Zezusi hã aibâ ihi'ré te te ipesezé
2
Tawamhã bâdâ umro na ãma si'utõrĩ pari, ma Zezusi hã apâ wi, Cafarnau u. Tawamhã ma iwasu'u hã ropé, 'ri, 're ihâimana pese mono zéb 're, ihâimana na hã. 2 Tame ma da'ahâ na itẽme dasito. Tahawa, rowib zama 'ridawa ãma hã da'masisi di. Tawamhã Zezusi hã 'Re ihâimana u'âsi mono mreme na te te dama rowasu'u ré, 3 ma tô aibâ norĩ maparane si'uiwa na ihâiba za'ra hã imorĩ'õ siwi ãwisi. 4 Tane nherẽ, da'ahâ uptabi wamhã, te te siwi 'mazébré waihu'u õ di, Zezusihi u hã. Tahawa, sipapara ma tô 'ri nhisi hawi sada 'ri 're pu'u za'ra, Zezusihi nho'õmoi baba. Tawamhã 'ri 're pu'u ãma ma tô ãma siwi si'ra, ihi'ré hã tiza'warizé wa inomro na. 5 Tawamhã Zezusi hã ma tô 'madâ, aibâ norĩ ma, 'Re ihâimana u'âsi mono te te sina 're i'umnhasi za'ra mono zé tãma ihâimana za'ra na hã. Tahawa ma tô imorĩ'õ ma tinha, ãne:— Ĩsiwaihu, aiwasédé hã, 'Re ihâimana u'âsi mono te te oto ai'ãma 're ab'madâ'â mono õ di za.
6 Tawamhã tame dame isisimro, nima norĩ 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te 'râwi sima ãma rosa'rata za'ra, ãne: 7 “E niha te õne õ hã aibâ tinha. 'Re ihâimana u'âsi mono ãma, te wasété. Dawasédé hã ni'wa te te pari waihu'u õ di. 'Re ihâimana u'âsi mono si, sada hã waihu'u pese di.”
8 Tawamhã Zezusi hã ta norĩ te te ãma irosa'rata za'ra zém na, awa'awi te te sina waihu'u wamhã, ma tô tãma nharĩ za'ra, ãne:
— E marĩ da, te ãne aipẽ'ẽ 'remhã irosa'rata za'ra wa'wa. 9 E ma hã iwapu, imorĩ'õ ma, te inharĩzéb da hã, e ã hã: “Aiwasédé hã 'Re ihâimana u'âsi mono te te oto ai'ãma 're ab'madâ'â mono õ di za”, e niwamhã duré ã hã “Aiwahutu. Asa'warizé âri, aimorĩ da oto.” 10 Tane nherẽ, Ti'ai ãma Dasiré Ipodo hã ti'ai ãma isimiroti pire uptabi na, dawasédé hã te te da'ãma 're i'ab'madâ'â mono õ zé hã waihu'u za'ra wa'aba da, wa za ãne hã 'manha.
Tawamhã imorĩ'õ ma, ma tô ãne tinha:
11 — Ãne wa za aima tinha: Aiwahutu. Asa'warizé hã âri, aimorĩ da oto, asõrõwa u.
12 Tawamhã awa'awi ma tô aibâ hã wahudu, da'ahâ nho'a. Tiza'warizé hã ma tô ti'â. Rob u, ma tô iré watobro. Tahawa, uburé, ma ãma tatob'uzu za'ra ni. 'Re ihâimana u'âsi mono ãma, te duré tawata za'ra ni. Ãne ma tô dasima rowasu'u za'ra ni:
— Ãne hã niwa, wa te i'madâ'â za'ra õ.
Zezusi hã Levihi zô ihârâzé
13 Tawamhã Zezusi hã te duré apâ mo, Galiléia isõ'u zaihâ u. Da'ahâ na ma tô itẽme aihutu ni. Tame te uburé dama rowahutu. 14 Tawamhã Zezusi hã zahadu morĩ ré, ma tô Afeuhu 'ra tisã Levia hã, danhib'apito ma, rob'uiprazé arĩ ubumroi'wa hã. Rob'uiprazé arĩ te te dawi 're i'a'ubumroi mono zéb ãma, te nhamra. Tawamhã Zezusi hã te tãma tinha, ãne:
— We ĩsiré aimorĩ.
Tahawa awa'awi ma wahudu Levi hã, isiré 're morĩ da oto. 15 Tawamhã suru na ãma ronomro pari, te Zezusi hã tisa, Levihi nhorõwa ãma. Tawamhã Zezusi duré isiré 're inomro mono norĩ me hã te rob'uiprazé arĩ ubumroi'wa norĩ hãb ahâ na tihâimana za'ra, duré aimawi dawasété na 're idanomro mono norĩ zama. 16 Nima norĩ 'Re ihâimana u'âsi mono nhimiroti zahi na rob'ui'éré na dama rowahutu'wa norĩ, ta norĩ hã tô farizeu, Zezusi hã te te siwi 'madâ'â wamhã, dawasété norĩ siré duré rob'uiprazé arĩ ubumroi'wa norĩ siré ĩsa na, ma tô isiré 're inomro mono norĩ ma nharĩ za'ra, ãne:
— E niha bâ, te bété rob'uiprazé arĩ ubumroi'wa norĩ siré, duré dawasété norĩ siré zama hã tisa.
17 Tawamhã Zezusi ãne hã te te wapari wamhã, ma tô tãma nharĩ za'ra, ãne:
— Ihâzé'õ norĩ hã dawede'wa zô 're simnhasi waihu'u za'ra mono õ di. Ihâzé ré norĩ si, te sô 're simnhasi za'ra. Tane duré wa hã. Dawasété na 're idanomro mono norĩ zô 're ĩhârâ mono da, wa tô wei mo. Mare di, dawẽ na 're idanomro mono norĩ zô hã.
Dasai ãna, rowaptẽrẽzé
18 Tawamhã Zuwã Batistaha siré 're inomro mono norĩ hã, duré farizeu norĩ hã te sai ãna a'â tihâimana za'ra. Tahawa, ni'wam norĩ hã ma tô Zezusihi u aihutu, te te siwi sadanharĩ da, ãne:
— Zuwãhã siré 're inomro mono norĩ hã duré farizeu norĩ hã, sai ãna te tihâimana za'ra. E niha bâ bété, asiré 're inomro mono norĩ hã, sai ãna a'â hâimana za'ra õ di.
19 Tawamhã Zezusi hã ma ãma sada'âbâ za'ra, ãne:
— Aibâ hã imrozéb u, sô ihârâ za'ra norĩ hã e sai ãna, te za a'â tihâimana za'ra, aibâ imro da hã isiré hâimana za'ra ré hã. Mare di. Sai ãna hâimana za'ra õ di za a'â, i'rata sãmra za'ra ré hã. 20 Niwapsi te za bâdâ hã iwa waptãrã, aibâ imro da hã iwa'wa hawi, da te tiwi i'âri za'ra zéb da hã. Tawapsi te za tô oto sai ãna 're hâimana za'ra, te te oto 're rowaptẽrẽ za'ra mono da hã.
21 — Ni'wa hã zazahâ ihâ tém na da'uza ihâ 'ratare hã te te hâiwa'aba waihu'u õ di. Te te ãma hâiwa'aba wamhã, da'uza ihâ té hã te za hâta, ihâ 'ratare hã. Ãne wamhã, te za tihâ 'repu'u za'ẽtẽ. 22 Tane duré ni'wa hã uva 'rãi wa'u isé iwa'u té hã romhâ 'manharĩ isémezé i'ratare 'remhã, te te sẽrẽ waihu'u õ di. Te te sẽrẽ wamhã, romhâ 'manharĩ i'ratare hã te za hâihaipo'o. Tawamhã uva 'rãi wa'u isé hã te za taré asa'wa. Romhâ 'manharĩ isémezéb zama te za duré hâihaiwamna. Ãne wa, isémezé itéb 'rep si, te za rob'rãi wa'u ité hã da te 're sé.
Zezusihi nhimiroti, sabadu na roti nhipai u pire uptabi di
23 Tawamhã sabadu na ma tô buru na amnho trigu 're wa'waibaba ro'razâ, Zezusi hã. Iwa'waibaba si'aba'réi ré hã ma tô isiré 're inomro mono norĩ hã amnho trigu 'rã hã te te sima sinarĩ za'ra. 24 Tawamhã farizeu norĩ hã te Zezusi siwi sadanha, ãne:
— E niha bâ, te ãne hã 'manharĩ za'ra, asiré 're inomro mono norĩ hã, sabadu na, wa te 're 'manharĩ za'ra mono tõ da, wama i'ru zahi õ hã.
25 Tawamhã Zezusi hã ma sada'âbâ za'ra:
— E apito Davihi wasu'u na rob'ui'éré hã sõré za'ra wa'aba ã bâ, te te irob'manharĩzém na, tisiré norĩ me hã, mra te te simroi wamhã. 26 Apito Davi hã ma tô ãzé 'Re ihâimana u'âsi mono nhorõwa u, Abiata hã 're hâimana mono ré. Ta hã sasedoti, 'Re ihâimana u'âsi mono ma da'ãma romhuri'wa ipire uptabi. Tawamhã Davi hã tamomo sébré wamhã, i'u'ẽne hã ma tô 'mai'rẽ, 'Re ihâimana u'âsi mono ma, aré ãma idanhoprub za'ra hã. Ta hã ma tô duré tisiré norĩ ma a za'ra, sasedoti norĩ si, te te 're huri mono da, aré i'ru zahi hã.
27 Tawamhã ãne ma Zezusi hã tãma 'rãsutu za'ra, timreme hã: