— Aibâ hã uva'ru ma tô a're. I'wawi ma tô wa'ra. Ma duré 'manha iwatizéb da hã, iwa'u zô. Tawamhã 'ri 'rãihâ ma duré 'manha, buru 'wawi rob'madâ'âzéb da hã. Taha pari ma tô tisõ iwa'âbâ zô, nima norĩ buru na romhuri'wa norĩ ma. Taha pari ma tô romhâ na mo, darob amoi u. 2 Tawamhã oto 'rãi prédu mono wa, i'rãnhinarĩzé bâdâ wisi wamhã, tite romhuri'wa hã ma tô 'mazatõ buru na romhuri'wa norĩ u, uva 'rãi apo te te tãma sõmri za'ra da, ite hã. 3 Tane nherẽ, ma tô siwi ti'â. Ma tô duré siwi azâ. Taha pari ma tô siwi satõ, ubana. 4 Tawamhã buru tede'wa ma duré 'mazatõ, romhuri'wa aimawi hã. Tane nherẽ, i'rãi wi ma tô siwi azâ. Ma duré tãma rowazém hiri za'ra. 5 Tawamhã aimawi hã ma tô duré 'mazatõ. Ta hã ma tô siwi tiwĩ. Ahâ na ma tô nasi azatõ, nima norĩ hã. Ma tô nasi hâ za'ra. Duré nima norĩ hã ma tô nasi simro. 6 Tawamhã buru tede'wa hã misire te te oto isatõrĩ da hã, ta hã i'ra tãma isawi uptabi. Tawamhã ti'ra hã ma tô oto satõ, ãne te te rosa'rata sina: “Ĩ'ra wamhã, te za siwi wazé.” 7 Tane nherẽ, buru na romhuri'wa norĩ hã te ãne ãma sima nharĩ za'ra: “Õhõ buru tede'wai 'ra, timama uirĩ na ãma isite da hã. Oto wa te wasiwi wĩrĩ aba. Tawamhã buru hã wate za'ra za.”

8 — Ãne wa, ma tô siwi ti'â, buru tede'wai 'ra hã. Ma tô siwi tiwĩ. Taha pari, ihâiba hã ma tô siwi time, buru nhiti.

9 — Ãhã wamhã, e marĩ te za 'manha, buru tede'wa hã. Te za sô timorĩ za'ra, te te uprosi da, buru na romhuri'wa norĩ hã. Taha pari te za tisõ buru hã, aimawi romhuri'wa norĩ ma.

10 — E niwa sõré za'ra wa'aba ã bâ, Ibaihâ Iwazé pese na rob'ui'éré, ãne inomro hã:

12 Tahawa Zudeu norĩ, pire na dama 're ihâimana za'ra mono norĩ hã te oto tirĩtĩ za'ra, Zezusi hã te te siwi âri da, te te ãma romnhimiré'é za'ra wa, te te siwi sadaihu'u wa, õ norĩ na te te irowasu'u na hã. Tane nherẽ, da'ahâ uptabi ma hã pahi za'ra di. Tahawa ma tô siwi tirẽ. Õne haré te ai'aba'ré.

13 Tawamhã taha pari, Zezusihi u ma tô 'mazatõrĩ za'ra, nima norĩ farizeu norĩ hã duré Erodihi niwĩ 're ihâimana za'ra mono norĩ zama te te siwi wapari da, tinhimiroti na te te i'upazéb zô. 14 Tawamhã itẽme sihutu wamhã, te ãne siwi sadanha:

— Rowahutu'wa, wama aiwaihu'u pese za'ra di, i'uwaibaba si 're i'aihâimana mono na hã duré danhimirosa'rata zarina 're i'aihâimana mono õ na hã. Duré 're da'a'madâ'â mono õ di, da'madâ'â ze zarina. Tazahã ma tô 're irowasu'u mo, tô sena dahâimanazém na 'Re ihâimana u'âsi mono te te sima 're iwẽ mono zéb zarina. Tahawa ma'ãpé wama waihu'u za'ra na. E i'uwaibaba rob'uiprazé arĩ hã, apito Cézaha^a ma, wa te 're iwa'âbâ za'ra mono da hã. E mare di.

15 Tane nherẽ, Zezusi hã ma tô waihu'u za'ra, te te waihu'u pese za'ra nherẽ, senai õ na te te siwi isadanharĩ na hã. Tahawa, te ãne tãma nharĩ za'ra:

— E marĩ da, te asiwi ĩpibui wa'wa, te i'upazéb zô. We asiwi 'mai'âri aba rob'uiprazé isapotore hã, te 'madâ'â da.

16 Tawamhã ma tô ni'wam norĩ hã tãma sõmri za'ra, rob'uiprazé isapotore hã. Tahawa te ãma sadanharĩ za'ra, ãne:

— E 'wai podo, rob'uiprazé isapotore na hã. E 'wa nhisi na duré ãma rob'ui'éré.

Tawamhã ma ãma siwi sada'â, ãne:

— Apito Cézaha podo. Duré taha nhisi ui'éré.

17 Tawamhã Zezusi hã te tãma nharĩ za'ra, ãne:

— Apito Cézaha ma sõmri za'ra wa'aba, marĩ Cézaha te hã. Tane, 'Re ihâimana u'âsi mono ma sõmri za'ra wa'aba, marĩ hã 'Re ihâimana u'âsi mono te hã.

Tawamhã ma tô ãma titob'uzu za'ra, Zezusi hã te te tãma iwaihu'u za'ra zém na.

18 Tawamhã taha pari, nima norĩ saduceu norĩ hã ma aihutu, Zezusihi u, te te dama 're iroti za'ra mono hã apâ 're idahâiwa'utu za'ra mono õ na hã. Tahawa te siwi sadanha, ãne:

19 — Rowahutu'wa, Mozési hã ma tô rob'ui'éré hã ãne tihi: “Aibâ hã dâ'â wamhã, timro hã 'ra ãna te te rẽme wamhã, isisãnawã te za ãma timro i'amo aba ãma, i'ra hã isisãnawã idâ'â 'ra ne 're hâimana za'ra mono da.” 20 Ãne wa za aima rowasu'u za'ra ni. Te 're hâimana za'ra, 7 na ihâiba za'ra aibâ norĩ sisãnawã si hã. Ipoto'rada hã ma tô timro. Tane nherẽ, ma tô dârâ, 'ra õ ré. 21 Tawamhã ipoto'rata nhosi hã ma tô ãma timro, i'amo aba ãma. Tane nherẽ, ta hã ma tô duré dârâ, 'ra õ ré. Tane ma tô duré tãma tiromhâiba si'ubdatõ ãma, ãma imro ma hã. 22 Tawamhã aibâ norĩ 7 na ihâiba za'ra hã ma uburé tô õhõ pi'õ na timro za'ra. Tane nherẽ, ma tô uburé tidâ'â za'ra, 'mai'ra ãna. Tawamhã pi'õ hã ma tô duré oto dârâ. 23 Tawamhã bété 'Re ihâimana u'âsi mono te te ida'ahâiwa'utuzé bâtâ ãma hã, e 'wai mro na te za tihâiba pi'õ hã, 7 na uburé ãma imro za'ra 'remhã.

24 Tawamhã Zezusi hã ma ãma sada'âbâ za'ra, ãne:

— Ma ãma i'upa za'ra wa'wa, aima waihu'u za'ra wa'aba õ wa, Ibaihâ Iwazé pese na rob'ui'éré hã duré 'Re ihâimana u'âsi mono waihu'u pe hã. 25 'Re ihâimana u'âsi mono hã idâ'â za'ra norĩ te te ahâiwa'utu wamhã, ni'wa hã oto mro õ di za. Dasina damro hã hâimana õ di za. E marĩ wa. Hâiwa ãma romhuri'wa norĩ ne, te za oto 're dahâimana za'ra. 26 E niha bâ, sõré za'ra wa'aba õ di, Mozési te te irob'ui'érézé hã apâ 're idahâiwa'utu za'ra mono zém na hã, wede zapore hawi, 'Re ihâimana u'âsi mono te te tãma inharĩzé hã, ãne: “Wa hã Abra'ãhã te 'Re ihâimana u'âsi mono, Izaquihi te 'Re ihâimana u'âsi mono duré Zacoho te 'Re ihâimana u'âsi mono.” 27 'Re ihâimana u'âsi mono hã idâ'â norĩ tei õ di. Dâ'â ãna 're ihâimana za'ra mono norĩ te si, ta hã. Tahawa ma ãma i'upai pese za'ra wa'wa.

28 Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa te te sina irotédé hã ma tô mreme wapari za'ra, isiwasu za'ra zé hã. Tawamhã i'uwaibaba na Zezusi hã te te sada'âbâ wa, te ãne sadanha:

— E ma hã ipire danhipai u 'Re ihâimana u'âsi mono nhimiroti, uburé ihâimana za'ra nhipai u hã.

29 Tawamhã Zezusi hã ma ãma sada'â, ãne:

— 'Re ihâimana u'âsi mono nhimiroti, danhipai u ipire uptabi hã, ã hã: “Izaraéu nhihudu norĩ, wapari za'ra wa'aba! Uburé Danhib'apito, wate 'Re ihâimana u'âsi mono hã, ta hã misire Uburé Danhib'apito uptabi. 30 'Re sawi pese mono, Uburé Danhib'apito ate 'Re ihâimana u'âsi mono hã, uburé aipẽ'ẽ na, uburé aihâimanazé aipẽ'ẽ 're i'rowi uptabi na, duré uburé asimirowaihu'u na duré uburé asiptede aima 're ihâimana za'ra wa'aba mono na zama.” 31 Tawamhã maparane ãma hã, ã hã duré ipire: “'Re dazawi pese za'ra wa'aba mono, 'râwi 're i'asisawi pese za'ra wa'aba mono ne.” Ã norĩ nhipai u hã, isimiroti ipire uptabi hã 'maihâimana õ di.

32 Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa te ãne tinha, Zezusihi ma:

— Tane tô, Rowahutu'wa. Tô sena uptabi, asimirowasu'u hã. Misire 'Re ihâimana u'âsi mono hã. Ihâiba'õ aimawi hã 'maihâimana õ di, isine hã. 33 Tahawa, wa za tô wa te 're sawi pese za'ra, 'Re ihâimana u'âsi mono hã uburé wapẽ'ẽ na, uburé wanhimirowaihu'u na, duré uburé wanhiptete na zama. Wa za duré wa te 're dazawi pese za'ra, 'râwi 're iwasisawi pese za'ra mono ne. Ã hã ipire, abaze da te 're izata za'ra mono, abaze zata zéb ãma duré 'Re ihâimana u'âsi mono ma, isiré norĩ na danhoprubzé nhipai u.

34 Tawamhã i'uwaibaba na te te isada'âbâ na, Zezusi hã te te wapari wamhã, ma tô ãne tãma tinha:

— Tane tô. 'Re ihâimana u'âsi mono, da'ãma 're isib'a'uwẽ mono zém nhiti, romhâ na aihâimana õ di.

Ta hawim haré, ni'wa isib'ru hã hâimana õ di, Zezusi te te isadanharĩ da hã, marĩ na.

35 Tawamhã Zezusi hã 'Re ihâimana u'âsi mono nhorõwa 'ri 'rãihâ 'wawi wa'ra 're, te te dama rowahutu ré, te ãne da'azadanha:

— 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te te dama 're rowasu'u za'ra, Davihi nhihudu na Danho'reptui'wa hã. E marĩ wa, te te ãne 're rowasu'u za'ra. 36 Apito Davi hã 'Re ihâimana u'âsi mono Pẽ'ẽzani te te tãma iwaihu'uzéb zarina, ma tô ãne ãma rob'ui'éré:

Tawamhã da'ahâ uptabi na idahâimana za'ra norĩ ma hã Zezusi hã wapari zei uptabi di.

38 Tawamhã Zezusi hã te dama rowahutu, ãne:

— Ãma 're pibui pese za'ra wa'aba mono, 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hâimanazé wi hã. Ta norĩ ma hã wẽ di, uza hâi wẽ na 're inomro mono da hã. Duré da te dasina 're i'ubumroi mono zéb ãma, wazép sina, da te 're iwaibui wẽ za'ra mono da si, tãma iwẽ za'ra hã. 39 Duré dama ipire norĩ simasisizém na 're si'ubumroi mono da si, tãma iwẽ za'ra hã, Zudeu norĩ te rowahutuzéb ãma hã duré dasiré 're idasaihuri mono zéb ãma zama. 40 Duré pi'õi mrotõ norĩ wi hã, te isibrom na 're simisaihuri za'ra. 'Re hâimana wẽ za'ra mono newa, te hâimana nhipese na, rowaptẽrẽ hã pa na te te 're 'manharĩ za'ra. Tahawa te za ta norĩ ma, danhipai u 'Re ihâimana u'âsi mono hã te te tãma 're arob'manharĩ wasété uptabi.

41 Tawamhã Zezusi hã te nhamra, 'Re ihâimana u'âsi mono ma danhoprubzé, da te 're iséme mono zéb 'rata. Rob'uiprazé, da te nasi séme ré, te da'a'madâ. Isibro pese norĩ hã ahâ na te nasi sé, rob'uiprazé hã sa'ẽtẽ na. 42 Taha ré hã, pi'õi mrotõ isibrob'õ hã ma tô wi. Ma tô tiza maparane rob'uiprazé isapotore hã surure nherẽ, da te ãma irob'uipra da hã. 43 Tawamhã isiré 're inomro mono norĩ zô, te hâ, Zezusi hã. Ãne te tãma nharĩ za'ra:

— Tô sena wa za aima waihu'u za'ra wa'wa, ãne: Ã hã pi'õi mrotõ sibrob'õ nherẽ, ma tô tinhoprubzém na uburé da'anhipa. 44 Uburé da te isõmri za'ra norĩ hã, isi'atarẽme si ma sõmri za'ra ni. Tanei õ di, pi'õi mrotõ hã. Simarĩ'õ uptabi nherẽ, ma tô uburé tisõ, ãma ihâimanazéb da hã.