à hã ibaihâ na rob'ui'éré'wa nhisi hã, Zuwã na isisi. à hã Zezusihi siré 're imorĩ, Tiaguhu sisãnawã. Ta norĩ hã tepe mrami na aré romhuri'wa zahuré. Duré Zuwã ihâiba amo hã te duré 're hâimana, â dawabzuri te te dama 're i'ab'manharĩ mono hã. Taha nhisi hã, Zuwã Batista. Tazahã ã hã ibaihâ na rob'ui'éré'wa hã ta hãi õ di.

Zuwã hã ma tô wama wasu'u za'ra, Zezusi hã tô sena 'Re ihâimana u'âsi mono 'ra uptabi na hã. Zuwã 20.31 ãma te ãhã wasu'u hã tihâiba. Ma tô duré wama waihu'u za'ra, Zezusi hã Danho'reptui'wa na ni'wam norĩ hã te te sina 're i'umnhasi za'ra mono hã rowẽ na 're idahâimana u'âsi za'ra mono zé hã za ta norĩ si te te sina 're i'uwaimrami za'ra mono na hã. Zuwã hã ma tô duré wama ãma romnhimiré'é za'ra, marĩ imono bâ, wahâimanazém na wa te ãma 're irosa'rata za'ra mono zéb da hã. Â na ma tô wama ãma romnhimiré'é za'ra duré i'u'ẽtẽ wapu na, duré rowa'a na duré pone'ẽrebâ na duré pone'ẽrebâ 'madâ'â'wa na zama, duré uva'ru na zama.