5 Erodi hã Zudéa na danhipti'a nho'õmo nhisi ãma, apito na 're hâimana mono ré hã, te 're hâimana sasedoti Zacaria na isisi hã. Ta hã sasedoti Abiasihi te, sasedoti norĩ ubumroi 'remhã. Imro hã Izabéu na isisi, Arãhã nhihudu.

6 Ta norĩ hã te 'Re ihâimana u'âsi mono ma, i'uwaibaba na si 're hâimana zahuré. Uburé Danhib'apito nhimiroti zahi te uburé te te 're ab'madâ'â pese zahuré. 7 Tane nherẽ, 'ra zahuré õ di, Izabéu hã 'ra waihu'u õ wa, duré oto ãma wahub za'ẽtẽ zahuré wa.

8 Nimahã bâtâ na hã, 'Re ihâimana u'âsi mono nhorõwa 'ri 'rãihâ ãma, Zacaria hã te tite 'manha, sasedoti nhimiromhuri hã, romhuri te te i'manharĩzéb da hã, bâdâ tãma ihâimanazéb ãma. 9 Sasedoti norĩ hâimanazéb zarina, ma tô Zacaria hã siwi pisutu, ẽtẽre te te siwi ime na, wedewati isadaze hã wedezane na danhoprubzé, da te 're isa'ra mono zéb ãma, te te zata da. Tahawa ma tô ãzé, Uburé Danhib'apito nhorõwa 'ri 'rãihâ u hã. 10 Wedewati isadaze te te zata ré, te rowi idasi'ubumro norĩ hã rowaptẽrẽ za'ra ni. 11 Tawamhã Uburé Danhib'apito ma hâiwa hawi romhuri'wa hã ma tô Zacariaha nho're tãma sihâi'ré. Danhoprubzé wedezane, da te 're isa'ra mono zém nhimire niwĩ te za, hâiwi. 12 Tawamhã Zacaria hã te te 'madâ'â wamhã, ma tô tipahi pese. Marĩ te te duré 'manharĩ waihu'u õ di. 13 Tane nherẽ, hâiwa hawi romhuri'wa hã ma tô ãne tãma tinha:

— Zacaria, aipahi tõ. 'Re ihâimana u'âsi mono hã, tiwi irowaptẽrẽzém na ma tô aimreme wapa. Tahawa Izabéu aimro hã te za ti'ra. Tawamhã poto wamhã, Zuwã na te za isisi za. 14 Ipotozé hã rowẽ isa'ẽne te za sina waze, aima hã. Da'ahâ na te za duré dasima rowẽ za'ra ni, ipotozém na hã. 15 E marĩ wa. Ta hã, Uburé Danhib'apito tõmo nho'remhã te za pire na 're hâimana. Uva 'rãi wa'u isé hã te te 're hâsi mono õ di za, duré âzé zama. Duré poto hawim haré, te za 'Re ihâimana u'âsi mono Pẽ'ẽzani ré sa'ẽtẽ uptabi na hã 're mo. 16 Tawamhã ta hã te za apâ a'ãwisi Izaraéu nhihudu norĩ hã, Uburé Danhib'apito u, ite za'ra 'Re ihâimana u'âsi mono u. 17 Uburé Danhib'apito nhowa te za wei mo, siptete na. Duré 'Re ihâimana u'âsi mono zadawa 'mahârâ'wa Elias siptete na 're ihâimana mono ne, te za 're hâimana. Te za duré te te 're ab'manharĩ damama norĩ hã ti'ra norĩ me, rowẽ na apâ siré 're hâimana za'ra mono da, duré 'Re ihâimana u'âsi mono zadawa 'madâ'â õ 'wa norĩ hã rowaihu iwẽ na 're hâimana za'ra mono da, i'uwaibaba na 're ihâimana za'ra mono norĩ ne. Ãne wamhã, te za da'aza'ra pese, Uburé Danhib'apito zô.

18 Tawamhã Zacaria hã te asa sadanha hâiwa hawi romhuri'wa, ãne:

— E niha wa za waihu'u pese, ta hã tô sena na hã. Wa tô ĩsi'ihi pese, duré ĩmro zama.

19 Tawamhã hâiwa hawi romhuri'wa hã ma asa sada'â, ãne:

— Wa hã Gabriéu, 'Re ihâimana u'âsi mono ma romhuri'wa. Ta hã ma tô we ĩzatõ, Rowasu'uwẽ hã te we aima âri da. 20 Te aima irowasu'uzém na hã, uburé te za tiromhâiba, bâdâ i'uwaibaba iwa iwaptã'ãzém na. Tane nherẽ, ãma ĩzazei õ di. Tahawa te za aimreme õ. Aimreme watobro õ di za, ai'ra ipotozéb u hã.

21 Taha ré hã, da'ahâ na te Zacariaha zô mapari za'ra ni rowimhã. Ma tô duré ãma tatob'uzu za'ra ni, sô rowaptâ'â wa, 'Re ihâimana u'âsi mono nhorõwa 'ri 'rãihâ 'remhã. 22 Rob u watobro wamhã oto, Zacaria hã mreme watobro waihu'u õ di. Tawamhã ma tô ãma rosa'rata waihu'u za'ra ni, 'Re ihâimana u'âsi mono nhorõwa 'ri 'rãihâ 'remhã sõtõ 'rowim ne, marĩ te te i'madâ'â na hã. Tawamhã mreme watobro waihu'u õ wa, ma tô tinhib'rata na si dama rowasu'u.

23 Tawamhã Zacaria hã, romhuri 'Re ihâimana u'âsi mono nhorõwa 'ri 'rãihâ 'remhã tite bâtâ mono hã te te 'rãsutu pari, tinhorõwa u ma tô oto mo. 24 Tawamhã suru na ãma ronomro parimhã, Izabéu imro hã ma tô oto tiwasã. Tahawa, imrotõ na a'amo isi'utõrĩ na hã, 'ri 'rep si ma tô hâimana.

25 Tawamhã Izabéu hã ma tô ãne tinha:

— Uburé Danhib'apito hã ma tô oto ĩpawapto. Da te oto dasiwi 're ĩwẽ'õ mono õ di za, ĩ'ra õ wa.

26 Tawamhã imropâ na a'amo si'utõrĩ wamhã, Izabéu iwasãzém na hã, 'Re ihâimana u'âsi mono ma tô satõ, hâiwa hawi romhuri'wa Gabriéu hã, Galiléia ti'ai ãma, 'ri wa'õno 're ihâimana mono Nazaré na isisi u. 27 Tawamhã hâiwa hawi romhuri'wa hã ma tô sihâi'ré pi'õ ihâiba té i'ubuni ma, za imro da hã, Zuzé na aibâ isisi ãma. Zuzé hã apito Davihi nhihudu. Pi'õ ihâiba té i'ubuni nhisi hã, Maria na. 28 Tawamhã hâiwa hawi romhuri'wa Gabriéu hã ma tô Mariaha ma tinha, ãne:

— Maria, rowẽ na 're i'aihâimana mono da si. 'Re ihâimana u'âsi mono hã ma tô aiwẽsã. Uburé Danhib'apito hã te asiré tihâiba.

29 Tane nherẽ, Maria hã hâiwa hawi romhuri'wa te te tãma inharĩzé te te wapari wamhã, niha hã te te rosa'rata waihu'u õ di. Tahawa ma tô ãma rosa'rata pese, marĩ te te wasu'u zô, timreme na te te isawizé hã. 30 Tawamhã hâiwa hawi romhuri'wa hã te duré tãma tinha, ãne:

— Maria, aipahi tõ. 'Re ihâimana u'âsi mono hã ma tô aiwẽsã. 31 Tahawa, te za aiwasã. Ai'ra hã te za aima podo, 'watébrémi na. Poto wamhã, Zezusi na te za isisi. 32 Ta hã dama pire uptabi di za. Te za duré da te 're sisi za'ra, 'Re ihâimana u'âsi mono Danhipai u 're ihâimana mono 'ra na. Tawamhã Uburé Danhib'apito 'Re ihâimana u'âsi mono hã te za tãma pisutu, si'apito da, ihi'rada Davi, apito na 're ihâimana mono ne. 33 Tawamhã ta hã te za Apito na 're hâimana u'âsi, Zacoho nhihudu norĩ ma hã. Duré te te 're ida'a'madâ'â mono zé hã, niwa si'utõrĩ õ di za.

34 Tawamhã Maria hã te sadanha, hâiwa hawi romhuri'wa, ãne:

— E niha wa za ĩwasã, niwa aibâ hã te sa'rese õ nherẽ.

35 Tawamhã hâiwa hawi romhuri'wa hã ma ãma sada'â, ãne:

— 'Re ihâimana u'âsi mono Pẽ'ẽzani hã te za we atẽme mo. Duré 'Re ihâimana u'âsi mono Danhipai u uptabi 're Ihâimana mono waihu'u pe hã te za ti'awã na ai'upsi. Tahawa 'watébrémi za ipodo hã te za da te 're sisi za'ra, 'Re ihâimana u'âsi mono 'ra Iwẽ uptabi na. 36 Ana wapté Izabéu zama te ai'uté ré tihâiba, hâiba prédu pese nherẽ. 'Ra waihu'u ãna, da te tãma 're nharĩ za'ra mono nherẽ, te oto a'amo imropâ na tihâiba, ai'uté ré hã. 37 E marĩ wa. 'Re ihâimana u'âsi mono ma hã, marĩ i'manharĩ waihu'u õ, 'maihâimana waihu'u õ di.

38 Tawamhã Maria hã ma sada'â, ãne:

— Wa hã, Uburé Danhib'apito ma romhuri'wa. Tô ĩma romhâimana, ĩma irowasu'uzéb zarina.

Tawamhã hâiwa hawi romhuri'wa hã, apâ ma tô oto mo.

39 Ãne hã romhâimana parimhã, Maria hã ma tô sima robza'ra pese. Taha pari si'aba'ré na ma tô mo, 'ri wa'õno 're i'maihâimana mono u, Zudéa 're ẽtẽ 'rãihâ 'ratamhã. 40 Wisi wamhã, ma tô ãzé Zacariaha nhorõwa u. Tame ma tô sawi, Izabéu hã. 41 Tawamhã Izabéu hã, Maria te te isawizé te te wapari wamhã, ai'uté idi'i 'remhã ma tô 're sirési. Tawamhã Izabéu hã ma tô tihâiba, 'Re ihâimana u'âsi mono Pẽ'ẽzani ihâiba 'remhã 'masisi na. 42 Tahawa mreme 'rãihâ na ma tô tinha ãne, rowẽ te:

— Iwẽ hã ma tô aima pisutu 'Re ihâimana u'âsi mono hã, pi'õ norĩ nhipai u. Iwẽ hã ma tô duré pisutu, ai'ra 'watébrémi za aima ipoto ma zama! 43 E wa hã tiha na ĩhâimana bâ, ma Ĩnhib'apito na we ĩzabu. 44 Aimreme na ĩzawizé te wapari wamhã, ai'uté ĩdi'i 'remhã ma tô rowẽ te, 're sirési. 45 Aima iwẽ hã ma tô pisutu, Uburé Danhib'apito te te aima inharĩzém na sazei wa, za aima iromhâimanazém na hã.

46 Tawamhã Maria hã ma tô tinha, ãne:

56 Tawamhã Maria hã ma tô nhamra Izabéu 'ratamhã, si'ubdatõ a'amo na. Taha pari ma tô apâ sina siri, tinhorõwa u hã.

57 Tawamhã Izabéu ma, oto i'ra ipotozé bâdâ iwa waptã'ã wamhã, ma tô oto tãma podo, 'watébrémi na. 58 Poto wamhã, isababa 're isõrõwa za'ra mono hã duré isiwadi norĩ zama, rowasu'u te te wapari za'ra wamhã, Uburé Danhib'apito iwẽ uptabi te te tãma i'manharĩzé hã, ma tô isiré sima rowẽ za'ra. 59 Tawamhã ipotozém na 8 na bâdâ ãma si'utõrĩ parimhã, 'watébrémi hã ma tô siwi ãwisi, da te sihâiwata nhizâri da. Tawamhã imama nhisi na te te aré siwi sisi da, Zacaria na. 60 Tane nherẽ, ina hã ma tô ãne tãma nharĩ za'ra:

— Maze di. Zuwã na, te za tinhisi.

61 Tane nherẽ, ma tô ãne tãma nharĩ za'ra:

— Tane nherẽ, asiwadi 'remhã, ni'wa hã sisi õ di, Zuwã na hã.

62 Tawamhã 'watébrémi mama ma, tinhib'rada hã ma tô 'manharĩ za'ra, te te siwi waihu'u da, niha za 'watébrémi hã sisi zô. 63 Tawamhã Zacaria hã ma tô 'maiwaptẽ, wedepo ipo'o hâpâre hã. Taha na ma tô isisi hã ui'éré, ãne: “Zuwã na isisi hã.” Tahawa uburé ma tô ãma titob'uzu za'ra. 64 Tawamhã awa'awi pesere, isadawa hã ma tô tãma si'ridawa. Ma duré tizoto wairo. Tahawa apâ ma tô oto mreme watobro. 'Re ihâimana u'âsi mono ãma te duré tiwata. 65 Tawamhã isababa 're isõrõwa za'ra mono hã ma tô tãma tipahi pese za'ra. Tahawa Zudéa 're ẽtẽ 'rãihâ na uburé 're irosa'wari mono 'remhã, ma tô ãhã na rowasu'u hã ropé. 66 Tahawa ãhã na rowasu'u, uburé da te iwapari za'ra hã ma tô nasi tasisadanharĩ za'ra ni, ãne:

— 'Watébrémi hã prédu wamhã, ãté niha te za 're hâimana.

E marĩ wa. Uburé Danhib'apito waihu'u pe hã, tô ãma 're hâimana mono wa.

67 Tawamhã Zacaria, Zuwãhã mama hã 'Re ihâimana u'âsi mono Pẽ'ẽzani ré 'masisi na iré hâimana wa, ma tô waihu'u siro, ãne:

80 Tawamhã 'watébrémi hã te prédu mono. Duré ipẽ'ẽzani hã te te tô siptete u'âsi. Te duré rop si 're irosa'wari mono ãma 're sãmra, Izaraéu nhihudu norĩ ma isihâi'rézéb u.