à hã ibaihâ na rob'ui'éré'wa nhisi Lucas na isisi hã. Duré ta hã, Atus na rob'ui'éré'wa. Ta hã aré dawede'wa (Colosu 4.14). Zezusihi wasu'u na rob'ui'éré'wa hâiba amo norĩ, ta norĩ hã Zudeu, Mateus, Marcus, duré Zuwã. Lucasihi si Zudeu õ di. Duré Teofiluhu ma tisiré zudeu'õ ma, ma tô ã hã ibaihâ na rob'ui'éré hã tisõ, Lucas hã.

Tawamhã Lucas hã ma tô Zezusihi wasu'u na rob'ui'éré, iwaptã'ãzém hawi sada 're iromhâimana mono zém na hã, duré hâiwa u apâ imorĩzéb u. Ma tô duré wama ãma rowasu'u za'ẽtẽ za'ra, Zezusihi nhimirowahutuzém na hã. Ma tô duré wama wasu'u za'ra, Zezusi hã ti'ai ãma wasine a'uwẽ na ipotozém na hã. Ma tô duré wama waihu'u za'ra, Zezusi hã a'uwẽ mono bâ te te 're da'anho'reptui mono da, wei imorĩ na hã, duré Zudeu norĩ tẽmep si we imorĩ õ na hã. Tahawa, ma tô Zezusi hã dama siwaihu'u, ti'ai ãma dasiré ipoto na hã.

Duré Lucasihi nhimi'ui'éré zarina, wa za waihu'u za'ra ni, Zezusi hã ihâzé ré norĩ ãma 're ipẽ'ẽzé mono zém na hã, duré isimarĩ'õ norĩ ãma, duré da te dasiwi 're iwẽ'õ za'ra mono norĩ ãma, duré samaritanu na dawamri norĩ ãma, duré wasété na 're inomro mono norĩ ãma hã.