— Rowahutu'wa, 'madâ'â pé! E niha hã ẽne itõmo wẽ uptabi si hã. E niha hã duré i'ri 'manharĩ wẽ uptabi si hã.

2 Tawamhã Zezusi hã ma ãma sada'â, ãne:

— E ã hã 'ri za'ẽne te i'a'madâ. Niwapsi ẽtẽ norĩ hã sisisiwi simi'wara õ di za. Uburé te za prub za'ra ni za.

3 Tawamhã Zezusi hã te oto nhamra, Olivera na ẽtẽ 'rãihâ nhisi ãma, 'Re ihâimana u'âsi mono nhorõwa 'ri 'rãihâ u ma tô ti nho're. Tame te siwi sadanha, hâiba pisutu Pedru norĩ hã, duré Tiagu, duré Zuwã duré Ãdré norĩ me:

4 — Rowahutu'wa. Ma'ãpé wama waihu'u za'ra na. E niwa te za ãne hã tiromhâiba. E marĩ te za watobro, ãma iwaihu'uzéb da hã, te te sina i'uwaimrami da hã.

5 Tawamhã Zezusi hã ma tãma waihu'u za'ra, ãne:

— Ma'ãpé, 're asi'madâ'â pese za'ra wa'aba mono, ni'wa hã te te aima rob'rãmi za'ra wa'aba tõ da. 6 Ni'wam norĩ hã ahâ uptabi na te za ĩnhisi na datẽme 're nomro. Ãne te za dama 're siwasu'u za'ra: “Wa hã Danho'reptui'wa!” Tawamhã ta norĩ hã da'ahâ uptabi na, te za te te dama 're rob'rãmi za'ra. 7 Duré dasi'wapéi wasu'u hã 're wapari za'ra wa'aba mono wamhã, tãma 're aipahi za'ra wa'aba mono tõ. Ã norĩ hã te za tô a'â 're wairébé. Tane nherẽ, zahadu rob'rãsutu õ di za. 8 Dawamri mono bâ te za 're dasi'wapé za'ra. Duré ti'ai wa'õtõ nho'õmo 're roti'wa norĩ hã te za ihâiba amoi u roti'wa norĩ hã te te 're 'wapé za'ra. Nima niwĩmhã te za ti'a hã daré 're popo'o za'ra. Te za duré mra hã da te 're sépata za'ra. Ã norĩ hã robzépata nhana'rada, pi'õi ãma iwasã hã 're isépu'u na'rata za'ra mono ne.

9 — Ma'ãpé, asimiza'rese 're aihâimana za'ra wa'aba mono. E marĩ wa. Da'ãma rowairébézéb u te za da te 're asimroi wa'wa. Abazei hâ nhorõ 'manharĩ na dapré'ézém na te za da te 're aihâ za'ra wa'wa, Zudeu norĩ te rowahutuzém norĩ 'remhã. Ĩ'u'âbâ te za da te 're asimroi wa'wa, roti'wa norĩ nho're u, duré apito norĩ nho're u hã. Tawamhã te za tãma 're asiwasu'u za'ra wa'aba mo, ĩzazei'wa 're i'anomro aba mono na hã. 10 Tawamhã rob'rãsutu õ ré hã, i'ru zahi tô Rowasu'uwẽ hã dawamri mono bâ da te iwapari za'ra da hã. 11 Tawamhã da te 're aiwaibui wa'aba mono wamhã, duré da'ãma rowairébézéb u, da te 're asimroi wa'aba mono wamhã, 're aihâtâ'â za'ra wa'aba mono tõ, za 're inharĩ za'ra wa'aba mono zém na hã. Taha bâtâ 'remhã, 'Re ihâimana u'âsi mono te te aima 're iwaihu'u za'ra wa'aba mono zém na si, 're nharĩ za'ra wa'aba mono za. E marĩ wa. A norĩ wa'wa 're nharĩ za'ra wa'aba mono õ wa za. Tazahã 'Re ihâimana u'âsi mono Pẽ'ẽzani. 12 Dasisãnawã nherẽ, te za da te 're hâiba za'ré za'ra, da te 're simroi mono da hã. Damama norĩ zama te za ti'ra hã te te 're hâiba za'ré za'ra. Da'ra norĩ hã timama norĩ da, te za 're hâimana za'ra. Te za duré te te 're simro. 13 Uburé te za da te 're ai'ruiwapari za'ra wa'wa ĩ'u'âbâ. Tane nherẽ, ni'wa hã siptete sina ĩ'ãma 're hâimana u'âsi mono wamhã, ro i'rãsutuzéb u, ta hã te za tinho'reptuzé hã sina uwaimra.

14 Tawamhã Zezusi hã ma ãma uzusi, ãne:

— Nimahã na hã, te za i'madâ'â za'ra wa'wa, 'Re ihâimana u'âsi mono nhorõwa 'ri 'rãihâ, da te dasiwi rẽme da, “marĩ ipipa iwasété uptabi hã” watobro ré hã, tame hâimana dai õ nherẽ. (Ãhã wasu'u na rob'ui'éré hã, isõré'wa hã te te isadaihu'u da si, iwẽ hã.) Tahawa, Zudéa ãma 're isi'ubumroi mono norĩ hã sisa'rei mono, simani za'ra da, ẽtẽ 'rãihâ u. 15 Duré ni'wa hã tinhorõwa 'ri nhisiwi sãmra ré wamhã, te te si'rai õ di za, 'ri para u sébré da hã, tinhimarĩ te te waibu da a'â. 16 Duré ni'wa hã rom na hâimana ré wamhã, tinhorõwa u hã te te sina siri õ di za, ti'uza ihâpa te te âri da hã. 17 Taha bâtâ mono na hã, pi'õ iwasã ré norĩ ma hã ropipa uptabi di za, duré ti'ra te te iwapsõmri ré norĩ ma zama! 18 Tahawa 'Re ihâimana u'âsi mono wi, 're rowaptẽrẽ za'ra wa'aba mono, ãne hã romhâimana tõ da, rowa'u'u wahâ 'rowi. 19 E marĩ wa. Bâdâ robzépata ré ihâimana za'ra 'remhã te za robzépata za'ẽtẽ uptabi za'ra ni, ãne na hã niwa iromhâimana õ, 'Re ihâimana u'âsi mono te te i'aropoto na'rata mono zém hawim haré, ãwa bâtâ u hã. Duré niwa ãne ihâimana zahu da hã mare di. 20 Uburé Danhib'apito hã, robzépatazé hã bâdâ te te asuru õ 'wa'âhã, ni'wa hã te te aré 'wapéi õ di. Tane nherẽ, tinhib'a'uwẽ da, te te sima ipisutu za'ra norĩ u'âbâ, ma tô pisutu, bâdâ 'rutu na hâimana da.

21 — Tahawa ni'wa hã te te aima rowasu'u aba wamhã, ãne: “Ma'ãpé, 'madâ'â za'ra wa'aba! Ãme te tihâiba, Danho'reptui'wa hã” niwamhã duré ãne: “Ma'ãpé, 'madâ'â za'ra wa'aba! Danho'reptui'wa, õhõta te nhamra”, ãne wamhã, 're dazaze za'ra wa'aba mono tõ. 22 E marĩ wa. Senai õ na 'Re ihâimana u'âsi mono zadawa 'mahârâ'wa norĩ hã te za sihâi'ré za'ra, duré senai õ danho'reptui'wa norĩ hã, marĩ dama i'manharĩ waihu'u'õ, za te te 're i'manharĩ za'ra mono hã, duré marĩ, za te te dama 're irowẽ zani za'ra mono zama, te te dama 're rob'rãmi za'ra mono da, duré wapu wamhã, 'Re ihâimana u'âsi mono te te sima ipisutu za'ra norĩ ma zama, te te rob'rãmi za'ra da. 23 Tahawa, ma'ãpé asimiza'rese 're aihâimana za'ra wa'aba mono. Wa aipo're pu'u za'ra wa'wa, ãne hã romhâimana wana ré.

24 Tawamhã Zezusi hã ma duré tãma waihu'u za'ra, ãne:

— Robzépata za'ẽtẽ zéb ré hã, bâdâ si'utõrĩ za'ra parimhã, bâdâ hã te za titobra. Te te oto rob'uiwẽ õ di za. A'amo zama te te duré oto rob'uiwẽ õ di za. 25 Wasi norĩ hã te za duré hâiwa hawi rere. Uburé hâiwa na siptete uptabi na 're isimasa mono hã te za oto tisãsã'ã za'ra. 26 Tawamhã Ti'ai ãma Dasiré Ipodo hã te za dasiwi 'madâ'â ni, hâiwa'a na wei morĩ ré apâ, waihu'u pese uptabi na duré ihâiba na rowa'a isa'ẽtẽ uptabi ré. 27 Tawamhã ta hã te za tite hâiwa hawi romhuri'wa norĩ hã we satõrĩ za'ra, daro mono bâ 'Re ihâimana u'âsi mono te te sima ipisutu za'ra norĩ hã te te sitẽme 'rã'õtõ da, maparane si'uiwa na ti'a zada'ré ihâimana za'ra norĩ hawimhã.

28 Tawamhã Zezusi hã te duré tãma rowasu'u za'ra, ãne:

— Ma'ãpé, waihu'u za'ra wa'aba, rob'rã figu wede na romnhimiré'ézé hã: Figu wede panhipti uzéi wẽ wamhã, duré su té wamhã, te za iwaihu'u za'ra wa'wa, tã ita'azéb u oto iromhuture na hã. 29 Tane duré, ã hã iromhâimanazé 'madâ'â za'ra wa'aba wamhã, te za ãma iwaihu'u za'ra wa'wa, iromhuture na hã apâ za we imorĩzé, Ti'ai ãma Dasiré Ipodo hã. 30 Tô sena wa ãne hã aima waihu'u za'ra wa'wa. Uburé ã hã iromhâimana mono zé hã te za tihâimana za'ra, ã bâtâ na dahâiba ré idahâimana za'ra hã dadâ'â za'ra õ ré. 31 Hâiwa duré ti'ai me, te za ai'utõrĩ zahuré. Tane nherẽ, ĩmreme hã niwa si'utõrĩ waihu'u õ di za.

32 Tawamhã Zezusi hã ma ãne tãma 'rãsutu za'ra:

— Ãne hã iromhâimana mono zéb da hã, ni'wa bâdâ hã te te waihu'u õ di, duré bâtâ pibuzé hã. Hâiwa hawi romhuri'wa norĩ zama te te duré waihu'u za'ra õ di, duré I'ra zama. Imama si te te waihu'u pese di. 33 Tahawa, ma'ãpé asimiza'rese 're aihâimana za'ra wa'aba mono. Duré asi'wawi 're asõpré u'âsi aba mono, waihu'u õ wa, bâdâ iwisizé hã. 34 Ta hã bâdâ hã, aiwa aibâ hã tinhorõwa te te irẽme ne romhâ na morĩ da, tinhimiromhuri tite romhuri'wa norĩ ma, te te i'apisutu ne hâiba mono bâ, 'ridawa 'madâ'â'wai ma, te te ĩ'ru ne, te te sô 're rob'madâ'â u'âsi mono da. 35 Tahawa, ma'ãpé 're asõpré u'âsi aba mono, waihu'u õ wa, 'ri tede'wa hã apâ za we iwisizé hã, ãté hâiwahâ, niwamhã mara wa'wa, duré niwamhã si'a hârâ wi, ãté duré niwamhã awẽ wi. 36 Tahawa 're asõpré u'âsi aba mono, rosa'rese õ ré wei wisi wa, asõtõ ré te te asõpẽtẽ za'ra wa'aba tõ da 37 Ãne hã te aima iwaihu'u za'ra wa'aba zé hã, uburé ĩzazei'wa norĩ ma, wa waihu'u siro: Ma'ãpé, asimiza'rese 're asõpré u'âsi aba mono!