiwata. Taha pari, ma tô te te wẽ'ẽ, i'u'ẽtẽ wapu hã. Isiré 're inomro mono norĩ ma, ma tô te te sõmri, te te dama sõmri za'ra mono da. Tebe maparane ihâimana zahuré zama ma tô te te wẽ'ẽ zahuré. Taha zama ma tô tãma sõmri. 42 Tawamhã uburé ma tô tasaihuri ni. Ma tô duré da te 'mahâpãrĩ. 43 Tawamhã isiré 're inomro mono norĩ hã 12 na si'õno hã ma tô ubumro za'ra isi'atarẽme ré hã, i'u'ẽtẽ wapu na 'masisi na tepe na zama. 44 Tawamhã dasiré isaihuri hã 5 miu na aibâ norĩ hã.

45 Tawamhã ãma ronomro õ ré, Zezusi hã ma tô rob'ru, isiré 're inomro mono norĩ ma, uba're wa sisisi da, iwana sisa'rei mono da, Betisaida na 'ri wa'õtõ nhisi u, te te da'azatõrĩ ré, oto dasi'aba'ré da. 46 Tawamhã dahawi watobro pari, ẽtẽ 'rãihâ u ma tô mo, te te rowaptẽrẽ da. 47 Mara wamhã oto, uba're hã â wa'wa u, ma tô oto tihâiba. Taha ré hã, te Zezusi hã siwaprosi tihâiba ti'a na. 48 Tawamhã ma tô 'madâ'â za'ra isiré 're inomro mono norĩ hã, pire na te te iwasi za'ra mono na uba're hã, rowa'u hã iwa'rãmi te te rowapõrĩ za'ra wa. Tawamhã robza'rã ré, Zezusi hã ma tô itẽme timorĩ za'ra â nhisi baba, duré te te isa're za'ra zéb u.

49 Â nhisi baba itẽme imorĩ za'ra na te te 'madâ'â za'ra wamhã, te ãma rosa'rata za'ra, dahâiba warõ na hã. Tahawa te tãma 're sadari za'ra, tãma pahi za'ra wa. 50 Tawamhã uburé ma tãma tipahi za'ra, te te i'madâ'â za'ra ma hã. Tane nherẽ, te Zezusi hã awa'awi 'mahârâ za'ra, ãne:

— Ma'ãpé, aipahi za'ra wa'aba tõ! Asib'ru za'ra wa'aba! Wa hã!

51 Tawamhã uba're wa, ma tô itẽme tizébré za'ra. Tame ma rowa'u hã sazâ. Tahawa isiré 're inomro mono norĩ hã ma tô ãma titob'uzui pese za'ra. 52 E marĩ wa. Pẽ'ẽ tete za'ra wa, duré marĩ dama i'manharĩ waihu'u'õ i'u'ẽtẽ wapu na, te te dama i'manharĩzé hã te te siwi sadaihu'u õ wa.

53 Tawamhã Zezusi duré isiré 're inomro norĩ hã isõ'u na zara u te te saprĩ za'ra wamhã, ma tô aihutu, Zenezaré na ti'a nhisi u. Tame â zada'ré ãma, uba're na ma ãma siwi wasisi. 54 Tawamhã wairébé wi uba're hawi, ma tô Zezusi hã dasiwi waihu'u ni. 55 Tahawa daro mono bâ, dawara sina ihâzé ré norĩ hã isa'warizéb ré ma tô 'wasari ni, Zezusi hã nimame ihâimanazéb u, da te iwapari za'ra zéb zarina. 56 Tawamhã daro mono bâ 're ine mono zéb u, re na 'ri 're isimasa mono u, 'ri wa'õtõ u, duré 'ri nho'õmo u zama, ihâzé ré norĩ hã ma tô da te 're 'wasari, 're idasi'rã'õtõ mono zéb u hã. Tawamhã Zezusihi wi, ma tô da te 're waptẽrẽ za'ra, 're si'rui mono da, taré i'uza hâ 'rãsudu hã da te tiwi 're upi za'ra mono da. Tawamhã i'uza hâ nhisutu si te te 're i'upi za'ra mono hã ma tô uburé 're pese za'ra.