Dawẽ'õ nherẽ, dasi'upana dawasédé da te da'ãma 're isa'ra za'ra mono zé
7
— Dawasédé hã da'ãma 're sa'ra za'ra wa'aba mono tõ, 'Re ihâimana u'âsi mono hã aiwasédé te te ai'ãma 're sa'ra za'ra wa'aba mono tõ da. 2 E marĩ wa. 'Re ihâimana mono te za aiwasédé hã te te ai'ãma 're sa'ra za'ra wa'wa, dawasédé hã da'ãma 're isa'ra za'ra wa'aba mono zéb zarina, duré dahâimanazé dawi 're ipibu za'ra wa'aba mono zéb zarina. 3 E marĩ da, te wede zapru hã asisãnawã tõmo 're ihâimana hã tiwi 're i'madâ'â mo. E 'madâ'â ã bâ, wede wa'õno atõmo 're ihâimana hã. 4 E niha te za tane nherẽ inha, asisãnawãi ma, ãne: “Atõmo 'remhã wede zapru te aima wazere da”, wede wa'õno hã atõmo 'remhã aima hâimana nherẽ. 5 Aihâimana si'amoi pese na 're i'aihâimana mono! Ma'ãpé wazere imorĩ'rata na, wede wa'õno atõmo 'remhã. Taha parip si te za i'madâ'â wẽ, wede zapru hã asisãnawã tõmo hawi iwazere da hã.6 — Marĩ hã wazé pese na 're ihâimana za'ra mono hã, wapsã ma 're sõmri za'ra wa'aba mono tõ. E marĩ wa. Ta norĩ hã te za asada 're hâimana za'ra wa'wa, te te 're aihâzu wa'aba mono da. Duré pérolaa hã 're sãmra aba mono tõ, uhâbâi ma. E marĩ wa. Ta norĩ hã te za taré te te 're wati'i za'ra.
'Re ihâimana u'âsi mono wi, da te 're irowaptẽrẽ u'âsi za'ra mono zé
7 — 'Re ihâimana u'âsi mono wi, marĩ 're waptẽrẽ za'ra wa'aba mono. Tawamhã te za te te aima 're anhomri 'wa. Sô 're airĩtĩ za'ra wa'aba mono. Tawamhã te za 're isõpẽtẽ za'ra wa'aba mo. 'Re 'ridawa ta'a za'ra wa'aba mono. Tawamhã te za te te aima 're a'ridawa wa'wa, 'Re ihâimana u'âsi mono hã. 8 E marĩ wa. Ni'wam norĩ hã marĩ te te 're iwaptẽrẽ za'ra mono hã, te za te te 're waibu. Duré marĩ zô 're irĩtĩ za'ra mono norĩ hã te za te te 're sõpẽtẽ za'ra. Duré 'ridawa hã te za tãma 're si'ridawa za'ra, te te 're i'ridawa ta'a za'ra mono norĩ ma hã. 9 Damama na i'aihâimana za'ra wa'wa hã, ai'ra, i'u'ẽtẽ wapu te te aiwi 'maiwaptẽrẽ aba wamhã, e ẽne hã te za tãma isõmri 'wa. 10 Duré, tebe te te aiwi 'maiwaptẽrẽ aba wamhã, e wahi tãma 'manhomri aba da bâ. 11 A norĩ wa'wa hã 're anomro wasété aba mono nherẽ, marĩ iwẽ ai'ra ma hã, 're sõmri waihu'u pese za'ra wa'aba mono di. Tane Aimama 'wa hâiwa ãma 're isãmra mono hã asipai u wa'aba te za marĩ iwẽ hã te te 're anhomri, te te tiwi 're iwaptẽrẽ za'ra mono norĩ ma hã.
12 — Marĩ hã dama 're 'manharĩ za'ra wa'aba mono, da te aima 're 'manharĩ za'ra wa'aba mono da, asima 're iwẽ za'ra wa'aba mono hã. Ã norĩ na te rowasu'u za'ra, 'Re ihâimana u'âsi mono nhimiroti zahi na Mozési te te ãma irob'ui'érézé hã duré isadawa 'mahârâ'wa norĩ nhimi'ui'éré zama.
Maparane 'ridawa
13 — Ma'ãpé, 'ridawa 're su'ure na si, 're asisisi aba mono. E marĩ wa. Ropipa u hã, 'ridawa hã 're za'ẽtẽ di. Duré ropipa u bâdâdi hã wapu di, ãma 're idanomro mono da hã. Taha 'ridawa 're za'ẽtẽ na hã, te da'ahâ na, 're danhisisi. 14 Tane nherẽ, dahâimanazé isi'utõrĩ'õ u 'ridawa hã 're su'ure di! Duré tamomo bâdâdi hã pire di, ãma 're idanomro mono da hã. Tahawa te da'umro na si, da te 're sõpẽtẽ za'ra.
Senai'õ na 'Re ihâimana u'âsi mono zadawa 'mahârâ'wa norĩ
15 — Ni'ãpé, 're asipibui pese za'ra wa'aba mono, senai'õ na 'Re ihâimana u'âsi mono zadawa 'mahârâ'wa norĩ wi hã. Ta norĩ hã pone'ẽrebâ newa te za atẽme tiwisi 'wa. Tane nherẽ, ipẽ'ẽ 'remhã abaze zahi ne hã. 16 A norĩ wa'wa hã te za 're iwaihu'u za'ra wa'aba mo, ihâimanazém na. 'Wabzéré hã 'rãi waihu'u õ di, uva na i'rã na hã. Tane duré rob'rã figu na i'rã na hã 'rãi waihu'u õ di, 'wabzéré hã. 17 Tane, rowede norĩ iwede wẽ hã, 'rãi wẽ na te za 're 'rã za'ra. Tazahã, rowede norĩ wede wasété wamhã, 'rãi wasété na si te za tô 're 'rã za'ra. 18 Rowede hã wede wẽ wamhã, 'rãi wasété na hã 'rãi waihu'u õ di. Tane duré rowede hã wede wasété wamhã, 'rãi wẽ na hã 'rãi waihu'u õ di. 19 Uburé rowede hã 'rãi wẽ na 're 'rã za'ra mono õ wamhã, te za da te 're sihâri za'ra. Taha parimhã, unhama u te za da te 're sãmra. 20 Tane, 'Re ihâimana u'âsi mono zadawa 'mahârâ'wa norĩ senai'õ hã te za 're iwaihu'u za'ra wa'aba mo, marĩ te te 're i'manharĩ za'ra mono zém na.
E 'wa hã te za ãzé, hâiwa ãma 'Re ihâimana u'âsi mono da'ãma isib'a'uwẽ mono zéb u hã
21 — Ni'wam norĩ hã te te ĩ'mahârâ za'ra nherẽ, ãne: “Ĩnhib'apito, Ĩnhib'apito” uburé sisisi õ di za ta norĩ hã, Hâiwa ãma 're Isãmra mono, da'ãma 're isib'a'uwẽ mono zéb u hã. Ĩmama hâiwa ãma 're isãmra mono, te te sima 're iwẽ mono zéb uwaibaba si, te te 're i'manharĩ za'ra mono norĩ si, te za asisi. 22 Tawamhã da'ahâ na te za taha bâtâ ãmab hã ĩ'mahârâ za'ra ni, ãne: “Ĩnhib'apito, Ĩnhib'apito, e asisi na wa te dama 're asadawa wasu'u za'ra mono ã bâ. E asisi na wa'uburé ma, wa te 're rob'ru za'ra mono ã bâ. E duré asisi na marĩ dama i'manharĩ waihu'u'õ hã ahâ na wa te 're 'manharĩ za'ra mono ã bâ.” 23 Tane nherẽ, wa za wa hã, ta norĩ ma sõ'awi tãma nharĩ za'ra, ãne: “Niwa te aiwaihu'u za'ra wa'aba õ di. Mo oto ĩnhiti ai'aba'réi wa'aba! A norĩ wa'wa hã marĩ iwasété si te 're i'manharĩ za'ra wa'aba mo.”
Maparane 'ri na'rata nhana'rata norĩ wasu'u
24 — Ni'wa hã ã hã ĩnhimiroti te te 're i'awapari mono hã duré ta norĩ zarina 're hâimana mono wamhã, ta hã aibâ rosa'rata waihu'u pese 'wa, tinhorõwa te te i'ri ne, ẽtẽ tob'rã nhisiwi. 25 Tawamhã nimahã na hã tã ta'a wamhã, ma tô ti'â pré. Rowa'u hã sa'ẽtẽ ma tô rowapõ, 'ri nho'õmoi baba. Tane nherẽ, 'ri hã simei õ di. E marĩ wa. 'Ri na'rata nhana'rada hã ẽtẽ tob'rã nhisiwi wa.
26 — Ni'wa hã ã hã ĩnhimiroti tipo're na te te 're awapari mono nherẽ, ta norĩ zarina 're hâimana mono õ wamhã, ta hã aibâ isimirosa'rata waihu'u'õ, tinhorõwa te te i'ri ne supara nhisiwi. 27 Tawamhã nimahã na hã tã ta'a wamhã, ma tô ti'â pré. Rowa'u hã ma tô sa'ẽtẽ rowapõ, 'ri nho'õmoi baba. Tawamhã 'ri hã ma tô waptãrã. Ma tô aipru pese.