Zezusi hã aibâ i'wa're ré te te ipesezé
8
Zezusi hã ẽtẽ 'rãihâ hawi te te si'rai wamhã, da'ahâ uptabi na ma tô isarina ai'aba'ré ni. 2 Tawamhã, aibâ lepra na i'wa're nhisi ré hã ma tô itẽme mo 'râwi. Hi'rãtitõ ma tô ipapara aime. Ãne te tãma tinha:— Apito, ĩma waihu'u pese di, za ĩpese waihu'u pese na hã, asima wẽ wamhã.
3 Tawamhã Zezusi hã tinhib'rada ma tô sô mawẽ. Ma tô upi. Ãne te tãma tinha:
— Wa ĩsima wẽ tô. Aihâiba pese oto.
— Ma'ãpé ĩwapari pese. Ni'wai ma, ãne na hã rowasu'u tõ. Sasedoti u si aimorĩ, i'aihâiba pesezém na te te aiwaihu'u da. Duré asõprubzé hã sõmri 'Re ihâimana u'âsi mono ma, Mozésihi nhimi'ui'éré zarina, i'aihâiba pesezém na hã.
Zezusi hã, dasi'wapéi 'manharĩ'wa norĩ wada'uri'wai ma, romhuri'wa te te ipesezé
5 Zezusi hã Cafarnau na 'ri nho'õmo nhisi u wisi wamhã, romanu na dawamri na dasi'wapéi 'manharĩ'wa norĩ wada'uri'wa hã ma tô itẽme wi. Ma tô tiwi rowaptẽrẽ zahi, ãma sime da. 6 Ãne te tãma tinha:
— Apito, ĩma romhuri'wa hã ĩnhorõwa ãma te nomro. Sirési waihu'u õ di. Te robzépata za'ẽtẽ.
7 Tawamhã te Zezusi hã tãma tinha, ãne:
— Wa za ãma mo, te pese da.
8 Tane nherẽ, romanu na dawamri na dasi'wapéi 'manharĩ'wa norĩ wada'uri'wa hã, te ãne tãma tinha:
— Tô'ã, apito. Wa hã aima ĩwapure di. Tahawa, sadai õ di, ĩnhorõwa u i'asébré da hã. Taré nharĩ. Tawamhã ĩma romhuri'wa hã te za tipese. 9 Duré ĩnhipai u ipire norĩ iré hã, marĩ te te ĩma 're i'ru za'ra mono hã. Tane duré dasi'wapéi 'manharĩ'wa norĩ hã te tãma 're irob'ru za'ra mono norĩ hã iré hã. Ãne te tãma 'mairob'rui wamhã: “Aimorĩ”, ãne wamhã, te za mo. Duré ihâiba amoi ma, ãne te rob'rui wamhã: “We aimorĩ”, ãne wamhã, te za duré wei mo. Duré ĩma romhuri'wai ma, te rob'rui wamhã, ãne: “'Manharĩ ã hã”, ãne wamhã, te za 'manha.
10 Tawamhã Zezusi ãne hã te te wapari wamhã, ma tô ãma titob'uzu. Ma tô tinha, isarina idasi'aba'ré norĩ ma, ãne:
— Tô sena wa za aima waihu'u za'ra wa'wa, ãne: Niwa te i'madâ'â õ, Izaraéu nhihudu 'remhã, ã hã aibâ 'Re ihâimana u'âsi mono te te sina 're i'umnhasi za'ẽtẽ mono ne hã. 11 Ãne, wa za duré aima waihu'u za'ra wa'wa. Da'ahâ uptabi na te za aihutu ni, bâtâ pusizém hawimhã, duré bâtâ zasizém hawimhã. Abra'ãhã siré, te za ai'ubumro ni, Izaquihi siré, duré Zacoho siré, dasa isa'ẽtẽ ãma ta norĩ siré dasaihuri da hã, Hâiwa ãma 're Isãmra mono, da'ãma 're isib'a'uwẽ mono zéb ãma hã. 12 Tane nherẽ, ni'wam norĩ hã 'Re ihâimana u'âsi mono, da'ãma 're isib'a'uwẽ mono zéb ãma, ihâimana za'ra da hã aré, ta norĩ hã te za sãmra sisiti, robra u. Tame te za 're 'ru'ru. Te za duré 're 'wahi sitete za'ra.
13 Tawamhã Zezusi hã te dasi'wapéi 'manharĩ'wa norĩ wada'uri'wai ma tinha, ãne:
— Mo oto aimorĩ asõrõwa u. Ãma i'asimizazezéb zarina te za tô tihâiba.
Tawamhã awa'awi pesere ma tô tipese, dasi'wapéi 'manharĩ'wa norĩ wada'uri'wai ma, romhuri'wa hã.
Da'ahâ uptabi na, Zezusi hã te te ida'apesezé
14 Zezusi hã Pedruhu nhorõwa u morĩ wamhã, ma tô 'madâ, imaprewa hã waptâ nomro ré, wa'ro wa. 15 Tawamhã Zezusi hã ma tô pa'â. Tahawa iwa'ro hã ma tô ihawi watobro. Ma tô oto udu. Taha pari, Zezusihi ma, ma tô isa hã 'manha sada.
16 Tawamhã ma'rã wi, ma tô itẽme ãwisi za'ra ni, wa'uburé ré 're inomro mono norĩ hã. Tame timreme misi na, ma tô wa'uburé hã tãma anhamra. Ma tô duré apese, uburé ihâzé ré norĩ hã. 17 Tawamhã Zezusi hã ma tô ãne hã 'manha, 'Re ihâimana u'âsi mono zadawa 'mahârâ'wa Izaias te te ãma irob'ui'érézé hã te te ãma uwaimrami da, ãne:
“Ma tô wawi waibu, wahâzé imono bâ, wa'ãma 're ihâimana za'ra mono hã. Ma tô duré wa'anho'reptu, wahâzé norĩ wi hã.”
Ni'wam norĩ hã Zezusihi nhirã zarina si'aba'ré da, te te sima iwẽ za'ra zé
18 Tawamhã Zezusi hã imana wawi da'ahâ uptabi na idahâimana za'ra na te te da'a'madâ'â wamhã, ma tô isiré 're inomro mono norĩ hã satõrĩ za'ra, isõ'u zara u te te saprĩ za'ra da. 19 Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa hã ma tô itẽme wi 'râwi pesere, Zezusihi u. Ãne te tãma tinha:
— Rowahutu'wa, asarina wa za 're mo, nimomo 're i'ane mono zéb u.
20 Tawamhã Zezusi hã ma sada'â, ãne:
— Wapsã wawẽre norĩ hã ab're 're, isõrõwa hã. Duré si norĩ hã izasi ré hã. Tanei õ di, Ti'ai ãma Dasiré Ipodo hã. Tãma hâimana õ di, nimame 're i'rãi wa'utu mono zéb da hã.
21 Tawamhã duré aimawi Zezusihi siré 're imorĩ hã ma tô sina 'mahâ, ãne:
— Apito, a'â apâ ĩmorĩ, imorĩ'rata na ĩmama ãma te a'â ti'a da.
22 Tane nherẽ, ma tô Zezusi hã ãne tãma tinha:
— Ĩzarina we aimorĩ. A'â idâ'â norĩ si te te 're ti'a za'ra mono, tiwi 're idâ'â za'ra mono norĩ ãma hã.
Zezusi hã rowa'u'u za'ẽtẽ ma, te te irob'ruzé, wa'u'utu da
23 Tawamhã Zezusi hã ma tô ãzé, uba're wa. Isiré 're inomro mono norĩ zama, ma tô duré isiré asisi. 24 Sisa'rei mono wamhã oto, waptu na rosa'rese õ ré, ma tô rowa'u'u za'ẽne hã, â poré âzasisi. Tahawa âsisasi hã ma tô uba're hã nasi ubu. Taha ré hã, te Zezusi hã nhono. 25 Tawamhã isiré 're inomro mono norĩ hã ma tô siwi utu. Ãne te hârâ 'rãihâ na siwi 'mahâ:
— Wanhib'apito, ma'ãpé wanho'reptu za'ra na. Wa za ai'utõrĩ ni.
26 Tahawa Zezusi hã ma tô tãma nharĩ za'ra, ãne:
— E marĩ da, ma aipahi za'ra wa'wa. E niha bâ, asiwi ĩ'umnhasi aba zé hã, surure di.
Tawamhã Zezusi hã ma tô wahudu. Rowa'u'u ma, ma tô mreme tete na tinha, duré â sisasisi ma zama. Tahawa ma tô uburé apâ oto tironomro wẽ. 27 Ãne wa, ma tô uburé isiré 're inomro mono norĩ hã ãma titob'uzu za'ra. Ãne ma tô sima nharĩ za'ra:
— Pra. E 'wa hã, ã hã aibâ, rowa'u duré â poré zama te te iwapari pe.
Zezusi hã aibâ norĩ, wa'uburé ré 're ine, te te ipese zahuré zé
28 Tawamhã Zezusi hã ma tô wi, Gadara na danhipti'a nho'õmo nhisi u, Galiléia pa nho'u bâtâ pusizém niwĩ. Tame maparane aibâ norĩ wa'uburé ré 're ine hã ma tô sina uzusi zahuré. Adâ'â 'ru hawi ma tô tineb zahuré. Ta norĩ hã isimi'rui uptabi zahuré. Tahawa ni'wa hã te te 're ro'rahâri waihu'u mono õ di, taha bâdâdi na hã. 29 Tawamhã aibâ norĩ hã ma tô sa'ẽtẽ Zezusi 'mahârâ zahuré, ãne:
— 'Re ihâimana u'âsi mono 'ra, e marĩ wa'ãma hã asima wẽ bâ. E bâdâ wisi wana ré wama rob'manharĩ wasété da, we aimorĩ bâ.
30 Tamemhã romhâ prã na te uhâbâ zari hã tisa te te 're huri, ahâ na. 31 Tawamhã wa'uburé norĩ hã sadahutu ãna ma tô Zezusihi wi rowaptẽrẽ za'ra, ãne:
— Wama rob'ru za'ra da wamhã, ma'ãpé wama rob'ru za'ra na, õwa uhâbâi wa, wanhisisi da.
32 Tawamhã Zezusi hã ma tô tãma rob'ru za'ra, ãne:
— Mo oto ai'aba'réi wa'aba!
Tawamhã wa'uburé norĩ hã ma tô wairé, aibâ norĩ hawi. Uhâbâi wa, ma tô asisi. Tahawa uhâbâ zari hã ma tô sa'ẽtẽ sisa're, rob'rehâ u. Ma tô titobro za'ra, âi ba. Tame ma tô ai'utõ, â 'rowi sisisi wa.
33 Tawamhã aibâ norĩ uhâbâi 'madâ'â'wa norĩ hã ma tô ta hawi sisa're. 'Ri wa'õtõ u, ma tô aihutu. Sihutu wamhã, ma tô dama rowasu'u pese za'ra, uburé iromhâimanazém na hã, duré aibâ norĩ maparane wa'uburé ré 're ine ma, iromhâimana zahuré zém na zama. 34 Tawamhã uburé 'ri nho'õmo 're, 're idasi'ubumroi mono norĩ hã ma tô tawairébé ni, Zezusi hã da te dasiwi sõpẽtẽ da. Da te dasiwi 'madâ'â wamhã, ma tô dazadawa za'réi ãna tãma rob'ru za'ra ni, danhipti'ai hawi morĩ da.