11 — A norĩ wa'wa hã ĩzazei'wa 're anomro aba mono wa, da te ai'ãma 're wasété za'ra wa'aba mono wamhã, duré da te aima 're rob'manharĩ wasété za'ra wa'aba mono wamhã, duré siwa'ru marĩ na senai õ nherẽ, da te 're aiwasu'u wasété za'ra wa'aba mono wamhã, aima 're rowẽ uptabi za'ra wa'aba mono di. 12 Tahawa, ma'ãpé asima rowẽ za'ra wa'aba. Aipawa'â hã sa'ẽtẽ uptabi na te asô tihâimana za'ra wa'wa, hâiwa ãma hã. Tô ãne aiwana za'ra wa'aba, 'Re ihâimana u'âsi mono zadawa 'mahârâ'wa norĩ 're ihâimana za'ra mono norĩ ma hã, ma tô da te tãma 're rob'manharĩ wasété za'ra.

13 — A norĩ wa'wa hã sa, dasai warĩrĩzé, ti'ai ãma dama hã. Tane nherẽ, sa hã wẽ nherẽ, wasété wamhã, e niha i'manharĩzé hã, wẽ na apâ hâimana da hã. Siwamnarĩ wamhã, marĩ dai õ di oto. Da te ime da si. Tawamhã te za oto da te 're wati'i za'ra, dasima iwẽ na, da te 're ro'rahâri za'ra mono sidâpâsi.

14 — A norĩ wa'wa hã rob'uiwẽzé, ti'ai ãma 're idahâimana za'ra mono norĩ ma hã. 'Ri nho'u hã ẽtẽ 'rãihâ nhisiwi da te 'ri nharĩ wamhã, sima'uri na hã hâimana waihu'u õ di. 15 Tane duré, rob'uiwẽzé hã ni'wa te te ro'o wamhã, piza'a 'rowimhã te te sãrĩ waihu'u õ di. Romnhiwasi te za tisã. Tawapsi te za rob'uiwẽ, uburé 'ri 're, isi'ubumro norĩ ma hã. 16 Tane te za duré ate za'ra wa'wa rowa'a na, sõ'awi dama 're irob'uiwẽ za'ra wa'aba mo, romhuri iwẽ 're i'manharĩ za'ra wa'aba mono hã da te 're 'madâ'â za'ra mono da, taha zarina Aimama 'wa, hâiwa ãma 're isãmra mono ãma 're dawata za'ra mono da.

17 — Ĩ'ãma rosa'rata za'ra wa'aba tõ, we ĩmorĩ na hã, 'Re ihâimana u'âsi mono nhimiroti zahi na Mozési te te ãma irob'ui'érézé te uprosi da hã, duré isadawa 'mahârâ'wa norĩ nhimiroti zama. Ta norĩ hã te a'uprosi da, we ĩmorĩ õ di. Te ĩsina uwaimrami da si, wa tô wei mo. 18 Tô sena, wa za ãne hã aima waihu'u za'ra wa'wa: Hâiwa, ti'ai me 're sa'wari zahuré mono ré hã, 'Re ihâimana u'âsi mono nhimiroti zahi na rob'ui'éré hã, ni'wa te te i'maiwazere da hã mare di, i'ui'érézé i'ui'éré surure hã duré i'rãihâ to norĩ hã. Õne u'â te za 're hâimana za'ra, uburé marĩ hã 're iwairébé mono zé te te sina i'uwaimrami za'ra zéb u. 19 Tahawa, ni'wam norĩ hã 'Re ihâimana u'âsi mono nhimiroti zahi, nima hã wapu nherẽ, te te 're 'madâ'â za'ra mono õ wamhã, duré isine da te 're 'manharĩ za'ra mono da, ãma dama 're sisanho za'ra mono wamhã, ta norĩ hã dama wapu na te za 're hâimana za'ra, Hâiwa ãma 're Isãmra mono, da'ãma 're isib'a'uwẽ mono zéb ãma hã. Tanei õ di, ni'wam norĩ hã ãma 're ihâimana za'ra mono norĩ hã duré te te ãma dama 're irowahutu pese za'ra mono norĩ hã, pire na te za 're hâimana za'ra, Hâiwa ãma 're Isãmra mono, da'ãma 're isib'a'uwẽ mono zéb ãma hã. 20 Tô sena wa za ãne hã aima waihu'u siromo za'ra wa'wa: 'Re ihâimana u'âsi mono te te sima 're iwẽ mono zé, marĩ i'uwaibaba na 're i'manharĩ za'ra wa'aba mono zé hã, farizeu norĩ hâimanazém nhipai u õ wamhã, duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hâimanazém nhipai u õ wamhã, niwa i'asisi aba da hã, mare uptabi di za, Hâiwa ãma 're Isãmra mono, da'ãma 're isib'a'uwẽ mono zéb u hã.

21 — Ma tô iwapari za'ra wa'wa, aihi'rata norĩ ma, 'Re ihâimana u'âsi mono nhimiroti, ãne hã: “Da'maiwĩrĩ tõ. Ni'wa hã te te da'maiwĩrĩ wamhã, te za saprõni ni, da'ãma rowairébézéb u.” 22 Tane nherẽ, wa hã wa za ãne aima waihu'u za'ra wa'wa. Ni'wa hã tisisãnawã da sahi wamhã, te za saprõni ni, da'ãma rowairébézéb u. Duré ni'wa hã tisisãnawãi ma, te te nharĩ wamhã, ãne: “A hã, marĩ dai õ di”, ãma rowairébé hã te za tihâiba, da'ãma rowairébézéb ãma hã. Duré ni'wa hã tisisãnawã te te 'mahârâ wamhã, ãne: “A hã i'asimiza'rese'õ”, ãne wamhã, tãma hã romnhimimnhasi di, unhama ro'o u'âsi u imorĩ da hã, ropipa u. 23 Tahawa, asõprubzé hã danhoprubzéb zatazém nhisiwi 'Re ihâimana u'âsi mono ma hiri ré, marĩ hã asisãnawãi ma 'manharĩ wasété wa, asada ihâimana wasété na aipo're pu'u wamhã, 24 hiri a'â asõprubzé hã, 're idanhoprub za'ra mono zé wedezane nho're, imorĩ'rata na aimorĩ da a'â, asisãnawãi me asima hiri wẽ wa'aba da, rowẽ na 're aihâimana aba mono da apâ. Taha parip si apâ asina siri, asõprubzé hã sõmri da, 'Re ihâimana u'âsi mono ma.

25 — Ni'wa hã te te aiwasu'u wasété wa, da'ãma rowairébézéb u te te asaprõni wamhã, tãma robzanhamri, asima hiri wẽ wa'aba da, bâdâ hã hâimana ré, aimasisi aba wana ré da'ãma rowairébézéb u hã. E marĩ wa. Da'ãma rowairébézéb u aimasisi aba parimhã, da'ãma rowairébé'wa nhib'rata te za oto aihâiba. Taha pari da'ãma rowairébé'wa hã te za aihâiba nho, dazazéb 're dazai'wai ma. Tawamhã ta hã te za asẽ, dazazéb 're. 26 Tô sena wa za ãne hã aima waihu'u za'ra wa'wa: Ta hawimhã aiwatobro õ di za, da'ãma rowairébé'wai ma, uburé asiwa'âbâ uprosi õ ré hã.

27 — Ma tô duré iwapari za'ra wa'wa, 'Re ihâimana u'âsi mono nhimiroti, ãne hã: “Damro na hã dawi asimisaihuri tõ.” 28 Tane nherẽ, wa hã wa za ãne aima waihu'u za'ra wa'wa: Ni'wa hã pi'õ te te 'madâ'â wamhã, duré ãma hâimana da, te te sima 'madâ'â zei wamhã, ãne wamhã, tipẽ'ẽ 'remhã ma tô 'manha, pi'õ na tinhimisaihuri hã. 29 Tahawa, atõmo nhimire niwĩmhã te te 're aiwasété mono wamhã, wazere. Me na asisiti. Iwẽ hã aihâiba na marĩ hã isimini da hã, aihâiba wahuré ré ropipa u i'aimorĩ nhipai u. 30 Duré asib'rata nhimire hã te te 're aiwasété mono wamhã, sizâri. Me na asisiti. Iwẽ hã aihâiba na marĩ hã isimini da hã, aihâiba wahuré ré ropipa u i'aimorĩ nhipai u.

31 — Ãne duré roti hã: “Ni'wa hã timro te te rẽme wamhã, rob'ui'éré te te tãma sõmri, te te irẽmezém na hã.” 32 Tane nherẽ, wa hã wa za ãne aima waihu'u za'ra wa'wa: Aibâ norĩ hã, imro aibâ aimawi na 're simisaihuri za'ra mono õ nherẽ, timro te te 're rẽme za'ra mono wamhã, aibâ hã te za tiwasédé 'manha, pi'õ za oto aibâ aimawi na simisaihuri wa, mro zahu wamhã, aibâ aimawi na. Duré aibâ, za ãma imro hã tinhimisaihuri te za 'manha.

33 — Ãne hã ma tô duré iwapari za'ra wa'wa, 'Re ihâimana u'âsi mono nhimiroti zahi na Mozési te te ãma irob'ui'érézé hã: “Taré hã dama 're ropisutu za'ra wa'aba mono tõ. Ãma 're uwaimrami za'ra wa'aba mono, 're iropisutu zahi za'ra wa'aba mono zém na Uburé Danhib'apito ma, za marĩ 're i'manharĩ za'ra wa'aba mono zém na hã.” 34 Tane nherẽ, wa hã wa za ãne aima waihu'u za'ra wa'wa: Dama 're ropisutu zahi za'ra wa'aba mono tõ. Tô'ã! Hâiwa nhisi na hã 're ropisutu zahi za'ra wa'aba mono tõ. E marĩ wa. Ta hã 'Re ihâimana u'âsi mono 're isãmra mono zé. 35 Duré ti'a nhisi na hã dama 're ropisutu zahi za'ra wa'aba mono tõ. E marĩ wa. Ta hã tipara nhimizusizé wa. Duré Zeruzalẽ nhisi na hã dama 're ropisutu zahi za'ra wa'aba mono tõ. E marĩ wa. Ta hã 'ri nho'u, Apito Uptabi te. 36 Duré, ai'rã na aimreme na dama 're ropisutu za'ra wa'aba mono tõ. E marĩ wa. A norĩ wa'wa hã 'manharĩ za'ra wa'aba dai õ di, aséré 'wa hã rã na, niwamhã 'rãdâ'â u'âsi misi si, hâimana za'ra da hã. 37 Marĩ hã dama 're 'manharĩ za'ra wa'aba mono da wamhã, ãne si te za dama 're inha za'ra wa'aba mo: “Ĩhe.” Duré asima 're wẽ za'ra wa'aba mono õ wamhã: “Mare di.” Ã hã ãma 're sipa za'ra wa'aba mono wamhã, ta hã oto Iwasété Uptabi^a nhimiromhuri.

38 — Ma tô duré iwapari za'ra wa'wa, 'Re ihâimana u'âsi mono nhimiroti, ãne hã: “Ni'wa hã te te atõmo wamnarĩ wamhã, asa ito hã tiwi wamnarĩ. Duré, tane ni'wa hã te te ai'wa pru wamhã, asa i'wa hã tiwi pru na.” 39 Tane nherẽ, wa za wa hã ãne aima waihu'u za'ra wa'wa: 'Re asi'rui wa'âbâ za'ra wa'aba mono tõ, ni'wam norĩ hã marĩ te te aima 're i'manharĩ wasété za'ra wa'aba mono norĩ ma hã. Ni'wa hã ai'ubu wi te te ai'azâri wamhã, tãma aipi'ra na, ihâiba amo niwĩ te te duré ai'azâri da. 40 Ni'wa hã da'uza ihâpa iwa'âbâ za'ẽne te te aiwi âri da, da'ãma rowairébézéb u te te asaprõni wamhã, tãma 'ru na, te te duré âri da, ate dasi'ubuzéb zama. 41 Ni'wa hã isisa da, misi ti'ai pibuzém^b na marĩ hã tãma duri da, te te aima 'ru zahi wamhã, tãma duri, maparane ti'ai pibuzém na. 42 Ni'wa hã marĩ te te aiwi waptẽrẽ wamhã, tãma sõmri. Duré ni'wa hã marĩ te te aiwi waptẽrẽ wamhã, iwa'rãmimhã apâ te te aima sõmri da, tô tãma sõmri.

43 — Ãne hã ma tô duré iwapari za'ra wa'wa: “Asiré hã 're sawi pese za'ra wa'aba mono. Ai'ruiwapari'wa norĩ si 're 'ruiwapari za'ra wa'aba mono.” 44 Tane nherẽ, wa hã wa za ãne aima waihu'u za'ra wa'wa: Ai'ruiwapari'wa norĩ hã 're sawi pese za'ra wa'aba mo. Duré te te aima 're irob'manharĩ wasété za'ra wa'aba mono norĩ ãma, 're rowaptẽrẽ za'ra wa'aba mono, 'Re ihâimana u'âsi mono ma, 45 Aimama aba 'ra na 're aihâimana za'ra wa'aba mono da, hâiwa ãma 're isãmra mono 'ra na. E marĩ wa. Ta hã bâdâ hã te te 're rob'uiwẽ mono da, te te 're 'manharĩ mono wa, iwẽ norĩ ma, duré iwasété norĩ ma zama. Ta hã te duré tãi ma te te 're rob'ru, te te 're robdi'i mono da, marĩ iwẽ te te 're i'manharĩ za'ra mono norĩ ma hã, duré marĩ iwasédé te te 're i'manharĩ za'ra mono norĩ ma zama. 46 Te te 're i'asawi pese za'ra wa'aba mono norĩ si, 're sawi pese za'ra wa'aba mono wamhã, e marĩ iwa'â 're waibui wa'aba mono da bâ. Ãne hã rob'uiprazé arĩ ubumroi'wa norĩ zama te tô te te 're 'manharĩ za'ra. 47 Asiwaihu'u norĩ si 're 'mahârâ wẽ za'ra wa'aba mono wamhã, e marĩ iwẽ te duré isiré hã i'manharĩ za'ra wa'wa. 'Re ihâimana u'âsi mono nhimiroti te te 're i'madâ'â pese za'ra mono õ norĩ zama te duré ãne hã te te 're 'manharĩ za'ra. 48 Tahawa, marĩ na upai ãna 're aihâimana za'ra wa'aba mono, Aimama 'wa marĩ na te te upai ãna 're ihâimana mono ne, hâiwa ãma 're isãmra mono hã.