— Ĩ'ra, asib'ru na! Aiwasédé hã, 'Re ihâimana u'âsi mono te te oto ai'ãma 're ab'madâ'â mono õ di za.

3 Tawamhã nima norĩ 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã ma tô 'râwi sima nharĩ za'ra, ãne:

— Õ hã aibâ hã, 'Re ihâimana u'âsi mono ãma te wasété.

4 Tane nherẽ, Zezusi hã te te waihu'u pese di, isimirosa'rata za'ra hã. Tahawa, ma tô ãne tãma nharĩ za'ra:

— E marĩ da, ma tô tane na aipẽ'ẽ 're irosa'rata wasété za'ra wa'wa. 5 E ma hã iwapu, imorĩ'õ ma, te inharĩzéb da hã, e ã hã: “Aiwasédé hã 'Re ihâimana u'âsi mono te te oto ai'ãma 're ab'madâ'â mono õ di za”, e niwamhã duré ã hã “Aiwahutu. Aimorĩ oto.” 6 Tane nherẽ, Ti'ai ãma Dasiré Ipodo hã ti'ai ãma isimiroti pire uptabi na, dawasédé hã te te da'ãma 're i'ab'madâ'â mono õ zé hã, waihu'u za'ra wa'aba da, wa za ãne hã 'manha.

Tawamhã imorĩ'õ ma, ma tô ãne tinha:

— Aiwahutu. Asa'warizé hã âri, aimorĩ da oto, asõrõwa u.

7 Tawamhã aibâ hã ma tô wahudu. Tinhorõwa u ma tô oto mo. 8 Ãne hã da te 'madâ'â za'ra wamhã, ma tô tapahi pese za'ra ni. Tahawa ma tô 'Re ihâimana u'âsi mono ãma tawata za'ra ni, roti ipire hã te te sõmri wa, ti'ai ãma a'uwẽ norĩ ma.

9 Zezusi hã dahawi morĩ wamhã, ma tô tisã, Mateus hã danhib'apito ma, rob'uiprazé arĩ ubumroi'wa hã. Rob'uiprazé arĩ te te 're i'a'ubumroi mono zéb ãma te nhamra. Tawamhã Zezusi hã te 'mahâ ãne:

— Ĩzarina we aimorĩ.

Tahawa Mateus hã ma tô wahudu. Isarina ma tô oto mo. 10 Taha pari, Zezusi hã Mateus nhorõwa ãma sai ré, rob'uiprazé arĩ ubumroi'wa norĩ hã duré dawasété na 're idanomro mono norĩ hã ma tô aihutu ni, da'ahâ na. Ta norĩ zama ma tô asimro, Zezusihi siré saihuri da, duré isiré 're inomro mono norĩ siré. 11 Tawamhã nima norĩ farizeu norĩ hã ãne hã te te 'madâ'â za'ra wamhã, ma tô Zezusihi siré 're inomro mono norĩ hã sadanharĩ za'ra, ãne:

— E marĩ wa, ate za'ra wa'wa rowahutu'wa hã, te rob'uiprazé arĩ ubumroi'wa norĩ siré hã tisa, duré dawasété na 're idanomro mono norĩ siré zama.

12 Tawamhã Zezusi hã te te wapari za'ra wamhã, ma tô ãne sada'âbâ za'ra:

— Ihâzé'õ norĩ hã dawede'wa zô 're simnhasi waihu'u za'ra mono õ di. Ihâzé ré norĩ si, te sô 're simnhasi za'ra. 13 Tahawa, ma'ãpé sadaihu'u za'ra wa'aba, Ibaihâ Iwazé pese na rob'ui'éré hã, ãne: “Wa ĩsima wẽ, dasi'ãma 're dasiwamri za'ra mono da. Danhimizama zata na danhoprubzéb zô 're ĩnhimipari mono õ di.” E marĩ wa. Dawasété na 're idanomro mono norĩ zô 're ĩhârâ mono da, wa tô wei mo. Mare di, dawẽ na 're idanomro mono norĩ zô hã.

14 Tawamhã Zuwã Batistaha siré 're inomro mono norĩ hã ma tô Zezusihi u aihutu. Ãne ma tô siwi sadanha:

— E marĩ wa, wa norĩ hã duré farizeu norĩ me, 'Re ihâimana u'âsi mono ma 're wamreme zusi mono da hã, wasai ãna a'â 're wahâimana za'ra mono nherẽ, asiré 're inomro mono norĩ hã sai ãna a'â 're hâimana za'ra mono õ di 'Re ihâimana u'âsi mono ma, 're mreme zusi mono da hã.

15 Tawamhã Zezusi hã ma ãma sada'âbâ za'ra, ãne:

— E aibâ imrozéb u, sô ihârâ za'ra norĩ hã robzei ãna hâimana waihu'u pese za'ra di, isiré hâimana za'ra ré hã. Mare di. Tane nherẽ, bâdâ hã te za wi, aibâ imro da hã, za da te tiwi iwazere za'ra zé hã iwa'wa hawib za'ra. Tawapsi te za oto sai ãna a'â 're hâimana za'ra, 'Re ihâimana u'âsi mono wi te te 're rowaptẽrẽ za'ra mono da hã.

16 — Ni'wa hã zazahâ ihâ tém na, da'uza ihâ 'ratare hã te te hâiwa'aba waihu'u õ di. Te te ãma hâiwa'aba wamhã, da'uza ihâ té hã te za hâta, ihâ 'ratare hã. Ãne wamhã, te za tihâ 'repu'u za'ẽtẽ. 17 Ni'wa hã uva 'rãi wa'u isé iwa'u té hã romhâ 'manharĩ isémezé i'ratare 'remhã, te te sẽrẽ waihu'u õ di. Te te sẽrẽ wamhã, romhâ 'manharĩ i'ratare hã te za hâihaipo'o. Tawamhã uva 'rãi wa'u isé hã te za taré asa'wa. Romhâ 'manharĩ isémezéb zama te za duré hâihaiwamna. Tazahã, uva 'rãi wa'u ité hã romhâ 'manharĩ itéb 're, te za da te 're sé. Ãne wapsi, romhâ 'manharĩ hã siprub õ di za. Duré uva 'rãi wa'u itéb zama taré sisa'wari õ di za.

18 Tawamhã Zezusi hã zahadu te te dama rowasu'u ré, ma tô itẽme wi, Zudeu norĩ te rowahutuzé 'madâ'â'wa hã. Hi'rãtitõ ipapara ma tô aime. Ãne te tãma tinha:

— Ĩ'ra si'azarudu hã ma ĩwi dârâ, nimosi. Ma'ãpé ĩsiré ãma aimorĩ, asib'rada hã ãma hiri da, apâ hâiba ré 're hâimana mono da.

19 Tawamhã Zezusi hã ma tô wahudu. Isiré ma tô mo. Isiré 're inomro mono norĩ zama ma tô duré isiré ai'aba'ré.

20 Si'aba'réi ré, pi'õ 12 na ãma iwahu hã, pi'õi hâzé ãma 're hâimana mono ré hã, ma tô Zezusihi zarina mo, te te sina itẽme rotété da. Te te itẽme sina rotété wamhã, ma tô upi, Zezusihi uza ihâpa hânhisudu hã, 21 ãne te te sima rosa'rata wa: “I'uza ihâpa si te upi wamhã, wa za ĩpese.”

22 Tawamhã te te upi wamhã, Zezusi hã ma tô sô aipi'ra. Tahawa ma tô 'madâ, pi'õ hã. Ãne te tãma tinha:

— Ĩ'ra, asib'ru na! Aihâzé hã ai'ãma 're hâimana mono õ di za oto. Asina ĩ'umnhasizé hã ma tô aipese.

Tawamhã awa'awi pesere ma tô pi'õ hã tipese.

23 Taha pari, Zezusi hã ma tô mo, rowahutuzéb ãma danhib'ihâ'a nhorõwa u. Tame ma tô 'madâ, rowamreme'wa norĩ hã 're dadâ'â za'ra mono wa, 're isimnhihãsi mono hã, duré da'ahâ uptabi na 're idasiwairõtõ mono hã. 24 Te te da'a'madâ'â wamhã, ma tô ãne da'a'mahâ:

— Mo oto uburé aiwairébé aba. Azarudu hã dâ'â õ di. Taré te nhono.

Tawamhã ma tô uburé ãma aihâ za'ra ni. 25 Dawairébé parimhã, Zezusi hã ma tô ãzé, 'ri're wa'wa u azarudu hã inomrozéb u. Sébré wamhã, ma tô pa'â. Tawamhã azarudu hã ma tô wahudu. 26 Ãne iromhâimanazém na rowasu'u hã ma tô te te ropé daro mono bâ, Galiléia ti'ai 'remhã.

27 Tawamhã Zezusi hã taha darom hawi ma tô oto mo. Morĩ ré hã, aibâ itob'a norĩ hã ma tô isarina tineb zahuré, ãne te te 'mahârâ zahuré sina:

— Davihi nhihudu, ma'ãpé wa'ãma aipẽ'ẽzé na.

28 Tawamhã Zezusi hã 'ri para u sébré wamhã, itob'a norĩ hã ma tô 'râwi itẽme sina rotété zahuré. Tahawa te Zezusi hã sadanharĩ zahuré, ãne:

— E ma ĩzazei wa'wa, za te i'aipese waihu'u pese aba zém na hã.

Tawamhã ma tô sada'âbâ zahuré, ãne:

— Ĩhe, Apito. Wa asaze ni.

29 Tawamhã Zezusi hã ma tô tõmo upi zahuré. Taha pari ma tô ãne tãma nharĩ zahuré:

— Asina ĩ'umnhasi aba zéb zarina, tô hâimana.

30 Tawamhã aibâ itob'a norĩ ma, ma tô ito hã tãma si'ridawa zahuré. Taha pari Zezusi hã ma tô mreme tete na tãma nharĩ zahuré, ãne:

— Ma'ãpé, ãma pibui pese aba, ni'wa hã te te waihu'u tõ da.

31 Tane nherẽ, neb zahuré wamhã, ma tô Zezusihi wasu'u na ropé zahuré ropâ, taha ti'ai 'remhã.

32 Tawamhã Zezusi hã te te ito pese zahuré neb za'u hã, ni'wam norĩ hã ma tô Zezusihi u aibâ hã siwi ãwisi, mreme ãna 're ihâimana mono hã, wa'uburé iwa 're hâimana mono wa. 33 Tawamhã Zezusi hã wa'uburé ma, te te rob'rui wamhã, aibâ hã ma tô oto mreme watobro. Tahawa uburé ma tô ãma tatob'uzu za'ra ni. Ãne ma tô nharĩ za'ra ni:

— Niwa, ãne hã wa te i'madâ'â za'ra õ, Izaraéu nhihudu norĩ nhipti'ai 'remhã.

34 Tane nherẽ, farizeu norĩ hã ma tô ãne nharĩ za'ra:

— Wa'uburé norĩ nhib'apito, tiwaihu'u pe te te tãma isõmrizéb zarina, te wa'uburé norĩ hã te te dama 're anhamra.

35 Zezusi hã 'ri nho'õmo mono bâ ma tô datẽme 're mo, duré 'ri wa'õtõ mono bâ. Zudeu norĩ te rowahutuzé 're ihâimana za'ra mono na zama ma tô te te 're rowahutu. Rowasu'uwẽ hã 'Re ihâimana u'âsi mono da'ãma 're isib'a'uwẽ mono zé hã ma tô te te dama 're wasu'u. Ma tô duré te te 're da'apese, dahâzé sipu'u pese na da'ãma 're ihâimana za'ra mono hã. 36 Tawamhã Zezusi hã da'ahâ uptabi na idahâimana za'ra hã te te da'a'madâ'â wamhã, ma tô da'ãma aiwamri, siwa'ru 're dahâimana za'ra mono wa, duré 're dasipawapto waihu'u za'ra mono õ wa, pone'ẽrebâ 'madâ'â'wai ãna 're inomro mono ne, 're danomro mono wa. 37 Tawamhã isiré 're inomro mono norĩ ma, ma tô tinha, ãne:

— Amnho itehâri da hã sa'ẽtẽ uptabi di. Tane nherẽ, romhuri'wa norĩ hã umrore di. 38 Tahawa, ma'ãpé roptehâri'wa tede'wai wi waptẽrẽ za'ra wa'aba, romhuri'wa norĩ hã te te we satõrĩ za'ra da ahâ na, tite roptehâri u hã.