— E 'wa hã te pire na 're hâimana, Hâiwa ãma 're Isãmra mono, da'ãma 're isib'a'uwẽ mono zéb ãma hã.

2 Tawamhã Zezusi hã ma tô hâ ai'uté zô. Iwa'wab za'ra ma tô tisã. 3 Ãne ma tô tãma nharĩ za'ra:

— Tô sena, wa za aima waihu'u za'ra wa'wa, ãne: Aihâimanazém na saprĩ za'ra wa'aba õ wamhã, duré ai'uté norĩ ne 're aihâimana za'ra wa'aba mono õ wamhã, niwa Hâiwa ãma 're Isãmra mono, da'ãma 're isib'a'uwẽ mono zéb u hã, asisisi aba õ di za. 4 Ni'wa hã dama wapu na 're si'madâ'â mono wamhã ai'uté ne, ta hã pire na te za 're hâimana, Hâiwa ãma 're Isãmra mono, da'ãma 're isib'a'uwẽ mono zéb ãma hã. 5 Ni'wa hã ai'uté, ĩnhisi na te te âri wẽ wamhã, ta hã te za ĩ'âri wẽ, i'u'âbâ.

6 — Ni'wa hã tiwasédé te te i'manharĩ u'âbâ, ã hã ai'uté norĩ ĩzazei'wa na 're ihâimana za'ra mono hã nima hã te te ĩrẽme wamhã, iwẽ hã aré ni'wa, da te ime da hã âporé â 'rehâ uptabi wa, ẽtẽ tõmo wawẽ na butu wazi ré. Tane nherẽ, 'Re ihâimana u'âsi mono za te te tãma irob'manharĩzé hã isipai u pipa uptabi di. 7 Iropipa uptabi za, siwa'ru ti'ai ãma 're ihâimana za'ra mono norĩ ma hã, ta norĩ hã marĩ, te te 're i'manharĩ za'ra mono u'âbâ, da te 're ĩzazei utõrĩ za'ra mono wa. Ãne hã te za tô 're romhâimana. Tane nherẽ, tãma 're ropipa uptabi za'ra mono di za, te te dama 're irob'rã'rata za'ra mono norĩ ma hã.

8 — Asib'rata hâiba amo hã duré niwamhã aipara hã 're aiwasété mono da, te te 're 'manharĩ mono wamhã, ma'ãpé sizâri. Asisiti me na. E marĩ wa. Iwẽ hã asébré da, dahâimanazé isi'utõrĩ'õ u, asib'rata misi ré duré aipara hâiba amoi ré si, 'Re ihâimana u'âsi mono hã te te aime tõ da, uzâ isi'utõrĩ'õ u ropipa u, asib'rata zahuré ré duré aipara zahuré ré. 9 Atõmo hâiba amo hã 're aiwasété mono da, te te 're 'manharĩ mono wamhã, ma'ãpé wazere. Asisiti me na. Iwẽ hã i'asébré da hã atõmo misi ré dahâimanazé isi'utõrĩ'õ u, 'Re ihâimana u'âsi mono hã te te aime tõ da, uzâ isi'utõrĩ'õ u ropipa u atõmo zahuré ré.

10 — Ma'ãpé, ãma 're pibui pese za'ra wa'aba mono, ã hã ai'uté norĩ hã 're wẽ'õ za'ra wa'aba mono tõ da. Tô sena, wa za aima rowasu'u za'ra wa'wa, ãne: Hâiwa hawi romhuri'wa norĩ hã te te 're 'madâ'â pese za'ra ite mono bâ, Ĩmama hâiwa ãma 're isãmra mono nho'a. 11 [E marĩ wa. Ti'ai ãma Dasiré Ipodo hã ma tô wei mo, te te 're anho'reptui mono da, siwa'ru 're idanomro mono norĩ hã.]

12 — E niha aima za'ra wa'aba hã, aibâ ma, pone'ẽrebâ hã 100 na hâimana za'ra wamhã. Tane nherẽ, misi tiwi simani wamhã. E za a'â te te rẽme za'ra õ di, 99 na ihâiba hã ẽtẽ 'rãihâ ãma saihuri ré, sô 're rĩtĩ mono da, tiwi isimani zô. 13 Te za tô sô 're rĩtĩ. Tô sena wa za aima waihu'u za'ra wa'wa, ãne: Te te sõpẽtẽ wamhã, tãma rowẽ uptabi di za, te te isõpẽtẽ u'âbâmhã, 99 na ihâimana za'ra norĩ u'âbâ tãma irowẽ nhipai u, niwa tiwi 'masimani õ wa, ta norĩ hã. 14 Tane duré, Aimama 'wa hâiwa ãma 're isãmra mono ma hã, tãma wẽ õ di, ã hã ai'uté norĩ i'masimani da hã.

15 — Asisãnawã hã asada ihâimanazém na tiwasédé te te 'manharĩ wamhã, ma'ãpé asiwaprosi itẽme aimorĩ. Tãma hâi'ré na, te te waihu'u da, te te ãma aima i'upazé hã. Te te aiwapari wamhã, apâ te za asisãnawã na aima 're hâimana. 16 Tazahã, te te aiwapari õ wamhã, ni'wa hã asiré saprõni misi duré niwamhã maparane, ãma uwaimrami da, Ibaihâ Iwazé pese na rob'ui'éré hã, ãne te te inharĩzé hã: “Iwasu'u wasété zé hã ni'wam norĩ hã, misi duré niwamhã maparane te te siptete waptob zahuré, te te iwasu'u zahuré zé hã.” 17 Tane nherẽ, asisãnawã te te i'upa hã te te duré wapari zahuré õ wamhã, ma'ãpé rowahutuzéb 're isazei'wa norĩ ma, uburé wasu'u pese, iromhâimanazé hã. Tazahã, isazei'wa norĩ hã te te duré wapari za'ra õ wamhã, ma'ãpé asiré isazei'õ'wa na 're 'madâ'â mono, niwamhã rob'uiprazé arĩ ubumroi'wa na.

18 — Tô sena wa za aima waihu'u za'ra wa'wa, ãne: Uburé marĩ hã ti'ai ãma 're isawi zahi za'ra wa'aba mono hã, hâiwa ãma zama te za 'Re ihâimana u'âsi mono hã te te 're azawi zahi. Tane duré, ti'ai ãma uburé marĩ ma, 're irowairébé za'ra wa'aba mono hã, te za 'Re ihâimana u'âsi mono hã hâiwa ãma zama te te 're arowairébé.

19 — Tô sena wa za duré ãne aima waihu'u za'ra wa'wa. Ni'wai me maparane aihâiba na, ti'ai ãma marĩ na asisazei wa'aba wamhã, rowaptẽrẽ na asiré waptẽrẽ aba wamhã, asimirowaptẽrẽ 'wa hã te za tô ãma aima uwaimrami 'wa, Ĩmama hâiwa ãma 're isãmra mono hã. 20 E marĩ wa. Nimame ni'wam norĩ hã maparane ihâiba na duré niwamhã si'ubdatõ ihâiba na, ĩnhisi na 're si'rã'õtõ mono wamhã, tame wa za isiré 're ĩhâimana za'ra.

21 Tawamhã Pedru hã ma tô Zezusihi u sina rotété. Ãne ma tô sadanha:

— Wanhib'apito, e niha ãma isahu na, ĩsisãnawãi ãma marĩ iwasédé te te ĩma 're i'manharĩ mono zé hã, te ãma 're i'madâ'â mono õ zéb da hã. E 7 na te te ãma isahuzéb u.

22 Tane nherẽ, ma tô Zezusi hã ãne ãma sada'â:

— Ãne wa za aima waihu'u. Mare di. 7 na te te ãma isahuzéb u hã. Tazahã, asisãnawã marĩ te te ai'ãma i'manharĩ wasété zé hã 490 na te te ãma isahuzéb u ãma 'madâ'â õ di za. 23 Tahawa, Hâiwa ãma 're Isãmra mono, da'ãma 're isib'a'uwẽ mono zé hã aiwa ti'ai ãma danhib'apito hã, tite romhuri'wa norĩ ma, romhuri za te te iwa'âbâ wẽ za'ra ne hã. 24 Ta hã te te tãma iwa'âbâ za'ra zé hã te te ãma tãma sãna'rata za'ra wi, ma tô ni'wa hã itẽme ãwisi ni, sa'ẽtẽ uptabi na tinhib'apito ma, te te iwa'âbâ õ hã rob'uiprazé isapotore ẽtẽ waipo prã na i'manharĩ hã. 25 Tane nherẽ, romhuri'wai ma rob'uiprazé hã hâimana õ di, tinhib'apito ma, te te iwa'âbâzéb da hã. Tahawa, te te wa'âbâ da, ma tô isib'apito hã ti'ru, da te dasiwi wede da, pawa'âbâ ãna dama romhuri'wa da, imro zama duré i'ra norĩ zama, duré uburé isimarĩ tãma ihâimana za'ra norĩ zama. 26 Tane nherẽ, romhuri'wa hã tinhib'apito nho're ma tô aime, hi'rãtitõ. Ãne ma tô tiwi waptẽrẽ zahi: “Apito, ma'ãpé ĩzapari ze na. Uburé na wa za aima wa'â za.”

27 — Tawamhã isib'apito hã ma tô ãma aiwamri. Tahawa, te te ãma 'madâ'â õ di, te te tãma iwa'âbâ õ zé hã. Ma tô duré tãma rob'ru, morĩ da. 28 Tawamhã romhuri'wa hã oto morĩ wamhã, ma tô sõpẽtẽ tisiré romhuri'wa hã, 100 na rob'uiprazé isapotore ẽtẽ waipo prãi 'manharĩ hã te te tãma iwa'âbâ õ hã. Tawamhã ta hã ma tô tisiré romhuri'wa hã ti'â. Isõ're'ré na, ma tô sõ'reti. Ãne ma tô nasi tãma tinha: “Ma'ãpé, ĩma wa'âbâ, ĩma iwa'âbâ õ hã!”

29 — Tawamhã isiré romhuri'wa hã ma tô hi'rãtitõ ipapara aime. Ãne ma tô tiwi waptẽrẽ zahi: “Ma'ãpé, ĩzapari ze na. Uburé wa za aima wa'â za.”

30 — Tane nherẽ, te te ãma sazei õ di. Ma tô ti'ru, tisiré romhuri'wa hã dazazéb 're, da te sẽrẽ da, uburé te te tãma iwa'âbâzéb u. 31 Tawamhã isiré romhuri'wa norĩ hã te te tãma i'manharĩzé hã te te siwi 'madâ'â wamhã, ma tô tiwi tirobzei'õ pese za'ra. Tahawa tinhib'apito zô ma tô tirĩtĩ za'ra, te te tãma rowasu'u za'ra da, iromhâimanazém na hã. 32 Tawamhã isib'apito hã ma tô hâ romhuri'wa zô, te te tãma wasu'u za'ra parimhã. Ãne te tãma tinha: “A hã romhuri'wa i'aiwasédé. Ĩwi waptẽrẽ zahi wa, te aré ai'ãma 'madâ'â õ di, ĩma iwa'âbâ õ zé hã. 33 E niha bâ, asiré romhuri'wai ãma aiwamri õ di bété, ai'ãma ĩsiwamri ne.”

34 — Tawamhã isib'apito hã ma tô sada ab'rui pese, romhuri'wa da. Tahawa ma tô ti'ru, dazazéb 're, da te sẽrẽ da, duré da te tãma rob'manharĩ wasété da, te te tãma iwa'âbâ õ zé hã te te tãma iwa'âbâ uprosizéb u.

35 — Ãne te za Ĩmama hâiwa ãma 're isãmra mono hã te te aima 're arob'manharĩ 'wa, asisãnawãi ãma marĩ te te aima 're i'manharĩ wasété za'ra wa'aba mono zé hã, ãma 're 'madâ'â u'âsi za'ra wa'aba mono wamhã.