— Taha bâtâ mono na hã, Hâiwa ãma 're Isãmra mono, da'ãma 're isib'a'uwẽ mono zé hã, aiwa 10 na pi'õ ihâiba ubuni, rob'uiwẽzé te te i'wasari ne, aibâ imro da hã te te siwi sõpẽtẽ da.^a 2 Tawamhã imrotõ na ihâimana nhimiza'rese õ hã, duré imrotõ na ihâimana nhimiza'rese hã. 3 Ihâimana nhimiza'rese õ norĩ hã ma tô 'wasa, rob'uiwẽzé hã. Tane nherẽ, rob'rãi wa'u to hã te te sada 'wasari õ di. 4 Ihâimana nhimiza'rese norĩ si, ma tô rob'rãi wa'u to hã 'wasa piza 're, rob'uiwẽzép siré. 5 Tawamhã aibâ imro da hã sô rowaptâ'â hâ wa, ma tô pi'õ 10 na ihâiba ubuni norĩ hã aptâ hã uburé hâ za'ra. Tahawa ma tô tinhotõ za'ra.

6 — Tawamhã mara wa'wa ma tô wapari za'ra, ni'wa te te i'mahârâ hã, ãne: “Õhõta te wei mo, aibâ za imro da hã. Ma'ãpé aiwairébé aba, asiwi sõpẽtẽ aba da.”

7 — Tawamhã 10 na pi'õ ihâiba ubuni norĩ hã ma tô ti'utu za'ra. Tite rob'uiwẽzé hã ma tô sima sa'ra wẽ za'ra. 8 Tawamhã pi'õ ihâimana nhimiza'rese õ norĩ hã ma tô tiwi waptẽrẽ za'ra, ihâimana nhimiza'rese norĩ wi hã, ãne: “Ma'ãpé suru na wama ahiri za'ra wa'aba, rob'rãi wa'u to hã, wate rob'uiwẽzé hã oto wawi ro'o nhib'uwa za'ra wa, wawi dâ'â za'ra tõ da.”

9 — Tane nherẽ, ma tô ãne sada'âbâ za'ra: “Maze di. Rob'rãi wa'u to hã mara wab õ di za, wama za'ra hã duré aima za'ra wa'aba hã. Tahawa ma'ãpé sô ai'aba'réi wa'aba, 'mai'uipra za'ra wa'aba da.”

10 — Tawamhã pi'õ iprédupté ihâimana nhimiza'rese õ norĩ hã ma tô ai'aba'ré, rob'rã wa'u to hã te te 'mai'uipra za'ra da. Sô si'aba'réi ré, ma tô wi, aibâ imro da hã. Tawamhã pi'õ ihâimana nhimiza'rese norĩ, rob'uiwẽzéb ré simiza'rese isimipari za'ra hã ma tô isiré asisi, dasina damro na dasa isa'ẽne ihâimana u hã. Taha pari ma tô 'ridawa hã iré sitob za'ra ni.

11 — Tawamhã ronomro pari, ma tô pi'õ ihâiba amo norĩ hã apâ aihutu. Ãne te nasi 'mahârâ za'ra: “Apito, apito, wei wama 'ridawa za'ra na, ãma wanhisisi da.”

12 — Tawamhã aibâ imro da hã ma tô sada'âbâ za'ra, ãne: “Tô sena wa za ãne aima nharĩ za'ra wa'wa: Ĩma aiwaihu'u za'ra wa'aba õ di.”

13 — Ãne wa, ma'ãpé 're asõpré u'âsi aba mono, bâdâ hã duré bâtâ pibuzé, za iwisizé hã aima waihu'u za'ra wa'aba õ wa, Ti'ai ãma Dasiré Ipodo apâ we imorĩzé hã.

14 Tawamhã Zezusi hã te duré tãma rowasu'u za'ra, romnhimiré'é na, ãne:

— 'Re ihâimana u'âsi mono da'ãma 're isib'a'uwẽ mono zé hã, aiwa aibâ hã darob amoi u, romhâ na za morĩ wa, tite romhuri'wa norĩ zô ihârâ ne, isibro hã te te sô 'madâ'â za'ra da. 15 Tawamhã ma tô rob'uiprazé hã hâiba mono bâ tãma sõmri za'ra, rowaihu hã tãma ihâimana za'ra zarina. Imorĩ'rata ma hã ma tô tisõ, 5 miu na rob'uiprazé isapotore ẽtẽ waipo pré oru 'manharĩ hã. Duré isãna're ma hã 2 miu na ma tô tisõ. Duré da'rãsutu'wai ma hã, miu na ma tô tãma tisõ. Taha pari te oto mo, darob amoi u, isib'apito za'ra hã. 16 Tawamhã romhuri'wa 5 miu na rob'uiprazé isapotore te te i'âri hã, õne haré ma tô watobro. Ma tô marĩ hã ãma 'manha. Tahawa ma tô ãma sisiwi duré, 5 miu na rob'uiprazé isapotore na. 17 Tane duré maparane ãma romhuri'wa rob'uiprazé isapotore te te i'âri hã, tô õne ma duré tãma rob'manha. Marĩ hã ma tô ãma 'manha. Tahawa ma tô ãma sisiwi, 2 miu na rob'uiprazé isapotore na. 18 Tanei õ di, si'ubdatõ ãma miu na te te i'âri hã, ma tô watobro. Ma tô sada ab're. Taha pari, ma simi'u, rob'uiprazé isapotore isib'apito te te tãma isõmri hã.

19 — Tawamhã ãma ronomro hâ pari, romhuri'wa norĩ nhib'apito hã ma tô apâ wi, rob'uiprazé te te tãma isõmri za'ra na, niha te te tãma irob'manharĩ za'ra na, tãma siwasu'u za'ra da. 20 Tawamhã romhuri'wa 5 miu na te te i'âri hã ma tô tãma ãwisi, duré isisiwi 5 miu na rob'uiprazé isapotore hã. Ãne te tinha, tinhib'apito ma: “Apito, rob'uiprazé isapotore 5 miu na ma tô ĩma isõ. Ãhãta ma'ãpé 'madâ'â! Wa tô ãma aima sisiwi, 5 miu na duré.”

21 — Tawamhã isib'apito hã ma tô ãne tãma tinha: “Wẽ uptabi di. Romhuri'wa i'aiwẽ, duré sena na i'aihâimana. Suru nherẽ, sena na te we ãma aihâiba. Tahawa sa'ẽtẽ na wa za oto aima tisõ, ahâ uptabi na 're ab'madâ'â mono da. Ma'ãpé we aimorĩ, te ĩsima irowẽzém na ĩsiré aihâimana da.”

22 — Tawamhã ma tô duré itẽme ãwisi, romhuri'wa 2 miu na rob'uiprazé te te i'âri hã. Ãne ma tô duré ta hã tinha, tinhib'apito ma: “Apito, ma tô ĩma isõ, rob'uiprazé isapotore hã 2 miu na. Ãhãta ma'ãpé 'madâ'â! Wa tô ãma aima sisiwi, 2 miu na duré.”

23 — Tawamhã isib'apito hã ma sada'â, ãne: “Wẽ uptabi di. Romhuri'wa i'aiwẽ, duré sena na i'aihâimana. Suru nherẽ, sena na te ãma aihâiba. Tahawa wa za oto aima tisõ, ahâ na 're ab'madâ'â mono da. Ma'ãpé we aimorĩ, te ĩsima irowẽzém na ĩsiré aihâimana da.”

24 — Tawamhã da'rãsutu ãma ma tô duré itẽme wi, miu na rob'uiprazé te te i'âri hã. Ãne te tinhib'apito ma tinha: “Apito, ĩma aiwaihu'u pese di, da'ãma i'aipẽ'ẽzé õ na hã, duré i'a're õ ãma 're iroptehâri mono na hã, duré amnho i'anhamra mono õ ãma 're i'a'ubumroi mono na^b hã. 25 Tahawa wa tô aima ĩpahi. Ate rob'uiprazé hã wa tô simi'u, ti'ai 'rowi. Ãhãta 'madâ'â, ate rob'uiprazé hã!”

26 — Tawamhã isib'apito hã ma tô tãma tinha, ãne: “Romhuri'wa i'aiwasédé, duré i'aiwa'a. E a hã ĩma nharĩ ã bâ, nimame te 're rob're mono õ nherẽ, te 're iroptehâri mono na hã, duré amnho te 're i'a'ubumroi mono na hã nimame te 're i'anhamra mono õ ãma. 27 Tahawa, e niha bâ bété sẽrẽ õ di, ĩte rob'uiprazé hã, rob'uiprazé da te 're iséme mono zéb 're. Tawamhã apâ we ĩwisi wapsi, te aré apâ ĩma isõ, te te nasi duré ãma ĩma isisiwizéb zama.” 28 — “Tiwi âri aba rob'uiprazé hã, 10 miu na tãma ihâimana ma, sõmri aba da. 29 E marĩ wa. Ni'wai ma, marĩ hã sa'ẽtẽ na hâimana wamhã, te za ãma tãma sisiwi, sa'ẽtẽ na tãma hâimana da. Tazahã, ni'wai ma hâimana õ wamhã, suru na tãma hâimana nherẽ, te za tô tiwi âri ni. 30 Tahawa, romhuri'wa iwasédé hã rob u asiwi mei wa'aba, robra u, tame 're wawai u'âsi mono da, duré 're 'wahi sitete u'âsi mono da, te te 're robzépata za'ẽtẽ mono wa.”

31 Tawamhã Zezusi hã ma ãma 'rãsutu, ãne:

— Ti'ai ãma Dasiré Ipodo hã niwa Apito na apâ wei morĩ wamhã, duré uburé ite hâiwa ãma romhuri'wa norĩ zama we isiré si'aba'réi wamhã, ta hã te za nhamra oto, danhamrazé iwẽ uptabi na. 32 Tawamhã uburé dapoto mono bâ te za isõ're tasi'rã'õtõ ni. Tame te za oto da'ãma aipo'o, pone'ẽrebâ 'madâ'â'wa hã, pone'ẽrebâ zéré mapu na duré iséré uzé na 're isipo'o za'ra mono ne. 33 Tawamhã pone'ẽrebâ zéré mapu norĩ hã^c te za tinhimire niwĩ sõré. Duré pone'ẽrebâ zéré uzé norĩ hã^d tinhimi'e niwĩ te za sõré. 34 Tawamhã Apito hã te za tãma nharĩ za'ra, isimire niwĩ isimasam norĩ ma, ãne: “Ĩmama, iwẽ si te te aima 're ipisutu za'ra wa'aba mono norĩ, we ai'aba'réi wa'aba, Ĩmama, ai'ãma isib'a'uwẽ za'ra wa'aba zé hã waibui wa'aba da, te te aropoto mono hawim haré te te asô ipisutu za'ra wa'wa hã. 35 E marĩ wa. Mram na 're ĩhâimana mono ré hã, ĩsa ma tô ĩma 're i'aza'ra wa'aba mo. Duré 'rubu ré, ma tô â hã ĩma 're i'õb za'ra wa'aba mo. Wa hã dasiré a'uwẽ õ nherẽ, ma tô asõrõwa u asiwi 're ĩmrami wẽ wa'aba mo. 36 Ĩ'uza zô ĩwi 're rowaptâ'â mono ré hã ma tô asiwi 're ĩ'uza wa'aba mo. Ĩhâzé wamhã, ma tô asiwi 're ĩ'madâ'â aba mo. Dazazéb 're, 're ĩza mono ré, ma tô asiwi 're ĩzabui wa'aba mo.”

37 — Tawamhã 'Re ihâimana u'âsi mono nhimiroti 'madâ'â pese 'wa norĩ hã te za ãne sada'âbâ za'ra: “Wanhib'apito, e niwa wa tô mram na aihâimana ré wasiwi ai'madâ'â ni, asa wa te aima isõmri za'ra hã duré niwamhã 'rubu na aihâimana ré, wa te aima i'õb za'ra hã. 38 E niwa wa tô duré wanhorõwa u hã wasiwi ai'âri wẽ ni, dasiré a'uwẽ õ nherẽ, duré niwamhã ai'uza õ ré, wa te wasiwi i'ai'uza hã. 39 E niwa wa tô duré wasiwi ai'madâ'â ni, aihâzé ré hã duré niwamhã dazazéb 're asab ré, wa te wasiwi i'asabu hã.”

40 — Tawamhã Uburé Danhib'apito hã te za ãne sada'âbâ za'ra: “Tô sena wa za ãne hã aima waihu'u za'ra wa'wa: Ĩsisãnawã norĩ hã dama marĩ dai ãna 're ihâimana za'ra mono norĩ ma, ãne hã 're 'manharĩ wẽ za'ra wa'aba mono wamhã, ĩma te 're i'manharĩ wẽ za'ra wa'aba mo.”

41 — Taha pari te za tinha, isimi'e niwĩ isimasam norĩ ma, ãne: “'Re ihâimana u'âsi mono, iwasété si te te aima 're ipisutu za'ra wa'aba mono norĩ, mo oto ĩnhiti ai'aba'réi wa'aba, uzâ isi'utõrĩ'õ u, Wa'uburé da, 'Re ihâimana u'âsi mono te te ipisutu u, duré isiré wa'uburé norĩ da zama. 42 E marĩ wa. Wa hã mrab ré, ĩma 're aza'ra wa'aba mono õ di, duré 'rubu ré hã ĩma 're õb za'ra wa'aba mono õ di. 43 Wa hã dasiré a'uwẽ õ nherẽ, asõrõwa u hã asiwi 're ĩ'mazasi wa'aba mono õ di. Duré ĩ'uza zô ĩwi 're rowaptâ'â mono wamhã, asiwi 're ĩ'uza wa'aba mono õ di. Ĩhâzé ré, duré dazazéb 're, 're ĩza mono ré hã asiwi 're ĩzabui wa'aba mono õ di.”

44 — Tawamhã te za siwi sada'â za, ãne: “Wanhib'apito, e niwa wa tô wasiwi ai'madâ'â ni mram na aihâimana ré hã, niwamhã 'rubu na aihâimana ré hã, dasiré a'uwẽ õ na aihâimana ré hã, niwamhã ai'uza zô aiwi rowaptâ'â ré hã, duré aihâzé ré hã, duré niwamhã dazazéb 're asab ré, ai'ãma iwasime za'ra õ na hã.”

45 — Tawamhã Uburé Danhib'apito hã te za sada'âbâ za'ra, ãne: “Tô sena wa za ãne hã aima waihu'u za'ra wa'wa: Ĩsisãnawã norĩ hã marĩ dai ãna dama 're ihâimana za'ra mono norĩ ma, marĩ iwẽ, 're i'manharĩ za'ra wa'aba mono õ hã, ĩma 're 'manharĩ za'ra wa'aba mono õ di.”

46 — Tahawa, ta norĩ hã te za ai'aba'ré, 'Re ihâimana u'âsi mono nhimihâzé isi'utõrĩ'õ u. Tanei õ di, 'Re ihâimana u'âsi mono nhimiroti 'madâ'â pese 'wa norĩ hã. Ta norĩ si te za sina uwaimrami za'ra, dahâimanazé isi'utõrĩ'õ hã.