Wa'uburé hã, Zezusi te te ipibuzé
4
Tawamhã 'Re ihâimana u'âsi mono Pẽ'ẽzani hã ma tô Zezusi hã saprõ, rop si 're irosa'wari mono u, Wa'uburé hã te te pibu da. 2 Tawamhã Zezusi hã 40 bâtâ na duré 40 mara na sai ãna hâimana parimhã, mra ma tô azâ. 3 Tahawa Wa'uburé hã ma tô itẽme sina rotété. Ãne te tãma tinha:— Tô sena, a hã 'Re ihâimana u'âsi mono 'ra wamhã, ma'ãpé ã hã ẽtẽ ma nharĩ, i'u'ẽtẽ wapu na aima si'manharĩ za'ra da.
4 Tawamhã Zezusi hã ma sada'â, ãne:
— Ibaihâ Iwazé pese na rob'ui'éré hã, ãne:
“I'u'ẽtẽ wapu na si, 're dahâimana za'ra mono õ di za, ti'ai ãma hã. Uburé 'Re ihâimana u'âsi mono mreme isadawa hawi 're iwairébé mono na si, te za 're dahâimana za'ra.”
5 Taha parimhã, Wa'uburé hã ma tô Zezusi hã saprõ, Zeruzalẽ 'ri nho'u iwazé pese u. Tame hâimo ma tô tisã, 'Re ihâimana u'âsi mono nhorõwa 'ri 'rãihâ, 'ri nhisi uptabi u. 6 Tame te ãne duré tãma tinha, Wa'uburé hã:
— Tô sena, A hã 'Re ihâimana u'âsi mono 'ra wamhã, ma'ãpé ã hawi asime na, ti'ai u. E marĩ wa. Ibaihâ Iwazé pese na rob'ui'éré hã ãne nomro wa:
“'Re ihâimana u'âsi mono te za we satõrĩ za'ra tite hâiwa hawi romhuri'wa norĩ hã, te te siwi ai'madâ'â da.
Tawamhã tinhib'rata na te za siwi asapa, aipara wi ẽne hã te te ai'u'a tõ da.”
7 Tawamhã Zezusi hã ma duré sada'â, ãne:
— Tane nherẽ, ãne duré Ibaihâ Iwazé pese na rob'ui'éré hã te nomro: “Uburé Danhib'apito hã 're pibu za'ra wa'aba mono tõ, ate za'ra wa'wa 'Re ihâimana u'âsi mono hã.”
8 Taha pari, Wa'uburé hã te duré saprõ Zezusi, ẽtẽ 'rãihâ uptabi u. Ta hawi ma tô tãma hâi'ré, uburé danhib'apito norĩ tinhipti'ai mono bâ te te 're irob'madâ'â za'ra mono zé hã duré ta norĩ te, ro iwẽ uptabi hã. 9 Tawamhã Wa'uburé hã te ãne duré tãma tinha:
— Ã hã uburé wa za aima tisõ, aihi'rãtitõ ĩma aimei wamhã, ĩ'ãma aiwata da.
10 Tahawa ma tô Zezusi hã tãma rob'ru, ãne:
— Satanasi, mo oto aimorĩ ĩnhiti! Ibaihâ Iwazé pese na rob'ui'éré hã ãne te nomro:
“Uburé Danhib'apito ãma si 're aiwata za'ra wa'aba mono, ate za'ra wa'wa 'Re ihâimana u'âsi mono ãma si. Duré õhõ ma si 're romhuri za'ra wa'aba mono.”
11 Tawamhã Wa'uburé hã ma tô oto ihawi mo. Morĩ wamhã, Zezusihi u hâiwa hawi romhuri'wa norĩ hã ma tô we itẽme aihutu, te te siwi 'madâ'â da.
Galiléia ãma Zezusi hã, romhuri na te te isãna'ratazé
12 Zuwã hã dazazéb 're, da te isẽrẽ na Zezusi te te wasu'u wapari wamhã, apâ ma tô mo, Galiléia u. 13 Tane nherẽ, Nazaré ãma 're sãmra mono õ di oto. Ma tô mo, Cafarnau na 'ri nho'õmo nhisi ãma 're sãmra mono da, Galiléia ãma isõ'u zapoto 'rata, Zébulõ ti'a niwĩmhã, duré Nafitali ti'a niwĩ. 14 Ãne hã ma tô tiromhâiba, te te sina uwaimrami da, 'Re ihâimana u'âsi mono zadawa 'mahârâ'wa Izaias te te ãma irob'ui'érézé hã:
15 “Zébulõhõ nhipti'ai ãma duré Nafitalihi nhipti'ai ãma, isõ'ui u bâdâdi na, Zodã na, pa nhisi zara niwĩ, Galiléia ãma zudeu'õ norĩ 're ihâimana za'ra mono norĩ hã 16 ma tô robra na 're hâimana za'ra. Tane nherẽ, ta norĩ hã ma tô oto 'madâ'â za'ra, rowa'a isa'ẽne hã.
Duré rowa'a hã ma tô oto te te tãma 're rowa'a za'ra, ni'wam norĩ hã ipẽ'ẽ 're, dâ'â na, robra na 're ihâimana za'ra mono norĩ ma hã.”
17 Tawamhã ta hawim haré, Zezusi hã ma tô oto romhuri na sãna'rata, Timama zadawa wasu'u na hã, ãne:
— Ma'ãpé aiwasété na asisãmri za'ra wa'aba, 'Re ihâimana u'âsi mono ma, asiwẽ'õ za'ra wa'aba da. E marĩ wa. Hâiwa ãma 're Isãmra mono, da'ãma 're isib'a'uwẽ mono zé hã romhuture wa oto.
Zezusi hã, maparane si'uiwa na tepe mrami'wa norĩ zô ihârâzé
18 Tawamhã Zezusi hã Galiléia isõ'u zaihâ na morĩ ré, ma tô 'madâ'â zahuré, sisãnawã zahuré hã: Simau, Pedru na isisi amo hã, duré ino Ãdré na isisi hã. Ta norĩ hã tepe mrami'wa zahuré, isõ'ui wa, te nasi abazipara hã wabzuri zahuré. 19 Tawamhã Zezusi hã te ãne 'mahârâ zahuré:
— Ĩzarina we ane wa'aba. Ĩma 're da'awaibui wa'aba mono da oto, wa za ãma aima asanho wa'wa.
20 Tahawa ma õne haré marẽme zahuré, abazipara ma. Zezusihi zarina te oto tineb zahuré.
21 Tawamhã Zezusi hã suru na timorĩ na pahâ wi, ma tô duré 'madâ'â zahuré sisãnawã zahuré, Zebedeu 'ra norĩ hã: Tiagu norĩ Zuwãhã me. Ta norĩ hã te uba're wa aimasisi zahuré, timama siré. Abazipara sisinarĩ hã te apâ a'rã'õtõ zahuré. Ta norĩ zô, ma tô duré Zezusi hã hâ. 22 Tawamhã awa'awi, ma tô timama hã rẽme zahuré, duré uba're zama. Ma tô oto tineb zahuré, Zezusihi siré.
Zezusi hã te te dama irowahutuzé, duré da'ahâ uptabi na te te ida'apesezé
23 Tawamhã Zezusi hã daro mono bâ ma tô oto 're mo, Galiléia 'remhã. Zudeu norĩ te, rowahutuzé mono na, ma tô te te dama 're rowahutu, rowasu'uwẽ 'Re ihâimana u'âsi mono da'ãma 're isib'a'uwẽ mono zé wasu'u na hã. Duré ihâzé ré norĩ hã ma tô te te 're apese, duré hâzé pire na 're ihâimana za'ra mono norĩ zama. 24 Tawamhã Zezusihi wasu'u hã daro mono bâ ma tô ropé, Siria na danhipti'a nho'õmo nhisi 'remhã. Tahawa, dahâzé mono bâ, dahâzé da te 're isépata za'ra mono norĩ hã ma tô itẽme da te 're 'wasari, wa'uburé ré hã, i'rã siwamnarĩ hã, 're ihâiba popo'o za'ra mono norĩ hã, duré imorĩ'õ norĩ zama. Tahawa ma tô uburé te te 're da'apese. 25 Tawamhã da'ahâ uptabi na ma tô isarina 're dasi'ré, Galiléia hawimhã, Decapoli, Zeruzalẽ, Zudéa na danhipti'a nho'õmo nhisi hawimhã, duré danhipti'a Zodã pa zara niwĩ 're idasi'ubumroi mono norĩ zama.