Zezusihi u bâtâ pusizém hawi, aibâ rowaihu'u pese 'wa norĩ isi'aba'rézé
2
Zezusi hã ma tô podo, Belẽ na 'ri nho'õmo nhisi ãma, Zudéa na danhipti'a nho'õmo nhisi 're, Erodi hã Izaraéu nhihudu norĩ nhipti'ai 're, apito na 're hâimana mono ré. Taha ré hã, nima norĩ aibâ norĩ wasi na romnhoré'wa norĩ hã ma tô aihutu bâtâ pusizém hawi, Zeruzalẽ u. 2 Ta norĩ hã ma tô anharĩ za'ra, ãne:— E mame te tihâiba 'watébrémi ipoto té hã, Zudeu norĩ nhib'apito da hã. Ite wasi hã wa wasiwi 'madâ'â ni, bâtâ pusizéb ãma hã. Tahawa, wa tô we ai'aba'ré ni, ãma wawata za'ra da.
3 Tawamhã ãne hã apito Erodi te te wapari wamhã, hâtâ'â uptabi di, duré uburé Zeruzalẽ ãma 're idasi'ubumroi mono norĩ zama. 4 Tahawa apito Erodi hã ma tô 'rã'õtõ, sasedoti norĩ tisiré norĩ ma ipire norĩ hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama. Ta norĩ hã ma tô sadanharĩ za'ra, nimame za poto zô, Danho'reptui'wa hã. 5 Tawamhã, ãne ma tô ãma siwi sada'â:
— Belẽ ãma te za podo, Zudéa ti'ai 're. Ãne ma tô 'Re ihâimana u'âsi mono zadawa 'mahârâ'wa hã ãma rob'ui'éré:
6 “A hã Belẽ, Zuda ti'ai 'remhã, dama asurure na 're aihâimana mono õ di, Zuda 're, 'ri wa'õno dama isa'ẽne 're ihâimana za'ra mono norĩ wazarimhã.
E marĩ wa. Aihawi te za podo danhib'apito hã, ĩnhib'a'uwẽ Izaraéu nhihudu norĩ, za te te 're isimroi mono da hã.”
7 Tawamhã Erodi hã ma tô sô tihârâ za'ra pi'uriwi, aibâ norĩ bâtâ pusizém hawi isihutu norĩ zô. Ma tô sadanharĩ za'ra, bâdâ hã i'uwaibaba na te te tãma wasu'u za'ra da, wasi isihâi'rézé hã. Tahawa, ma tô tãma wasu'u za'ra. 8 Taha pari ma tô tãma rob'ru za'ra, Belẽ u si'aba'ré da, ãne:
— Mo oto ai'aba'réi wa'aba. 'Watébrémi zô asinharĩ pese za'ra wa'aba za. Sõpẽtẽ za'ra wa'aba wamhã, we asiwi ĩpo're pu'u aba, ĩzama itẽme ĩmorĩ da, ãma ĩwata da.
9 Tawamhã apito te te siwi wapari parimhã, ma tô oto ai'aba'ré, Belẽ u. Bâdâdi na si'aba'réi ré, ma tô duré wasi hã siwi 'madâ'â, tô õ hã bâtâ pusizéb ãma tirob ãma ré te te i'madâ'â za'ra hã. Ta hã isõwa te timorĩ za'ra. Tawamhã ma tô mazazâ, 'watébrémi inomrozém nhisiwi. 10 Tawamhã wasi hã te te siwi 'madâ'â wamhã, toi uptabi za'ra di. Duré tipẽ'ẽ 'remhã te 're to za'ra. 11 Tawamhã 'ri para u ma tô asisi. Tame ma tô siwi sõpẽtẽ 'watébrémi hã, ina Maria hã iré sãmra ré. Tawamhã hi'rãtitõ ma tô asimro. Ma tô ãma tiwata za'ra. Taha pari, ma tô 'ridawa za'ra, tinhimiro'wapézé tinhoprubzéb ré te te i'wasari hã. Ma tô tãma sõmri za'ra, tinhoprubzé hã; ẽtẽ waipo pré oru hã, wedewati isadaze hã, duré wedewati isadaze i'u'ẽne hã, mirra na isisi hã.
12 Tawamhã 'Re ihâimana u'âsi mono hã ma tô po're pu'u za'ra, sõtõ 'rowi, Erodihi u apâ si'aba'ré tõ da. Tahawa ma tô bâdâdi amo na apâ ai'aba'ré, tinhipti'ai u hã.
Zuzé norĩ hã Ezitu u ti'ra ré isimani zahuré zé
13 Aibâ norĩ apâ tirob u si'aba'ré za'u hã, hâiwa hawi Uburé Danhib'apito ma romhuri'wa hã ma tô Zuzéhé ma sihâi'ré, isõtõ 'rowi. Ãne te tãma tinha:
— Ma'ãpé aiwahutu. Sa'ra na 'watébrémi hã. Ina hã iré saprõni. Ezitu u aimani wa'aba, tame aimasisi aba da, apâ te i'aipo're pu'uzéb u. E marĩ wa. Erodi hã ai'uté zô rĩtĩ wa, te te wĩrĩ da.
14 Tawamhã Zuzé hã ma tô udu, barana. Ma tô sa'ra ai'uté hã. Ina hã ma tô iré saprõ, Ezitu u. 15 Tawamhã tame ma tô aimasisi zahuré, Erodi hã idâ'âzéb u. Ãne hã ma tô tiromhâiba, te te sina uwaimrami da, Uburé Danhib'apito tizadawa 'mahârâ'wai ma, te te iwaihu'uzéb zarina: “Wa hã ĩ'ra zô, wa tô hâ, Ezitu hawi morĩ da.”
'Watébrémi norĩ, da te isõ'rebzârizé
16 Erodi hã aibâ norĩ bâtâ pusizém hawimhã te te tãma irob'rãmi za'ra na te te waihu'u wamhã, ma tô ab'rui pese. Tahawa ma tô ti'ru, da te simro da, uburé 'watébrémi norĩ hã, zahadu maparane ãma iwahub õ norĩ hã, Belẽ 'remhã duré isababa daro isisõré mono na hã. Ãne hã ma tô 'manha, rowasu'u te te iwaihu'uzéb zarina, wasi isihâi'rézém na hã. 17 Tawamhã ãne ma tô sina uwaimra, 'Re ihâimana u'âsi mono zadawa 'mahârâ'wa Zeremia te te irob'ui'érézé hã, ãne:
18 “Rama na romnhisi ãma dawawa hã ma tô wapari za'ra ni, 're idazadari 'rãihâ za'ra mono zé hã.
Ta hã Raqueu hã te aiwa'õ, ti'ra norĩ ãma. Pẽ'ẽzé uptabi wa, te te sima wẽ õ di, da te ipẽ'ẽtété da hã, i'ra norĩ hã uburé tiwi si'utõrĩ wa.”
Ezitu hawi, Zuzé norĩ hã apâ inebzé
19 Erodi hã dâ'â parimhã, Zuzéhé ma isõtõ 'rowi ma tô Uburé Danhib'apito ma hâiwa hawi romhuri'wa hã sihâi'ré, Ezitu ãma. 20 Ãne te tãma tinha:
— Aiwahutu. Sa'ra na 'watébrémi hã. Ina hã iré saprõni apâ, Izaraéu nhihudu norĩ nhipti'ai u. Aibâ norĩ hã 'watébrémi te te siwi wĩrĩ da, te te sima iwẽ za'ra hã ma tô tidâ'â za'ra.
21 Tawamhã Zuzé hã ma tô wahudu. Ma tô sa'ra 'watébrémi hã. Ina hã ma tô iré saprõ apâ, Izaraéu nhihudu norĩ nhipti'ai u. 22 Tane nherẽ, Arquelau, apito Erodihi 'ra timama nhibrob're, Zudéa ãma te te 're da'a'madâ'â mono da, isébré na te te waihu'u wamhã, pahi di, tamomo imorĩ da hã. Tawamhã sõtõ 'rowi marĩ te te i'manharĩ da hã 'Re ihâimana u'âsi mono te te duré po're pu'u parimhã, Zuzé hã ma tô mo, Galiléia na danhipti'a nho'õmo nhisi u. 23 Tame ma tô 're simasisi zahuré, Nazaré na 'ri wa'õtõ nhisi ãma. Ãne hã ma tô tiromhâiba, te te sina uwaimrami da, 'Re ihâimana u'âsi mono zadawa 'mahârâ'wa te te irob'ui'érézé hã, ãne: “Te za oto da te 're sisi za'ra, Nazaré ãma iprédum na.”