— Tô sena wa za aima waihu'u za'ra wa'wa, ãne: Ni'wam norĩ hã te ãme tihâimana za'ra dawazari, dâ'â za'ra õ ré, za te te i'madâ'â za'ra hã, 'Re ihâimana u'âsi mono da'ãma 're isib'a'uwẽ mono zé hã siptete uptabi na wei wisi wamhã.

2 Tawamhã bâdâ imropâ na si'utõrĩ pari, Zezusi hã ma tô te te siré simro Pedru, Tiagu duré Zuwãhã zama ẽtẽ 'rãihâ u, siwaprosi hâimana za'ra da. Tame ma tô siwi 'madâ Zezusi hã, sisaprĩ ré hã. 3 Tawamhã i'uza hã hâirã uptabi di. Hâ si'ubuzi uptabi di. Da'uza hâ upsõi'wa hã isine hã te te 'manharĩ waihu'u õ di. 4 Tawamhã isõ'a za'ra ma tô sihâi'ré zahuré, Elias duré Mozésihi me. Ta norĩ hã te Zezusihi ma robzanhamri zahuré. 5 Tawamhã Pedru hã te Zezusihi ma tinha, ãne:

— Rowahutu'wa, irowẽ, ãme wahâimana za'ra wa. Si'ubdatõ, wa za 'ri za'ra ni, romhâ 'manharĩ na. Misi za ate da hã, misi za Mozésihi te da hã, duré Eliasihi te da hã.

6 Tawamhã Pedru hã sisa'rese õ di, te te inharĩzém na hã, pahi uptabi za'ra wa. 7 Taha pari ma tô hâiwa'a hã upsibi za'ra. Ta hawi ma tô damreme hã we tinha, ãne:

— Ã hã ĩ'ra, ĩma isawi uptabi. 'Re wapari pese za'ra wa'aba mono.

8 Tawamhã waptu na isiré 're inomro mono norĩ hã simana wawi te te sô rob'madâ'â za'ra nherẽ, ni'wa hã te te siwi 'madâ'â õ di. Zezusihi si ma tô siwi 'madâ.

9 Tawamhã ẽtẽ 'rãihâ hawi te te si'ra za'ra ré hã, Zezusi ma tô isiré 're inomro mono norĩ hã sadawa uwati pese za'ra, te te rowasu'u za'ra tõ da, te te irob'madâ'â za'ra zém na hã, Ti'ai ãma Dasiré Ipodo hã apâ hâiwa'utu õ ré hã.

10 Tawamhã si'rep si ma tô iré tihâimana za'ra, imreme ré hã. Tane nherẽ, ma tô ãma sima robzanhamri za'ra, te te iwasu'uzém na, apâ za ihâiwa'utuzém na hã.

11 Tahawa te Zezusi hã siwi sadanha, ãne:

— Rowahutu'wa, e marĩ wa, te bété 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te te 're rowasu'u za'ra, i'ru zahi na, Elias za we imorĩ na hã imorĩ'rata na.

12 Tawamhã Zezusi hã ma ãma sada'âbâ za'ra, ãne:

— Tô sena te za Elias hã wei mo imorĩ'rata na, te te robza'ra pese da. Tane nherẽ, e marĩ wa bété, te Ibaihâ Iwazé pese na rob'ui'éré i'uwaibaba na hã tinha, Ti'ai ãma Dasiré Ipodo hã za te te irobzépata za'ẽtẽ na hã duré za da te dasiwi iwẽ'õ na hã. 13 Tane nherẽ, wa za ãne aima waihu'u za'ra wa'wa: Elias hã ma tô we timorĩ pa. Da te dasima iwẽ za'ra zéb zarina, ma tô tãma rob'manharĩ wasété za'ra ni, ãma irob'ui'éré zarina.

14 Tawamhã, tisiré norĩ u apâ sihutu wamhã, ma tô da'madâ'â za'ra imana wawi, da'ahâ uptabi na idahâimana za'ra na hã, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te te isada'rãmi za'ra na hã. 15 Tawamhã Zezusi hã da te dasiwi 'madâ'â wamhã, uburé ma tô ãma tatob'uzu za'ra ni. Ma tô itẽme dasisa're, da te sawi za'ra da. 16 Tawamhã Zezusi hã te anha, ãne:

— E marĩ na, te asiwasu za'ra wa'wa.

17 Tawamhã aibâ hã dawazari isa hã te 'mahâ, ãne:

— Rowahutu'wa, ĩ'ra 'watébrémi hã wa we atẽme saprõ. Wa'uburé hã te te 're mreme nhito, 're mreme mono tõ da. 18 Duré Wa'uburé hã te te 're ahâri mono wamhã, ti'ai u te te 're wabzuri. Tawamhã te za sadaiproi watobro. Te za duré 'wahi sitete. Tahawa te sib'uwa u'âsi. Wa tô aré waptẽ, asiré 're inomro mono norĩ hã wa'uburé te te siwi me da. Tane nherẽ, te te siwi mei waihu'u õ di.

19 Tawamhã Zezusi hã te tãma nharĩ za'ra, ãne:

— E niha bété i'asimi'umnhasi za'ra wa'aba õ. E mahã bâtâ u ai'rata 're ĩnhamra u'âsi aba mono da bâ. E mahã bâtâ u te duré 're asapari ze za'ra wa'aba mono da bâ. Ma'ãpé we ĩma saprõni wa'aba, ai'repudu hã.

20 Tawamhã ma tô itẽme saprõni za'ra. Wa'uburé hã Zezusi te te 'madâ'â wamhã, ai'repudu ma tô hâiba sãsã'ã. Tahawa, ai'repudu hã ti'ai u ma tô waptãrã. Ma tô 're sipizari. Ma tô duré saiproi watobro.

21 Tawamhã Zezusi hã te ai'reputu mama hã sadanha, ãne:

— E niha wahum na te 're hâimana, ai'ra ãne hã.

Ãne ma sada'â, imama hã:

— Sapore hawim haré. 22 Nimahã na hã wa'uburé hã unhama u te za time, duré âi ba, te te wĩrĩ da. Tane nherẽ, aima wapu wamhã, ma'ãpé wa'ãma aime na. Wa'ãma aipẽ'ẽzé na!

23 Tawamhã Zezusi hã ma sada'â, ãne:

— Te ĩma inha, ĩma wapu zô. Uburé marĩ hã wapu di, te te 're ĩzaze za'ra mono norĩ ma hã.

24 Tawamhã awa'awi pesere te imama hã hârâ 'rãihâ na hâ, ãne:

— Wa ai'umnhasi. Ma'ãpé ĩpawapto na, te oto ai'umnhasi za'ẽtẽ da.

25 Tawamhã Zezusi hã itẽme idasi'rã'õtõ na da'ahâ na te te da'a'madâ'â wamhã, ma tô wa'uburé ma rob'ru, ãne:

— Wa'uburé damreme'õ 'manharĩ'wa duré dapo'reptõ 'manharĩ'wa, ai'repudu hawi aiwatobro. Niwamhã apâ asébré zahu tõ.

26 Tawamhã wa'uburé hã, ma tizadari. Sisa'u ma tô ai'repudu hã hâiba sãsã'ã. Taha pari ma tô tirẽ. Dâ'â ne te nomro, isa'u. Tahawa, da'ahâ na te nharĩ za'ra ni, idâ'â na hã. 27 Tane nherẽ, Zezusi hã ai'repudu ma tô pa'â. Ma wahutu, para na sab da.

28 Tawamhã Zezusi hã 'ri para u sébré wamhã, isiré 're inomro mono norĩ hã ma tô siwi sadanha hâiba pisutu, ãne:

— E niha bâ, wa norĩ hã, wa te bété wasiwi mei waihu'u õ di, wa'uburé hã.

29 Tawamhã Zezusi hã ma sada'âbâ za'ra, ãne:

— Ãne hã wa'uburé hã rowaptẽrẽ na si te za 're wairébé.

30 Tawamhã ta hawi ma tô ai'aba'ré. Galiléia wa'waibaba ma tô ro'rahâri za'ra. Tawamhã Zezusi hã te te sima wẽ õ di, da te iwaihu'u za'ra da hã nimame ihâimana na hã, 31 isiré 're inomro mono norĩ ma, hâiba pisutu te te tãma sina nharĩ za'ra wa, ãne:

— Ti'ai ãma Dasiré Ipodo hã te za dasima hâiba nhomri za'ra ni za. Tawamhã aibâ norĩ hã te za siwi tiwĩ. Tane nherẽ, si'ubdatõ bâdâ si'utõrĩ õ ré, te za apâ hâiwa'udu.

32 Tawamhã Zezusi hã tãma isiwasu'u za'ra zém na hã te te siwi sadaihu'u õ di. Tane nherẽ, te te duré siwi sadanharĩ waihu'u õ di, tãma pahi za'ra wa.

33 Tawamhã Zezusi hã duré isiré 're inomro mono norĩ me ma tô aihutu, Cafarnau na 'ri nho'õmo nhisi u. Tame 'ri para u sisisi wamhã, Zezusi hã ma tô isiré 're inomro mono norĩ hã sadanharĩ za'ra, ãne:

— E marĩ na te bâdâdi na hã we asima irobzanhamri za'ra wa'aba mo.

34 Tane nherẽ, te ari'iwi tihâimana za'ra, bâdâdi na hã te te sima robzanhamri za'ra mono wa, ni'wa hã danhipai u dama pire zô.

35 Tawamhã Zezusi hã ma tô nhamra. Isiré 're inomro mono norĩ zô ma tô hâ. Ãne te tãma nharĩ za'ra:

— Ni'wa hã danhipai u dama pire da wamhã, da'rãsutu u 're hâimana mono. Duré dama romhuri'wa na 're hâimana mono.

36 Tawamhã ai'uté hã ma tô pa'â. Iwa'wab za'ra ma tisã. Tinho'utu ma duré ti'â. Taha pari, te isiré 're inomro mono norĩ ma tinha, ãne:

37 — Ni'wa hã ĩnhisi na, ai'uté te te âri wẽ wamhã, ta hã te za ĩ'âri wẽ, i'u'âbâ. Ni'wa hã te te ĩ'âri wẽ wamhã, ĩwétési te te ĩ'âri wẽ õ di za. We ĩzatõrĩ'wa zama te za âri wẽ.

38 Tawamhã Zuwã hã te Zezusihi ma rowasu'u, ãne:

— Rowahutu'wa, aibâ hã wa tô wasiwi 'madâ'â ni, asisi na wa'uburé ma, te te irob'ru hã. Tane nherẽ, wa tô tiwi sawi za'ra ni, te te 'manharĩ tõ da, wasiré 're morĩ õ wa.

39 Tawamhã Zezusi hã ma ãma sada'â, ãne:

— Mare di. Tiwi sawi za'ra wa'aba tõ. Ni'wa hã ĩnhisi na marĩ dama i'manharĩ waihu'u'õ te te 'manharĩ wamhã, taha pari te te ĩ'ãma wasété dai õ di. 40 E marĩ wa. Ni'wa hã wazada ihâimana õ hã, ta hã waniwĩmhã. 41 Tô sena wa za aima waihu'u za'ra wa'wa, ãne: A norĩ wa'wa Cristuhu zazei'wai wa, ni'wa hã misi hâsizéb ré, â te te aima õ wa'aba wamhã, 'Re ihâimana u'âsi mono hã te te tãma iwa'âbâzé te te isimini da hã mare di za.

42 Tawamhã Zezusi hã ma ãma uzusi, ãne:

— Ni'wa hã tiwasédé te te i'manharĩ u'âbâ, ã hã ai'uté norĩ ĩzazei'wa na 're ihâimana za'ra mono hã nima hã te te ĩrẽme wamhã, iwẽ hã aré ni'wa, da te ime da hã âporé wa, ẽtẽ tõmo wawẽ na butu wazi ré. Tane nherẽ, 'Re ihâimana u'âsi mono za te te tãma irob'manharĩzé hã isipai u pipa uptabi di. 43 Tawamhã duré asib'rata hâiba amo hã 're aiwasété mono da, te te 're 'manharĩ mono wamhã, ma'ãpé sizâri, asisiti me da. Iwẽ hã dahâimanazé isi'utõrĩ'õ u asib'rata misi ré, i'asébré da hã, asib'rata zahuré ré ropipa u i'aimorĩ nhipai u, uzâ idâ'â'õ u. 44 [Tamemhã dahâiba uprosi'wa hã dâ'â õ di. Duré uzâ hã dâ'â waihu'u õ di.] 45 Duré aipara hâiba amo hã 're aiwasété mono da, te te 're 'manharĩ mono wamhã, ma'ãpé sizâri, asisiti me da. Iwẽ hã aipara misi ré i'asébré da hã, dahâimanazé isi'utõrĩ'õ u, aipara zahuré ré ropipa u 'Re ihâimana u'âsi mono te te i'aime nhipai u. 46 [Tamemhã dahâiba uprosi'wa hã dâ'â õ di. Duré uzâ hã dâ'â waihu'u õ di.] 47 Duré atõmo hâiba amo hã 're aiwasété mono da, te te 're 'manharĩ mono wamhã, ma'ãpé wazere. Iwẽ hã 'Re ihâimana u'âsi mono da'ãma 're isib'a'uwẽ mono zéb u atõmo misi ré i'asébré da hã, atõmo zahuré ré ropipa u 'Re ihâimana u'âsi mono te te i'aime nhipai u. 48 Tamemhã dahâiba uprosi'wa hã dâ'â õ di. Duré uzâ hã dâ'â waihu'u õ di.

49 — Dahâiba mono bâ te za 're dahâimana za'ra, 'Re ihâimana u'âsi mono ma danhoprubzé, sa na da te 're iwarĩrĩ za'ra mono ne, taha pari da te 're izata za'ra mono ne. 50 Sa na dasai warĩrĩzé hã wẽ di. Tane nherẽ, siwamnarĩ wamhã, e niha te za ihiri wẽ wa'wa apâ, wẽ na hâimana da hã. Ãne wa, 're aihâimana za'ra wa'aba mono, dasa hã sa na warĩrĩ wa, se na 're ihâimana za'ra mono ne. Duré ato sina rowẽ na asiré 're aihâimana za'ra wa'aba mono.