2 — Aima waihu'u pese za'ra wa'aba di, maparane awẽ parimhã, Pascoa na dato iwamri za ihâimana na hã. Tawamhã Ti'ai ãma Dasiré Ipodo hã te za dasiwi hâiba nhomri ni, wedepo'o nhonhi'rãmi na da te sasõmri da.

3 Taha ré hã, sasedoti ipire norĩ hã duré Zudeu norĩ ma roti'wa norĩ hã ma tô si'rã'õtõ, Caifasihi nhorõwa, 'ri isa'ẽtẽ ãma. Ta hã sasedoti tisiré norĩ nhipai u ipire uptabi, 'Re ihâimana u'âsi mono ma, da'ãma romhuri'wa. 4 Tawamhã ma tô rowa'õno hã siwi 'manha, Zezusi hã te te siwi âri da, pi'uriwi te te siwi wĩrĩ da. 5 Tane nherẽ, ma tô ãne sima roti za'ra:

— Dato hã hâimana ré, wa te wasiwi âri õ di za. E marĩ wa. Ãne hã wa te wasiwi 'manharĩ wamhã, ro'wa'rudu hã te za watobro. Te za wazada tazahi za'ra ni za.

6 Tawamhã Zezusi hã, Betãnia ãma Simau i'wa're ré nhorõwa ãma sãmra ré, 7 ma tô pi'õ hã itẽme ãzé. Wedewa'u zadaze ẽtẽ 'manharĩ 'remhã iwa'âbâ za'ẽne hã ma tô sô 'mazé. Tawamhã i'rã nhisiwi ma tô sa'wa. 8 Tane nherẽ Zezusihi siré 're inomro mono norĩ hã, ãne hã te te 'madâ'â za'ra wamhã, ma tô sada ab'ru za'ra, pi'õ da. Ãne ma tô tãma nharĩ za'ra:

— E marĩ da, ma taré isa'wa, wedewa'u zadaze hã. 9 Ãhã wedewa'u isadaze hã, wa'âbâ za'ẽtẽ na te aré iwe. Tawamhã iwa'â hã isibrob'õ norĩ ma, te aré isõmri mo.

10 Tane nherẽ, Zezusi hã te te sima inharĩ za'ra zé te te waihu'u wa, ma tô ãne tãma nharĩ za'ra:

— E marĩ da, te pi'õi wi iro'wa'rutu za'ra wa'wa. Iwẽ uptabi hã ma tô ĩma 'manha. 11 E marĩ wa. Isibrob'õ norĩ hã ai'rata te za 're hâimana u'âsi za'ra wa'wa. Tanei õ di, Wa hã ai'rata 're ĩnhamra u'âsi aba mono dai õ di. 12 Pi'õ hã wedewa'u zadaze ĩ'rã nhisiwi te te isa'wari hã, da te dasiwi ĩnherẽzéb u ĩdâ'â wana ré, te te ãma ĩhâiba zadaze da, ma tô ãne hã 'manha. 13 Tô sena, wa za ãne hã aima waihu'u za'ra wa'wa: Daro mono bâ Rowasu'uwẽ na da te dasima 're rowasu'u za'ra mono wamhã, ã hã pi'õ te te ĩma i'manharĩzé hã te za da te dasima 're wasu'u za'ra. Te za duré ãma 're dasipo're pu'u za'ra.

14 Tawamhã 12 na Zezusihi siré 're inomro mono norĩ me 're imorĩ, Zudasi Iscarioti na isisi hã, ta hã ma tô mo, sasedoti norĩ tisiré norĩ nhipai u ipire norĩ u. 15 Ãne ma tô sina sadanharĩ za'ra:

— E niha te za ĩma iwa'âbâ za'ra wa'wa, Zezusi hã te aima hâiba nhomri za'ra wa'aba wamhã.

Tawamhã ma tô tãma wa'âbâ za'ra, 30 na rob'uiprazé isapotore ẽtẽ waipo prã prata 'manharĩ na.

16 Tawamhã ta hawim haré te Zudasi hã oto simiza'rese tihâiba, Zezusi te te dama hâiba nhomri da hã.

17 Tawamhã imorĩ'rada bâdâ ihâimana ãma I'u'ẽtẽ Wapu imapu õ na 're idasaihuri mono zém na, ma tô Zezusihi u sina rotété za'ra, isiré 're inomro mono norĩ hã. Ãne ma tô siwi sadanha:

— Rowahutu'wa. E momo te asima irowẽ, barana iwasaihurizéb da hã, Pascoa na dato ihâimanazém na hã.

18 Tawamhã Zezusi hã ma tô ãne tãma nharĩ za'ra:

— Mo oto ai'aba'réi wa'aba 'ri wa'õtõ u, aibâ zô airĩtĩ za'ra wa'aba da. Sõpẽtẽ za'ra wa'aba wamhã, ãne tãma nharĩ za'ra wa'aba za: “Rowahutu'wa hã ãne te we tinha: Ĩte bâdâ hã ma tô wi. Ĩsiré 're inomro mono norĩ me, wa za wasaihuri ni asõrõwa 're, Pascoa na dato nhisi ihâimanazém na hã.”

19 Tawamhã isiré 're inomro mono norĩ hã ma tô 'manharĩ za'ra, Zezusi te te tãma i'ru za'ra zéb zarina. Barana isaihurizéb da hã ma tô robza'ra pese za'ra, Pascoa na dato nhisi ihâimanazém na hã.

20 Tawamhã mara wamhã oto, Zezusi hã duré isiré 're inomro mono norĩ me, ma tô asimro, saihuri da. 21 Saihuri ré, ma tô Zezusi hã tãma nharĩ za'ra, ãne:

— Tô sena, wa za aima waihu'u za'ra wa'wa, ãne: Asiré za'ra wa'aba hã, ni'wa misi te za dama ĩhâiba nho.

22 Ãne wa, ma tô tiwi tirobzei'õ pese za'ra. Tahawa, hâiba mono bâ ma tô sina sadanharĩ za'ra, ãne:

— Apito, e wa hã bâ. Wa hãi õ di.

23 Tawamhã Zezusi hã ma tãma waihu'u za'ra, ãne:

— Ĩhâiba nhomri'wa da hã, ĩsiré isa pratu 're. 24 Ti'ai ãma Dasiré Ipodo hã te za dârâ. Te za sina uwaimra, Ibaihâ Iwazé pese na rob'ui'éré ãma inomro siromo hã. Tazahã, tãma ropipa uptabi di za, Ti'ai ãma Dasiré Ipodo te te dama ihâiba nhomri ma hã! Wẽ di aré tãma hã, niwa poto õ 'wa'âhã, ta hã.

25 Tawamhã Zudasi, dama ihâiba nhomri'wa da hã ma tô Zezusi hã sina sadanha, ãne:

— Rowahutu'wa, e wa hã bâ, te ĩ'ãma irosa'ra.

Tawamhã Zezusi hã ma sada'â, ãne:

— Tane tô. Tane na hã asi'uihâ na ma tô iwaihu'u siro.

26 Tawamhã saihuri ré, ma tô Zezusi hã ti'â, i'u'ẽtẽ wapu hã. 'Re ihâimana u'âsi mono ãma te tiwata. Taha pari, ma tô te te wẽ'ẽ. Isiré 're inomro mono norĩ ma, ma tô te te sõmri. Ãne te tãma nharĩ za'ra:

— Waibui wa'aba. Huri aba. Ã hã ĩhâiba.

27 Taha pari, ma tô duré ti'â hâsizé, uva 'rãi wa'u isé ré hã. 'Re ihâimana u'âsi mono ãma te duré tiwata. Taha pari, ma tô duré isiré 're inomro mono norĩ ma tisõ. Ãne te tãma nharĩ za'ra:

— Ma'ãpé aihâiba mono bâ âhuri aba, ã hã. 28 Ã hã ĩwapru. Da'ahâ uptabi zada, te za asa'wa, 'Re ihâimana u'âsi mono, dawasédé te te da'ãma 're i'ab'madâ'â mono õ zéb da hã. Ĩwapru hã 'Re ihâimana u'âsi mono, tinhib'a'uwẽ norĩ ma te te iropisutuzé, sena na iwaihu'uzéb da hã. 29 Tô sena, wa za aima ĩsiwasu'u za'ra wa'wa, ãne: Ã hã rob'rãi wa'u isé hã niwa te hâ'rẽne zahu õ di za oto. Niwapsi wa za hâ'rẽ, rob'rãi wa'u ité hã asiré za'ra wa'aba, Ĩmama, da'ãma 're isib'a'uwẽ mono zéb ãma si.

30 Tawamhã tinho're na ma tô 'Re ihâimana u'âsi mono ãma tiwata za'ra. Taha pari, ma tô oto wairé, Olivera na ẽtẽ 'rãihâ nhisi u.

31 Tawamhã Zezusi hã ma tô isiré 're inomro mono norĩ ma tinha, ãne:

— Tô ãhã mara na hã, uburé te za asiwi ĩrẽme 'wa za, Ibaihâ Iwazé pese na rob'ui'éré siromo zarina, ãne: “Pone'ẽrebâ 'madâ'â'wa, wa za tiwĩ. Tawamhã pone'ẽrebâ norĩ hã te za ropé.” 32 Tane nherẽ, apâ ĩhâiwa'utu wamhã, asõwa wa za ĩmorĩ 'wa, Galiléia u hã.

33 Tawamhã Pedru hã te Zezusihi ma tinha, ãne:

— Rowahutu'wa. Uburé te te siwi airẽme nherẽ, wa hã niwa te airẽme õ di za.

34 Tane nherẽ, Zezusi hã ma tô ãne tãma tinha:

— Tô sena wa za ãne aima waihu'u: Ã mara na hã si'a hârâ wana ré, si'ubdatõ te za ĩ'udâ.

35 Tawamhã Pedru hã te duré Zezusihi ma tinha, ãne:

— Asiré ĩdâ'â da nherẽ, niwa te i'ai'udâ da hã mare di.

Tawamhã isiré norĩ hã, tô õne si ma tô nharĩ za'ra.

36 Tawamhã Zezusi hã ma tô mo. Isiré 're inomro mono norĩ zama ma tô isiré ai'aba'ré, Zétisemani na rob're nhisi u. Tame ma tô tãma nharĩ za'ra, ãne:

— Ma'ãpé, ãme asimroi wa'aba, õwa ĩmorĩ ré, te rowaptẽrẽ da.

37 Tawamhã siré ma tô te te simro Pedru hã, duré Zebedeu 'ra norĩ hã. Tame ma tô robzei'õ hã azâ, sa'ẽtẽ uptabi na. Ma tô duré sa'ẽtẽ uptabi na robzépata. 38 Tahawa ma tô ãne tãma nharĩ za'ra:

— Ĩhâiba 'remhã robzei'õ hã sa'ẽtẽ uptabi na ma ĩ'azâ, za te te ĩwĩrĩ ne hã. Ãme asimroi wa'aba, ĩsiré asõpré wa'aba da.

39 Tawamhã ãma wati prã na^a ma tô isiti za'ra mo. Tame ma tô nhamra hi'rãtitõ. Ti'ai u ma tô ti'ubu na ropto. Ãne te rowaptẽ:

— Ĩmama, wapu wamhã, ma'ãpé ĩma ba'a, ã hã, za te irobzépatazé isé uptabi hã! Tane nherẽ, mare di, te ĩsima iwẽzéb zarina hã. Asima iwẽzéb zarina si.

40 Taha pari isiré 're inomro mono norĩ u, ma tô apâ sina siri. Tane nherẽ, sõtõ za'ra ré, ma tô sõpẽtẽ za'ra. Tahawa Pedruhu ma, te tinha, ãne:

— E ĩsiré asõpré wa'aba ré hã, misi bâtâ pibuzé hã ai'ãma isi'utõrĩ za'ra wa'aba da hã, waihu'u õ di bété. 41 Ma'ãpé, asõpré wa'aba, duré rowaptẽrẽ za'ra wa'aba, Satanasi hã te te aipibu za'ra wa'aba wa, airere'e aba tõ da. Aipẽ'ẽ 'remhã marĩ iwẽ hã 're 'manharĩ za'ra wa'aba mono da, te asima 're iwẽ za'ra wa'aba mono. Tane nherẽ, aihâiba za'ra wa'wa hã sib'uware di.

42 Tawamhã maparane ãma ma tô duré mo Zezusi hã, te te rowaptẽrẽ da. Ãne ma tô duré rowaptẽ:

— Ĩmama, te irobzépatazé hã za, ĩma ba'a waihu'u õ wamhã, ma'ãpé 'manharĩ, asima iwẽzéb zarina.

43 Tawamhã apâ te te duré sina siri wamhã, sõtõ za'ra ré, ma duré sõpẽtẽ za'ra, tomhâ pire za'ra wa.

44 Tawamhã Zezusi hã ma tô duré apâ mo isiti za'ra. Timama wi ma tô duré rowaptẽ si'ubdatõ ãma hã. Tô õne si ma tô duré ãma sahu timreme na, te te irowaptẽrẽ 'rata zém na. 45 Tawamhã apâ ma tô mo, isiré 're inomro mono norĩ u. Ãne ma tô tãma nharĩ za'ra:

— E niha te zahadu asõtõ siroptub za'ra wa'wa. Te duré aiwa'utu za'ra wa'wa. Ma'ãpé, 'madâ'â za'ra wa'aba! Bâdâ hã ma tô oto iwa waptãrã. Ti'ai ãma Dasiré Ipodo hã te za oto hâiba nhomri ni, iwasété norĩ nhib'rata. 46 Ma'ãpé aiwahutu za'ra wa'aba, oto wasi'aba'ré da. 'Madâ'â za'ra wa'aba! Õhõta te wei mo, dama ĩhâiba nhomri'wa da hã.

47 Tawamhã Zezusi hã te te tãma nharĩ za'ra ré, ma tô Zudasi hã wi, isiré 're inomro mono norĩ me, aré 're imorĩ hã. Tawamhã isiré hã da'ahâ uptabi di, sib'ézé 'wapa ré duré wedewãi ré zama, sasedoti ipire norĩ, duré Zudeu norĩ ma roti'wa norĩ te te sô idazatõrĩ za'ra norĩ hã. 48 Tawamhã ihâiba nhomri'wa hã te te ãma iwaihu'u za'ra zéb da hã ma tô tãma waihu'u siromo za'ra, ãne: “Aibâ hã, tob'rata hârâ na za te isawi hã, ta hã te za asiwi i'âri 'wa za.” 49 Tawamhã Zudasi hã Zezusihi u ma tô timorĩ waré. Ãne te tãma tinha:

— Rowahutu'wa, rowẽ na 're i'aihâimana mono da si, iwẽ hã.

Taha pari tob'rata hârâ na ma tô sawi. 50 Tawamhã Zezusi hã ma asa sada'â, ãne:

— Ĩsiwaihu, marĩ i'manharĩ da hã, ma'ãpé tô 'manharĩ.

Tawamhã ma tô sô ai'ré za'ra. Ma tô siwi ti'â, Zezusi hã. Ma tô duré siwi pawasisi. 51 Tawamhã Zezusihi siré 're imorĩ i'rata isa hã ma tô sib'ézé 'wapa na u'a, sasedoti ipire uptabi ma romhuri'wa hã. Ma tô ãma po're nhizâ. 52 Tawamhã Zezusi hã ma tô tãma tinha, i'u'a'wai ma, ãne:

— Ma'ãpé, sẽrẽ apâ, ate sib'ézé 'wa pa hã. Ni'wa hã sib'ézé 'wa pa na te te da'maiwĩrĩ wamhã, sib'ézé 'wapa na te za tô wĩrĩ ni. 53 Ĩmama wi te waptẽrẽ 'wa'âhã, ahâ uptabi na te aré we satõrĩ za'ra, tite hâiwa hawi romhuri'wa norĩ hã te te siwi ĩ'madâ'â da. E ãne na waihu'u ã bâ bété. 54 Ãne hã ĩ'ãma romhâimana 'wa'âhã, e niha wa aré ĩsina uwaimra, Ibaihâ Iwazé pese na rob'ui'éré hã, tô i'ru zahi nherẽ, iromhâimana da hã.

55 Taha pari Zezusi hã ma tô tãma nharĩ za'ra, sô isi'aba'ré norĩ ma, ãne:

— E wa hã dapãrĩ'wa pâ, we ĩzô i'ai'aba'réi wa'aba da hã, sib'ézé 'wapa ré duré wedewãi ré zama, asiwi ĩ'âri aba da hã. Bâtâ sidâpâ wa tô te 're rowahutu, 'Re ihâimana u'âsi mono nhorõwa 'ri 'wawi wa'ra 're. Tane nherẽ, tame asiwi ĩ'âri aba õ di. 56 Tane nherẽ, uburé ma tô ãne hã tiromhâiba, Ibaihâ Iwazé pese na rob'ui'éré hã te ĩsina uwaimrami da.

Tawamhã uburé isiré 're inomro mono norĩ hã ma tô oto siwi tirẽ. Ma tô sisa're.

57 Tawamhã aibâ norĩ, Zezusi te te siwi i'âri norĩ hã ma tô siwi saprõ, Caifasihi nhorõwa u. Ta hã 'Re ihâimana u'âsi mono ma da'ãma romhuri'wa ipire uptabi. Tame 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã ma tô sô si'rã'õtõ, duré dama roti'wa norĩ zama. 58 Tawamhã Pedru hã ma tô Zezusi te te pibu romhâ na, sasedoti ipire uptabi nhorõwa 'wawi wa'ra u. Tamomo ma tô ãzé. Ma tô duré nhamra, dasi'wapéi 'manharĩ'wa 'ridawa 'madâ'â'wa norĩ siré, te te rob'madâ'â da, niha za romhâimana zô.

59 Tawamhã sasedoti ipire norĩ hã, duré uburé Zudeu norĩ ma roti'wa norĩ zama, te ni'wam norĩ zô tirĩtĩ za'ra, ta norĩ hã senai õ nherẽ, Zezusi hã tizadawa nhipese na te te siwi wasu'u wasété da, taha zarina te te siwi 'ru da, da te dasiwi wĩrĩ da. 60 Tane nherẽ, marĩ i'uptabi hã te te siwi sõpẽtẽ õ di, senai'õ na iwasu'u wasété 'wa norĩ hã ahâ nherẽ. Tawamhã ma tô oto sihâi'ré zahuré, maparane te te iwasu'u zahuré da hã. 61 Ãne te ta norĩ hã wasu'u zahuré:

— Ã hã aibâ hã te ãne dama sina tinha: “Ã hã 'ri 'rãihâ 'Re ihâimana u'âsi mono nhorõwa hã, te 'ri pru waihu'u pese di. Duré apâ te 'ri waihu'u pese di, si'ubdatõ bâtâ 're.”

62 Tawamhã sasedoti ipire uptabi hã ma tô hâiwi za. Ãne te Zezusi sadanha:

— E asi'wawi aimapa õ di za, aiwasu'u wasété 'wa norĩ wi hã.

63 Tane nherẽ, te Zezusi hã ari'iwi zab u'â. Tawamhã sasedoti ipire uptabi hã te duré apâ sadanharĩ zahu, ãne:

— 'Re ihâimana u'âsi mono idâ'â'õ nhisi na wa aiwi waptẽrẽ zahi, wama asiwasu'u za'ra da: E a hã Cristu,^b 'Re ihâimana u'âsi mono 'ra.

64 Tawamhã Zezusi hã ma sada'â, ãne:

— A hã te tane na hã ĩma inha. Tô sena wa za ãne hã aima waihu'u za'ra wa'wa: Bâdâ hã te za wi, Ti'ai ãma Dasiré Ipodo hã, 'Re ihâimana u'âsi mono Iwaihu'u Pese uptabi zababa sãmra ré, i'madâ'â za'ra wa'aba zéb da hã, duré apâ wei morĩ ré, hâiwa'a na.

65 Tawamhã sasedoti ipire uptabi hã ma tô ti'uza hã hâiwa zu. Ãne te tinha:

— 'Re ihâimana u'âsi mono ãma te wasété. E marĩ da, wa za duré amnhasi za'ra ni, iwasu'u'wa zô hã. Ma tô iwapari za'ra wa'wa, 'Re ihâimana u'âsi mono ãma te te iwasété zé hã. 66 E niha te za ãma iwaihu'u za'ra wa'wa.

Tawamhã ãne ma tô siwi sada'â:

— Ma ãma upa. Tô dâ'â!

67 Taha parimhã ni'wam norĩ hã ma tô tizadaipro na siwi ubu upto. Ma tô duré nasi siwi ahâ. Ni'wam norĩ hã te duré nasi siwi ubu pré'é. 68 Ãne te ta norĩ hã nasi sina 'mahârâ za'ra:

— A hã Cristu, ma'ãpé ãma uwaimrami. E 'wa hã ma ai'azâ.

69 Tawamhã Pedru hã, 'ri 'wawi wa'ra 're, rowi sãmra ré, ma tô pi'õ hã itẽme sina rotété, sasedoti ipire uptabi ma, romhuri'wa hã. Ãne te tãma tinha:

— Azama te Zezusi, Galiléia ãma iprédup siré 're aimo.

70 Tane nherẽ, Pedru hã ma tô uburé danho'a dawi ai'udâ, ãne:

— E marĩ na te we ĩma inha. Te waihu'u õ di, wa hã.

71 Taha pari ma tô mo, 'ri 'wawi wa'ra ãma 'ridawa u. Tame ma tô duré pi'õ, dama romhuri'wa ihâiba amo hã dama 'mahâ, tame idasimasam norĩ ma, ãne:

— Õ hã te Zezusi, Nazaré ãma iprédup siré hã 're mo.

72 Tawamhã Pedru hã te duré dawi ai'udâ, ãne:

— Tô sena, wa aima ĩsiwasu'u zahi za'ra wa'wa. Ã hã aibâ hã ĩma waihu'u õ di.

73 Tawamhã ãma ronomro prãi wi, tame idasimasam norĩ hã ma tô itẽme dasina rotété za'ra ni. Ãne te tãma nharĩ za'ra ni:

— Azama te isiré 're aimorĩ za'ra. Aimreme hã ma aihâi'ré, Galiléia ãma 're idamreme zusi mono zém na aimreme hã.

74 Tawamhã Pedru hã te asa tãma nharĩ za'ra, ãne:

— Mare di. Tô sena wa aima ĩsiwasu'u zahi za'ra wa'wa. Ĩma waihu'u õ di, ã hã aibâ hã. 'Re ihâimana u'âsi mono si, te te tô ĩma rob'manharĩ, sena ĩsiwasu'u õ wamhã.

Tawamhã awa'awi ma tô si'a hã oto hâ. 75 Tahawa Pedru hã ma tô po're puru, Zezusi te te tãma iwaihu'u siromo zém na, ãne: “Si'a hã hârâ õ ré, si'ubdatõ, te za dawi ai'udâ, aima ĩwaihu'u õ na hã.”

Tahawa Pedru hã ma tô ta hawi watobro. Sa'ẽtẽ uptabi na ma tô aiwa'õ.