— E ã hã te uburé marĩ hã i'madâ'â za'ra wa'wa. Tô sena wa za aima waihu'u za'ra wa'wa, ãne: Ã hã ẽtẽ norĩ hã sisisiwi simi'wara õ di za, nimahã na hã. Uburé te za prub za'ra ni za.

3 Tawamhã Zezusi hã Olivera na ẽtẽ 'rãihâ nhisi ãma zahadu sãmra ré, ma tô isiré 're inomro mono norĩ hã 'râwi itẽme aihutu. Ãne te hâiba pisutu siwi sadanha:

— Rowahutu'wa. E niwa te za ãne hã tiromhâiba. Ma'ãpé wama waihu'u za'ra na. E marĩ te za sihâi'ré, wa te ãma iwaihu'u za'ra zéb da hã, bâdâ iwisi na hã, apâ za we i'aimorĩzé hã duré uburé za iropsi'utõrĩzéb zama.

4 Tawamhã Zezusi hã ma tãma waihu'u za'ra, ãne:

— Ma'ãpé, ãma 're pibui pese za'ra wa'aba mono, ni'wa hã te te aima rob'rãmi za'ra wa'aba tõ da. 5 E marĩ wa. Da'ahâ na te za wa hã newa 're dasiwasu'u za'ra, ãne: “Wa hã 'Re ihâimana u'âsi mono te te ĩpisudu, Danho'reptui'wa da!” Ãne wamhã, da'ahâ uptabi na te za ta norĩ hã te te dama 're rob'rãmi za'ra. 6 'Re aipahi za'ra wa'aba mono tõ, 're dasi'wapé za'ra mono wa, da te dasina 're iropupu'u za'ra mono zé hã, 're wapari za'ra wa'aba mono wamhã, duré dasi'wapéi wasu'u ma zama. Uburé ã norĩ hã te za tô 're wairébé. Tane nherẽ, zahadu rob'rãsutu õ di za. 7 Dawamri mono bâ te za 're dasi'wapé za'ra. Ti'ai wa'õtõ nho'õmo 're, roti'wa norĩ hã te za ti'ai wa'õtõ nho'õmo amoi u roti'wa norĩ hã te te 're 'wapé za'ra. Darob ahâ na te za mrab zô dawi 're rowaptâ'â za'ra. Duré nima niwĩmhã ti'ai popo hã te za 're wairébé. 8 Ã norĩ hã robzépata nhana'rada, pi'õi ãma iwasã hã 're isépu'u na'rata za'ra mono ne.

9 — Taha parimhã dazazéb 're, te za da te 're aséme 'wa, da te aima 're rob'manharĩ wasété za'ra wa'aba mono da, duré da te 're asimroi wa'aba mono da. Uburé na, te za da te 're ai'ruiwapari za'ẽtẽ za'ra wa'wa, ĩzazei'wa 're anomro aba mono wa. 10 Taha wahu mono 'remhã, da'ahâ na te za da te 're ĩzazei utõrĩ za'ra. 'Râwim nherẽ, te za duré 're dasihâiba za'ré za'ra. Dasi'ruiwapari hã te za duré 're hâimana. 11 Tawamhã ahâ na te za senai'õ na 'Re ihâimana u'âsi mono zadawa 'mahârâ'wa norĩ hã sihâi'ré za'ra. Ta norĩ hã te za da'ahâ na dama rob'rãmi za'ra. 12 Marĩ iwasédé hã da te 're 'manharĩ za'ẽtẽ za'ra mono wa, te za ni'wam norĩ wi isimizawizé hã tiwi ai'utõrĩ za'ra. 13 Tane nherẽ, ni'wa hã ro i'rãsutuzéb u siptete sina ĩ'ãma 're hâimana u'âsi mono wamhã, ta hã te za tinho'reptuzé hã sina uwaimra. 14 'Re ihâimana u'âsi mono, da'ãma 're isib'a'uwẽ mono zé wasu'u iwẽ uptabi hã, ĩzazei'wa norĩ hã daro mono bâ te za te te dama 're wasu'u za'ra, dawamri mono bâ, da te oto wapari za'ra da. Tawap si te za oto tirob'rãsutu za.

15 Tawamhã Zezusi hã ma duré ãma uzusi:

— Te za i'madâ'â za'ra wa'wa za, 'Re ihâimana u'âsi mono nhorõwa ãma 'ri're wa'wa iwazéb zahi 're, “Marĩ ipipa Iwasété uptabi hã” 'Re ihâimana u'âsi mono zadawa 'mahârâ'wa Daniéu te te ãma irob'ui'érézé hã. (Ãhã wasu'u na rob'ui'éré hã isõré'wa hã te te isadaihu'u da si, iwẽ hã.) 16 Tahawa, Zudéa ãma 're isi'ubumroi mono norĩ hã, sisa'rei mono, simani za'ra da, ẽtẽ 'rãihâ u. 17 Duré ni'wa hã tinhorõwa 'ri nhisiwi sãmra ré wamhã, tinhimarĩ zô tinhorõwa u sébré da, te te si'ra tõ. 18 Duré ni'wa hã rom na hâimana ré wamhã, tinhorõwa u hã te te sina siri tõ, ti'uza ihâpa zô hã. 19 Taha bâtâ mono na hã, pi'õ iwasã ré norĩ ma hã ropipa uptabi di za, duré ti'ra te te iwapsõmri ré norĩ ma zama! 20 Tahawa 'Re ihâimana u'âsi mono wi, 're rowaptẽrẽ za'ra wa'aba mono, rowa'u'u wahâ 'rowi, duré sabadu^a na romhâimana tõ da, za i'asa'rei wa'aba zé hã aimani za'ra wa'aba da. 21 E marĩ wa. Taha bâtâ mono 'remhã te za robzépada hã sa'ẽtẽ na tihâiba, niwa iromhâimana õ, 'Re ihâimana u'âsi mono te te i'aropoto mono hawim haré, ãwa bâtâ u hã. Duré niwa za, ãne hã iromhâimana zahu õ. 22 'Re ihâimana u'âsi mono hã robzépata ré bâdâ ihâimana za'ra hã te te asuru õ 'wa'âhã, ni'wa hã aré sisõ'reptui õ di. Tane nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ u'âbâ, ma tô bâdâ hã asuru.

23 — Tahawa ni'wa hã te te aima 'mairowasu'u wa'aba wamhã, ãne: “'Madâ'â za'ra wa'aba! Ãme te tihâiba, 'Re ihâimana u'âsi mono te te ipisudu, Danho'reptui'wa hã” duré niwamhã ãne: “Danho'reptui'wa, õme te nhamra”, ãne wamhã, 're dazaze za'ra wa'aba mono tõ. 24 E marĩ wa. Senai õ na 'Re ihâimana u'âsi mono zadawa 'mahârâ'wa norĩ hã te za sihâi'ré za'ra, duré senai õ danho'reptui'wa norĩ hã, marĩ dama i'manharĩ waihu'u'õ, za te te 're i'manharĩ za'ra mono hã, duré marĩ, za te te dama 're irowẽ zani za'ra mono zama, te te dama 're rob'rãmi za'ra mono da, duré wapu wamhã, 'Re ihâimana u'âsi mono te te sima ipisutu za'ra norĩ ma zama, te te rob'rãmi za'ra da. 25 Tahawa, ma'ãpé ĩwapari pese za'ra wa'aba. Ã hã na uburé wa aima rowasu'u pese za'ra wa'wa, romhâimana wana ré.

26 — Duré ni'wa hã te te aima 'mairowasu'u wa'aba wamhã, ãne: “Õme te nhamra, rop si 're irosa'wari mono ãma”, tamomo ai'maimorĩ aba tõ. Duré niwamhã, ãne: “Ãhãta ma dawi aima'u, 'ripara.” Ãne wamhã duré, ãma 're dazaze za'ra wa'aba mono tõ. 27 E marĩ wa. Tã si'ubuzi bâtâ pusizém hawi duré bâtâ zasizéb u, hâiwa na 're isi'ubuzi mono ne. Tane za duré, Ti'ai ãma Dasiré Ipodo apâ we imorĩzé hã.

28 — Nimame marĩ idâ hã hâimana wamhã, tame te za sipahutu norĩ hã 're si'rã'õtõ.

29 Tawamhã Zezusi hã ma tô duré tãma waihu'u za'ra, ãne:

— Robzépata za'ẽtẽ zéb ré hã, bâdâ si'utõrĩ za'ra parimhã, bâdâ hã te za titobra. Te te oto rob'uiwẽ õ di za. A'amo zama te te duré oto rob'uiwẽ õ di za. Wasi norĩ hã te za duré hâiwa hawi rere. Uburé hâiwa na siptete uptabi na 're isimasa mono hã te za oto tisãsã'ã za'ra. 30 Tawamhã, marĩ hã te za watobro hâiwa na, ipibui pese zéb da hã, Ti'ai ãma Dasiré Ipodo hã, apâ za we imorĩ na hã. Wei morĩ wamhã, uburé dapoto mono bâ te za ta'ru'ru ni, robzawi te. Ti'ai ãma Dasiré Ipodo hã hâiwa'a na wei morĩ ré, te za duré 'madâ'â za'ra ni, waihu'u pese uptabi na duré rowa'a isa'ẽtẽ uptabi ré. 31 Danhimnhihârâzém hârâ 'rãihâ hã te za wapari za'ra ni. Tawamhã Ti'ai ãma Dasiré Ipodo hã te za hâiwa hawi tãma romhuri'wa norĩ hã we satõrĩ za'ra ti'ai u, 'Re ihâimana u'âsi mono tinhib'a'uwẽ da, te te sima ipisutu za'ra norĩ zô, daro mono bâ te te ubumroi mono da.

32 Tawamhã Zezusi hã te duré tãma rowasu'u za'ra, ãne:

— Ma'ãpé, waihu'u za'ra wa'aba, rob'rã figu wede na romnhimiré'ézé hã: Figu wede panhipti uzéi wẽ wamhã, duré su té wamhã, te za iwaihu'u za'ra wa'wa, tã ita'azéb u oto iromhuture na hã. 33 Tane duré, ã hã iromhâimanazé 'madâ'â za'ra wa'aba wamhã, te za ãma iwaihu'u za'ra wa'wa, Ti'ai ãma Dasiré Ipodo apâ za we imorĩzé oto iromhuture na hã. 34 Tô sena wa ãne hã aima waihu'u za'ra wa'wa. Uburé ã hã iromhâimana mono zé hã te za tihâimana za'ra, ã bâtâ na dahâiba ré idahâimana za'ra hã dadâ'â za'ra õ ré. 35 Hâiwa duré ti'ai me, te za ai'utõrĩ zahuré. Tane nherẽ, ĩmreme hã niwa si'utõrĩ waihu'u õ di za.

36 Tawamhã Zezusi hã ma duré tãma waihu'u siromo za'ra, ãne:

— Ãne hã iromhâimana mono zéb da hã, ni'wa bâdâ hã te te waihu'u õ di, duré bâtâ pibuzé hã. Hâiwa hawi romhuri'wa norĩ zama te te duré waihu'u za'ra õ di, duré I'ra zama. Imama si te te waihu'u pese di. 37 Noé 're hâimana mono ré, 're iromhâimana mono zém ne, te za tiromhâiba, Ti'ai ãma Dasiré Ipodo apâ we imorĩzéb u hã. 38 Â pusi mono wana ré, ma tô 're dasaihuri. Te duré da te 're âhuri. Aibâ norĩ duré pi'õ norĩ hã ma tô si'ãma 're mro za'ra, Noé hã uba're wa, isébrézéb u. 39 Tane nherẽ, da te rosa'rese za'ra õ di, i'âpusi mono zéb u hã. Ta hã ma tô uburé da'uprosi. Tane te za duré tiromhâiba, Ti'ai ãma Dasiré Ipodo hã apâ we imorĩzéb u hã.

40 — Taha bâtâ 'remhã aibâ norĩ hã siré buru na te te romhuri zahuré ré, te za 'Re ihâimana u'âsi mono hã ihâiba amo ti'â. Ihâiba amo hã te za tirẽ. 41 Duré pi'õ norĩ hã siré 'ru'u zahuré ré, te za ihâiba amo 'Re ihâimana u'âsi mono hã ti'â. Ihâiba amo hã te za tirẽ. 42 Tahawa, ma'ãpé 're asõpré u'âsi aba mono, waihu'u za'ra wa'aba õ wa, bâdâ Asib'apito za'ra wa'wa hã apâ za we imorĩzé hã. 43 Tahawa, ma'ãpé sadaihu'u za'ra wa'aba, ã hã: 'Ri tede'wa hã isimisaihuri, isõrõwa u niha bâtâ pibuzém na za iwisizé hã te te waihu'u wamhã, te za sô rob'madâ'â u'âsi, isõrõwa hã te te tiwi 'ri prup tõ da, isimarĩ zô. 44 Tahawa, duré a norĩ wa'aba zama 're asõpré u'âsi aba mono. E marĩ wa. Ti'ai ãma Dasiré Ipodo hã te za wei mo, bâdâ, sô i'asimipari za'ra wa'aba õ zém na.

45 Tawamhã Zezusi hã te duré tãma romnhimiré'é za'ra, ãne:

— E 'wa hã tawamhã romhuri'wa, sena na ihâimana, duré te te irowaihu'u pe hã. Ta hã isib'apito te te ipisudu, tisiré romhuri'wa norĩ 'madâ'â'wa na 're hâimana mono da, ĩsa hã te te tãma 're anhomri mono da, bâdâ i'uwaibaba na. 46 Romhuri'wai ma rowẽ uptabi di za, isib'apito te te tãma ipisudu te te 'manharĩ ré, itẽme wisi wamhã. 47 Tô sena wa za aima waihu'u za'ra wa'wa, ãne: Isib'apito hã te za tãma pisutu, uburé isimarĩ hã te te tãma 're ab'madâ'â mono da. 48 Tanei õ di, romhuri'wa iwasété wamhã, te za rosa'rata, ãne: “Ĩnhib'apito hã simahudu õ di.” 49 Tahawa te za ãma sãna'rata, tisiré norĩ ahâri na hã. Âzézei'wa norĩ siré, te za duré 're sa. Te za duré ta norĩ siré te te 're hâsi. 50 Tawamhã isib'apito hã bâdâ, romhuri'wa hã sô isimipari õ zém na apâ wisi wamhã, 51 te za tãma rob'manharĩ wasété, romhuri'wai ma. Te za duré tãma pisutu, ro hã hâimana si'amoi pese na 're ihâimana za'ra mono norĩ 're ihâimana za'ra mono norĩ siré, 're hâimana u'âsi mono da. Tame te za 're wawai u'âsi. Te za duré 're 'wahi sitete u'âsi.