3 Tawamhã nima norĩ farizeu norĩ hã ma tô itẽme sina rotété za'ra, te te siwi pibu da. Ãne ma tô siwi sadanha:

— E i'ru zahi, aibâ hã timro te te irẽme da hã, siwa'ru marĩ na te te tiwi upai wamhã.

4 Tawamhã Zezusi hã ma tô ãne ãma sada'âbâ za'ra:

— E niwa sõré za'ra wa'aba ã bâ, 'Re ihâimana u'âsi mono nhimiroti 'rata na rob'ui'éré hã. Ãne te te inharĩzé hã: “Ropoto na'rata hawimhã, Ropoto'wa hã ma tô poto, aibâ duré pi'õ hã.” 5 Ãne duré 'Re ihâimana u'âsi mono te te inharĩzé hã: “Tahawa, aibâ hã, timama duré tina te za rẽme zahuré, timro me, si'ãma hâiba sitob zahuré da. Tawamhã maparane ihâiba nherẽ, te za misi ihâiba na oto 're hâimana zahuré.” 6 Ãne wamhã, maparane ihâiba na oto 're hâimana zahuré mono õ di za. Misi oto ihâiba zahuré hã za. Tahawa, iwẽ hã ni'wa ãma isiwanhizari zahuré õ da si, 'Re ihâimana u'âsi mono, ãma isitobzé hã.

7 Tane nherẽ, farizeu norĩ hã ma tô duré apâ siwi sadanha, ãne Zezusi hã:

— Oro zapre bété Mozési hã ma tô ãne ãma rob'ui'éré, aibâ, timro ma rob'ui'éré hã te te sõmri da, za te te irẽmezém na hã, taha parip si te te tãma rob'ru da oto.

8 Tawamhã Zezusi hã ma duré ãma sada'âbâ za'ra, ãne:

— Ta hã Mozési hã ma tô aima rowairébé za'ra wa'wa, aimro hã 're rẽme za'ra wa'aba mono da, aipẽ'ẽ tete za'ra wa'aba wa. Tane nherẽ, ropoto na'rata hawim haré, ãne hã 're romhâimana mono õ di. 9 Tahawa, tô sena wa za aima waihu'u za'ra wa'wa, ãne: Ni'wa aibâ hã, imro pi'õ, aibâ aimawi na timro wi hâimana õ nherẽ, timro te te rẽme wamhã, ta hã te za pi'õ na apsaihu, pi'õ aimawi na mro zahu wamhã.

10 Tawamhã Zezusihi siré 're inomro mono norĩ hã ma tô tãma nharĩ za'ra, ãne:

— Tane damro 're, romhâimanazé wamhã, aibâ duré pi'õ norĩ 'remhã, tane ze te bâ, damro ãna 're idanomro mono da hã, iwẽ.

11 Tawamhã Zezusi hã ma ãma sada'âbâ za'ra, ãne:

— Uburé ãma 're dahâimana za'ra mono õ di za, ã hã roti na hã. 'Re ihâimana u'âsi mono te te tãma 're i'apisutu mono norĩ si, te za ãma 're hâimana za'ra. 12 Ni'wam norĩ aibâ norĩ hã zahadu mro za'ra õ di, 'ra waihu'u za'ra ãna poto siromo za'ra wa, duré ni'wam norĩ hã ãne hâimana za'ra da, te te sima 'manharĩ za'ra wa, duré ni'wam norĩ hã, Hâiwa ãma 're Isãmra mono nhib'a'uwẽ 're nomro mono u'âbâ, zahadu mro za'ra õ wa. Ni'wai ma wapu wamhã, te te 're 'madâ'â pese mono, ã hã ĩnhimiroti hã.

13 Taha parimhã, ni'wam norĩ hã ma tô itẽme ãwisi za'ra ai'uté norĩ hã Zezusihi u, tinhib'rada te te nasi ãma aza'ra da, duré te te ãma rowaptẽrẽ za'ra da. Tane nherẽ, isiré 're inomro mono norĩ hã ma tô timreme hã dama pẽtẽ za'ra, õne hã te te 'manharĩ za'ra tõ da. 14 Tawamhã Zezusi hã ma tô ãne tãma nharĩ za'ra, isiré 're inomro mono norĩ ma, ãne:

— A'â we ĩtẽme si'aba'ré, ai'uté norĩ hã. Tiwi rosawi za'ra wa'aba tõ, ãne hã te te 'manharĩ za'ra tõ da hã. E marĩ wa. Hâiwa ãma 're Isãmra mono, da'ãma 're isib'a'uwẽ mono zé hã, ni'wam norĩ hã ai'uté ne 're ihâimana za'ra mono norĩ te si.

15 Tawamhã Zezusi hã tinhib'rada ma tô ãma aza'ra. Taha pari, ma tô oto mo, ta hawi.

16 Tawamhã nimahã bâtâ na aibâ hã ma tô Zezusihi u sina rotété. Ãne ma tô sadanha:

— Rowahutu'wa, e marĩ iwẽ hã wa za 'manha, dahâimanazé isi'utõrĩ'õ hã te ĩsina uwaimrami da hã.

17 Tawamhã Zezusi hã ma sada'â, ãne:

— E marĩ da, ma tô ĩzadanha, marĩ iwẽ na. Misire iwẽ hã te 're hâimana. Dahâimanazé isi'utõrĩ'õ asina uwaimrami da, asima wẽ wamhã, ma'ãpé ĩnhimiroti hã 're ab'madâ'â pese mono.

18 Tawamhã aibâ ihâiba té hã ma tô duré sadanha, ãne:

— E ma hã tawamhã, 'Re ihâimana u'âsi mono nhimiroti.

Tawamhã Zezusi hã ma ãma sada'â, ãne:

— Ã norĩ hã: “Da'maiwĩrĩ tõ. Damro na dawi asipsaihuri tõ. Marĩ simi'uri tõ. Tô senai õ nherẽ, niha na dawasu'u tõ. 19 Aimama 're wazé pese mono, ana zama. Duré, 're da'azawi pese mono, 'râwi 're i'asisawi pese mono ne.”

20 Tawamhã aibâ ihâiba té hã ma tô ãma sada'â, ãne:

— Ta norĩ hã uburé wa tô te 're a'madâ'â pese, isimiroti zahi hã. E marĩ zô, te tawamhã ĩwi rowaptâ.

21 Tawamhã Zezusi hã ma duré ãma sada'â, ãne:

— 'Re ihâimana u'âsi mono te te sima iwẽ zarina aiwẽ na 're aimorĩ da wamhã, mo oto aimorĩ. Wede za'ra na asibro hã, iwa'â hã isibrob'õ norĩ ma, sõmri mono da. Tawapsi te za asibro hã aima 're hâimana, hâiwa ãma hã. Taha parimhã, we aimorĩ, ĩzarina 're aimorĩ da oto.

22 Tane nherẽ, aibâ ihâiba té, ãne hã te te wapari wamhã, ma tô mo robzei ãna, sibro pese uptabi wa. 23 Tawamhã isa'u, Zezusi hã isiré 're inomro mono norĩ ma, ma tô tinha, ãne:

— Tô sena wa za aima waihu'u za'ra wa'wa, ãne: Pire uptabi di, isibro pe hã Hâiwa ãma 're Isãmra mono, da'ãma 're isib'a'uwẽ mono zéb u isébré da hã. 24 Ãne wa za duré aima waihu'u za'ra wa'wa: Awaru ba'õmore hã isi'uwazi zazahâ hâibabarĩzé para'õtõ zapu'u 're, isébré waihu'u õ nhipai u, isibro pe hã sébré waihu'u õ di, 'Re ihâimana u'âsi mono da'ãma 're isib'a'uwẽ mono zéb u hã.

25 Tawamhã ãne hã imreme te te wapari za'ra wamhã, isiré 're inomro mono norĩ hã ma tô tãma a'rãmi pese za'ra. Tahawa ma tô sisadanharĩ za'ra, ãne:

— Õne wamhã bété, e 'wa hã tinho'reptuzé te te sina uwaimrami da bâ.

26 Tawamhã Zezusi hã ma tô 'madâ'â za'ra. Tahawa ma ãne ãma sada'âbâ za'ra:

— Ti'ai ãma a'uwẽ norĩ ma hã pire di, ã hã. Tane nherẽ, 'Re ihâimana u'âsi mono ma hã, marĩ i'manharĩ waihu'u õ hã tãma 'maihâimana õ di.

27 Tawamhã Pedru hã ma ãma sada'â, ãne:

— Wa norĩ hã uburé marĩ, wa rẽme za'ra ni, asiré 're wanomro mono da. E marĩ, te za tawamhã 'Re ihâimana u'âsi mono hã iwa'â wama sõmri za'ra.

28 Tawamhã Zezusi hã ma tô tãma nharĩ za'ra, ãne:

— Tô sena wa za aima waihu'u za'ra wa'wa, ãne: Uburé marĩ hã itéb u sisaprĩ za'ra wamhã, duré Ti'ai ãma Dasiré Ipodo hã danhib'apito simasisizé iwẽ uptabi na oto sãmra wamhã, tawamhã uburé a norĩ wa'wa hã ĩsiré 're i'anomro aba mono hã te za asimroi wa'wa 12 na danhib'apito simasisizém na, ãma rowairébé za'ra wa'aba da, 12 na Izaraéu nhihudu norĩ wamri ihâimana za'ra norĩ ãma hã. 29 Duré uburé ni'wam norĩ hã ĩ'u'âbâ, tinhorõwa, tisisãnawã norĩ, tihidiba norĩ, timama, tina, ti'ra norĩ, duré niwamhã tinhipti'a norĩ, te te 're irẽme za'ra mono norĩ hã te za waibu, 100 na ãma isisiwi na duré dahâimanazé isi'utõrĩ'õ zama. 30 Tawamhã da'ahâ na ãhã na imorĩ'rata na idahâimana za'ra hã, da'rãsutu u te za tahâimana za'ra ni za. Duré ãhã na da'rãsutu u idahâimana za'ra hã, imorĩ'rata na te za oto tahâimana za'ra ni za.