— Ma'ãpé ane wa'aba, asõwa 'ri wa'õno ihâimana aba u. Tame te za isõpẽtẽ 'wa, 'rãi wazi na isima'wara awaru po'repore hã, i'ra isababa isa hã. Ma'ãpé sahuré wasihui wa'aba, we ĩma saprõni zahuré wa'aba da. 3 Ni'wa hã te te ãma asadanharĩ aba wamhã, ma'ãpé ãne tãma nharĩ aba za: “Uburé Danhib'apito hã te we sô wazatõrĩ zahuré. Apâ te za we sõmri su'u zahuré za.”

4 Tawamhã ãne hã ma tô tiromhâiba, te te sina uwaimrami da, 'Re ihâimana u'âsi mono zadawa 'mahârâ'wa te te ãma irob'ui'érézé hã, ãne:

6 Tawamhã Zezusihi siré 're ine hã ma tô oto tineb zahuré. Ma tô 'manharĩ zahuré, Zezusi te te tãma i'ru zahuré zéb zarina. 7 Tawamhã awaru po'repore sipi'õ hã ma tô saprõni zahuré, duré ipréduptéb zama. Taha pari ma tô bazadâ zahuré, tisi'ubuzé ti'uza ihâpa na. Taha pari ma tô Zezusi hã iba nhisi ãma nhamra. 8 Tawamhã da'ahâ uptabi na ma tô da'uza ihâpa na da te tãma waptâ za'ra, bâdâdi na. Duré ni'wam norĩ hã wede panhipti isui ré na ma tô bâdâdi na tãma waptâ za'ra, da te isihâri za'ra na. 9 Tawamhã da'ahâ uptabi na isõwa idasi'aba'ré hã duré isa'u hã ma tô dahãsi, ãne:

10 Tawamhã Zezusi hã Zeruzalẽ u oto sébré wamhã, iwa 're idasi'ubumroi mono norĩ hã ma tô da'ahâ uptabi na 're dasiwa'rãmi, da te dasima 'mahârâ za'ra sina. Tahawa, te nasi tasisadanharĩ za'ra ni, ãne:

— E 'wa hã, õ hã.

11 Tawamhã Zezusihi zarina idasi'aba'ré hã ma tô nasi sada'âbâ za'ra, Zeruzalẽ ãma 're isi'ubumroi mono norĩ hã, ãne:

— Ã hã Zezusi, 'Re ihâimana u'âsi mono zadawa 'mahârâ'wa, Nazaré na 'ri wa'õtõ nhisi hawi we imorĩ, Galiléia hawimhã.

12 Tawamhã Zezusi hã ma tô ãzé, 'Re ihâimana u'âsi mono nhorõwa 'ri 'rãihâ u, 'ri 'wawi wa'ra 're. Ta hawi ma tô te te sate, uburé te te irob'uipra za'ra norĩ hã duré tame te te dama irowede za'ra mono norĩ zama. Meza hã ma tô 'marõpãrĩ za'ra, rob'uiprazém na te te isaprĩ za'ra norĩ wi hã, duré danhamrazéb zama utu'u te te iwede za'ra norĩ wi hã. 13 Tawamhã Zezusi hã ma tô ãne tãma nharĩ za'ra:

— Ibaihâ Iwazé pese na rob'ui'éré hã, ãne te nomro: “Ĩnhorõwa hã te za da te 're sisi za'ra, ‘Da te ĩwi 're Irowaptẽrẽ za'ra mono zém’ na.” Tane nherẽ, ma tô asiwi i'manharĩ 'wa, isimisaihuri norĩ sima'urizém na.

14 Tawamhã itob'a norĩ hã duré imorĩ'õ norĩ zama, ma tô Zezusihi u sina rotété za'ra, 'Re ihâimana u'âsi mono nhorõwa 'ri 'wawi wa'ra 're. Tame ma tô apese. 15 Tawamhã sasedoti tisiré norĩ ma ipire norĩ hã duré 'Re ihâimana u'âsi mono nhimiroti zahi na dama rowahutu'wa norĩ hã, Zezusi iwẽ uptabi te te i'manharĩzé hã te te 'madâ'â za'ra wamhã, duré 'Re ihâimana u'âsi mono nhorõwa 'ri 'wawi wa'ra 're, ai'uté norĩ hã nasi ihãsi na te te wapari za'ra wamhã, ãne: “Apito Davihi nhihudu ãma, 're wawata za'ra wa'aba mono”, ãne wa, ma tô ab'rui pese za'ra.

16 Tahawa Zezusi hã ma tô siwi sadanha, ãne:

— E wapari õ di, ai'uté norĩ nasi ihãsizé hã.

Tawamhã Zezusi hã ma asa sada'âbâ za'ra, ãne:

— Wa tô wapari za'ra. E niwa sõré za'ra wa'aba ã bâ, Ibaihâ Iwazé pese na rob'ui'éré hã, ãne inomro hã: “Ai'uté norĩ zadawa hawi duré ai'uté pré dapam norĩ zadawa hawib zama te 're wairébé, iwẽ hã 'Re ihâimana u'âsi mono ãma 're iwata za'ra mono zé hã.”

17 Tawamhã Zezusi hã ma tô oto ihawi timorĩ za'ra, 'ri wa'õtõ hawi, Betãnia na 'ri wa'õtõ nhisi u, tame a'â sõtõ da.

18 Tawamhã awẽm na 'ri nho'õmo u apâ morĩ wamhã, Zezusi hã ma tô mra azâ. 19 Tahawa rob'rã figu wede bâdâdi zada'ré isa hã te te sãmri wamhã, ma tô itẽme apa, te te sabu da, i'rã zô. Tane nherẽ, 'rãi õ di. Isu si. Tahawa ma tô tãma tinha, rob'rã figu wede ma, ãne:

— Niwa i'ai'rã da hã, mare di za.

Ãne wa, awa'awi pesere ma tô tiwede'ré. 20 Tawamhã Zezusihi siré 're inomro mono norĩ ãne hã te te 'madâ'â za'ra wamhã, ma tô ãma titob'uzu za'ra. Tahawa, ma tô Zezusihi ma nharĩ za'ra, ãne:

— E niha ma awa'awi tiwede'ré, figu wede hã.

21 Tawamhã Zezusi hã ma tô asa tãma nharĩ za'ra, ãne:

— Tô sena wa za aima waihu'u za'ra wa'wa, ãne: 'Re ihâimana u'âsi mono umnha hã, aima 're hâimana za'ra wa'aba mono wamhã, duré 're asiwawã za'ra wa'aba mono õ wamhã, wapu di, figu wede ma, te i'manharĩ ne, 're i'manharĩ za'ra wa'aba mono da hã. Taha nhipai u hã duré ã hã ẽtẽ 'rãihâ ma, 're nharĩ waihu'u pese za'ra wa'aba mono di za, ãne: “Ma'ãpé hâiwi asa na, â poré u atobro da.” Tawamhã te za tô ãne hã tiromhâiba. 22 Uburé marĩ hã 'Re ihâimana u'âsi mono wi, rowaptẽrẽ na 're waptẽrẽ za'ra wa'aba mono wamhã, ãma 're asimizaze za'ra wa'aba mono wamhã, te za tô 're iwaibui wa'aba mo.

23 Tawamhã Zezusi hã ma tô apâ mo, 'Re ihâimana u'âsi mono nhorõwa 'ri 'rãihâ u. Tame te te dama rowahutu ré, sasedoti ipire norĩ hã ma tô itẽme aimasa, Zudeu norĩ ma roti'wa norĩ zama. Ãne ma tô siwi sadanha:

— E 'wa sadawa para ma tô ãne hã, marĩ 're i'ab'manharĩ mo. E 'wa hã asimiroti pire ma tô aima tisõ.

24 Tawamhã Zezusi hã ma tô sada'âbâ za'ra, ãne:

— Ĩzama wa za duré asadanharĩ za'ra wa'wa. I'uwaibaba ãma asiwi ĩzada'âbâ aba wamhã, wa za aima wasu'u za'ra wa'wa za, ni'wa sadawa para, marĩ te 're i'ab'manharĩ mono na hã. 25 Ma'ãpé ãma ĩzada'âbâ za'ra wa'aba za: E 'wa sadawa para Zuwã hã ma tô â dawabzuri hã te te dama 're ab'manharĩ. E 'Re ihâimana u'âsi mono zadawa para, e niwamhã ti'ai ãma 're idahâimana za'ra mono norĩ zadawa para.

Tawamhã ma tô sima nharĩ za'ra, ãne:

— Wa te ãma sada'âbâ za'ra wamhã, ãne: “'Re ihâimana u'âsi mono na”, te za wazadanharĩ za'ra za, ãne: “E niha bâ tawamhã bété, Zuwã Batista hã asiwi sazei wa'aba õ di.” 26 Tazahã, ti'ai ãma dazadawa param na, wa te ãma sada'âbâ za'ra wamhã, wapahi za'ra di dama hã, niha da te wama rob'manharĩ za'ra õ'umnhasite. E marĩ wa. Zuwã Batista hã uburé ma tô da te dasiwi 're 'madâ'â, 'Re ihâimana u'âsi mono zadawa 'mahârâ'wa na hã.

27 Tahawa ma tô ãne ãma siwi sada'â:

— Wa te waihu'u za'ra õ di.

Tawamhã Zezusi hã ma tô duré ãne asa ãma sada'âbâ za'ra:

— Tane duré wa hã te aima waihu'u za'ra wa'aba õ di za, ni'wa sadawa para, marĩ, te 're i'ab'manharĩ mono na hã.

28 Tawamhã Zezusi hã ma ãma uzusi, ãne:

— E niha ãma asimirob'madâ'â za'ra wa'wa hã ãhã na hã. Aibâ ma, te i'ra hã tãma 're hâimana zahuré. Tawamhã ipoto'rata ma, te tinha, ãne: “Ĩ'ra, mo oto aimorĩ, ĩte uva'ru te i'a're u, romhuri da, ãhã na hã.”

29 — Tawamhã ipoto'rada hã ma ãne sada'â: “Te ĩsima rowẽ õ di, ĩmorĩ da hã.” Tane nherẽ, taha parimhã rosa'rata na te te saprĩ wa, ma tô mo.

30 — Tawamhã imama hã ma tô duré mo inoi u. Tô õne ma tô tãma tinha. Ta hã ma tô sada'â, ãne: “Wẽ di tô, ĩmama. Wa za mo.” Tane nherẽ, morĩ õ di, ta hã.

31 — E ma hã ma tô 'manha, imama te te sima iwẽzé hã. — Ãne Zezusi hã ma tô ãma sadanharĩ za'ra.

Tawamhã ma tô ãma siwi sada'â, ãne:

— I'ra ipoto'rada.

Tawamhã Zezusi hã te ãne tãma nharĩ za'ra:

— Tane tô. Tô sena wa za aima waihu'u za'ra wa'wa, ãne: Danhib'apito ma rob'uiprazé arĩ ubumroi'wa norĩ hã duré pi'õ siwa'âbâ zô 're isi'ru za'ra mono norĩ hã te asisi, aiwana za'ra wa'aba, 'Re ihâimana u'âsi mono, da'ãma 're isib'a'uwẽ mono zéb u hã. 32 E marĩ wa. Zuwã Batista hã ma tô wei mo, bâdâdi i'uwaibaba hã te te aima hâi'ré za'ra wa'aba da. Tane nherẽ, asiwi sazei wa'aba õ di. Rob'uiprazé arĩ ubumroi'wa norĩ si duré pi'õ siwa'âbâ zô 're isi'ru za'ra mono norĩ si ma tô saze za'ra. Ta norĩ nhimizazezé hã 'madâ'â za'ra wa'aba nherẽ, aiwasété na asiwẽ'õ za'ra wa'aba õ di. Duré Zuwã Batistaha nhimirowasu'u hã asiwi sazei wa'aba õ di.

33 Tawamhã Zezusi hã te duré tãma rowasu'u za'ra, ãne:

— Ma'ãpé wapari pese za'ra wa'aba, ihâiba amo rowasu'u na romnhimiré hã: Aibâ buru tede'wa ma tô a're, uva 'ru hã. I'wawi ma duré wa'ra. Uva 'rãi ubumrozé ma tô duré 'manha, dapara na iwatizéb da, iwa'u zô. 'Ri 'rãihâ ma tô duré 'manha, uva'ru 'wawi rob'madâ'âzéb da hã. Taha pari nima norĩ buru na romhuri'wa norĩ ma, ma tô tisõ, i'apo'o zô. Taha pari ma tô mo, romhâ na. 34 Tawamhã bâdâ i'rã nhinarĩzé wisi wamhã, uva'ru tede'wa hã ma tõ nima norĩ tite romhuri'wa norĩ hã satõrĩ za'ra, romhuri'wa norĩ te te tãma i'apo'o za'ra zô. 35 Tane nherẽ, buru na romhuri'wa norĩ hã ma tô aibâ ma romhuri'wa norĩ hã siwi waibu. Ihâiba amo hã ma tô te te siwi 're pré'é. Duré ihâiba amo hã ma tô siwi tiwĩ. Duré ihâiba amo hã ẽtẽ na ma siwi tiwĩ. 36 Tawamhã uva'ru tede'wa hã ma tô duré tite romhuri'wa norĩ hã satõrĩ za'ra oto, ahâ na iwana ré te te isatõrĩ za'ra nhipai u. Tane nherẽ, buru na romhuri'wa norĩ hã tô õne ma tô duré tãma rob'manharĩ za'ra, iwana ré isi'aba'ré norĩ ma, te te irob'manharĩ za'ra ne. 37 Tawamhã da'rãsutu ãma hã, ti'ra hã ma tô itẽme satõrĩ za'ra, ãne te te rosa'rata sina: “Ĩ'ra wamhã, te za siwi wazé.” 38 Tane nherẽ, buru na romhuri'wa norĩ hã te te siwi 'madâ'â wamhã, ma tô ãne sima nharĩ za'ra: “Ã hã buru tede'wai 'ra. Romhutu'õmhã ite na te za oto tãma 're hâimana, buru hã. Oto wa te wasiwi wĩrĩ aba. Tawamhã buru hã wate za'ra za oto.”

39 — Ãne wa, ma tô siwi ti'â, buru tede'wai 'ra hã. Ma tô siwi waze, buru nhiti. Tame ma tô siwi tiwĩ.

40 Tawamhã Zezusi hã te oto sadanharĩ za'ra, ãne:

— Uva'ru tede'wa hã oto apâ wisi wamhã, e marĩ te za ãma 'manharĩ za'ra, buru na romhuri'wa norĩ ãma hã.

41 Tawamhã ma tô ãma sada'âbâ za'ra, ãne:

— Ãma pẽ'ẽzé za'ra ãna, te za simro, buru na romhuri'wa iwasété norĩ hã. Taha parimhã, buru hã te za tisõ, buru na romhuri'wa aimawi norĩ ma. Tawamhã ta norĩ hã te za te te tãma 're wa'âbâ za'ra, bâdâ i'uwaibaba na.

42 Tawamhã Zezusi hã ma tô tãma nharĩ za'ra, ãne:

— E niwa sõré za'ra wa'aba ã bâ, Ibaihâ Iwazé pese na rob'ui'éré, ãne inomro hã:

43 — Tahawa, tô sena wa za aima waihu'u za'ra wa'wa, ãne: 'Re ihâimana u'âsi mono hã te za aiwi wazere za'ra wa'wa, da'ãma 're isib'a'uwẽ mono zé hã. Tawamhã 're i'rãi wẽ za'ra mono norĩ ãma si te za oto 're sib'a'uwẽ za. 44 Ni'wa hã ã hã ẽtẽ nhisiwi waptã'ã wamhã, te za te te wa'õtõ 'rare. Duré ẽne hã ni'wa nhisiwi waptã'ã wamhã, te za su pese.

45 Tawamhã sasedoti ipire norĩ hã, duré farizeu norĩ hã, Zezusi rowasu'u na te te iromnhimiré'ézé hã te te wapari za'ra wamhã, ma tô sadaihu'u za'ra sina, õ norĩ ãma te te irowasu'u na hã. 46 Tahawa, ma tô aré sima wẽ za'ra, te te siwi âri da, dazazéb 're sab da, Zezusi hã. Tane nherẽ, dama hã pahi za'ra di, da te dasiwi 're 'madâ'â mono wa, Zezusi hã 'Re ihâimana u'âsi mono zadawa 'mahârâ'wa 're imorĩ na hã.