— Dato hâimana ré hã, wa te wasiwi âri õ di za, ãne hã wa te wasiwi 'manharĩ wamhã, ro'wa'rudu hã watobro õ'umnhasite, dasisapẽtẽ za'ra wa.

3 Tawamhã Zezusi hã Betãnia ãma te tihâiba. Tame te tisai ma nhamra, Simahã nhorõwa 're, ta hã i'wa're, ãma 're ihâimana mono aré. Taha ré, pi'õ hã ma tô itẽme ãzé. Wedewa'u zadaze ẽtẽ 'manharĩ 'remhã ma siré 'mazé, nardu na wedewa'u nhisi iwa'âbâ za'ẽne hã. Tawamhã isé hã ma tô sô pru. Taha pari, ma tô sa'wa Zezusihi 'rã nhisiwi. 4 Tawamhã tame idahâimana za'ra hã da te ãma dasiwi wẽ'õ pese wa, ma tô ãne dasima nharĩ za'ra ni:

— E marĩ da, ma taré sa'wa wedewa'u zadaze hã. 5 Te te dama wede 'wa'âhã, 300 na aré rob'uiprazé isapotore hã, isibrob'õ norĩ ma, te te isõmri mono da hã.

Tawamhã pi'õi ma, ma tô duré mreme tete na nharĩ za'ra. 6 Tane nherẽ, Zezusi hã te tãma nharĩ za'ra, ãne:

— Tô'ã. Tane hã pi'õi ma, 'manharĩ aba tõ. Rowẽ na si hâimana. E marĩ da, ma sada asahi za'ra wa'wa. Iwẽ uptabi hã ma tô ĩma 'manha. 7 Isibrob'õ norĩ hã ai'rata te za 're si'ubumroi u'âsi 'wa. Asima iwẽzéb zarina, te za 're ipawaptob za'ra wa'aba mo. Tanei õ di wa hã. Ai'rata 're ĩnhamra u'âsi aba mono dai õ di. 8 Pi'õ hã ma tô ĩma 'manha, pire nherẽ, te te i'manharĩ da hã. Dasisadazezé wedewa'u to isadazei uptabi hã ma tô ĩhâiba nhisiwi sa'wa. Ĩdâ'â wana ré, ma tô ĩhâiba zadaze, ab're 're, da te ĩnherẽ wana ré. 9 Tô sena, wa za ãne aima waihu'u za'ra wa'wa. Daro mono bâ Rowasu'uwẽ na da te 're dapo're pu'u za'ra mono wamhã, te za da te 're wasu'u za'ra, ã hã pi'õ te te ĩma i'manharĩ wẽ zé hã. Te za duré ãma 're dasipo're pu'u u'âsi za'ra.

10 Tawamhã Zudasi Iscarioti hã ma tô mo, Zezusihi siré 12 na 're inomro mono norĩ siré 're imorĩ hã, sasedoti ipire norĩ u, Zezusi hã te te tãma hâiba nhomri za'ra da. 11 Tawamhã Zudaha mreme te te wapari za'ra wamhã, ma tô tãma rowẽ pese za'ra. Tahawa, ma tô rob'uiprazém na tãma ropisutu za'ra. Tawamhã Zudasi hã te oto rob'madâ, bâdâ i'uwaibaba hã tãma iwisizéb zô, Zezusi hã te te ihâiba nhomrizéb da hã.

12 Tawamhã i'u'ẽtẽ wapu mapu õ na 're idasaihuri mono zéb ãma imorĩ'rata na bâdâ ihâimana ãma, ma tô Zudeu norĩ hã te te 're simro pone'ẽrebâ i'rare hã, Pascoa na dato nhisi na ãma 're isaihuri mono zéb da hã. Tahawa Zezusi hã ma tô siwi sadanha, isiré 're inomro mono norĩ hã, ãne:

— Rowahutu'wa. E momo ma tô asima iwẽ, iwanhipi za'ra zéb da hã, Pascoa na dato nhisi na iwasaihuri da hã.

13 Tawamhã Zezusi hã ma tô maparane satõrĩ zahuré, isiré 're ine hã. Ãne te tãma rob'ru zahuré:

— 'Ri nho'õmo u, ane wa'aba. Tamemhã te za aibâ hã asõpẽtẽ 'wa, piza'a te te i'âri hã, â ré. Isarina ane wa'aba za. 14 Tawamhã aibâ isébrézéb ãma, tame 'ri tede'wa hã sadanharĩ aba za, ãne: “Rowahutu'wa hã te wei wama ti'ru, wa te asadanharĩ da: E mame te tihâiba 'ri're wa'wa hã, ĩsiré 're inomro mono norĩ me, iwa iwasaihurizéb da hã, Pascoa na dato nhisi na.” 15 Tawamhã te za aima wasu'u wa'wa, hâimo 'ri're wa'wa isa'ẽne hã. Tamemhã uburé marĩ hã te iwa aimasa, dasai 'manharĩzéb da hã. Tame wazô robza'ra pese aba za.

16 Tawamhã Zezusihi siré 're ine hã neb zahuré wamhã, 'ri wa'õtõ u ma tô tizasi zahuré. Tame ma tô anhopẽtẽ zahuré, uburé marĩ hã Zezusi te te tãma iwaihu'u siromo zahuré zéb uwaibaba. Tawamhã tame ma tô robza'ra pese zahuré, Pascoa na dato nhisi na isaihurizéb da hã.

17 Tawamhã mara wamhã oto, Zezusi hã ma tô ãwisi za'ra, isiré 're inomro mono 12 na ihâiba za'ra norĩ hã. 18 Tawamhã saihuri ré, Zezusi hã ma tô tãma nharĩ za'ra, ãne:

— Tô sena, wa za aima waihu'u za'ra wa'wa, ãne: Asiré za'ra wa'aba hã ni'wa misi te za dama ĩhâiba nho, ĩsiré isa hã.

19 Ãne wa, ma tô tiwi tirobzei'õ pese za'ra. Tahawa, ma tô hâiba mono bâ sina sadanharĩ za'ra, ãne:

— E wa hã te dama aihâiba nhomri da bâ.

20 Tawamhã Zezusi hã ma duré tãma waihu'u za'ra:

— Asiré za'ra wa'aba hã, ni'wa ĩsiré isa pratu 're. 21 Ti'ai ãma Dasiré Ipodo hã te za dârâ. Te za sina uwaimra, Ibaihâ Iwazé pese na rob'ui'éré ãma inomro siromo hã. Tazahã, tãma ropipa uptabi di za, Ti'ai ãma Dasiré Ipodo te te dama ihâiba nhomri ma hã! Wẽ di aré tãma hã, niwa poto õ 'wa'âhã, ta hã.

22 Tawamhã saihuri ré, Zezusi hã ma tô ti'â, i'u'ẽtẽ wapu hã. 'Re ihâimana u'âsi mono ãma te tiwata. Taha pari, ma tô te te wẽ'ẽ, i'u'ẽtẽ wapu hã. Tawamhã isiré 're inomro mono norĩ ma, ma tô te te sõmri. Ãne te tãma nharĩ za'ra:

— Waibui wa'aba. Ã hã ĩhâiba.

23 Taha parimhã ma tô duré ti'â hâsizé hã, uva 'rãi wa'ui ré hã. 'Re ihâimana u'âsi mono ãma te duré tiwata. Taha pari, isiré 're inomro mono norĩ ma, ma tô tãma sõmri za'ra. Ta norĩ hã uburé ma tô âhu. 24 Tawamhã Zezusi hã ma duré tãma waihu'u za'ra, ãne:

— Ã hã ĩwapru. Da'ahâ uptabi zada, te za asa'wa. Ĩwapru hã te za uwaimra ropisudu, 'Re ihâimana u'âsi mono hã te te i'manharĩzé, tinhib'a'uwẽ norĩ ma. 25 Tô sena wa za aima ĩsiwasu'u za'ra wa'wa, ãne: Ã hã rob'rãi wa'u hã te hâ'rẽne zahu õ di za. Niwapsi wa za hâ'rẽ, rob'rãi wa'u ité hã 'Re ihâimana u'âsi mono da'ãma 're isib'a'uwẽ mono zéb ãma si.

26 Tawamhã Zezusi norĩ hã tinho're na^a 'Re ihâimana u'âsi mono ãma wata za'ra parimhã, ma tô wairé, Olivera na ẽtẽ 'rãihâ nhisi u.

27 Tawamhã Zezusi hã ma tô isiré 're inomro mono norĩ ma waihu'u siromo za'ra, ãne:

— Uburé te za asiwi ĩrẽme 'wa za, duréihã Ibaihâ Iwazé pese na rob'ui'éré siromo zarina, ãne: “Pone'ẽrebâ 'madâ'â'wa hã wa za tiwĩ. Tawamhã pone'ẽrebâ norĩ hã te za ropé.” 28 Tane nherẽ, apâ ĩhâiwa'utu parimhã, asõwa wa za ĩmorĩ 'wa, Galiléia u.

29 Tawamhã Pedru hã te Zezusihi ma tinha, ãne:

— Uburé te te airẽme za'ra nherẽ, wa hã niwa te airẽme õ di za.

30 Tane nherẽ, te Zezusi hã tãma tinha, ãne:

— Tô sena wa za aima waihu'u. Ã mara na, maparane ãma si'a hã tihârâ na te te sahu õ ré, te za dawi ĩ'udâ za si'ubdatõ, aima ĩwaihu'u õ na hã.

31 Tane nherẽ, Pedru hã sadahutu ãna te nasi tãma tinha, ãne:

— Asiré ĩdâ'â da nherẽ, niwa te ai'udâ õ di za.

Tawamhã uburé isiré 're inomro mono norĩ hã ma tô õne si nharĩ za'ra, za te te dawi i'udâ za'ra õ na hã.

32 Tawamhã Zezusi norĩ hã ma tô ai'aba'ré, Zétisemani na rob're nhisi u. Tame te isiré 're inomro mono norĩ ma nharĩ za'ra, ãne:

— Ãme asimroi wa'aba, te rowaptẽrẽ da, za ĩmorĩ ré.

33 Tawamhã siré ma tô te te simro Pedru norĩ hã, Tiagu duré Zuwã norĩ me. Tame ma tô robzei'õ hã azâ, sa'ẽtẽ uptabi na. Ma tô duré sa'ẽtẽ uptabi na robzépata. 34 Tahawa te tãma nharĩ za'ra, ãne:

— Robzei'õ hã te sa'ẽtẽ uptabi na ĩma tihâiba, ta hã za ãté te te ĩwĩrĩ ne hã. Ãme asimroi wa'aba. Ma'ãpé asõpré wa'aba.

35 Tawamhã romhâ prã na ma tô isiti timorĩ za'ra. Tame ma tõ hi'rãtitõ nhamra, ti'ai u siwẽ'ẽ sina. Timama wi te rowaptẽ, wapu wamhã, te te irobzépatazé hã za bâdâ te te tãma ba'a da. 36 Ãne ma tô rowaptẽ:

— Ĩmama ĩma i'asawi uptabi, uburé marĩ hã aima waihu'u pese di. Tahawa, ma'ãpé ĩma ba'a, robzépada isé uptabi hã. Tane nherẽ, mare di te ĩsima iwẽzéb zarina hã. Asima iwẽzéb zarina si.

37 Taha pari tisiré 're inomro mono norĩ u, apâ ma tô sina siri. Tane nherẽ, sõtõ za'ra ré, ma sõpẽtẽ za'ra. Tahawa te Pedruhu ma tinha, ãne:

— Simau, e te asõ. E asõtõ ãna, misi bâtâ pibuzé hã ai'ãma isi'utõrĩ da hã waihu'u õ di. 38 Ma'ãpé, asõpré wa'aba, duré rowaptẽrẽ za'ra wa'aba, Satanasi hã te te aipibu za'ra wa'aba wa, airere'e aba tõ da. Aipẽ'ẽ 'remhã marĩ iwẽ hã 're 'manharĩ za'ra wa'aba mono da, te asima 're iwẽ za'ra wa'aba mono. Tane nherẽ, aihâiba za'ra wa'wa hã sib'uware di.

39 Tawamhã Zezusi hã apâ ma tô duré mo. Ma tô rowaptẽ, tô õhõ na te te irowaptẽrẽ 'rata zém na, te te irobzépatazé hã te te tãma ba'a da. 40 Tawamhã apâ te te sina siri wamhã, ma tô duré sõpẽtẽ za'ra, sõtõ za'ra ré, tomhâ pire za'ra wa. Tahawa Zezusi hã te te siwi sada'âbâ waihu'u õ di.

41 Tawamhã si'ubdatõ ãma te te sina isiri ãma hã, ma tô tãma nharĩ za'ra, ãne:

— E niha te zahadu asõtõ za'ra wa'wa. Te duré aiwa'utu siroptub za'ra wa'wa. Tô'ã oto. Bâdâ ma tô oto iwa waptãrã. Ti'ai ãma Dasiré Ipodo, te za oto hâiba nhomri ni, aibâ iwasété norĩ nhib'rata. 42 Ma'ãpé, aiwahutu za'ra wa'aba, oto wasi'aba'ré da. Õhõta te wei mo, dama ĩhâiba nhomri'wa da hã.

43 Tawamhã Zezusi hã tãma siwasu'u za'ra ré, Zudasi hã ma tô wi, isiré 're imorĩ hã aré. Isiré hã da'ahâ uptabi di, danhi'wa ré duré danhiwãi ré, sasedoti ipire norĩ te te sô isatõrĩ za'ra hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama. 44 Taha wana ré hã, Zudasi hã ma tô waihu'u siro, dama ipire norĩ ma, pibui pese na da, za te te i'manharĩzé hã, ãne: “Tob'rata hârâ na za te isawi hã, tô ta hã asiwi âri aba. Asiptete sina, asiwi saprõni aba.”

45 Tawamhã Zudasi hã Zezusihi u wisi wi, te ãne tãma tinha:

— Rowahutu'wa.

Taha pari ma tô sawi, tob'rata hârâ na. 46 Tawamhã Zezusi hã ma tô oto dasiwi âri ni. Ma tô duré dasiwi tété ni. 47 Tawamhã ni'wa tame i'rata isa hã ma tô sib'ézé 'wapa hã waze. Ma tô po're nhizâ, sasedoti ipire uptabi ma romhuri'wa hã. 48 Tawamhã Zezusi hã sô idasihutu norĩ ma, te tinha, ãne:

— E wa hã dapãrĩ'wa pâ, ma we ĩzô aihutu 'wa, sib'ézé 'wapa ré, duré wede wãi ré. 49 Bâtâ sidâpâsi wa tô asiré 're ĩhâimana za'ra wa'wa. Wa tô te 're rowahutu 'Re ihâimana u'âsi mono nhorõwa 'ri 'wawi wa'ra 're. Tane nherẽ, tamemhã asiwi ĩ'âri aba õ di. Tane nherẽ, Ibaihâ Iwazé pese na ĩ'ãma rob'ui'éré hã te ĩsina i'uwaimrami da hã, tô ĩ'ru zahi.

50 Tawamhã uburé isiré 're inomro mono norĩ hã ma tô siwi tirẽ. Ma tô sisa're.

51 Tawamhã aibâ ihâiba té hã zazahâ hâirã na si isi'ubu hã ma tô Zezusihi zarina mo. Ta hã da te dasiwi âri da aré. 52 Tane nherẽ, sisa'u ma tô tirẽ, tisi'ubuzé zazahâ hâirã hã. Ai'uréiwi ma tô wara.

53 Taha parimhã Zezusi hã ma tô dasiwi saprõni ni, sasedoti 'Re ihâimana u'âsi mono ma da'ãma romhuri'wa tisiré norĩ nhipai u ipire uptabi u. Tame ma tô si'rã'õtõ, sasedoti ipire norĩ hã, Zudeu norĩ ma roti'wa norĩ hã, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama.

54 Tawamhã Pedru hã ma tô Zezusi hã te te pibu romhâ na, sasedoti ipire uptabi nhorõwa 'wawi wa'ra u. Tame 'ridawa 'madâ'â'wa norĩ siré ma tô nhamra, unhama dawa, hâi'ro da. 55 Tawamhã sasedoti ipire norĩ hã duré uburé Zudeu norĩ ma roti'wa norĩ hã te tinhopré ni'wam norĩ zô, Zezusi hã marĩ te te 're i'ab'manharĩ wasété mono zém na te te siwi wasu'u da, taha zarina te te siwi 'ru da, da te dasiwi wĩrĩ da. Tane nherẽ, ni'wai õ di, iwasu'u wasété'wa da hã. 56 Tawamhã da'ahâ na dazadawa nhipese na ma tô wasu'u za'ra ni. Tane nherẽ, da te iwasu'u wasété za'ra zé hã si'uwaimrami za'ra õ di.

57 Tawamhã ni'wam norĩ hã ma tiwahutu za'ra hâiwi, sadawa nhipese sina Zezusihi ãma iwasédé te te hiri za'ra da. Ãne te dama wasu'u za'ra:

58 — Wa wapari za'ra ni, ãne te te nharĩ ré hã: “Wa za 'ri pru, ã hã 'Re ihâimana u'âsi mono nhorõwa 'ri 'rãihâ hã, danhib'rata na da te dasiwi i'ri hã. Tawamhã aimawi hã wa za 'ri si'ubdatõ bâtâ 're, danhib'rata na da te dasiwi i'ri õ hã za.”

59 Tane nherẽ, isimirowasu'u za'ra hã sipu'u pese di. Si'uwaimrami za'ra õ di.

60 Tawamhã sasedoti ipire uptabi hã dawa'wa ma tô hâiwi za. Ta hã te Zezusi sadanha, ãne:

— E sada'âbâ za'ra õ di za, aiwasu'u wasété 'wa norĩ hã.

61 Tane nherẽ, te Zezusi hã ari'iwi zab u'â. Te te sada'âbâ õ di. Tawamhã sasedoti ipire uptabi hã te duré sadanharĩ zahu, ãne:

— E a hã Danho'reptui'wa, 'Re ihâimana u'âsi mono ãma 're iwawata za'ra mono 'ra.

62 Tawamhã Zezusi hã te tãma siwasu'u, ãne:

— Ĩhe, wa hã. Ti'ai ãma Dasiré Ipodo hã te za asiwi i'madâ'â 'wa, 'Re ihâimana u'âsi mono Iwaihu'u Pese nhimire niwĩ isãmra na, duré hâiwa'a na apâ wei morĩ wamhã.

63 Tawamhã sasedoti ipire uptabi hã te te sadawa 'rui wa, ma tô ti'uza hã hâiwazu. Ãne ma tô da'mahâ:

— Wanhimnhasi za'ra õ di za oto, iwasu'u wasété 'wa norĩ zô hã. 64 Ma tô iwapari za'ra wa'wa, 'Re ihâimana u'âsi mono ãma te te iwasétézé hã. E niha te ãma irosa'rata za'ra wa'wa.

Tawamhã uburé ma tô ãma rowairébé za'ra, da te dasiwi wĩrĩ da.

65 Tawamhã ni'wam norĩ hã ma tô nasi siwi ubu upto, tizadaipro na. Zazahâ na ma duré siwi ubu ubu. Taha ré, te nasi siwi ahâ. Ãne te nasi siwi 'mahâ:

— E 'wa hã ma ai'azâ. Ma'ãpé ãma uwaimrami.

Tawamhã 'Re ihâimana u'âsi mono nhorõwa 'ri 'madâ'â'wa norĩ zama, ma tô siwi ti'â, te te nasi siwi ahâri da hã.

66 Tawamhã Pedru hã 'ri 'wawi wa'ra 're, pi'reba 'ri zahâpâ ãma zahadu dame sãmra ré, ma pi'õ hã sihâi'ré, sasedoti ipire uptabi ma romhuri'wa hã. 67 Tame ma 'madâ Pedru, hâi'ro ré. Ma tô 'madâ'â pese. Tahawa te ãne tãma tinha:

— Azama te Zezusihi siré 're aimo, Nazaré ãma iprédup siré.

68 Tane nherẽ, Pedru hã te ai'udâ:

— Ĩma waihu'u õ di. Ĩma inharĩzé hã ĩma sa'rese õ di.

Taha pari 'ri nhi'riti u ma watobro. Tame awa'awi si'a hã ma tô hâ. 69 Tawamhã romhuri'wa sipi'õ hã Pedru, 'ri nhi'riti ãma te te duré 'madâ'â wamhã, i'rata idasimasam norĩ ma, te duré wasu'u, ãne:

— Ã hã aibâ hã Zezusi norĩ siré, 're imorĩ.

70 Tane nherẽ, Pedru hã te duré ai'udâ. Taha pari ãma ronomro õ ré, te duré tãma nharĩ za'ra, i'rata isimasam norĩ hã, ãne:

— Tô sena, a hã Zezusi norĩ siré, 're i'aimorĩ. A hã duré Galiléia ãma 're i'asãmra mono.

71 Tawamhã Pedru hã ma tô sina ropisutu, 'Re ihâimana u'âsi mono ma, marĩ iwasédé hã te te tãma pisutu da, tô sena dama siwasu'u õ wamhã. Ãne te tãma ropisutu za'ra:

— Ĩma waihu'u õ di ã hã aibâ hã, ĩma iwasu'u za'ra wa'wa hã.

72 Tawamhã awa'awi si'a hã ma tihârâ na sahu, maparane ãma oto. Tahawa Pedru hã ma tô sipo're pu'u, Zezusi te te tãma iwaihu'u siromo zém na hã, ãne: “Maparane ãma si'a hã tihârâ na te te sahu õ ré, si'ubdatõ te za ĩ'udâ za.”

Tahawa Pedru hã ma tô oto aiwa'õ.