— E marĩ da, te hâiba ré ihâimana zô asõpré wa'wa, idâ'â norĩ 're isimi'wara mono zéb ãma hã. 6 Ta hã ãme oto hâimana õ di. Apâ ma tô hâiwa'udu! Ma'ãpé ãma aipo're pu'u za'ra wa'aba, Galiléia ãma asiré hâimana za'ra wa'aba ré, te te sina aima iroti za'ra wa'aba zém na hã, ãne: 7 “Tô i'ru zahi, Ti'ai ãma Dasiré Ipodo hã dawasété na 're idanomro mono norĩ nhib'rata da te ihâiba nhomri da hã, duré wedepo'o nhonhi'rãmi na da te isasõmri da hã, duré si'ubdatõ bâtâ ãma apâ za ihâiwa'utu da hã.”

8 Tahawa, ma pi'õ norĩ hã Zezusihi mreme na oto tipo're pu'u za'ra.

9 Tawamhã taha pari oto si'aba'réi wamhã, ma tô rowasu'u pese za'ra, Zezusihi siré 're inomro mono norĩ 11 na ihâiba za'ra norĩ ma, duré uburé isiré isazei'wa norĩ isiré ihâimana za'ra norĩ ma zama. 10 Pi'õ norĩ nhisi hã, ãne: Maria Madalena duré Zuãna duré Maria, Tiaguhu na. Ã norĩ hã duré pi'õ norĩ isiré isi'aba'ré norĩ zama, ma tô Zezusihi zadawa wasu'u'wa norĩ ma hã rowasu'u za'ra. 11 Tane nherẽ, te te ãma saze za'ra õ di, isimirowasu'u za'ra na hã, 'rãsiwamnarĩ za'ra newa. 12 Tazahã Pedru hã ma tô wahudu. Ab're u ma tô wara. Wisi wamhã, ma tô ahâpâ, te te rob'madâ'â da, ab're u. Tane nherẽ, ma tô zazahâ ihâirã i'ubuzép si 'madâ. Taha pari ma tô apâ mo. Ma tô ãma titob'uzu, iromhâimanazém na hã.

13 Tawamhã tô taha bâtâ na, te Zezusihi zazei'wa norĩ hã tineb zahuré, Emaus na 'ri wa'õtõ nhisi u. Zeruzalẽ hawimhã Emaus u hã, 11 quilometru na ti'ai pibuzé hã. 14 Ta norĩ hã te bâdâdi na neb zahuré sina, te te sima rowasu'u zahuré, uburé iromhâimanazém na hã. 15 Te te sima rowasu'u zahuré mono ré, duré ãma sisada'âbâ zahuré mono ré, ma tô Zezusi hã ãma tiwisi zahuré. Tawamhã te oto mo, isiré zahuré. 16 Tane nherẽ, 'Re ihâimana u'âsi mono hã marĩ ma tô tãma 'manharĩ zahuré, Zezusi te te waihu'u zahuré tõ da. 17 Tawamhã Zezusi hã ma tô sadanharĩ zahuré, ãne:

— E marĩ na, te asima irobzanhamri aba mo, bâdâdi na ane wa'aba sina hã.

Tahawa, ma tô mazahâri zahuré, ubu ze zahuré ãna robzei'õ wa. 18 Tawamhã ihâiba amo, Cleopa na isisi hã ma tô Zezusihi ma tinha, ãne:

— Ãté niwamhã asiwaprosi aima iwaihu'u õ, Zeruzalẽ 're marĩ ihâimana za'ra zém na, ã nimosi iwairébé mono zém na hã.

19 Tahawa, Zezusi hã ma tô asa sadanharĩ zahuré, ãne:

— E marĩ hâimana bâ.

— Zezusi, Nazaré ãma iprédu ma iromhâimanazém na, wa wasima robzanhamri ni. Ta hã 'Re ihâimana u'âsi mono zadawa 'mahârâ'wa. Imreme nhiptede, duré marĩ iwẽ te te dama 're i'ab'manharĩ wẽ mono, 'Re ihâimana u'âsi mono ma hã, duré uburé dama zama. 20 Tane nherẽ, sasedoti ipire norĩ hã duré wama roti'wa norĩ hã, ma tô siwi tisõ, da te tãma pisutu da, da te dasiwi wĩrĩ da, duré wedepo'o nhonhi'rãmi na da te dasiwi sasõmri da. 21 Wa tô sô 're wanhimipari za'ra aré, Izaraéu nhihudu norĩ hã te te sõ'reptu za'ra da newa, danhimiwada'uri zarina oto 're hâimana za'ra mono tõ da. Ãhã na hã, si'ubdatõ bâdâ ma tô ãma ne, uburé iromhâimanazém na hã. 22 Nima norĩ pi'õ norĩ, wasiré isazei'wa norĩ nhimirowasu'u na wa tô ãma watob'uzu za'ra ni. Ta norĩ hã ãhã na mararé ma tô ai'aba'ré, ab're u. 23 Tane nherẽ, ihâiba hã te te siwi sõpẽtẽ õ di. Apâ watẽme sihutu wamhã, ma tô wama rowasu'u za'ra, hâiwa hawi romhuri'wa norĩ itẽmeb za'ra isihâi'ré zahuré na hã. Ta norĩ hã ma tô u tãma rowasu'u za'ra, hâiba ré ihâimana na hã. 24 Tahawa nima norĩ wasiré isazei'wa norĩ hã ma tô duré ab're u tineb zahuré. Tawamhã ma tô sõpẽtẽ zahuré, pi'õ norĩ hã uburé te te irowasu'u za'ra zéb zarina. Tane nherẽ, ta norĩ hã te te duré sõpẽtẽ zahuré õ di, Zezusi hã.

25-26 Tawamhã Zezusi hã ma tô tãma nharĩ zahuré, ãne:

— E niha i'ai'rãnhimiza'rese aba õ! Duré i'asapari nhimahudu aba õ, 'Re ihâimana u'âsi mono zadawa 'mahârâ'wa norĩ te te ãma irob'ui'éré za'ra zé isadaihu'u aba da hã. Oro tô i'ru zahi za, Danho'reptui'wa da, 'Re ihâimana u'âsi mono te te ipisudu za a'â te te irobzépata da hã, taha parip si isimiroti pire hã duré dama iwazé pese zé hã 'Re ihâimana u'âsi mono te te tãma pisutu da, iwẽ uptabi hã.

27 Tawamhã te te tãma nharĩ zahuré pari, Zezusi hã ma tô tãma a'rãzarõtõ zahuré, iwasu'u na, uburé Ibaihâ Iwazé pese na rob'ui'éré ãma isimi'wara siromo hã. Mozésihi nhimi'ui'éré na ma tô ãma tãma sãna'rata zahuré, duré uburé 'Re ihâimana u'âsi mono zadawa 'mahârâ'wa norĩ te te ãma irob'ui'éré za'ra zém na.

28 Tawamhã 'ri wa'õno Emaus u te te oto rob'umhutu za'ra wamhã, Zezusi hã ma tô tihâiba, ni'wa hã za romhâ na uptabi imorĩ ne. 29 Tane nherẽ, sadahutu ãna ma tô tãma nharĩ zahuré, ãne:

— Wasiré a'â asãmra. Te za oto tirobra. Ma tô tihâiwahâ pesere.

Tahawa, Zezusi hã ma tô isiré tizébré zahuré, 'ri para u. 30 Tawamhã meza na isiré sãmra zahuré wamhã, i'u'ẽtẽ wapu hã ma tô ti'â. 'Re ihâimana u'âsi mono ãma te tiwata. Taha pari ma tô tãma awẽ'ẽ zahuré. 31 Tawamhã 'Re ihâimana u'âsi mono, ma tô ito hã oto tãma 'ridawa zahuré. Tahawa ma tô oto waihu'u zahuré, Zezusi na. Tane nherẽ, ma tô tiwi aimani zahuré. 32 Tawamhã ma tô sima nharĩ zahuré, ãne:

— Õne wa, wapẽ'ẽ 'remhã rowẽ isa'ẽne hã, e uzâ iwa'ro uptabi ne te te wa'ahâri ã bâ bété, bâdâdi na Ibaihâ Iwazé pese na rob'ui'éré na te te wei wama rowasu'u mono ré hã.

33 Tawamhã ma tô tiwahutu zahuré. Awa'awi pesere waptu na ma tô apâ tineb zahuré, Zeruzalẽ u hã. Simasisi wamhã, Zezusihi zadawa wasu'u'wa norĩ 11 na ihâiba za'ra hã ma tô sõpẽtẽ za'ra, siré isi'rã'õno hã aimawi isazei'wa norĩ me. 34 Tawamhã isadawa wasu'u'wa norĩ hã ma tô nharĩ za'ra, ãne:

— Tô sena, Wanhib'apito hã ma tô hâiwa'udu. Simahã ma, ma tô sihâi'ré.

35 Tawamhã maparane isazei'wa norĩ hã ma tô rowasu'u zahuré, bâdâdi na neb ré, tãma iromhâimana zahuré zém na hã, duré Wanhib'apito te te iwaihu'u zahuré zém na, i'u'ẽtẽ wapu te te tãma awẽ'ẽ zahuré wapsi.

36 Tawamhã taha na te te sima rowasu'u za'ra ré, ma tô Zezusi hã tãma sihâi'ré za'ra, iwa'wab za'ra. Ãne te tãma nharĩ za'ra:

— Rowẽ hã, asiré 're ihâimana za'ra wa'aba mono da si!

37 Tawamhã ma tô tãma a'rãmi pese za'ra. Ma duré tãma tipahi pese za'ra. Te ãma rosa'rata za'ra, dahâiba warõ te te 'madâ'â za'ra newa. 38 Tane nherẽ, ma tô Zezusi hã tãma nharĩ za'ra, ãne:

— E marĩ da, ma aipahi za'ra wa'wa. E marĩ da, ma duré aipẽ'ẽ 're asiwawã za'ra wa'wa. 39 Ma'ãpé 'madâ'â za'ra wa'aba, ĩnhib'rada duré ĩpara zama. Tô wa hã! Ma'ãpé ĩ'upi za'ra wa'aba. Duré ĩ'madâ'â za'ra wa'aba. Dahâiba warõ hã nhi õ di, duré hi õ di. Tazahã wa hã asiwi ĩ'madâ'â 'wa hã, tô ĩhâiba uptabi.

40 Tawamhã ãne tãma siwasu'u za'ra parimhã, Zezusi hã ma tô tinhib'rada hã tãma sõ'a za'ra, duré tipara zama. 41 Tawamhã isiré 're inomro mono norĩ hã toi uptabi za'ra wa, duré ãma tob'uzui pese za'ra nherẽ, zahadu ãma simizaze waihu'u za'ra õ di. Tawamhã Zezusi hã te sadanharĩ za'ra, ãne:

— E marĩ, aima hâimana za'ra wa'aba õ di, te i'rẽne da hã.

42 Tahawa, tepe zebre wa'õno hã ma tô tãma sõmri za'ra. 43 Ta hã ma tô ti'â. Ma tô ti'rẽ, isõ'a za'ra. 44 Taha pari te tãma nharĩ za'ra, ãne:

— Asiré ĩhâimana za'ra wa'aba ré hã, wa tô aima ĩsiwasu'u za'ra wa'wa, tô i'ru zahi zarina uburé za tô ĩma iromhâimana za'ra na hã, ĩ'ãma rob'ui'éré zarina 'Re ihâimana u'âsi mono nhimiroti zahi na Mozési te te ãma irob'ui'érézéb zarina, duré 'Re ihâimana u'âsi mono zadawa 'mahârâ'wa norĩ nhimi'ui'éré zarina, duré Salmu ãma rob'ui'éré zarina zama.

45 Tawamhã Zezusi hã ma tô oto i'rã tãma 'ridawa za'ra, Ibaihâ Iwazé pese na rob'ui'éré isimi'wara hã te te sadaihu'u za'ra da. 46 Ãne ma tô tãma nharĩ za'ra:

— Ibaihâ Iwazé pese na rob'ui'éré hã te daba'wara siro, Danho'reptui'wa da, 'Re ihâimana u'âsi mono te te ipisudu hã, za tô te te irobzépata na hã, duré taha pari za apâ ihâiwa'utu na hã si'ubdatõ bâtâ ãma. 47 Duré isisi na, dawasété na 're idasi'ruiwapari za'ra mono zéb zarina, 're dasipizari za'ra mono wa, 'Re ihâimana u'âsi mono, dawasédé te te da'ãma 're i'ab'madâ'â mono õ zé hã, te za uburé dapoto mono bâ oto da te dasima 're wasu'u za'ra. Ta hã Zeruzalẽ ãma te za tinhana'rata. 48 A norĩ wa'wa ma tô ĩ'ãma i'madâ'â za'ra wa'wa, uburé ã hã marĩ mono hã. 49 Duré Ĩmama te te ãma iropisudu hã wa za we atẽme satõrĩ za'ra wa'wa. Tane nherẽ, ãme Zeruzalẽ 're, a'â sô asimipari za'ra wa'aba, hâiwa hawi 'Re ihâimana u'âsi mono waihu'u pe iwaibui wa'aba zéb u.

50 Taha pari, Zezusi hã ma tô isiré 're inomro mono isazei'wa norĩ hã te te simro 'ri nho'õmo hawi, Betãnia na 'ri wa'õtõ nhisi 'rata ro 're ihâimana mono u. Tame ma tô tinhib'rada hâimo wẽ. Iwẽ hã ma tô tãma pisutu za'ra. 51 Iwẽ te te tãma pisutu za'ra ré, Zezusi hã ma tô oto rẽme za'ra. Imama ma tô oto ti'â, hâiwa u. 52 Tawamhã ma tô ãma tiwata za'ra. Taha pari ma tô apâ ai'aba'ré Zeruzalẽ u, ipẽ'ẽ 'remhã rowẽ 'masisi uptabi za'ra sina. 53 Tawamhã 'Re ihâimana u'âsi mono nhorõwa ãma te bâtâ sidâpâsi nasi tihâimana za'ra. Te nasi ãma tiwata u'âsi za'ra.