2 Tawamhã Zuwã Batista hã dazazéb 're sab ré, ma tô wapa Cristuhu wasu'u hã, marĩ te te 're i'a'manharĩ mono zém na hã. Tahawa isiré 're inomro mono norĩ hã ma tô maparane satõrĩ zahuré, 3 te te sadanharĩ zahuré da, ãne:

— E tô a hã we iwisi da hã^a, ma we aiwi. E niwamhã zahadu, wa za mapari za'ra ni, aimawi zô.

4 Tawamhã Zezusi hã ma ãma sada'âbâ zahuré, ãne:

— Mo oto apâ ane wa'aba, Zuwãhã ma rowasu'u wa'aba da, iwapari aba zém na hã, duré i'madâ'â aba zém na zama. 5 Tãma wasu'u wa'aba, itob'a norĩ hã ito pese za'ra na, duré imorĩ'õ norĩ hã oto imorĩ ré na, duré i'wa're ré norĩ ipese za'ra na hã, ipo'reptõ norĩ ipo're pese za'ra na hã, duré idâ'â norĩ apâ ihâiwa'utu za'ra na hã, duré isibrob'õ norĩ hã Rowasu'u wẽ ité te te iwapari za'ra na hã. 6 Ni'wam norĩ ma 're rowẽ uptabi za'ra mono di, te te sina 're ĩ'umnhasi za'ra mono zé, te te 're irẽme waihu'u za'ra mono õ norĩ ma hã.

7 Tawamhã Zuwã Batistaha siré 're ine hã apâ oto ne wamhã, Zezusi hã ma tô ãma sãna'rata dama rowasu'u na, da'ahâ uptabi na idahâimana za'ra ma, Zuwã Batistaha wasu'u na hã, ãne:

— E marĩ 'madâ'â za'ra wa'aba da, ma tô ai'aba'réi wa'wa, rop si 're irosa'wari mono u hã. E du teihi po, rowa'u te te 're irési mono. 8 E marĩ 'madâ'â za'ra wa'aba da bâ. E aibâ, uza hâi wẽ uptabi na 're isi'uza mono. Waihu'u za'ra wa'aba! Uza hâi wẽ uptabi na 're isi'uza za'ra mono norĩ hã, apito norĩ te, 'ri isa'ẽne iwẽ uptabi wap si te 're si'ubumro. 9 Tazahã, e marĩ 'madâ'â za'ra wa'aba da, ma tô ai'aba'réi wa'wa. E 'Re ihâimana u'âsi mono zadawa 'mahârâ'wa. Tane tô. Tô sena wa za duré aima waihu'u za'ra wa'wa. Ma tô i'madâ'â za'ra wa'wa, 'Re ihâimana u'âsi mono zadawa 'mahârâ'wa norĩ nhipai u ipire hã. 10 E marĩ wa. Zuwãhã ãma ma tô 'Re ihâimana u'âsi mono zadawa 'mahârâ'wa hã ãma rob'ui'éré, Imreme na Ibaihâ Iwazé pese na rob'ui'éré hã, ãne: “Ĩmreme 'wapéi'wa hã wa za satõ, aiwana. Ta hã te za ate bâdâdi hã aiwana asô ropese.” 11 Tô sena wa za aima waihu'u za'ra wa'wa, ãne: Uburé a'uwẽ norĩ ipoto za'ra hã, ni'wa Zuwã Batistaha ne hã hâimana õ di, ipire hã. Tane nherẽ, ni'wa hã Hâiwa ãma 're Isãmra mono, da'ãma 're isib'a'uwẽ mono zéb ãma dama wapu na 're ihâimana mono hã, ta hã Zuwã Batistaha ma sa'ẽtẽ di za, isipai u hã. 12 Zuwã Batista hã, Rowasu'u wẽ itém na te te 're irowasu'u mono zém na te te isãna'ratazém hawim haré, ãwa bâtâ u hã, Hâiwa ãma 're Isãmra mono, da'ãma 're sib'a'uwẽ mono zé hã ma tô danhiptete na da te 're 'wapé za'ra, dazahi na. Aibâ iwasété norĩ hã ma tô te te sima 're wẽ za'ra, tinhiptete na te te sima 're waibui mono da. 13 Uburé 'Re ihâimana u'âsi mono zadawa 'mahârâ'wa norĩ nhimirob'ui'éré hã duré uburé isimiroti zahi na Mozési nhimirob'ui'éré zama ma tô wasu'u za'ra, 'Re ihâimana u'âsi mono da'ãma 're isib'a'uwẽ mono zé hã, Zuwã ipotozéb u hã. 14 Tawamhã isimirowasu'u za'ra na, saze za'ra wa'aba da wamhã, Zuwã hã, ta hã Elias, za we iwisi da hã, duréi da te 're iwasu'u mono. 15 Asimiparizé aima hâimana za'ra wa'aba wamhã, ma'ãpé wapari za'ra wa'aba!

16 — E marĩ na, wa za da'ãma romnhimiré'é, ãhã na 're idahâimana za'ra mono norĩ ãma hã. Aiwa ai'uté norĩ ne hã da te dasina 're i'ubumroi mono zéb ãma, nasi isi'mahârâ za'ra ne hã, ãne:

18 Tawamhã Zuwã Batista hã, sai ãna te te 're rowaptẽrẽ. Duré uva 'rãi wa'u te te 're hâsi mono õ di. Taha zarina, te da te dasima 're nharĩ za'ra, ãne: “Õ hã te wa'uburé ré 're mo.” 19 Ti'ai ãma Dasiré Ipodo hã ma tô wei mo. Ta hã te to sina dasiré 're sa. Uva 'rãi wa'u isé hã te duré te te 're hâsi dame. Tahawa, te da te tãma 're nharĩ wasété za'ra, ãne: “Ma'ãpé 'madâ'â za'ra wa'aba! Õ hã aibâ hã isai wawẽ. Duré uva 'rãi wa'u isé hã te te 're hâsi za'ẽtẽ! Rob'uiprazé arĩ ubumroi'wa norĩ siwaihu, duré siwa'ru 're idanomro mono norĩ siwaihu.” Tazahã, rowaihu 'Re ihâimana u'âsi mono te hã te 're sihâi'ré, romhuri iwẽ na da te 're i'manharĩ za'ra mono zém na si, tô sena na.

20 Tawamhã Zezusi hã ma tô dawasédé da'ãma aza'ra, 'ri nho'õmo mono bâ marĩ dama i'manharĩ waihu'u'õ, ahâ na te te dama 're i'ab'manharĩ mono zéb ãma hã. E marĩ wa. Tamemhã 'Re ihâimana u'âsi mono ma, dasiwẽ'õ za'ra õ wa, dawasété na idasisãmri za'ra zéb zarina. Ãne ma tô tinha:

21 — 'Ri nho'u Corazĩ ãma 're i'ai'ubumroi wa'aba mono norĩ, aima 're ropipa uptabi za'ra wa'aba mono di za! Duré 'ri nho'u Betisaida ãma 're i'ai'ubumroi wa'aba mono norĩ, aima 're ropipa uptabi za'ra wa'aba mono di za. E marĩ wa. Marĩ dama i'manharĩ waihu'u'õ ai'reb za'ra wa'aba, te 're i'ab'manharĩ mono hã, 'ri wa'õno Tiru ãma duré Sidõ ãma 'wa'âhã, tame 're isi'ubumroi mono hã te aré tiwasédé hã rẽme za'ra, duréi pese. Tawamhã tiwasété wi isipizari za'ra na sihâi'ré za'ra da hã, te aré si'uza za'ra, da'uza ihâpa ihâihâ za'õtõ na. Duré 'ru'a hã te aré ti'rã nhisiwi sima ahiri za'ra! 22 Tô sena wa za aima waihu'u za'ra wa'wa, ãne: 'Re ihâimana u'âsi mono, Da'ãma Rowairébézé ihâimana ãma hã Tiru duré Sidõ ãma 're idahâimana za'ra mono norĩ ãma, te za tipẽ'ẽzé, Corazĩ ãma duré Betisaida 're, i'ai'ubumroi wa'aba mono norĩ nhipai u. 23 Tawamhã duré a hã, 'ri wa'õno Cafarnau. E te asina irosa'ra, hâiwa u za i'aiwisi na hã. Aiwisi õ di za. 'Re ihâimana u'âsi mono hã te za aime, adâ 're ihâimana za'ra mono zé, Hades na rowamri u. E marĩ wa. Marĩ dama i'manharĩ waihu'u'õ tame te 're i'ab'manharĩ mono hã, Sodoma ãma hâimana 'wa'âhã, ta hã 'ri nho'u te aré ãne zahadu 're hâimana. 24 Tô sena wa za aima waihu'u za'ra wa'wa, ãne: 'Re ihâimana u'âsi mono hã Da'ãma Rowairébézé ihâimana ãma hã Sodoma ãma 're idasi'ubumroi mono norĩ ãma te za tipẽ'ẽzé, 'ri wa'õno Cafarnau ãma 're i'ai'ubumroi wa'aba mono norĩ nhipai u.

25 Tawamhã tame hâimana ré, Zezusi hã ma tô ãne tinha, Timama ma:

— Ĩmama, Uburé Danhib'apito, hâiwa ãma duré ti'ai ãma zama, wa ai'ãma ĩwata, ai'uté ne dama wapu na 're ihâimana za'ra mono norĩ ma, 're ahâi'ré mono wa, rowaihu'u pese 'wa norĩ ma, marĩ 're i'ahâi'ré mono õ hã. 26 Tane tô, Ĩmama. Ãma aima 're rowẽ uptabi mono di, ãne hã 're i'ab'manharĩ mono zém na hã.

27 — Ĩmama hã uburé marĩ hã ma tô ĩma sõmri za'ra. Ni'wa hã te te waihu'u õ di, I'ra hã. Imama si te te waihu'u pese di. Duré ni'wa hã te te waihu'u õ di, Imama hã. I'ra si te te waihu'u pese di. Duré I'ra hã ni'wam norĩ te te sima 're i'awẽ mono zéb uwaibaba, te te tãma 're i'ahâi'ré mono norĩ ma si, waihu'u pese di, Imama hã.

28 — We ĩtẽme ai'aba'réi wa'aba, asadâ'â na i'aihâimana za'ra wa'wa hã, marĩ pire na, da te 're i'wasari mono ne, i'wasari 'wa hã. Tawamhã wa hã wa za aima sõmri za'ra wa'wa, i'aiwa'utu za'ra wa'aba zé hã. 29 Ĩzazei'wa 're anomro aba mono. Duré ĩ'ãma waihu'u za'ra wa'aba. E marĩ wa. Wa hã ĩpẽ'ẽ na ĩnhimizawi pese di. Duré dama ĩpire na 're ĩsi'madâ'â zei mono õ wa. Tahawa, ĩ'ãma si te za isõpẽtẽ za'ra wa'wa, i'aiwa'utu za'ra wa'aba zé hã, aipẽ'ẽ na. 30 Marĩ iwapu, da te 're i'wasari mono ne, ĩzazei'wa na 're i'anomro aba mono zé hã, wapu di.