— Ma'ãpé aiwasété na asisãmri za'ra wa'aba, 'Re ihâimana u'âsi mono ma, asiwẽ'õ za'ra wa'aba da. E marĩ wa. Hâiwa ãma 're Isãmra mono, da'ãma 're isib'a'uwẽ mono zé hã romhuture wa oto.

3 Zuwã Batistaha ãma, 'Re ihâimana u'âsi mono zadawa 'mahârâ'wa Izaias hã ma tô rob'ui'éré, ãne:

4 Zuwãhã uza hã, awaru ba'õmore zéré 'manharĩ na. Duré abazei hâ 'manharĩ waré na i'usisizé hã. Te duré 're sa 'riti na, ropĩni na zama. 5 Tawamhã da'ahâ uptabi na ma tô itẽme 're danomro, isimirowasu'u, da te 're wapari za'ra mono da hã, Zeruzalẽ hawimhã, Zudéa na danhipti'a nho'õmo nhisi hawimhã, duré Zodã pa 'rata uburé daro, 're isisõré mono hawib zama. 6 Tawamhã dawasété na ma tô 're dasiwẽ'õ za'ra. Tahawa, Zuwã hã ma tô â dawabzuri hã te te dama 're ab'manharĩ, Zodã na, pa nhisi ãma.

7 Tawamhã nimahã na hã Zuwã hã, farizeu norĩ duré saduceu norĩ ma, â dawabzuri hã te te tãma 'manharĩ za'ra da, ahâ na itẽme isi'aba'ré na te te ab'madâ'â wamhã, ma tô ãne tãma nharĩ za'ra:

— Wahi isé uptabi norĩ! E 'wa hã te te aima rowasu'u za'ra wa'aba bâ, za i'asisõ'reptu za'ra wa'aba na hã, 'Re ihâimana u'âsi mono nhimihâzé za iwisi wi hã. 8 Ma'ãpé, marĩ hã 'manharĩ za'ra wa'aba, asihâi'ré za'ra wa'aba da, aiwasété na asisãmri za'ra wa'aba wa, i'asi'ruiwapari za'ra wa'aba na hã. 9 'Râwimhã asina rosa'rata za'ra wa'aba tõ, ãne hã: “Wa norĩ hã Abra'ãhã nhihudu.” E marĩ wa. Tô sena wa za aima waihu'u za'ra wa'wa, ãne: 'Re ihâimana u'âsi mono hã, ã hã ẽtẽ nherẽ, te te ãma saprĩ waihu'u pese di, Abra'ãhã nhihudu na 're hâimana za'ra mono da! 10 Hâtâra hã te oto mapa, wede norĩ hã te te anhihâri da, isari hawi. Uburé rowede hã 're i'rãi wẽ za'ra mono õ norĩ hã te za da te 're sihâri za'ra, unhama u da te 're sãmra mono da.

11 — Wa hã wa tô â na si, â dawabzuri hã te aima 're ab'manharĩ 'wa, aiwasété wi 're i'aipizari za'ra wa'aba mono zém na, da te oto ãma 're aiwaihu'u za'ra wa'aba mono da hã. Tane nherẽ, ĩza'u hã te za wei wi, ni'wa ĩnhipai u iwaihu'u pese uptabi hã. Taha si te za 'Re ihâimana u'âsi mono Pẽ'ẽzani na te te 're aihâiba ubu za'ra wa'wa, duré unhama na zama. Ta hã ĩnhipai u waihu'u pese uptabi wa, wa hã sadai õ di, ipara'uza te tãma imrami da hã. 12 Isib'ratamhã iparahi wawẽ amnho trigu 'rãi upõrĩzé, tãma 're ihâimana mono na, te za amnho trigu hã ãma aipo'o, iteihi nhiti. Amnho trigu si te za sé, tite dasai ubumrozéb ãma hã. Tanei õ di, iteihi hã te za ãma ro'o unhama na, niwa za idâ'â waihu'u õ na.

13 Taha bâtâ mono 'remhã Zezusi hã ma tô mo Galiléia hawi, Zodã pa u, Zuwã Batista hã â dawabzuri te te tãma 'manharĩ da. 14 Tane nherẽ, Zuwã Batista hã ma tô pibu aré, isimirosa'rata na te te ãma tiwi saprĩ da. Tahawa te ãne tãma tinha:

— Wa hã wa amnhasi, â dawabzuri hã ĩma 'manharĩ da. E niha te tane nherẽ, asima iwẽ, wa hã te aima 'manharĩ da, â dawabzuri hã.

15 Tane nherẽ, Zezusi hã ma tô ãne tãma tinha:

— Tô ãne haré marĩ hã hâimana za'ra. Tawap si wa za uburé marĩ hã 'manharĩ ni, 'Re ihâimana u'âsi mono te te sima iwẽzéb zarina.

Tahawa, Zuwã hã ma tô ãma saze. Â dawabzuri hã ma tô Zezusihi ma 'manha.

16 Tawamhã Zezusi hã â dawabzuri te te 'manharĩ parimhã, â hawi ma tô watobro. Tô taha wi awa'awi hâiwa hã ma tô si'ridawa. Tawamhã Zezusi hã ma tô 'madâ, 'Re ihâimana u'âsi mono Pẽ'ẽzani, utu'u ne we te te isi'ra hã, duré ihâiba na isimizazâri hã. 17 Tawamhã hâiwa hawi damreme hã ma tô we tinha, ãne:

— Ã hã ĩ'ra, ĩma isawi uptabi. Ãma ĩto za'ẽtẽ uptabi di.