— E a hã, Zudeu norĩ nhib'apito.

Tawamhã Zezusi hã ma sada'â, ãne:

— Tane na hã a hã te inha.

3 Tawamhã sasedoti ipire norĩ hã ma tô Zezusihi ãma ahâ na iwasédé hã sa'ra za'ra. 4 Tahawa, Pilatu hã te duré sadanha, ãne:

— E asadawa na wa'rãmi õ di za. Ma'ãpé ãma rosa'rata pese, marĩ 're i'a'manharĩ mono zém na te te i'aiwasu'u wasété za'ra zém na hã.

5 Tane nherẽ, Zezusi hã tizadawa na te te ãma tãma wa'rãmi õ di. Tahawa, ma tô Pilatu hã ãma titob'uzu.

6 Wahub sidâpâ, Pascoa na dato nhisi 're hâimana mono wamhã, Pilatu hã misi ma tô te te 're azani, dazazéb 're, 're isimasa mono hã, da te tiwi 're iwaptẽrẽ za'ra mono zéb uwaibaba. 7 Taha bâtâ 'remhã aibâ hã te za, dazazéb 're, Barabas na isisi hã, ni'wam norĩ siré. Ta norĩ hã romanu norĩ da, 're hâimana za'ra mono wa, te te ida'mapãrĩ za'ra, 'râwi si'wapé za'ra wa. 8 Tawamhã da'ahâ uptabi na ma tô tasi'rã'õtõ ni, da te tiwi waptẽrẽ za'ra da, Pilatuhu wi, te te 're i'manharĩ mono zéb zarina, misi te te 'maiwazere da, dazazém hawimhã. 9 Tahawa, Pilatu hã te da'a'mahâ, ãne:

— E te asima iwẽ za'ra wa'wa, Zudeu norĩ nhib'apito te aima wazere za'ra wa'aba da hã.

10 Tawamhã sasedoti ipire norĩ hã Zezusi te te siwi 're sõ'rui mono wa, te te itẽme i'ãwisi za'ra na hã te te waihu'u pese wa, ma tô ãne hã tãma nharĩ za'ra. 11 Tane nherẽ, sasedoti ipire norĩ hã ma tô dawada'uri za'ra, dazahutu ãna, Pilatuhu wi, da te waptẽrẽ za'ra da, Barabasihi ma si te te rob'ru da, morĩ da, Zezusihi upana. 12 Tawamhã Pilatu hã te duré da'a'mahâ, ãne:

— E marĩ, wa za bété 'manha, ã hã aibâ Zudeu norĩ nhib'apito na asiwi 're isisi aba mono ãma hã.

13 — Wedepo'o nhonhi'rãmi na sasõmri! — Ãne ma tô tahãsi ni.

14 — E marĩ wa. E marĩ i'upa ma tô 'manharĩ wasété. — Ãne te da'a'mahâ, Pilatu hã.

Tane nherẽ, ma tô oto tahârâ 'rãihâ pese za'ra ni:

— Wedepo'o nhonhi'rãmi na sasõmri!

15 Tawamhã Pilatu hã te te dama arowẽ da, ma tô rob'ru Barabasihi ma si, da te tiwi iwaptẽrẽ za'ra zéb uwaibaba. Taha pari, ma tô Zezusi hã ti'ru, abazei hâ nhorõ 'manharĩ na dapré'ézém na da te dasiwi 're pré'é mono da. Taha pari, dasi'wapéi 'manharĩ'wa norĩ ma, ma tô hâiba za'ré Zezusi hã, wedepo'o nhonhi'rãmi na te te siwi sasõmri da.

16 Tawamhã dasi'wapéi 'manharĩ'wa norĩ hã, Zezusi ma tô siwi saprõ, apito Pilatuhu nhorõwa^a 'ri 're wa'wa nho'õmo u. Tame ma tô uburé si'rã'õtõ, dasi'wapéi 'manharĩ'wa norĩ hã. 17 Tawamhã ma tô siwi uza Zezusi hã, da'uza ihâpa ihâpré na. 'Wabzéré panhipti na ma duré siwi sõpre. 18 Taha pari ma tô timreme na ãne nasi siwi sawi, ãma wa'ẽ za'ra sina:

— Zudeu norĩ nhib'apito, rowẽ na 're aihâimana mono!

19 Tawamhã i'rãi wi, ma tô nasi siwi ahâ, wede waré na. Tizadaipro na te duré nasi siwi upto. Hi'rãtitõ te duré nasi tãma asimro, ãma to sina, ãma wata za'ra da. 20 Tawamhã ãma wa'ẽ za'ra parimhã, i'uza ihâpré hã ma tô tiwi wazere za'ra. Taha pari, i'uza na ma oto apâ siwi uza. Tawamhã te oto rob u siwi saprõ, 'ri nho'õmo nhiti, wedepo'o nhonhi'rãmi na te te siwi sasõmri da.

21 Tawamhã bâdâdi na te te siwi saprõni ré, ma tô aibâ hã siwi sõpẽtẽ Simau na isisi hã, Cireni ãma iprédu hã, ta hã a'ubuni hawi iwatobro 'ri nho'õmo u, Alesãdri duré Rufu norĩ mama. Taha ma, ma tô 'ru za'ra, wedepo'o nhonhi'rãmi hã te te âri da, Zezusihi ma. 22 Tawamhã Zezusi hã ma tô siwi saprõ, Gougota na romnhisi u. (Gougota te wasu'u, “Da'rãihi Ubumrozé”.) 23 Tawamhã dasi'wapéi 'manharĩ'wa norĩ hã te te aré tãma õb za'ra da, uva 'rãi wa'u isé hã mirra na wedepa wa'u nhisi na, iwazari hã. Tane nherẽ, te te hâ'rẽne õ di, Zezusi hã. 24 Taha pari, ma tô oto siwi sasõ, wedepo'o nhonhi'rãmi na. Te duré ẽtẽ zapotore i'ui'éré ré hã nasi sima sãmra, ni'wam norĩ hã te te ãma i'uwaimrami za'ra zarina, i'uza i'upsãtã mono bâ te te sima waibu da, hâiba mono bâ. 25 Tawamhã Zezusi hã te te siwi isasõmrizé hã 9 hora na bâtâ pibuzé hã. 26 Tawamhã Zezusihi 'rãi uwaibaba ma tô wedepo'o wa'õtõ na rob'ui'éré hã siwi sasõ, iwasété da te ãma dasiwi ihirizé hã, da te ãma waihu'u za'ra da, ãne: “Ã hã, Zudeu norĩ nhib'apito.”

27 Tawamhã Zezusihi siré, ma tô duré sasõmri zahuré ni aibâ norĩ maparane, danhibrob zô dama rob'manharĩ wasété 'wa norĩ hã, isimire niwĩ duré isimi'e niwĩ. 28 [Ãne hã ma tô rob'ui'éré zarina sina uwaimra, duréihã Ibaihâ Iwazé pese na rob'ui'éré hã, ãne: “Ma tô tãma rob'manharĩ wasété za'ra ni, 'Re ihâimana u'âsi mono nhimiroti zahi wazéb'õ'wa newa.”]

29 Tawamhã iwa'waibaba, da te nasi iro'rahâri za'ra hã ma tô nasi ãma tawa'ẽ za'ra ni. Da'rã siwamnarĩ sina, te nasi ãma wasété za'ra ni, ãne:

— Oro a hã nharĩ za, 'Re ihâimana u'âsi mono nhorõwa hã 'ri prub da. Oro duré si'ubdatõ bâtâ ãma apâ 'ri 'ru za. 30 Ma'ãpé, wedepo'o nhonhi'rãmi hawi we si'ra na. 'Râwi asisõ'reptu na.

31 Tane duré sasedoti ipire norĩ hã ãma wa'ẽ sina, te ãne nasi sima nharĩ za'ra, 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama:

— Te te 're da'anho'reptui mono nherẽ hã, 'râwimhã sisõ'reptui waihu'u õ di. 32 Danho'reptui'wa Izaraéu nhihudu norĩ nhib'apito, ma'ãpé si'ra na wedepo'o nhonhi'rãmi hawi, wa te ai'madâ'â za'ra da, duré wa te asaze za'ra da.

Tawamhã Zezusihi siré isa'o zahuré norĩ zama, te nasi tãma nharĩ wasété zahuré.

33 Tawamhã abzuma wa'wa ma tô tirobra uburé daro mono bâ. Bâdâ isipi'razéb u si'ubdatõ na bâtâ pibuzéb u, te robra na tiromhâiba. 34 Tawamhã si'ubdatõ na bâtâ pibuzéb ãma, Zezusi hã hârâ 'rãihâ na ma tô hâ, ãne:

— “Eloi, Eloi, lema sabactani.”

à hã imreme ãma isaprĩzé hã ãne:

— “Ĩte 'Re ihâimana u'âsi mono, Ĩte 'Re ihâimana u'âsi mono, e marĩ wa, ma tô ĩsiwaprosi ĩrẽ.”

35 Tawamhã ni'wam norĩ i'rata isimasa hã Zezusihi hârâ te te wapari za'ra wamhã, ma tô ãne nharĩ za'ra:

— Ma'ãpé wapari za'ra wa'aba. Eliasihi zô te hâ.

36 Tawamhã ni'wa hã si'aba'ré na ma tô piza're upsõzé hã 'mai'â. Ta hã ma tô uva 'rãi wa'u isé na di'i, iwa'âbâ suru na. Wedewaré 'rãsutu na ma tô wẽ, Zezusihi ma, te te hâ'rẽne da. Ãne te tinha:

— A'â pé, wa te rob'madâ'â za'ra wa'aba, Elias hã we sô morĩ õ'umnhasite, wedepo'o nhonhi'rãmi hawi te te si'ra da.

37 Tawamhã Zezusi hã hârâ 'rãihâ na ma tô hâ, irẽme ma. Taha pari, ma tô pẽ'ẽ hai'utõ.

38 Tawamhã zazahâ ihâpa hã, 'Re ihâimana u'âsi mono nhorõwa ãma 'ri 're wa'wa nhitobzé hã ma tô hâihaipo'o, hâimo hawi pi'reba maparane iwa'õtõ na aiwa. 39 Tawamhã Romanu na dawamri na dasi'wapéi 'manharĩ'wa norĩ wada'uri'wa Zezusihi nho're ipapara isa hã, Zezusi hã hârâ 'rãihâ na ihârâzé te te wapari wamhã, duré niha na idâ'âzé te te 'madâ'â wamhã, te ãne tinha:

— Tô sena ã hã aibâ hã, 'Re ihâimana u'âsi mono 'ra.

40 Tawamhã nima norĩ pi'õ norĩ zama, te romhâ hawi Zezusi hã siwi 'madâ'â. Dasiré ihâimana za'ra hã: Maria Madalena, Salomé, duré Maria, Zuzé norĩ na hã, Tiaguhu me, duré Tiagu hã ihâiba té. 41 Ã hã pi'õ norĩ hã Zezusi Galiléia ãma 're morĩ ré, te isiré 're nomro. Te te duré tãma 're romhuri za'ra. Duré ahâ na pi'õ norĩ Zeruzalẽ u isiré isi'aba'ré hã ma tô dame tihâimana za'ra.

42 Tawamhã marazéb u oto romhuri 'rãsudu sexta na, sabadu u bâdâ iwisizéb u hã. 43 Zuzé Arimatéia hawimhã, Zudeu norĩ ma roti'wa ipire hã, 'Re ihâimana u'âsi mono da'ãma 're isib'a'uwẽ mono zéb zô 're isimipari mono hã, ma tô mo Pilatuhu u, pahi ãna. Zezusihi hâiba hã ma tô tiwi waptẽ. 44 Tawamhã Pilatu hã ma tô tãma a'rãmi pese, Zezusi hã idâ'â su'u na te te waihu'u wamhã. Tahawa romanu na dawamri na dasi'wapéi 'manharĩ'wa norĩ wada'uri'wa zô te hâ, Zezusi hã tô sena dâ'â zô te te sadanharĩ da. 45 Tawamhã dasi'wapéi 'manharĩ'wa norĩ wada'uri'wa hã tô sena Zezusi idâ'â na te te tãma wasu'u parimhã, Zuzéhé ma, ma tô ti'ru, Zezusihi hâiba hã. 46 Tawamhã Zuzé hã zazahâ ihâiwẽ uptabi hã ma sada uipra, ihâirã hã. Taha pari, Zezusihi hâiba hã ma tô si'ra. Zazahâ hâirã na ma ubu. Tawamhã sa'a zahâpâ ẽtẽ wa, ma tô tisẽ, ab're siromo 're. Taha pari, te ẽtẽ tõmo wawẽ hã te te pizari, ab're te te ãma iré sitob da. 47 Tawamhã Maria Madalena duré Maria Zuzéhé na me, ma tô 'madâ'â zahuré Zezusihi hâiba, nimame Zuzé te te isẽrẽzé hã.