— Hâiwa ãma 're Isãmra mono, da'ãma 're isib'a'uwẽ mono zé hã, aiwa buru tede'wa ne. Ta hã mararé ma tô watobro, te te tãma iromhuri za'ra da hã, te te awaibu da, tite uva'ru ãma, te te tãma romhuri za'ra da. 2 Tawamhã romhuri'wa norĩ ma, ma tô pisutu za'ra, za te te nasi tãma i'awa'âbâ za'ra na hã, bâtâ sidâpâ misi rob'uiprazé isapotore ẽtẽ waipo prã 'manharĩ na hã. Taha pari ma tô satõrĩ za'ra, tite uva'ru te te i'a're u. 3 Tawamhã 9 na bâtâ pibuzéb ãma mararé, buru tede'wa hã ma tô duré mo, da te dasina 're i'ubumroi mono zéb u. Tame ma tô sõpẽtẽ za'ra, aibâ norĩ hã marĩ te te 'manharĩ za'ra ãna, isisimro hã. 4 Ta norĩ ma, ma tô duré nharĩ za'ra, ãne: “Ma'ãpé a norĩ wa'aba zama ai'aba'réi wa'aba ĩte uva'ru te i'a're u, romhuri za'ra wa'aba da. Ai'aba'réi wa'aba wamhã, i'uwaibaba na wa za aima wa'âbâ za'ra wa'wa za.”

5 — Tawamhã aibâ norĩ hã ma tô ai'aba'ré. Abzuma wa'wamhã duré si'ubdatõ bâtâ pibuzéb ãma, buru tede'wa hã ma tô duré õne 'manha. 6 Tawamhã bâtâ pibuzé hã imrotõ ãma hâiwahâ ma tô sina siri apâ, da te dasina 're i'ubumroi mono zéb u. Tame ma tô duré aibâ aimawi norĩ hã 'madâ'â za'ra. Ãne ma tô sadanharĩ za'ra: “E marĩ wa, te bâtâ wahuré asimroi wa'wa, marĩ 'manharĩ ãna.”

7 — Tawamhã asa ma tô ãne siwi sada'â: “Ni'wa hã te te wawaibui õ wa, iwa'âbâ zô wa te tãma romhuri za'ra da hã.”

— Tawamhã buru tede'wa hã ma tõ ãne tãma nharĩ za'ra: “Ma'ãpé a norĩ wa'aba zama ai'aba'réi wa'aba, romhuri za'ra wa'aba da, ĩte uva'ru te i'a're u.”

8 — Tawamhã mara wamhã oto, ite romhuri'wa norĩ 'madâ'â'wai ma, ma tô tinha, ãne: “Ma'ãpé, romhuri'wa norĩ zô aihârâ, pawa'âbâ za'ra da. Imorĩ'rata na pawa'âbâ za'ra na da'rãsutu'u te iwaibu hã. Taha pari ãma da'rãsutu za'ra na, imorĩ'rata na te iwaibu norĩ ãma hã.”

9 — Tawamhã aibâ norĩ hã hâiwahâ pesere, imrotõ na bâtâ pibuzéb ãma, romhuri na te te isãna'rata za'ra hã ma tô waibu, rob'uiprazé isapotore ẽtẽ waipo prã prata 'manharĩ hã misisi. 10 Tahawa, imorĩ'rata na buru tede'wa te te iwaibu norĩ hã ma tô rosa'rata za'ra, za danhipai u te te pawa'âbâ za'ra da newa. Tane nherẽ, hâiba mono bâ ma tô õhõ si waibu, rob'uiprazé isapotore hã misisi. 11 Tawamhã rob'uiprazé hã ma tô waibu. Taha pari ma tô aiwapsari za'ra, tinhib'apito ma. 12 Ãne ma tô tãma aiwapsari za'ra: “Wa norĩ hã bâtâ bâre wa tô romhuri za'ra ni, rowa'ro zé 'rowi. Tane nherẽ, ã hã aibâ norĩ hã, da'rãsutu ãma iwaibu hã, misi bâtâ pibuzém na te te romhuri za'ra nherẽ, ma tô ipawa'âbâ za'ra, aiwa wama iwa'âbâ za'ra ne.”

13 Tawamhã buru tede'wa hã ma tô ãne tãma tinha, misi romhuri'wai ma: “Ĩsiwaihu, i'upa na hã aima ĩhâimana õ di. E wa te wasima waihu'u ã bâ, za te aima iwa'âbâ na hã misi rob'uiprazé isapotore ẽtẽ waipo prã prata 'manharĩ na. 14 Ma'ãpé âri ate hã. Taha parimhã aimorĩ, asõrõwa u. Wa ĩsima wẽ, ã hã aibâ da'rãsutu ãma te i'âri ma, te wa'âbâ da, te aima iwa'âbâ ne, aiwa. 15 E marĩ, te ĩsima iwẽzéb zarina te 'manharĩ ãna, marĩ ĩte na hã. E ma ĩnho'ru, wa hã ĩnhopru wa.”

16 Tawamhã Zezusi hã ma ãma 'rãsutu, ãne:

— Tane, ãhã na imorĩ'rata na idahâimana za'ra hã, da'rãsutu u te za tahâimana za'ra ni za oto. Duré ãhã na da'rãsutu u idahâimana za'ra hã, imorĩ'rata na te za tahâimana za'ra ni za oto.

17 Tawamhã Zezusi hã duré isiré 're inomro mono norĩ me, Zeruzalẽ u te te sai'uri za'ra wamhã, ma tô 'mahârâ za'ra, isababa si'aba'ré da. Tahawa ma tô ãne tãma nharĩ za'ra:

18 — Ma'ãpé ĩwapari pese za'ra wa'aba. Ãhã na hã wa ai'aba'ré ni, Zeruzalẽ u. Tame te za Ti'ai ãma Dasiré Ipodo hã hâiba nhomri ni, sasedoti nhib'ihâ'a norĩ ma, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ ma zama. Tawamhã ta norĩ hã te za iwasédé hã ãma hiri za'ra. Taha zarina te za dama 'ru za'ra, da te wĩrĩ da hã. 19 Taha pari te za siwi hâiba nho, zudeu'õ norĩ ma. Ta norĩ hã te za ãma tiwa'ẽ za'ra. Abazei hâ nhorõ 'manharĩ na dapré'ézém na te za duré te te siwi 're pré'é. Te za duré siwi sasõ wedepo'o nhonhi'rãmi na, dâ'â da. Tane nherẽ, si'ubdatõ bâdâ ãma si'utõrĩ õ ré, te za apâ Imama hã hâiwa'utu.

20 Tawamhã Zebedeu mro hã ma tô Zezusihi u wi, ti'ra si'aibâ norĩ ré. Ipapara ma tô aime. Taha pari ma tô tiwi rowaptẽ.

21 Tawamhã Zezusi hã ma tô pi'õ sadanha, ãne:

— E marĩ, te asima iwẽ.

Tawamhã pi'õ hã ma sada'â, ãne:

— Ma'ãpé ropisutu, niwa Apito na asãmra wamhã, ã hã ĩ'ra si'aibâ norĩ maparane hã asababa simasisi da, ihâiba amo hã asimire niwĩ duré ihâiba amo hã asimi'e niwĩ.

22 Tawamhã Zezusi hã ma tô i'ra norĩ ma nharĩ zahuré, ãne:

— Aima waihu'u aba õ di, iwaptẽrẽ aba zé hã. E sada asiptete wa'aba di, ihâsi wa'aba da hã, uva 'rãi wa'u isé, za te ihâ'rẽne ne hã.

Tawamhã ma sada'âbâ zahuré, ãne:

— Ĩhe. Wa te hâsi waihu'u pese di.

23 Tawamhã Zezusi hã ma tô tãma nharĩ zahuré, ãne:

— Te za tô ĩsine ihâsi wa'wa, ĩte uva 'rãi wa'u isé hã. Tane nherẽ, wa hãi õ di, ni'wa te ipisutu da hã, ĩnhimire niwĩ isãmra da hã duré ĩnhimi'e niwĩ. Ĩmama si ma tô pisutu siro, ni'wam norĩ hã za isimasisi da hã. Taha si te za tisõ, ni'wam norĩ ma, te te sima iwẽzéb zarina.

24 Tawamhã Zezusihi siré 're inomro mono norĩ 10 na ihâiba za'ra, ãne hã te te wapari za'ra wamhã, ma tô sada tinhiti'ru za'ra, sisãnawã zahuré da. 25 Tahawa, Zezusi hã ma tô 'râwi sitẽme sô tihârâ za'ra. Ãne ma tô tãma waihu'u za'ra:

— Aima waihu'u pese za'ra wa'aba di. Ti'ai ãma roti'wa norĩ hã isimiroti 're, te za 're hâimana za'ra, isib'a'uwẽ norĩ hã. Duré dama ipire norĩ nhimiroti 're, te za 're hâimana za'ra. 26 Tane nherẽ, ai'reb za'ra wa'aba hã, ãne hã 're romhâimana mono tõ. Iwa'rãmi 're 'manharĩ za'ra wa'aba mono. Ni'wa hã dama pire da wamhã, dama romhuri'wa na 're hâimana mono. 27 Duré ni'wa hã imorĩ'rata na hâimana da wamhã, wada'uri zarina titede'wai ma romhuri'wa ne, te za dama 're hâimana. 28 Tane, Ti'ai ãma Dasiré Ipodo hã da te tãma 're romhuri za'ra mono da, wei morĩ õ di. Te te dama 're romhuri mono da, ma tô wei mo, duré tihâiba te te dazada sõmri da, da'ahâ uptabi na te te da'anho'reptu da.

29 Tawamhã Zezusi hã duré isiré 're inomro mono norĩ me, Zerico hawi oto wairébé wamhã, da'ahâ na ma tô isarina za'ra dasi'ré. 30 Tawamhã maparane itob'a norĩ hã bâdâdi zada'ré ãma isimasi hã ma tô wapari zahuré, ni'wa te te tãma irowasu'u zahuré zé hã, Zezusi te te iro'razâri na hã. Tahawa te nasi 'mahârâ zahuré, ãne:

— Apito, Davihi nhihudu, ma'ãpé wa'ãma aipẽ'ẽzé na.

31 Tane nherẽ, da'ahâ na idasi'aba'ré hã ma tô damreme hã tãma pẽtẽ zahuré ni, ari'iwi simasisi da. Tane nherẽ, ma tô tihârâ ma sé zahuré, ãne:

— Apito, Davihi nhihudu, ma'ãpé wa'ãma aipẽ'ẽzé na.

32 Tawamhã Zezusi hã ma tô mazazâ. Ma tô sô tihârâ zahuré. Ãne te sadanharĩ zahuré:

— E marĩ, te asima iwẽ wa'wa, te aima i'manharĩ aba da hã.

33 — Apito, wa wasima wẽ ni, wato hã wama si'ridawa da. — Ãne ma tô sada'âbâ zahuré, itob'a norĩ hã.

34 Tawamhã Zezusi hã ma tô ãma tipẽ'ẽzé zahuré. Tahawa, ma tô tõmo upi zahuré. Tawamhã awa'awi pesere ma tô oto rob'madâ'â zahuré. Taha pari ma tô isarina tineb zahuré.