5 Tawamhã Zezusi hã, ã hã 12 na aibâ ihâiba za'ra norĩ hã ma tô datẽme satõrĩ za'ra. Ãne ma tô tãma roti za'ra:

— Ai'aba'réi wa'aba tõ, zudeu'õ norĩ 're isi'ubumroi mono zéb u hã. Duré asisisi aba tõ, 'ri wa'õtõ norĩ Samaria 're, 're idasi'ubumroi mono zéb u hã. 6 Ma'ãpé sô airĩtĩ za'ra wa'aba, Izaraéu nhihudu norĩ siwa'ru 're ihâimana za'ra mono norĩ zô si, pone'ẽrebâ norĩ, siwa'ru 're inomro mono ne. 7 Mo oto ai'aba'réi wa'aba, dama rowahutu za'ra wa'aba mono da, ãne: “Hâiwa ãma 're Isãmra mono, da'ãma 're isib'a'uwẽ mono zé hã romhuture di oto.” 8 Ihâzé ré norĩ hã pese za'ra wa'aba mono. Dadâ'â za'ra mono nherẽ, apâ dahâiwa'utu za'ra wa'aba mono. I'wa're ré norĩ hã hâiba pese za'ra wa'aba mono. Wa'uburé hã dama sãmra za'ra wa'aba mono. Wa'âbâ ãna wa tô ĩwaihu'u pe hã aima sõmri za'ra wa'wa. Tane, te za wa'âbâ ãna dama i'manharĩ za'ra wa'aba mo. 9 Rob'uiprazé isapotore hã asiré 'wasari aba tõ, ẽtẽ waipo pré oru 'manharĩ hã, ẽtẽ waipo prã prata 'manharĩ hã duré ẽtẽ topsada cobri 'manharĩ zama. 10 'Wasari aba tõ, romramizé hã. Ai'uza ihâpa misi ré si te za ai'aba'réi wa'wa, duré aipara'uza misi ré si. Wedehu asiwazusizé hã misire te za i'wasari 'wa. E marĩ wa. Romhuri'wa hã uburé marĩ zô tiwi irowaptâ hã, tô i'ru zahi, da te tãma isõmri da hã, ãma hâimana da.

11 — 'Ri nho'õmo u niwamhã duré 'ri wa'õtõ u aihutu aba wamhã, sõ airĩtĩ za'ra wa'aba mono, ni'wa hã itẽme aihutu aba wa, za asô itob'uzu za'ra wa'aba zô. Tawamhã tame isõrõwa ãma a'â aihâimana za'ra wa'aba mono, za ta hawi i'aiwairébé aba mono zéb u. 12 'Ri para u asisisi aba mono wamhã, 'ri 're, idahâimana za'ra norĩ hã sawi za'ra wa'aba mono. 13 'Ri 're, idahâimana za'ra hã asô datob'uzu za'ra wa'aba mono wamhã, rowẽ na idazawi za'ra wa'aba mono zé hã, dasiré ihâimana za'ra mono da si, iwẽ hã. Tazahã, asô datob'uzu za'ra wa'aba mono õ wamhã, rowẽ na idazawi za'ra wa'aba mono zé hã te za apâ dawi iwaibui wa'aba mo. 14 Nimame 'ri 'remhã, niwamhã duré nimame 'ri wa'õtõ ãma datẽme asisi aba da, asô datob'uzu za'ra wa'aba õ wamhã, niwamhã duré irowasu'u za'ra wa'aba zém na da te aiwapari za'ra wa'aba da, da te dasima wẽ za'ra õ wamhã, ma'ãpé ta hawimhã tô aiwairébé aba mono. Duré oto ta hawi aiwairébé aba zéb u hã, aipara zapru hã asisa'u tata'a za'ra wa'aba mono, ti'ai u rere'e mono da. 15 Tô sena wa za aima waihu'u za'ra wa'wa, ãne: Bâdâ 'Re ihâimana u'âsi mono, dahâimanazéb zarina uburé te te da'ãma i'arowairébézéb ãma hã Sodoma ãma duré Gomora ãma 're idahâimana wasété uptabi za'ra mono norĩ ma, te te irob'manharĩ pipa zém nhipai u, te za 'ri wa'õtõ 're, asô itob'uzu za'ra wa'aba õ norĩ ma hã rob'manharĩ za'ẽtẽ za'ra.

16 — Ma'ãpé ĩwapari pese za'ra wa'aba. Wa oto asatõrĩ za'ra wa'wa datẽme, pone'ẽrebâ i'rare norĩ hã abaze zahi wa'wa u 're isisisi mono ne. Tahawa, ma'ãpé aihâimana nhimiza'rese 're aihâimana za'ra wa'aba mono, wahi ne. Duré aiwaimri na te za 're aihâimana za'ra wa'aba mo, utu'u ne. 17 Tahawa, ma'ãpé ãma 're pibui pese za'ra wa'aba mono. E marĩ wa. Da'ãma rowairébézéb u te za da te 're asimroi wa'wa. Abazei hâ nhorõ 'manharĩ na dapré'ézém na te za duré da te 're aihâ za'ra wa'wa, Zudeu norĩ te rowahutuzé, 're ihâimana za'ra mono 'remhã. 18 Ĩ'u'âbâ te za da te 're asimroi wa'wa, roti'wa norĩ nho're u hã duré apito norĩ nho're u zama. Tawamhã tame bâdâ hã te za aima 're hâimana za'ra wa'wa, ta norĩ ma, 're ĩwasu'u za'ra wa'aba mono zéb da hã, zudeu'õ norĩ ma zama. 19 Dama ipire norĩ u, da te 're asimroi wa'aba mono wamhã, 're aihâtâ'â za'ra wa'aba mono tõ, za 're inharĩ za'ra wa'aba mono zém na hã duré niha na za 're inharĩ za'ra wa'aba mono zém na hã. Za i'asiwasu'u wa'aba zéb da hã, bâdâ aima wisi aba wamhã, 'Re ihâimana u'âsi mono si te za aima sõmri 'wa, aimreme aba zéb da hã. 20 Aimreme aba wamhã, a norĩ wa'wa hã nharĩ aba dai õ di. Tazahã, Aimama wa'aba Pẽ'ẽzani si te za asadawa na nharĩ 'wa.

21 — Dasisãnawã nherẽ, te za da te 're hâiba za'ré za'ra, da te 're simroi mono da hã. Damama norĩ zama te za ti'ra hã te te 're hâiba za'ré za'ra. Da'ra norĩ hã timama norĩ da, te za 're hâimana za'ra. Te za duré te te 're simro. 22 Uburé te za da te 're ai'ruiwapari za'ra wa'wa, ĩ'u'âbâ. Tane nherẽ, ni'wa hã ro i'rãsutuzéb u siptete sina ĩ'ãma 're hâimana u'âsi mono wamhã, ta hã te za tinho'reptuzé hã sina uwaimra. 23 Nimame 'ri wa'õtõ 're, da te aima 're rob'manharĩ wasété za'ra wa'aba mono wamhã, ma'ãpé ta hawimhã 're aiwairébé aba mono, 're aimani za'ra wa'aba mono da, 'ri wa'õtõ amoi u. Tô sena wa za ãne hã aima waihu'u za'ra wa'wa: Izaraéu nhihudu norĩ nhipti'ai 're, 'ri wa'õtõ mono bâ asimiromhuri hã 'rãsutu za'ra wa'aba õ ré, te za wei mo apâ, Ti'ai ãma Dasiré Ipodo hã.

24 — Ni'wa romnhoré'wa hã pire na hâimana waihu'u õ di, tãma iromnhoré'wa nhipai u hã. Duré, dama romhuri'wa hã pire na hâimana waihu'u õ di, tinhib'ihâ'a nhipai u hã. 25 Tahawa, romnhoré'wa hã te za te te sima 're rowẽ, tite tãma iromnhoré'wa ne, 're ihâimana mono zém na hã, duré dama romhuri'wa hã tinhib'ihâ'a ne 're ihâimana mono zém na hã. 'Ri tede'wa hã Beuzebu na da te 're sisi za'ra mono wamhã, 'ri 're, isiré 're ihâimana za'ra mono hã, taha nhipai u te za tô iwasété uptabi na da te 're wamri za'ra.

26 — Tahawa, dama hã 're aipahi za'ra wa'aba mono tõ. Bâdâ hã te za wi, 'Re ihâimana u'âsi mono uburé marĩ pi'uriwi 're ihâimana za'ra mono hã, za te te i'ahâi'rézé hã. Marĩ hã pi'uriwi tiwi 'maihâimana waihu'u õ di za. 27 Marĩ hã aima za'ra wa'aba si, robra na te aima 're iwasu'u za'ra wa'aba mono hã, bâtâ na iwasu'u na, ãma dama 're sahu za'ra wa'aba mono. Uburé pi'uriwi aima wa'aba si, te aima 're iwasu'u za'ra wa'aba mono hã, ma'ãpé sõ'awi dama 're wasu'u za'ra wa'aba mo. 28 'Re aipahi za'ra wa'aba mono tõ, dahâiba te te 're isimroi mono norĩ ma hã. E marĩ wa. Ta norĩ hã dapẽ'ẽzani dahâiba uptabi hã te te 're simroi waihu'u mono õ di. 'Re ihâimana u'âsi mono ma si, te za 're aipahi za'ra wa'aba mo. Ta hã dapẽ'ẽzani dahâiba uptabi hã te te uprosi waihu'u pese di, dahâiba zama ropipa ãma hã. 29 E maparane sire hã da te dasima 're wede za'ra mono ã bâ, misi rob'uiprazé isapotore isurure na hã. Tane nherẽ, niwa ti'ai u hã 'maiwaptã'ã õ di, dâ'â siromo, Aimama 'wa hã ãne tãma 'mairomhâimana da hã, te te tãma 'mai'rui õ nherẽ. 30 Tane duré aséré za'ra wa'wa hã, ai'rã na 're isimasa mono hã sa'rata pese na te 're hâimana za'ra. 31 Tahawa, ma'ãpé 're aipahi za'ra wa'aba mono tõ, a norĩ wa'wa hã aiwa'âbâ za'ẽtẽ uptabi za'ra wa'aba wa, si norĩ i'ahâ uptabi nhipai u.

32 — Ni'wa hã ĩzazei'wa na sõ'awi dama 're siwasu'u mono wamhã, Rob'rãsutu ãma Da'ãma rowairébé ihâimana ãma hã, ĩzama wa za wasu'u sõ'awi ĩzazei'wa na hã, Ĩmama hâiwa ãma 're isãmra mono nho'a. 33 Tazahã, ni'wa hã ĩzazei'õ'wa na danho'a 're siwasu'u mono wamhã, ĩzama te wasu'u õ di za ĩzazei'wa na hã, Ĩmama hâiwa ãma 're isãmra mono nho'a hã, Rob'rãsutu ãma Da'ãma rowairébé ihâimana ãma hã.

34 — Ĩ'ãma rosa'rata za'ra wa'aba tõ, rowẽ, te we i'âri na hã, ti'ai u. Rowẽ, te wei âri õ di. Tazahã, wa tô we ti'â, sib'ézé 'wa pa^a. 35 Da'ra norĩ hã timama da, 're hâimana za'ra mono da, wa tô wei mo ti'ai u hã, da'ra sipi'õ norĩ hã tina norĩ da, duré dasani'aba norĩ hã timaprebaba sipi'õ norĩ da, 're hâimana za'ra mono da. 36 Ãne wa, te za dasisada 're dahâimana za'ra, damama sipoto hawi a'uwẽ nherẽ.

37 — Ni'wa hã ĩzawi nhipai u, timama duré tina, te te 're sawi pese uptabi zahuré mono wamhã, ta hã sadai õ di, ĩzazei'wa 're imorĩ da hã. Duré ni'wa hã ĩzawi nhipai u, ti'ra si'aibâ duré ti'ra sipi'õ te te 're sawi pese uptabi zahuré mono wamhã, ta hã duré sadai õ di, ĩzazei'wa 're imorĩ da hã. 38 Ni'wa hã ĩzazei'wa na 're morĩ da, wedepo'o nhonhi'rãmi tiza'ozéb da, te te âri õ wamhã, ĩzazei'wa 're imorĩ da hã, waihu'u õ di. 39 Ni'wa hã tinho'reptuzé te te sina uwaimrami da wamhã, 'râwi tihâimanazé hã te te sima sawi tõ. Tazahã, ni'wa hã 'râwi tihâimanazé ĩ'u'âbâ te te sima sawi õ wamhã, ta hã te za tinho'reptuzé hã sina uwaimra.

40 — Ni'wa hã te te 're aiwaibui wẽ wa'aba mono wamhã, ta hã te za ai'u'âbâ wa'aba, ĩ'âri wẽ. Tane ni'wa hã te te ĩ'âri wẽ wamhã, we ĩzatõrĩ'wa zama te za âri wẽ. 41 Ni'wa hã 'Re ihâimana u'âsi mono zadawa 'mahârâ'wa hã te te âri wẽ wamhã, tô 'Re ihâimana u'âsi mono zadawa 'mahârâ'wai wa, te za 'Re ihâimana u'âsi mono hã tãma wa'â, tizadawa 'mahârâ'wai ma, za te te iwa'âbâ ne. Duré ni'wa hã 'Re ihâimana u'âsi mono nhimiroti 'madâ'â pese 'wa te te âri wẽ wamhã, tô 'Re ihâimana u'âsi mono nhimiroti 'madâ'â pese 'wai wa, 'Re ihâimana u'âsi mono hã te za tãma wa'â, tizadawa 'madâ'â pese 'wai ma, za te te iwa'âbâ ne.

42 — Ni'wa hã, ĩzazei'wa norĩ wapu na dama 're ihâimana za'ra mono norĩ ma, hâsizé wa, â wahâzé hã tô ĩzazei'wa 're nomro mono wa, ĩnhisi u'âbâ te te tãma õb za'ra wamhã, 'Re ihâimana u'âsi mono te te tãma iwa'âbâzé te te isimini da hã, mare di za.