— Aipahi wa'aba tõ! Ĩma waihu'u pese di, Zezusihi zô i'airĩtĩ aba na hã, wedepo'o nhonhi'rãmi na da te dasiwi isasõmri zô. 6 Tane nherẽ, ãme hâimana õ di. Apâ ma tô hâiwa'udu, te te sina irotizéb zarina. Ma'ãpé we ane wa'aba, sabui wa'aba da, inomrozé hã. 7 Ma'ãpé duré sa'ẽtẽ ane wa'aba, isiré 're inomro mono norĩ ma, rowasu'u wa'aba da, ãne: “Apâ ma tô hâiwa'udu. Asõwa te oto timorĩ za'ra wa'wa, Galiléia u. Tame te za asiwi i'madâ'â 'wa.” Ãne si wa aima rowasu'u wa'wa.

8 Tawamhã waptu na ma tô tipusi zahuré ab're hawi, pahi uptabi zahuré wa. Tane nherẽ, tãma irowẽ uptabi zahuré. Ma tô asamro, isiré 're inomro mono norĩ ma, te te rowasu'u zahuré da. 9 Tawamhã waptu na rosa'rese õ ré, Zezusi hã ma tô sõpẽtẽ zahuré. Ãne te tãma nharĩ zahuré:

— Rowẽ na 're aihâimana aba mono.

Tawamhã pi'õ norĩ hã 'râwi ma tô itẽme tineb zahuré. Ipara ãma ma tô sawi zahuré. Ma tô duré ãma tiwata zahuré.

10 Tawamhã Zezusi hã te tãma nharĩ zahuré, ãne:

— Aipahi wa'aba tõ! Mo oto ane wa'aba, ĩsisãnawã norĩ ma, ĩwasu'u wa'aba da, Galiléia u si'aba'ré da. Tame te za siwi ĩ'madâ za.

11 Tawamhã pi'õ norĩ hã zahadu bâdâdi na hâimana zahuré ré hã, nima norĩ dasi'wapéi 'manharĩ'wa norĩ, ab're te te siwi i'madâ hã ma tô 'ri wa'õtõ u ai'aba'ré. Ta norĩ hã ma tô sasedoti ipire norĩ ma rowasu'u pese za'ra, uburé iromhâimanazém na hã. 12 Tawamhã sasedoti ipire norĩ hã ma tô duré si'rã'õtõ, Zudeu norĩ ma roti'wa norĩ me. Rowa'õno hã ma tô siwi 'manha. Tahawa, rob'uiprazé hã sa'ẽtẽ na ma tô sõmri za'ra, dasi'wapéi 'manharĩ'wa ab're 'madâ'â'wa norĩ ma. 13 Ãne ma tô tãma roti za'ra:

— Ãne dama rowasu'u za'ra wa'aba za: Isiré 're inomro mono norĩ hã, barana ma tô we ai'aba'ré, wanhotõ za'ra ré. Tahawa ma tô siwi simi'u, Zezusihi hâiba hã. 14 Ãne hã, Zudéa ãma apito hã rowasu'u te te wapari wamhã, wamreme na wa za ãma ai'uté za'ra ni za, tô ãne iromhâimana na hã. Ãne wamhã, marĩ ipire asada hâimana za'ra wa'aba õ di za.

15 Tawamhã dasi'wapéi 'manharĩ'wa ab're 'madâ'â'wa norĩ hã ma tô rob'uiprazé hã waibu. Sasedoti, tisiré norĩ ma ipire norĩ hã te te tãma i'ru za'ra zéb zarina, ma tô 'manharĩ za'ra. Tahawa, ã hã rowasu'u zadawa nhipe hã ma tô ropé Zudeu norĩ 'remhã. Ã bâtâ na zama te 're hâimana.

16 Tawamhã Zezusihi siré 're inomro mono 11 na ihâiba za'ra norĩ hã ma tô ai'aba'ré, Galiléia u. Tame ẽtẽ 'rãihâ u ma tô aihutu, Zezusi te te tãma ipisutu za'ra zéb u. 17 Tawamhã Zezusi hã te te siwi sãmri wamhã, ma tô ãma tiwata za'ra. Tane nherẽ, nima norĩ hã ma tô ãma siwawã za'ra. 18 Tawamhã Zezusi hã ma tô 'râwi itẽme timorĩ za'ra. Ãne ma tô tãma siwasu'u za'ra:

— Ĩmama 'Re ihâimana u'âsi mono hã ma tô ĩpisutu, isadawa para ĩpire na 're ĩhâimana mono da, hâiwa ãma duré ti'ai ãma zama. 19 Tahawa, mo oto ropéi wa'aba, uburé a'uwẽ mono bâ. Dama ĩzadawa wasu'u za'ra wa'aba mono, ĩnhimiroti 'madâ'â'wa 're danomro mono da. Duré ĩzazei'wa norĩ ma, â dawabzuri hã 're 'manharĩ za'ra wa'aba mono, Ĩmama nhisi na, duré Ĩnhisi na duré Ĩmama Pẽ'ẽzani nhisi na. 20 Duré tãma 're roti pese za'ra wa'aba mono, ĩnhimiroti uburé te aima i'ru za'ra wa'wa hã te te 're 'madâ'â pese za'ra mono da. Duré ãma aipo're simrami za'ra wa'aba tõ, ãne na hã: Bâtâ sidâpâ wa za asiré 're ĩhâimana u'âsi za'ra wa'wa, irob'rãsutuzéb u.