2 — Tahawa, marĩ isibrob'õ norĩ ma, 're sõmri za'ra wa'aba mono wamhã, dama 're wasu'u za'ra wa'aba mono tõ, i'manharĩ aba zé hã, hâimana si'amoi pese na 're ihâimana za'ra mono norĩ, rowahutuzéb ãma duré 'ri nhi'riti na te te 're i'manharĩ za'ra mono ne hã. Ãne te ta norĩ hã te te 're 'manharĩ za'ra, da te 're uzei wẽ za'ra mono da. Tô sena wa za ãne hã aima waihu'u za'ra wa'wa: Ta norĩ hã ma tô waibui pa, ti'ai ãma tipawa'â hã. 3 Tane nherẽ, a norĩ wa'wa hã ni'wai wi marĩ zô tiwi irowaptâ, pawapto wa'aba wamhã, wasu'u aba tõ, asiwaihu'u uptabi ma hã, te te waihu'u tõ da, i'manharĩ aba zé hã. 4 Marĩ dama 're i'manharĩ wẽ za'ra wa'aba mono zé hã, pi'uriwi 're ihâimana mono da hã i'ru zahi. Tawamhã Aimama 'wa hã, marĩ i'manharĩ aba zé pi'uriwi te te i'madâ hã te za aima wa'âbâ 'wa.

5 — 'Re rowaptẽrẽ za'ra wa'aba mono wamhã, hâimana si'amoi pese na 're ihâimana za'ra mono norĩ ne hã, 're 'manharĩ za'ra wa'aba mono tõ. Ta norĩ ma hã, tãma iwẽ, sap sina te te 're irowaptẽrẽ za'ra mono da hã, rowahutuzéb ãma hã duré 'ri nhi'riti na bâdâdi nhi'oto ãma zama, da te 're 'madâ'â za'ra mono da. Tô sena wa za ãne hã aima waihu'u za'ra wa'wa: Ta norĩ hã ma tô tipawa'â waibui pa, ti'ai ãma hã. 6 Tane nherẽ, a norĩ wa'wa hã, 're rowaptẽrẽ za'ra wa'aba mono da wamhã, asib'ri're wa'wa u 're asisi aba mono. 'Ridawa hã asiré 're sitob za'ra wa'aba mono. Taha parimhã 're rowaptẽrẽ za'ra wa'aba mono Aimama wi, 'madâ'â waihu'u ãna 're ihâimana mono wi. Tawamhã ta hã, uburé marĩ pi'uriwi 're i'manharĩ za'ra wa'aba mono zé, te te 're i'ab'madâ'â mono hã, te za te te aima 're awa'âbâ 'wa.

7 — 'Re rowaptẽrẽ za'ra wa'aba mono wamhã, aimreme na ãma 're sahu za'ra wa'aba mono tõ, nharĩ pari aba nherẽ, 'Re ihâimana u'âsi mono nhimiroti te te 're i'madâ'â za'ra mono õ norĩ te te 're i'manharĩ za'ra mono norĩ ne hã. Ta norĩ hã te te 're rosa'rata za'ra, 'Re ihâimana u'âsi mono za te te 're iwapari za'ra mono na hã, rowaptẽrẽ hã, pa na te te 're i'manharĩ za'ra mono zarina. 8 Isine hã 're aihâimana za'ra wa'aba mono tõ. E marĩ wa. Aimama 'wa hã te te waihu'u pese di, marĩ hã asima 're iwẽ za'ra wa'aba mono zé hã, tiwi 're waptẽrẽ za'ra wa'aba mono wana ré. 9 Tahawa, ãne te za 're aimreme zusi aba mo, 'Re ihâimana u'âsi mono ma:

14 — A norĩ wa'wa hã, da te aima 're i'manharĩ wasété za'ra wa'aba mono zé hã, asi'ãma 're 'madâ'â za'ra wa'aba mono õ wamhã, Aimama 'wa hâiwa ãma 're isãmra mono hã te te duré aiwasédé hã ai'ãma 're ab'madâ'â aba mono õ di za. 15 Tazahã, marĩ da te aima 're i'manharĩ wasété za'ra wa'aba mono zé hã, da'ãma 're 'madâ'â u'âsi za'ra wa'aba mono wamhã, Aimama 'wa hã te za duré te te ai'ãma 're ab'madâ'â u'âsi 'wa, marĩ iwasédé 're i'manharĩ za'ra wa'aba mono zé hã.

16 — 'Re ihâimana u'âsi mono ma, 're aimreme zusi aba mono da, asai ãna a'â 're aihâimana za'ra wa'aba mono wamhã, ai'ubu zei ãna dama 're asihâi'ré za'ra wa'aba mono tõ, hâimana si'amoi pese na 're ihâimana za'ra mono norĩ te te 're i'manharĩ za'ra mono ne hã. Ta norĩ hã te ãne te te 're 'manharĩ za'ra, da te 're waihu'u za'ra mono da, sai ãna a'â te te 're irowaptẽrẽ za'ra mono na hã. Tô sena wa za aima waihu'u za'ra wa'wa, ãne: Ta norĩ hã ma tô waibui pa, ti'ai ãma tipawa'â hã. 17 Tazahã, 'Re ihâimana u'âsi mono wi rowaptẽrẽ da, asai ãna a'â aihâimana wamhã, asiwarĩrĩ wẽ na duré asi'ubu upsõ na, 18 da te aiwaihu'u za'ra tõ da, asai ãna a'â i'aihâimana na hã 'Re ihâimana u'âsi mono wi, rowaptẽrẽ da. Ãne wamhã, Aimama hã, pi'uriwi te te i'ai'madâ hã te za aima wa'â.

19 — Ti'ai ãma asibro wa'âbâ za'ẽtẽ na 're ihâimana za'ra mono hã asima 're ubumroi pese za'ra wa'aba mono tõ, piro'o wawẽ za marĩ te te dawi iwamnarĩzéb ãma hã, duré u're wa, za marĩ isiwamnarĩzéb ãma hã, duré isimisaihuri norĩ hã danhibrob zô, te te 're simi'uri za'ra mono da, 're isisisi mono zéb ãma hã. 20 Tazahã, marĩ iwẽ uptabi hã asima 're ubumroi pese za'ra wa'aba mono, hâiwa ãma hã. Tame piro'o wawẽ za te te iwamnarĩ waihu'u'õ ãma hã, duré za i'u're waihu'u õ ãma hã, duré isimisaihuri za sô isébré waihu'u õ ãma hã, te te isimi'uri da hã. 21 E marĩ wa. Nimame asibro aima 're ihâimana za'ra wa'aba mono ãma, te za aipẽ'ẽ na 're aihâimana za'ra wa'aba mo.

22 — Dato hã rob'uiwẽzé, dahâiba ma hã. Atõmo za'ra wa'wa hã wẽ wamhã, aihâiba za'ra wa'aba na, te za uburé rowa'a hã ãma tihâiba. 23 Tanei õ di, atõmo za'ra wa'wa hã wasété wamhã, aihâiba za'ra wa'aba na te za uburé robra hã ãma tihâiba. Tahawa rowa'a hã aihâiba 're, hâimana da nherẽ, robra si hâimana wamhã, ta hã pipa uptabi di za, robra hã.

24 — Dama romhuri'wa hã te te romhuri waihu'u õ di aiwamhã, isib'apito maparane tãma hâimana zahuré wamhã. E marĩ wa. Ihâiba amo hã te za te te 're 'ruiwapari. Ihâiba amo si te za te te sima 're sawi pese. Niwamhã, ihâiba amo hã te za te te 're wapari pese. Ihâiba amo si te za te te siwi 're wẽ'õ pese. Tane a norĩ wa'wa hã 'Re ihâimana u'âsi mono ma, duré rob'uiprazé ma, 're romhuri waihu'u za'ra wa'aba mono õ di, aiwamhã.

25 — Tahawa, wa za ãne aima waihu'u za'ra wa'wa: 'Re aihâtâ'â za'ra wa'aba mono tõ, 're i'aihâimana za'ra wa'aba mono zém na hã, marĩ 're ihuri aba mono zém na hã, duré za 're i'âhuri aba mono zém na hã. Duré aihâiba na 're aihâtâ'â za'ra wa'aba mono tõ, za 're i'asi'uza za'ra wa'aba mono zém na hã. E dahâimanazé hã, dasa nhipai u ipire ã bâ. Duré e dahâiba hã pire na da'uza nhipai u 're hâimana mono ã bâ bété. 26 'Madâ'â za'ra wa'aba, si norĩ hã hâiwa na 're isisa'rei mono hã. Ta norĩ hã te te 're robzuri mono õ di. Duré amnho hã te te 're tehâri za'ra mono õ di. Tisa hã dasai ubumrozéb 'remhã te te duré 're ubumro za'ra mono õ di. Tane nherẽ, Aimama 'wa hâiwa ãma 're isãmra mono hã te isa hã te te tãma 're anhomri. E a norĩ wa'wa hã si norĩ nhipai u aiwa'âbâ za'ẽtẽ za'ra wa'aba ã bâ bété. 27 Ai'reb za'ra wa'aba hã, e 'wa hã 're hâimana hâ mono da, bâdâ hã te te sima apraba waihu'u pese bâ, tihâimanazém na 're ihâtâ'â mono zéb zarina.

28 — E marĩ wa, te bété 're aihâtâ'â za'ra wa'aba mo, 're i'asi'uza za'ra wa'aba mono zém na hã. Ma'ãpé, 'madâ'â za'ra wa'aba, romnhirãrã rom na niha, 're iprédub za'ra mono zé hã. Ta norĩ hã te te 're romhuri za'ra mono õ di. Ti'uza hã te te duré sima 're 'manharĩ za'ra mono õ di. 29 Tane nherẽ, wa za tô sena ãne aima waihu'u za'ra wa'wa. Apito Saloma hã sibro pese uptabi nherẽ, ã hã romnhirãrã ne hã 're si'uza mono õ di, i'madâ'â zei uptabi na hã. 30 Ãne te 'Re ihâimana u'âsi mono hã du, rom na 're isimasa mono hã te te 're ab'manharĩ, 'madâ'â ze na, bâtâ na 're sirãrã wairébé mono nherẽ, awẽm na, za da te ãma isazu hã ro'o da. 'Re ihâimana u'âsi mono asina 're i'umnhasi suru za'ra wa'aba mono norĩ, e tawamhã te te bété 're ai'uza za'ra wa'aba mono õ di za. 31 Tahawa, marĩ na asina 're aihâtâ'â za'ra wa'aba mono tõ, ãne hã 're asisadanharĩ za'ra wa'aba mono sina: “E marĩ wa za 'rẽne za'ra ni. E marĩ wa za âhuri ni.” Duré niwamhã, “E ma hawim na wa za wasi'uza za'ra ni.” 32 'Re ihâimana u'âsi mono waihu'u'õ'wa norĩ si, te sô 're sõpré, ã norĩ hã uburé marĩ tãma 're hâimana za'ra mono da hã. Aimama 'wa hâiwa ãma 're isãmra mono hã te te waihu'u pese di, uburé marĩ zô aiwi 're irowaptâ'â za'ra wa'aba mono na hã. 33 Tahawa, 'Re ihâimana u'âsi mono da'ãma 're Isib'a'uwẽ mono zép si, asima 're sõré wa'aba mono, uburé marĩ nhipai u, duré uburé marĩ 'Re ihâimana u'âsi mono te te sima 're i'awẽ mono zé hã. Tawapsi uburé marĩ aihâimanazéb da hã te za te te aima 're anhomri 'wa. 34 Tahawa, 're aihâtâ'â za'ra wa'aba mono tõ, za i'awẽzém na hã. Ta hã te za tô ropire hã sina ãwisi. Waihu'u za'ra wa'aba, awẽ sidâpâsi te tô ropire hã 're hâimana za'ra, bâtâ mono te hã.