3 — Ma'ãpé ĩwapari pese za'ra wa'aba. Rob're'wa hã ma tô mo, te te rob're da. 4 Tawamhã romnhamare te te anhamra mono wamhã, nima norĩ hã ma tô rere'e, bâdâdi zababa. Tane nherẽ, si norĩ hã ma tô sô sina. Ma tô te te huri, uburé. 5 Tawamhã nima norĩ hã ti'a surure na ẽtẽ wazari 're ihâimana za'ra mono na ma duré rere'e. Ta norĩ hã ma 'wanhipré su'u, ti'ai baihâire wa. 6 Tane nherẽ, bâdâ oto 'rãiwatobro wamhã, ma tô ti'wanhipré 'ré za'ra, sari õ wa. 7 Tawamhã nima norĩ hã ma duré rere'e, wab'ru wa'wa. Ta norĩ hã prédub za'ra wamhã, ma tô wapre za'ra, rob're hã. Tahawa, 'rãi waihu'u za'ra õ di, ta norĩ hã. 8 Tanei õ di, romnhamare ti'ai wẽ wa irere'e mono hã wẽ na ma 'wanhipré. Ma tô tiprédub za'ra. 'Rã za'ra wamhã, ma tô ti'rã za'ra, 30 na i'rã na, nima norĩ hã 60 na, duré nima norĩ hã misi iwede nherẽ, 100 na i'rã hã.

9 Tawamhã Zezusi hã ma tô ãne ãma 'rãsutu, timreme na:

— Asimiparizé aima hâimana za'ra wa'aba wamhã, ma'ãpé wapari za'ra wa'aba!

10 Tawamhã Zezusi hã siwaprosi hâimana wamhã oto, ni'wam norĩ dame ihâimana za'ra hã ma tô itẽme sina rotété za'ra dawa'rãmi, 12 na ihâiba za'ra norĩ siré, te te siwi sadanharĩ da, rowasu'u na romnhimiré'é na te te irowasu'uzém na hã.

11 Tahawa, Zezusi hã ma tô tãma nharĩ za'ra, ãne:

— Aima za'ra wa'aba hã 'Re ihâimana u'âsi mono, ma tô aima hâi'ré za'ra wa'wa, dama iwaihu'u'õ hã da'ãma 're isib'a'uwẽ mono zém na hã, sõ'awi te te dama waihu'u õ nherẽ. Tanei õ di, da'ãma 're isib'a'uwẽ mono zém nhiti rowi 're ihâimana mono norĩ ma hã. Rowasu'u na romnhimiré'é na si te ta norĩ ma te te 're awaihu'u. 12 Titõmo na te te 're 'madâ'â za'ra mono nherẽ, te te 're 'madâ'â waihu'u za'ra mono õ di. Te te duré 're wapari za'ra mono nherẽ, te te 're sadaihu'u za'ra mono õ di. Te te waihu'u za'ra 'wa'âhã, te aré 'Re ihâimana u'âsi mono u 're sipizari za'ra. Tawamhã iwasété za'ra hã te te aré ãma 're a'madâ'â mono õ di.

13 Tawamhã Zezusi hã ma tô sadanharĩ za'ra, ãne:

— Ã hã rowasu'u na romnhimiré hã sadaihu'u za'ra wa'aba õ wamhã, e niha te za bété ihâiba amo norĩ hã isadaihu'u za'ra wa'wa.

14 Zezusi hã ma ãma tãma uzusi za'ra, ãne:

— Rob're'wa hã, 'Re ihâimana u'âsi mono mreme te te 're i're za'ra mono te wasu'u. 15 Ni'wam norĩ hã 'Re ihâimana u'âsi mono mreme te te 're iwapari za'ra mono hã, aiwa romnhamare bâdâdi zababa irere'e mono ne. Te te wapari za'ra wi, Satanasi hã te za tiwi sô timorĩ za'ra. Te za tiwi wazere za'ra, ipẽ'ẽ 're, da te tãma i'a're za'ra hã. 16 Ni'wam norĩ hã aiwa romnhamare ti'a ẽtẽ wazari 're ihâimana za'ra mono na, aibâ te te i'anhamra mono ne. 'Re ihâimana u'âsi mono mreme te za wapari za'ra. Waptu na te za saze za'ra, to sina. 17 Tane nherẽ, sari õ wa, ãma ronomro prãi wi, te za sazei utõrĩ za'ra. 'Re ihâimana u'âsi mono mreme te te iwapari u'âbâmhã, robzépada duré dama rob'manharĩ wasété zé hã, sô wisi za'ra wamhã, tahawa, te za rẽme za'ra, te te isaze za'ra zé hã. 18 Ni'wam norĩ hã aiwa romnhamare wab'ru wazari, aibâ te te i'anhamra mono ne. 'Re ihâimana u'âsi mono mreme te za wapari za'ra. 19 Tane nherẽ, ti'ai 'rem na si, 're hâtâ'â za'ra mono wamhã, tinhimarĩ na si duré marĩ na si te te 're rosa'rata za'ra mono wamhã, te za te te tiwi 're 'wa'rutu za'ra, 'Re ihâimana u'âsi mono mreme hã. Tawamhã 'rãi waihu'u za'ra õ di za. 20 Tanei õ di, ni'wam norĩ hã romnhamare ti'ai wẽ wa, irere'e mono ne. Ta norĩ hã 'Re ihâimana u'âsi mono mreme te za wapari za'ra. Te za saze za'ra. Tawamhã 'rã za'ra wamhã, 'rãi pese na te za ti'rã za'ra. 30 na i'rã na, 60 na, duré 100 na te za ãma sisiwi za'ra, te te iwapari za'ra zém nhipai u.

21 Tawamhã Zezusi hã ma duré ãma uzusi, ãne:

— E ni'wa hã te te sãrĩ waihu'u pese di rob'uiwẽzé hã, piza'a 'rowimhã duré niwamhã waptâ 'rowimhã. Mare di. Te te rob'uiwẽ da hã romnhiwasi te za sãrĩ ni. 22 Tahawa, uburé marĩ simi'uri na ihâimana za'ra hã te za upsibi me za'ra ni. Duré uburé marĩ pi'uriwi ihâimana za'ra hã sõ'awi te za oto tihâimana za'ra. 23 Ãne wa, asimiparizé hã aima hâimana za'ra wa'aba wamhã, ma'ãpé wapari za'ra wa'aba!

24 Ma duré ãma uzusi, ãne:

— Ãma rosa'rata pese za'ra wa'aba, 're iwapari za'ra wa'aba mono hã! Marĩ hã dama 're i'manharĩ za'ra wa'aba mono zéb zarina, te za 'Re ihâimana u'âsi mono hã te te aima 're 'manharĩ zara wa'wa, pire uptabi na. 25 Ni'wai ma hâimana wamhã, sa'ẽtẽ na te za ãma tãma sisiwi. Tazahã ni'wa te baba wamhã, suru na tãma hâimana nherẽ, te za tô tiwi waze.

26 Tawamhã Zezusi hã ma duré ãma uzusi, ãne:

— 'Re ihâimana u'âsi mono da'ãma 're isib'a'uwẽ mono zé hã, aiwa aibâ romnhamare ti'ai u te te i'anhamra mono ne. 27 Tawamhã barana duré bâtâ na sõtõ ré duré rĩtĩ ré zama, te za ti'wanhipré za'ra. Amnho hã te za duré tiprédub za'ra, te te waihu'u ãna, e niha ma ãne hã tiprédub za'ra. 28 Ti'a hã te za tô prédu. Imorĩ'rata na hã rob're te za podo. Taha parimhã te za sihiti. Taha parip si i'rã hã te za sina su nhito. 29 Tawamhã 'rãi 'ré wapsi, te za oto 'rãihâ, ro'wa na aibâ hã, bâdâ oto iwa waptã'ã wa, te te itehârizé hã.

30 Tawamhã Zezusi hã ma duré ãma uzusi, ãne:

— E marĩ na wa za ãma simiré'é, 'Re ihâimana u'âsi mono, da'ãma 're isib'a'uwẽ mono zém na hã. E ma hã wa za wasu'u, rowasu'u na romnhimiré hã. 31 Ta hã aiwa romnhamare mostarda ne hã. Romnhamare dama hã ĩsurure, ta hã. 32 Tane nherẽ, da te 're zuri mono wamhã, oto 'wanhipré wamhã, te za ti'rãihâ pese, uburé rowede norĩ nhipai u. Papo za'ẽtẽ uptabi wa, te za si norĩ hã te te iwa sima 're zasi za'ra.

33 Ãne ma tô Zezusi hã ahâ na te te 're rowasu'u romnhimiré'é na, da te 're sadaihu'u za'ra mono da. 34 Taha ãna hã te te dama 're rowasu'u mono õ di. Tane nherẽ, isiré 're inomro mono norĩ ma si, ma tô hâiba pisutu, te te tãma 're awaihu'u pese, sõ'awi.

35 Tawamhã taha bâtâ na hã hâiwahâ pesere Zezusi hã ma tô isiré 're inomro mono norĩ ma tinha, ãne:

— Oto â zara u^a, wa te saprĩ za'ra na.

36 Tawamhã sisa'u ma tô darẽme za'ra. Ma tô asisi, uba're Zezusi iwa isébrézéb 're. Ma tô isiré sisa're. Uba're aimawi norĩ hã ma tô duré isiré sisa're. 37 Tawamhã waptu na rowa'u hã ma tô watobro, sa'ẽtẽ na. Âsisasi hã uba're ma tô nasi ahâ. Tahawa ma ti'â'masisi, uba're wa. 38 Taha ré hã, Zezusi hã te nhono, uba're na're ãma. Da'rã zaparizém na te 'rã zapa. Tawamhã isiré 're inomro mono norĩ hã ma tô siwi utu. Ãne te siwi 'mahâ:

— Rowahutu'wa, wa za ai'utõrĩ ni. E wa'ãma rosa'rata za'ra õ di.

39 Tawamhã Zezusi hã ma tô wahudu. Rowa'u'u ma, te tinha, mreme tete na. Âsisasisi ma zama te duré tinha, ãne:

— Ma'ãpé asimizazâri! Airési ãna aihâimana!

Tawamhã rowa'u hã ma tô mazazâ. Robrési ãna ma tô oto tiromhâiba. 40 Taha pari Zezusi hã ma tô sadanharĩ za'ra, ãne:

— Pra! E marĩ da bâ, ma aipahi za'ra wa'wa. E zahadu asiwi ĩ'umnhasi aba õ di.

41 Tawamhã isiré 're inomro mono norĩ hã, pahi uptabi za'ra di. Tahawa te ãne sima nharĩ za'ra:

— E 'wa hã, ã hã aibâ, rowa'u duré â poré zama te te iwapari pe.