2 — 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, duré farizeu norĩ hã dama simiroti pire za'ra di, 'Re ihâimana u'âsi mono nhimiroti zarina Mozési te te ãma irob'ui'érézém na te te dama 're ihâi'ré za'ra mono zéb da hã. 3 Tahawa, ma'ãpé ta norĩ hã 're wapari pese za'ra wa'aba mono. Duré ãma 're anomro pese aba mono, uburé marĩ na te te 're irowasu'u za'ra mono zém na hã. Taré oto ihâimana za'ra zé hã 're sizusi za'ra wa'aba mono tõ. E marĩ wa. Te te 're irowasu'u za'ra mono zém na ãma 're hâimana za'ra mono õ wa. 4 Danhisada ipire ne, te danhisé te te dama 're sa'ra. Tane nherẽ, da'ãma 're sina mono õ di. Tinhiptõmo hi hã te te 're rési waihu'u za'ra mono õ di, te te dama 're i'wasari mono da hã. 5 Da te 're i'madâ'â wẽ za'ra mono da si, te uburé marĩ hã te te 're 'manharĩ za'ra. Ma'ãpé 'madâ'â za'ra wa'aba! Ta norĩ hã te powawẽ hâ 'manharĩ 're, nima norĩ Ibaihâ Iwazé pese na rob'ui'éré hã te te siré 're 'wasari, ibaihâ nhemezé isa'ẽtẽ uptabi 'remhã. Ti'uihâ ãma te sima te te 're wasisi za'ra, tipaihi wib zama, 're nomro wẽ mono newa, da te 're 'madâ'â ze za'ra mono da. Taha da, te duré ti'uza ihâpa, isa'ru pa uptabi na si 're si'uza za'ra. 6 Tãma iwẽ za'ra hã dasimasisizé, dama ipire norĩ nhamrazé, dasa da te dasiré 're ihuri mono zéb ãma hã duré Zudeu norĩ te, rowahutuzé mono na danhamrazé 're isimasa mono na hã. 7 Tãma iwẽ za'ra hã wazép sina da te 're isawi za'ra mono da si, da te dasina 're i'ubumroi mono zéb ãma hã, duré “rowahutu'wa” na da te 're i'mahârâ za'ra mono da si. 8 Tazahã, “rowahutu'wa” na da te 're asisi za'ra wa'aba mono tõ. Misire ate za'ra wa'wa, Rowahutu'wa hã. Tawamhã uburé a norĩ wa'wa hã asisãnawã te 're anomro aba mo. 9 Ti'ai ãma hã ni'wa sisi wa'aba tõ, aimama 'wa isa'ẽtẽ na hã, misire Aimama 'wa isa'ẽne hâiwa ãma 're sãmra mono wa. 10 Duré “danhib'apito” na da te 're asisi za'ra wa'aba mono tõ. E marĩ wa. Misire Asib'apito za'ra wa'wa hã, ta hã 'Re ihâimana u'âsi mono te te ipisudu, Danho'reptui'wa da. 11 Ai'reb za'ra wa'aba danhipai u ni'wa pire na 're ihâimana mono hã za, ta hã da'ãma 're isiwãrĩ mono, duré dama romhuri'wa na 're ihâimana mono. 12 Ni'wam norĩ hã pire na 'râwi sina 're isõpré mono hã, 'Re ihâimana u'âsi mono te za te te ãma 're ti'awi za'ra. Tanei õ di, ni'wam norĩ hã pire na 'râwi 're isi'madâ'â za'ra mono õ hã, 'Re ihâimana u'âsi mono hã te za te te 're anhoré, pire na 're hâimana za'ra mono da.

13-14 — Farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã, aima 're ropipa uptabi za'ra wa'aba mono di za! Te dawi 're isitob za'ra wa'aba mo, 're danhisisi mono tõ da, Hâiwa ãma 're Isãmra mono, da'ãma 're isib'a'uwẽ mono zéb u hã. Tane nherẽ, a norĩ wa'aba zama asisi aba õ di. Te duré dawi 're iro'wa'rutu za'ra wa'aba mo, 're danhisisi mono tõ da.

15 — Farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã, aima 're ropipa uptabi za'ra wa'aba mono di! Â pore na, te datẽme 're isaprĩ za'ra wa'aba mo. Duré daro mono bâ te datẽme 're anomro aba mo, asitẽme 're dapizari za'ra wa'aba mono da, asiniwĩ 're danomro aba mono da. Asiniwĩ 're dapizari za'ra wa'aba mono wamhã, ni'wam norĩ hã asiniwĩ oto 're inomro aba mono hã, maparane ãma isisiwi na, ropipa u 're inomro mono da hã, te oto 're hâimana za'ra, asipai u za'ra wa'aba.

16 — Aima 're ropipa uptabi za'ra wa'aba mono di, atob'a nherẽ, 're idanhimroi wa'aba mono hã. Ãne te dama 're irowasu'u za'ra wa'aba mo: “Ni'wa hã 'Re ihâimana u'âsi mono nhorõwa nhisi na te te dama ropisutu zahi wamhã, i'ru zahi õ di, te te iropisutuzé te te ãma i'uwaimrami da hã. Tazahã, ni'wa hã 'Re ihâimana u'âsi mono nhorõwa 're, ẽtẽ waipo pré oru 're isimasa mono nhisi na, te te ropisutu zahi wamhã, taha si i'ru zahi, te te ãma i'uwaimrami da hã, te te iropisutu zahi zé hã.” 17 I'aihâimana nhimiza'rese za'ra wa'aba õ, duré i'atob'a za'ra wa'wa! E ma hã danhipai u ipire: E ẽtẽ waipo pré oru, e niwamhã 'Re ihâimana u'âsi mono nhorõwa, ẽtẽ waipo pré oru te te 're i'a'manharĩ mono, wazé pese na aimawi 're hâimana za'ra mono da hã. 18 Ãne te duré dama 're irowasu'u za'ra wa'aba mo: “Ni'wa hã 'Re ihâimana u'âsi mono nhorõwa ãma, tãma danhoprubzé, da te 're isa'ra za'ra mono zém nhisi na te te ropisutu zahi wamhã, ta hã tinhimiropisutu zahi te te ãma i'uwaimrami da hã, i'ru zahi õ di, te te iropisutu zahi zé hã. Tazahã, ni'wa hã danhoprubzé da te 're isa'ra za'ra mono zém nhisiwi danhoprubzé inomro na te te ropisutu zahi wamhã, taha si i'ru zahi, ropisutu zahi te te i'manharĩzé te te ãma i'uwaimrami da hã.” 19 Itob'a norĩ, e ma hã danhipai u ipire: E danhoprubzé, e niwamhã danhoprubzé da te 're isa'ra za'ra mono zé wedezane, danhoprubzé te te 're i'a'manharĩ mono, wazé pese na aimawi 're hâimana za'ra mono da. 20 Tahawa, ni'wa hã danhoprubzé da te 're isa'ra za'ra mono zém nhisi na te te ropisutu zahi wamhã, te duré uburé danhoprubzé, isisiwi 're isimi'wara mono nhisi na zama ropisutu. 21 Duré ni'wa hã 'Re ihâimana u'âsi mono nhorõwa nhisi na te te ropisutu zahi wamhã, taha nhisi zarina te duré ropisutu zahi, 'Re ihâimana u'âsi mono, iwa 're isãmra mono nhisi na zama. 22 Duré ni'wa hã hâiwa nhisi na te te dama ropisutu zahi wamhã, te duré 'Re ihâimana u'âsi mono te, danhamrazé iwẽ uptabi nhisi na ropisutu zahi, duré 'Re ihâimana u'âsi mono, iwa 're isãmra mono nhisi na zama.

23 — Farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã, aima 're ropipa uptabi za'ra wa'aba mono di za! 'Re ihâimana u'âsi mono ma, te asõprubzé hã 're ipo'o za'ra wa'aba mo, hortelã na wesuirã nhisi hã, duré erva doce na wesuirã nhisi hã duré cominhu na wesuirã nhisi hã. Tane nherẽ, 'Re ihâimana u'âsi mono nhimiroti zahi na Mozési ipire uptabi na te te ãma irob'ui'éré hã, 're 'madâ'â pese za'ra wa'aba mono õ di, ã hã: I'uwaibaba na dama 're idahâimana za'ra mono zé hã, duré dawẽ na dama 're idahâimana za'ra mono zé hã, duré sena na dama 're idahâimana za'ra mono zé hã. Tazahã, ã norĩ hã i'ru zahi tô, 're i'manharĩ za'ra wa'aba mono da hã, nima hã 'mairẽme aba ãna. 24 Tob'a nherẽ, dazaprõni'wa norĩ! Upure hã 're sõmri za'ra wa'aba mono tõ da, te â hã 're iwamirĩ pese za'ra wa'aba mo. Tane nherẽ, te awaru ba'õmore hã 're isõmri za'ra wa'aba mo.

25 — Farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã, aima 're ropipa uptabi za'ra wa'aba mono di za! Te 're i'upsõ za'ra wa'aba mo hâsizé hã, imana wawip si, duré pratu zama. Tane nherẽ, i'remhã 'masisi di, marĩ hã asadawa nhipese na dawi 're iwaibui wa'aba mono hã, duré ãma asima 're irowẽ za'ra wa'aba mono hã, 're asi'madâ'â ze za'ra wa'aba mono zéb zarina. 26 Tob'a nherẽ, dazaprõni'wa norĩ! Hâsizé hã i're uimrehẽne, 're upsõ za'ra wa'aba mono. Tawap si te za imana wawib zama 'rerã na hã 're hâimana za'ra.

27 — Farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã, aima 're ropipa uptabi za'ra wa'aba mono di za! A norĩ wa'wa hã adâ'â 'ru, 'madâ'â ze da, imana wawi da te i'a ne, te 're aihâimana za'ra wa'aba mo. Iwẽ ne hã imana wawimhã. Tazahã, i'remhã dahi si i'masisi ne hã duré i'ro si. 28 Rowimhã i'aiwẽ za'ra wa'aba ne hã. Tane nherẽ, aipẽ'ẽ 'remhã i'masi, asadawa nhipese za'ra wa'wa hã duré aiwasété za'ra wa'wa hã.

29 — Aima 're ropipa uptabi za'ra wa'aba mono di, farizeu norĩ, duré dama rowahutu'wa norĩ, aihâimana si'amoi pese na 're i'aihâimana za'ra wa'aba mono hã. 'Re ihâimana u'âsi mono zadawa 'mahârâ'wa norĩ 'ru hã te wẽ uptabi na 're i'manharĩ za'ra wa'aba mo. Duré ni'wam norĩ i'uwaibaba na 're inomro mono norĩ 'ru zama te 'madâ'â ze da, 're ipese za'ra wa'aba mo. 30 Te duré 're inharĩ za'ra wa'aba mo, ãne: “Wahi'rata norĩ 're hâimana za'ra mono ré, 're wahâimana za'ra mono 'wa'âhã, ta norĩ siré, wa te aré 're simroi mono õ di, 'Re ihâimana u'âsi mono zadawa 'mahârâ'wa norĩ hã.” 31 Ãne na, te tô sena 're asiwasu'u za'ra wa'aba mo, a norĩ wa'wa 'Re ihâimana u'âsi mono zadawa 'mahârâ'wa norĩ te te 're isimroi mono norĩ nhihudu na hã. 32 Tahawa, ma'ãpé ãma uzusi za'ra wa'aba, 'rãsutu za'ra wa'aba da, aihi'rata norĩ wa'wa te te ãma isãna'rata za'ra zé hã. 33 Wahi isé uptabi norĩ! E niha asisõ'reptu za'ra wa'aba da bâ, 'Re ihâimana u'âsi mono te te asatõrĩ za'ra wa'aba wa, ropipa u hã. 34 Tahawa, wa za we satõrĩ za'ra 'Re ihâimana u'âsi mono zadawa 'mahârâ'wa norĩ hã, rowaihu'u pese 'wa norĩ hã, duré rowahutu'wa norĩ hã. Tawamhã nima norĩ hã te za isimroi wa'wa. Duré nima norĩ hã wedepo'o nhonhi'rãmi na te za isasõmri za'ra wa'wa. Duré nima norĩ hã abazei hâ nhorõ 'manharĩ na dapré'ézém na te za 're ihâ za'ra wa'aba mo, ate za'ra wa'wa rowahutuzé 're isimasa mono ãma hã. 'Ri wa'õtõ mono na te za duré sô 're anomro aba mo, tãma 're rob'manharĩ za'ra wa'aba mono da hã. 35 Tahawa, 'Re ihâimana u'âsi mono hã te za aima rob'manharĩ wasété za'ra wa'wa, aihi'rata norĩ hã te te 're simroi mono wa, marĩ, te te 're i'upa za'ra mono õ norĩ hã, Abéu hã 're morĩ wẽ nherẽ, te te siwi iwĩrĩzém hawi, Zacaria Baraquiaha 'ra hã asiwi iwĩrĩ aba zéb u, 'Re ihâimana u'âsi mono nhorõwa 'ri 'rãihâ norĩ wa'wa danhoprubzé da te 're isa'ra za'ra mono zé me. 36 Tô sena wa za ãne hã aima waihu'u za'ra wa'wa: 'Re ihâimana u'âsi mono nhimihâzé hã te za waptãrã, ãhã na 're idahâimana za'ra mono norĩ nhisiwimhã.

37 Tawamhã Zezusi hã ma ãma 'rãsutu, ãne:

— Zeruzalẽ, Zeruzalẽ, a hã te 're i'anhimroi mo, 'Re ihâimana u'âsi mono zadawa 'mahârâ'wa norĩ hã! Ẽtẽ na te duré 're i'anhimroi mo, 'Re ihâimana u'âsi mono timreme 'wapéi'wa te te atẽme 're i'azatõrĩ mono hã! Wa tô aré õne u'â te ĩsima 're wẽ u'âsi, uburé ai'ra norĩ hã te ubumro da, si'a hã ti'ra zawi te, 're ipapo za'ra mono ne. Tane nherẽ, asima wẽ za'ra wa'aba õ di 38 Tahawa, 'Re ihâimana u'âsi mono hã asõrõwa na sapa'a za'ra wa'aba õ di za oto. 39 Tahawa, tô sena wa za aima waihu'u za'ra wa'wa. Niwa oto asiwi ĩ'madâ'â wa'aba õ di za, bâdâ hã iwisizéb u, ãne inharĩ za'ra wa'aba zéb u: “'Re ihâimana u'âsi mono hã iwẽ si te te tãma 're ipisutu u'âsi mono da si, Uburé Danhib'apito nhisi na we imorĩ ma hã.”