— Aibâ hã te 're hâimana isibro pe, duré isibro te te tãma 're i'madâ'â mono hã. Tawamhã ma tô tãma 'mairowasu'u ni, isibro 'madâ'â'wa hã, isibro te te nasi tiwi i'anhimini na hã. 2 Tahawa, ma tô sô hâ. Ãne te sadanha: “Aiwasu'u hã wa wapa. Tahawa, ma'ãpé ĩma hâi'ré na, asimirob'madâ'âzé hã, ãma uzusi dai õ wa, ĩma rob'madâ'â mono zém na hã.”

3 — Tawamhã tãma rob'madâ'â'wa hã ma tô rosa'rata, ãne: “Ĩnhib'ihâ'a hã ma ĩwaze. E marĩ, wa za tawamhã 'manha oto. Ĩnhib'uware di, te 're i'ab're mono da hã. Duré ĩma rowazéb di, te 're ida'awari mono da hã. 4 Wa tô waihu'u, te te ĩwazere wamhã, za te i'manharĩzé hã, danhorõwa u za da te dasiwi ĩ'âri wẽ zéb da hã.”

5 — Tawamhã ma tô sima sô tihârâ za'ra, isib'apito ma, te te iwa'âbâ za'ra õ norĩ zô. Ãne ma tô sadanha, imorĩ'rada hã: “E niha iwa'âbâ õ, ĩnhib'apito ma hã.”

6 — “Piza'a hã 100 na ihâiba hã, azeitona 'rãi wa'ui wab ré hã!” — Ãne ma tô tãma siwasu'u.

Tawamhã ma tô tãma tinha, ãne:

— “Ãhãta iwa'âbâ õ zém na rob'ui'éré hã. Ai'aba'ré na asãmra. Ma'ãpé ãma rob'ui'éré, 50 na.”

7 — Tawamhã ihâiba amo hã te duré sadanha, ãne: “A hã bété, e niha tãma iwa'âbâ õ hã.”

— “Sa'u amnho trigu ré hã, 100 na ihâiba hã.”

— Tawamhã rob'madâ'â'wa hã ma tô tãma tinha, ãne: “Ãhãta iwa'âbâ õ zém na rob'ui'éré hã. Ma'ãpé ãma rob'ui'éré, 80 na.”

8 — Tawamhã rob'madâ'â'wa senai õ hã ma tô isib'apito hã uze, 'rã nhipese wa.

Tawamhã Zezusi hã ma tãma waihu'u za'ra, ãne:

— Ti'ai ãma marĩ zô si 're idahâimana za'ra mono hã, dahâimana nhipese di, danhibrom na hã, rowa'a na 're inomro mono norĩ nhipai u. 9 Tahawa, ãne wa za aima waihu'u za'ra wa'wa: Asibro aima 're ihâimana za'ra wa'aba mono na, isibrob'õ norĩ, ãma 're pawaptob za'ra wa'aba mono, asiwaihu'u na oto 're nomro aba mono da, asibrob zô aiwi sô 're rowaptâ'â za'ra wa'aba mono wamhã, te te 're aiwaibui wẽ wa'aba mono da, ro isi'utõrĩ'õ ãma hã. 10 Ni'wa hã, umnhasi na danhibro surure nherẽ, te te 're ab'madâ'â mono wamhã, tane te za duré umnhasi na te te 're ab'madâ'â, sa'ẽtẽ wamhã. Duré ni'wa hã suru nherẽ, sena na te te 're 'madâ'â mono õ wamhã, tane za duré isa'ẽne hã sena na te te 're ab'madâ'â mono õ di za. 11 Ãne wa, ti'ai ãma danhibro aima 're ihâimana za'ra wa'aba mono na, sena na ãma 're aihâimana za'ra wa'aba mono õ wamhã, e 'wa hã ai'umnhasi zarina te te aima 're pisutu za'ra wa'aba mono da bâ, danhibro tô sena uptabi hã. 12 Duré marĩ date hã sena na 're 'madâ'â za'ra wa'aba mono õ wamhã, e 'wa hã te te aima 're sõmri za'ra wa'aba mono da bâ, marĩ ate za'ra wa'aba da hã.

13 — Dama romhuri'wa hã te te romhuri waihu'u õ di aiwamhã, isib'apito maparane tãma hâimana zahuré wamhã. E marĩ wa. Ihâiba amo hã te za te te 're 'ruiwapari. Ihâiba amo si te za te te sima 're sawi pese. Niwamhã ihâiba amo hã te za te te 're wapari pese. Ihâiba amo si te za te te siwi 're wẽ'õ pese. Tane a norĩ wa'wa hã 'Re ihâimana u'âsi mono ma, duré rob'uiprazé ma, 're romhuri waihu'u za'ra wa'aba mono õ di, aiwamhã.

14 Tawamhã farizeu norĩ hã, ãne hã Zezusihi mreme te te wapari za'ra wamhã, ma tô ãma tito za'ra, rob'uiprazé tãma sawi za'ra wa. 15 Tahawa, Zezusi hã ma tô tãma nharĩ za'ra, ãne:

— Dama hã aiwẽ ne, te 're anomro aba mo. Tane nherẽ, 'Re ihâimana u'âsi mono hã aipẽ'ẽ 'remhã te te aiwaihu'u pese za'ra wa'aba di. Ti'ai ãma marĩ dama iwa'âbâ za'ẽne hã, 'Re ihâimana u'âsi mono tõmo nho'remhã, marĩ dai õ di.

16 — 'Re ihâimana u'âsi mono nhimiroti zahi na Mozési te te ãma irob'ui'érézé hã, duré 'Re ihâimana u'âsi mono zadawa 'mahârâ'wa norĩ nhimiroti hã ma tô 're hâimana za'ra, Zuwã Batista 're ihâimana mono zéb u. Ta hawim haré, te oto Rowasu'uwẽ 'Re ihâimana u'âsi mono da'ãma 're isib'a'uwẽ mono zém na, da te ãma 're rob'mahârâ za'ra. Tahawa dahâiba mono bâ, te sada 're dasisapẽtẽ za'ra, iwa 're danhisisi mono da.

17 — Wapu di hâiwa norĩ ti'ai me hã, isi'utõrĩ zahuré da hã, 'Re ihâimana u'âsi mono nhimiroti zahi ui'éré i'rãihâ to hã, za da te iwazere waihu'u õ nhipai u.

18 — Ni'wa aibâ hã timro te te rẽme wa, pi'õ aimawi na mro wamhã, pi'õ na te za tiwasédé hã 'manha. Duré ni'wa aibâ hã, pi'õ imro te te irẽme na mro wamhã, aibâ hã te za duré tiwasédé hã 'manha, pi'õ na.

19 Tawamhã Zezusi hã ma duré ãma uzusi, ãne:

— Aibâ hã te 're hâimana, isibro pese uptabi hã. Ta hã te i'uza iwa'âbâ za'ẽtẽ na si 're si'uza. Bâtâ sidâpâsi te duré te te sima 're rowẽ, marĩ iwẽ uptabi na hã. 20 Tawamhã aibâ isibrob'õ hã te duré 're hâimana, i'wa're te te ihâiba ubu, Lazaru na isisi hã. Ta hã ma tô da te 're simizusi, aibâ isibro pese nhorõwa dawa, 'ridawa isa'ẽtẽ ãma. 21 Lazaru hã ma tô te te sima 're wẽ, aibâ isibro pese sa, meza hawi 're irere'e mono hã te te 're 'masi mono da. Tawamhã wapsã norĩ hã ma tô itẽme 're nomro, i'wa're hã te te tãma 're upsõmri za'ra mono da. 22 Nimahã na hã ma tô oto dârâ, Lazaru hã. Tawamhã hâiwa hawi romhuri'wa norĩ hã ma tô siwi saprõ, Abra'ãhã u. Isibro pe hã ma tô duré oto dârâ. Ta hã ma tô ãma dasiwi ti'a ni. 23 Tawamhã Hades na romnhisi, adâ 're ihâimana za'ra mono zéb ãma, aibâ isibro pe hã ma tô oto robzépata za'ẽtẽ. Tame hâimo te te rob'madâ'â wamhã, Abra'ã hã ma tô 'madâ romhâ na, duré Lazaru isababa isãmra na. 24 Tawamhã ma tô 'mahâ, ãne: “Wahi'rada Abra'ã, ĩ'ãma aipẽ'ẽzé na! Ma'ãpé Lazaru hã we satõrĩ, tinhiptõmohi na te te ĩnhoto di'i da, te te ãma ĩnhoto wahâ da, ãme te robzépata za'ẽtẽ wa, unhama ãma!”

25 — Tane nherẽ, Abra'ã hã ma tô sada'â, ãne: “Ĩnhihudu, ma'ãpé ãma aipo're pu'u, atâ'â õ ré, marĩ iwẽ si aima 're ihâimana za'ra mono na hã. Tazahã, Lazaru hã marĩ iwasété si ma tô tãma 're hâimana za'ra. Tane nherẽ, ãhã na hã tãma rowẽ uptabi di, a hã tame 're robzépata mono ré hã. 26 Duré taha siré hã, ĩtẽmeb da hã duré atẽmeb da hã, te ab're isa'ẽtẽ uptabi hã 're hâimana. Tahawa ni'wa hã ã hawimhã te te ãma saprĩ waihu'u õ di, duré tane ta hawimhã ni'wa hã we te te saprĩ waihu'u õ di.”

27 — Tawamhã isibro pe hã te duré tãma tinha, ãne: “Wahi'rada Abra'ã, tane wamhã, wa za aiwi waptẽ. Ma'ãpé Lazaru hã satõrĩ, ĩmama nhorõwa u, 28 ĩsisãnawã norĩ hã imrotõ na tame 're si'ubumroi mono wa. Ma'ãpé tamomo satõrĩ, ta norĩ hã te te po're pu'u za'ra da, niwa we sihutu tõ da ãwa, robzépata za'ẽtẽ zéb u hã.”

29 — Tane nherẽ, Abra'ã hã ma tô ãne sada'â: “Asisãnawã norĩ 'ratamhã te 're hâimana za'ra, 'Re ihâimana u'âsi mono nhimiroti zahi na Mozési te te ãma irob'ui'érézé hã, duré 'Re ihâimana u'âsi mono zadawa 'mahârâ'wa norĩ nhimi'ui'éré zama, te te ãma ipo're pu'u za'ra zéb da hã. Ta hã te te iwapari za'ra da si, iwẽ hã.”

30 — Tawamhã isibro pe hã te duré tãma tinha, ãne: “Wahi'rada Abra'ã, taha si hã, sadai õ di. Tazahã, ni'wa hã dâ'â nherẽ, hâiwa'utu wa, itẽme morĩ za'ra wapsi, te za tiwasété na sisãmri za'ra, 'Re ihâimana u'âsi mono u sipizari za'ra da hã.”

31 — Tawamhã Abra'ã hã ma tô duré tãma tinha, ãne: “Mozésihi nhimiroti, duré 'Re ihâimana u'âsi mono zadawa 'mahârâ'wa norĩ nhimiroti te te wapari za'ra õ wamhã, ni'wa hã dâ'â nherẽ, apâ hâiwa'utu wa, te te tãma rowasu'u za'ra da, itẽme morĩ za'ra nherẽ, te te saze za'ra õ di za.”