— Ma'ãpé 'madâ'â za'ra na! Asiré 're inomro mono norĩ hã, marĩ hã te 'manharĩ za'ra, sabadu na wa te 're 'manharĩ za'ra mono da, wama i'ru zahi õ hã.

3 Tawamhã Zezusi hã ma tô ãma sada'âbâ za'ra, ãne:

— E sõré za'ra wa'aba ã bâ, apito Davi te te i'manharĩzé hã tisiré norĩ me, mra te te simroi wamhã. 4 Ta hã ma tô ãzé, 'Re ihâimana u'âsi mono nhorõwa 'ri 'rãihâ u. Tawamhã tisiré norĩ me ma tô i'u'ẽtẽ wapu hã 'rẽne za'ra, 'Re ihâimana u'âsi mono ma, ãma idanhoprub za'ra hã, roti zahi hã te te 'rui õ nherẽ. Sasedoti norĩ si te te 're ihuri mono da hã i'ru zahi nherẽ, i'u'ẽtẽ wapu hã. 5 E duré niwamhã sõré za'ra wa'aba ã bâ, 'Re ihâimana u'âsi mono nhimiroti zahi na Mozési te te ãma irob'ui'érézé hã sabadu na hã sasedoti norĩ, 'Re ihâimana u'âsi mono nhorõwa ãma te te 're iromhuri za'ra mono na hã, tane nherẽ, õ norĩ te te 're i'upa za'ra mono na iwasédé da te ãma 're isa'ra za'ra mono õ na hã. 6 Tô sena, wa za aima waihu'u za'ra wa'wa, ãne: Ãme ihâimana hã^a pire uptabi di, 'Re ihâimana u'âsi mono nhorõwa 'ri 'rãihâ nhipai u. 7 Re ihâimana u'âsi mono mreme na Ibaihâ Iwazé pese na rob'ui'éré hã aima waihu'u pese za'ra wa'aba 'wa'âhã, ã hã: “Wa ĩsima wẽ, dasi'ãma 're dasiwamri za'ra mono da. Danhimizama zata na danhoprubzéb zô 're ĩnhimipari mono õ di”, aré iwasédé hã ãma sa'ra za'ra wa'aba õ di, marĩ te te i'upa za'ra õ norĩ ãma hã. 8 E marĩ wa. Ti'ai ãma Dasiré Ipodo hã simiroti pire uptabi di, sabadu na roti zahi ihâimana nhipai u.

9 Tawamhã Zezusi hã ta hawi oto morĩ wamhã, ma tô ãzé, Zudeu norĩ te rowahutuzéb u. 10 Tame te aibâ hã nhamra, isib'rata hâiba amo isib'rata tede hã. Tawamhã ni'wam norĩ hã ma tô sima wẽ za'ra, 'Re ihâimana u'âsi mono nhimiroti na Mozési te te ãma irob'ui'érézém na sabadu na roti zahi hã te te ãma upa zô, iwasédé hã te te siwi ãma hiri da. Tahawa ma tô siwi sadanha ãne, Zezusi hã:

— E roti zahi Mozésihi nhimi'ui'éré upana, sabadu na ni'wa, da te ipese da hã.

11 Tawamhã Zezusi hã ma ãma sada'âbâ za'ra, ãne:

— Asimizama pone'ẽrebâ hã aima 'maihâimana aba wamhã, duré ta hã aré ab're 're waptã'ã wamhã, e sô ai'maimorĩ aba õ di za, ab're hawi wazere aba da hã. 12 E 'Re ihâimana u'âsi mono ma, dazawi uptabi ã bâ, pone'ẽrebâ nhipai u. Tahawa, 'Re ihâimana u'âsi mono nhimiroti zahi zarina, sabadu na wa za wa te 're dapawaptob za'ra, iwẽ na hã.

13 Tawamhã aibâ isimizu'rã're ma, Zezusi hã ma tô tinha, ãne:

— Ma'ãpé, asib'rada wahutu.

Tawamhã ma tô tinhib'rada hã wahutu, aibâ hã. Awa'awi ma tô tipese, isimizu amo ne oto.

14 Tawamhã te te pese parimhã, farizeu norĩ hã ma tô wairé. Zezusihi hâiba na ma tô sima rowa'õtõ za'ra, te te siwi wĩrĩ da.

15 Tawamhã Zezusi hã ãne hã te te sina waihu'u wamhã, ma tô oto mo, ta hawi. Tawamhã da'ahâ uptabi na ma tô isarina dasi'ré. Tame ma tô uburé da'apese, dahâzé ré dasiwazari idahâimana za'ra hã. 16 Te te da'apese parimhã, ma tô dawi sisawi, da te dasima wasu'u za'ra tõ da. 17 Ãne hã ma tô tiromhâiba, 'Re ihâimana u'âsi mono zadawa 'mahârâ'wa, Izaias hã te te ãma irob'ui'érézé hã te te sina uwaimrami da, ã hã:

22 Tawamhã Zezusihi u, ma tô aibâ hã dasiwi saprõni ni, itob'a duré imreme'õ hã, wa'uburé ré 're hâimana mono wa. Tawamhã Zezusi hã ma tô pese. Te te pese parimhã, ma tô oto rob'madâ. Ma tô duré mreme watobro. 23 Tawamhã da'ahâ uptabi hã ma tô ãma tatob'uzu za'ra ni. Tahawa, ma tô dasima nharĩ za'ra ni, ãne:

— Ãté tô õ hã apito Davihi nhihudu.

24 Tane nherẽ, farizeu norĩ ãne hã te te dawapari za'ra wamhã, ma tô nharĩ za'ra, ãne:

— Ta hã Beuzebu, wa'uburé norĩ nhib'apito. Taha zadawa para ma tô wa'uburé hã te te dama 're anhamra.

25 Tane nherẽ, Zezusi hã isimirosa'rata za'ra te te waihu'u pese wamhã, ma tô ãne tãma nharĩ za'ra:

— Ti'ai wa'õtõ nho'u hã sisada sipo'o wa, 'râwi si'wapé za'ra wamhã, 'râwi te za tô si'uprosi. Duré 'ri nho'u hã niwamhã 'ri 're, 're ihâimana za'ra mono hã sisada hâimana za'ra wamhã, 'râwi te za duré ta norĩ zama si'uprosi za'ra. 26 Tane duré, Satanasihi te wa'uburé norĩ hã 'râwi wa'uburé ma, te te 're rob'ru za'ra mono wamhã, 'râwi te za sima aipo'o. E niha te za tawamhã 're si'uprosi mono ãna 're hâimana za'ra. 27 Te ĩma inharĩ za'ra wa'wa, wa'uburé ma, te 're irob'rui mono na Beuzebu hã ĩwaihu'u pe, te te ĩma 're sõmri mono wa, te dama 're anhamra mono da. Tane nherẽ, ãne wamhã, e 'wa hã ma tô asiré wa'aba 're inomro mono norĩ ma, iwaihu'u pe hã te te 're anhomri, wa'uburé hã te te dama 're sãmra za'ra mono da hã. Ãne wamhã, asiré 're inomro wa'aba mono norĩ hã te za aiwasédé hã ai'ãma sa'ra za'ra wa'wa, i'upa na 're aihâimana za'ra wa'aba mono wa. 28 Tazahã, 'Re ihâimana u'âsi mono waihu'u pese na si, wa tô wa'uburé hã te dama 're anhamra. Taha zarina ma tô iwaihu'u za'ra wa'wa, 'Re ihâimana u'âsi mono da'ãma 're isib'a'uwẽ mono zé hã, we oto atẽme iwisi za'ra wa'aba na hã.

29 — E ni'wa hã sébré waihu'u pese bâ, aibâ isiptete nhorõwa u hã isibro te te tiwi duri da hã, a'â te te pawasisi õ ré hã. Te te pawasisi parip si, te te tiwi robduri waihu'u pese di, aibâ isiptete nhorõwa hawimhã.

30 — Ni'wa hã ĩniwĩb õ wamhã, ta hã te ĩzada 're hâimana. Duré ni'wa hã te te ĩma da'ubumro da, ĩ'ãma simei õ wamhã, ta hã te za ĩwi da'ãma ropé. 31 Tahawa, tô sena wa za aima waihu'u za'ra wa'wa, ãne: Dawasédé hã sipu'u pese na da te 're i'manharĩ za'ra mono hã, duré niwamhã, 'Re ihâimana u'âsi mono ãma da te 're iwasété za'ra mono zé hã, 'Re ihâimana u'âsi mono ma hã tãma waihu'u pese di, dawasédé hã te te dama 're i'apari mono zéb da hã. Tazahã, 'Re ihâimana u'âsi mono Pẽ'ẽzani ãma da te 're iwasété za'ra mono zé hã 'Re ihâimana u'âsi mono hã te te dama 're apari waihu'u mono õ di za. 32 Ni'wa hã, Ti'ai ãma Dasiré Ipoto ãma te te wasété wamhã, 'Re ihâimana u'âsi mono ma hã tãma waihu'u pese di, ãne na iwasédé hã te te tãma ipari da hã, te te oto ãma 're 'madâ'â mono tõ da. Tazahã, ni'wa hã 'Re ihâimana u'âsi mono Pẽ'ẽzani ãma te te wasété wamhã, 'Re ihâimana u'âsi mono hã te te tãma pari waihu'u õ di za, ãhã na hã duré romhutu'õmhã.

33 — Waihu'u za'ra wa'aba: Rowede hã wede wẽ wamhã, 'rãi wẽ na te za ti'rã. Duré rowede hã wede wasété wamhã, 'rãi wasété na te za ti'rã. E marĩ wa. Rowede norĩ hã te za da te 're waihu'u za'ra, i'rã na. 34 Wahi isé uptabi norĩ! E niha te za bété iwẽ na 're aimreme zusi aba mo, aiwasété na 're anomro aba mono nherẽ. Dapẽ'ẽ 're dama 're ihâimana za'ra mono zéb zarina te za 're damreme zusi. 35 Ni'wa iwẽ hã tipẽ'ẽ 're, iré 're ihâimana mono zém hawi te za iwẽ hã te te 're azani. Duré ni'wa iwasédé hã tipẽ'ẽ 're, iré 're ihâimana mono zém hawi te za marĩ iwasété si te te 're azani.

36 — Tô sena, wa za aima waihu'u za'ra wa'wa, ãne: 'Re ihâimana u'âsi mono, za te te da'ãma i'arowairébézéb ãma hã, dahâiba mono bâ te za tãma ãma rowasu'u za'ra ni za, marĩ wa, marĩ dai õ na da te dama 're inharĩ za'ra mono zém na hã. 37 'Re i'aimreme zusi aba mono zéb zarina, te za 'Re ihâimana u'âsi mono hã ai'ãma arowairébé 'wa. Iwẽ na si 're aimreme zusi aba mono wamhã, te za aiwẽsãmri za'ra wa'wa, aiwasédé 're i'manharĩ za'ra wa'aba mono õ zarina. Tazahã, iwasété na si 're aimreme zusi aba mono wamhã, te za aiwasédé hã ai'ãma sa'ra wa'wa.

38 Tawamhã nima norĩ farizeu norĩ, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã ma tô Zezusihi ma nharĩ za'ra, ãne:

— Rowahutu'wa, wa wasima wẽ za'ra ni, marĩ dama i'manharĩ waihu'u'õ hã 'manharĩ da, wa te 'madâ'â za'ra da.

39 Tawamhã Zezusi hã ma ãma sada'âbâ za'ra, ãne:

— Ãhã na dapodo hã, dawasété na si 're idanomro mono hã, duré 'Re ihâimana u'âsi mono ma si 're idahâimana za'ra mono õ hã te waptẽrẽ za'ra ni, sena na 'Re ihâimana u'âsi mono zadawa para, te dama 're i'ab'manharĩ mono na sena na te te ãma ĩwaihu'u za'ra da hã. Tane nherẽ, te tãma 'manharĩ za'ra õ di za. Marĩ dama i'manharĩ waihu'u'õ hã, Zonahã ma iromhâimanazép si te za tãma tihâimana za'ra, 'Re ihâimana u'âsi mono hawim na sena na te te ĩwaihu'u za'ra da hã. 40 Zona hã si'ubdatõ bâtâ na duré si'ubdatõ mara na tebe isa'ẽtẽ nomo 're, ihâimana ne, tane te za Ti'ai ãma dasiré Ipodo hã tihâiba ti'ai 'rowimhã, si'ubdatõ bâtâ na duré si'ubdatõ mara na. 41 Da'ãma Rowairébézé za ihâimana ãma hã, Ninive ãma 're isi'ubumroi mono norĩ hã te za tiwahutu za'ra, aiwasédé hã te te ai'ãma sa'ra za'ra wa'aba da. E marĩ wa. Ta norĩ hã Zonahã nhimirowasu'u te te wapari za'ra wamhã, tiwasété na sisãmri za'ra wa, ma tô 'Re ihâimana u'âsi mono u aipizari za'ra, tiwasété wi. Tô sena wa za ãne aima waihu'u za'ra wa'wa: Ãhã na ãme ihâimana hã pire uptabi di, Zonahã nhipai u. 42 Da'ãma Rowairébézé za ihâimana ãma hã, Saba te danhib'apito sipi'õ hã te za wahudu, aiwasédé hã te te ai'ãma sa'ra za'ra wa'aba da. Ta hã romhâ na ma tô mo, Salomahã nhimirowaihu'u wẽ te te wapari da hã. Tô sena wa za ãne aima waihu'u za'ra wa'wa: Ãhã na ãme ihâimana hã, Salomahã nhipai u pire uptabi di.

43 — Wa'uburé hã ni'wai hawi watobro wamhã, te za 're mo, a'ubuni wi, ro â ãna 're iromnhimi'wara mono na. Tiwa'utuzéb zô te za 're rĩtĩ. Tane nherẽ, te te 'manhopẽtẽ õ di za. 44 Tawamhã te za sima tinha, ãne: “Apâ wa za ĩsina siri ĩnhorõwa u, ĩwatobrozéb u.” Tawamhã apâ te te sina siri wamhã, te za sõpẽtẽ 'ri baba na, ropese wẽ na duré robza'ra pese na. 45 Taha parimhã, tisiré wa'uburé norĩ zô te za mo. Siré te za ãwisi za'ra, 7 na ihâiba za'ra hã isipai u iwasété uptabi za'ra hã. Tawamhã tame te za siré 're si'ubumro. Ãne wamhã, ni'wai ma hã ropire uptabi di za oto, iwana ré nhipai u.

46 Tawamhã Zezusi hã zahadu te te dama rowasu'u ré, ma tô itẽme aihutu, ina duré ino norĩ hã. Rowi te aimasa. Tawamhã ma tô siwi da'maipo're pu'u, Zezusihi ma, da te 'mairowasu'u da, rob u itẽme watobro za'ra da. 47 Tawamhã Zezusihi ma, ma tô 'mairowasu'u ni, ãne:

— Ana, duré ano norĩ hã te rowi aimasa. Te sima wẽ za'ra, te te aima nharĩ za'ra da, marĩ na.

48 Tawamhã Zezusi hã ma sada'â, ãne:

— E 'wa hã ĩna bâ. Duré e 'wam norĩ hã ĩno norĩ.

49 Tawamhã tinhiptõmo na ma tô isiré 're inomro mono norĩ hã wasu'u za'ra. Ãne te tinha:

— Ma'ãpé 'madâ'â za'ra wa'aba! Ãhãta ĩna, duré ãhãta ĩsisãnawã norĩ. 50 E marĩ wa. Ni'wa hã Ĩmama hâiwa ãma 're isãmra mono hã te te sima 're iwẽ mono zéb zarina, te te 're ab'manharĩ mono wamhã, ta hã ĩsisãnawã, ta hã ĩhidiba, duré ta hã ĩna.