— Aiwahutu! We aimorĩ, dawa'wa u.

4 Taha pari te da'a'mahâ, ãne:

— E marĩ i'ru zahi, sabadu na wa te 're i'manharĩ za'ra mono da hã: E iwẽ. E iwasédé. E wa za wa te 're danho'reptu za'ra. E niwamhã wa za wa te 're danhimro.

Tane nherẽ, ni'wa hã te te sada'âbâ õ di. 5 Tawamhã Zezusi hã toi ãna ma tô simana wawi da'a'madâ. Ma tô tiwi tirobzei'õ pese, pẽ'ẽ tete za'ra wa. Taha pari te aibâ ma tinha, ãne:

— Ma'ãpé, asib'rada wahutu.

Aibâ hã tinhib'rada ma tô wahutu. Ma tô oto tipese. 6 Taha pari, ma tô awa'awi wairé, farizeu norĩ hã. Tawamhã Erodihi niwĩ 're ihâimana za'ra mono norĩ^a me, ma tô sima rowa'õtõ za'ra, Zezusihi hâiba na, te te siwi wĩrĩ da.

7 Tawamhã Zezusi hã duré isiré 're inomro mono norĩ me ma tô ai'aba'ré, Galiléia isõ'ui pa u. Tawamhã da'ahâ uptabi na te isarina ai'aba'ré ni, Galiléia ti'ai hawimhã, duré Zudéa hawib zama, 8 duré Zeruzalẽ hawimhã, Iduméa, Zodã pa zara hawimhã, Tiru, duré Sidõ ti'ai hawib zama, Zezusi hã da te dasiwi sõpẽtẽ da, marĩ te te 're i'a'manharĩ mono zém na iwasu'u hã da te wapari za'ra wa. 9 Tawamhã Zezusi hã ma tô isiré 're inomro mono norĩ ma ti'ru, uba're hã te te 'ma'âri za'ra da dawi, iwap sébré da, da te dasiwi hõti tõ da, dasina. 10 Tawamhã da'ahâ uptabi na te te da'apese wa, ma tô ihâzé ré norĩ hã iteme 're sisãmra, te te siwi upi da. 11 Wa'uburé dawa 're ihâimana za'ra mono norĩ hã, Zezusi te te nasi 'madâ'â za'ra wamhã, hi'rãtitõ te ipapara nasi tãma ana. Ãne te sa'ẽtẽ nasi siwi 'mahâ:

— A hã 'Re ihâimana u'âsi mono 'ra.

12 Tane nherẽ, Zezusi hã wa'uburé norĩ wi mreme tete na ma tô tiwi sisawi za'ra, 'Re ihâimana u'âsi mono 'ra na hã te te dama hâi'ré za'ra tõ da.

13 Tawamhã Zezusi hã ẽtẽ'rãihâ na ma tô sai'u. Tame te te sima iwẽ za'ra norĩ zô ma tô hâ. Ta norĩ hã ma tô itẽme ai'aba'ré 'râwi. 14 Tame 12 na aibâ norĩ hã ma tô pisutu za'ra, isiré 're hâimana za'ra mono da, te te duré datẽme satõrĩ za'ra da, Rowasu'u wẽ ité hã te te dama 're wasu'u za'ra mono da. 15 Isimiroti pire hã ma tô duré tãma sõmri za'ra, wa'uburé hã te te dama 're sãmra za'ra mono da. 16 Tawamhã 12 na ihâiba za'ra norĩ nhisi hã, ãne: Simau, Zezusi te te isisi té Pedru na. 17 Tiagu duré Zuwãhã me, ta norĩ hã Zebedeu 'ra zahuré. Buanezi na ma tô sisi téb zahuré. “Tãirãrã'ã 'ra” te wasu'u, isisi téb zahuré hã. 18 Ãdré, Filipi, Bartolomeu, Mateus, Tome, Tiagu Afeuhu 'ra, Tadeu, Simau, zeloti norĩ niwĩ 're ihâimana mono, 19 duré Zudasi Iscarioti, Zezusihi hâiba nhomri'wa da hã dama.

20 Tawamhã Zezusi hã 'ri, 're izasi pese mono zéb u morĩ wamhã, da'ahâ na ma tô duré itẽme dasito. Tahawa Zezusi norĩ hã saihuri waihu'u õ di. 21 Ina duré isiwadi norĩ hã, Zezusihi wasu'u te te wapari za'ra wamhã, ma tô sô ai'aba'ré, da te dasiwi wasu'u wa, i'rãsiwamnarĩ na hã. 22 Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, Zeruzalẽ hawi isihutu norĩ hã te ãne nasi nharĩ za'ra:

— Beuzebu te iwa tihâiba, wa'uburé norĩ nhib'apito hã. Taha zadawa para te wa'uburé hã te te dama 're anhamra.

23 Tawamhã Zezusi hã te sô tihârâ za'ra. Tame ma tô tãma rowasu'u za'ra, romnhimiré'é na. Ãne:

— E niha te za Satanasi hã 'râwi te te sima 're rob'ru. 24 Ti'ai wa'õtõ nho'u hã maparane iwa'õtõ na sisada sipo'o wa si'wapé za'ra wamhã, 'râwi te za si'uprosi. 25 Dasisãnawã nherẽ, dasisada 're dasipo'o mono wa, 're dasi'wapé za'ra mono wamhã, te za 're dasi'uprosi. 26 Tane Satanasi norĩ hã maparane iwa'õtõ na sisada sipo'o wa, si'wapé za'ra wamhã, te za si'uprosi. Tame te za ai'utõ.

27 — E ni'wa hã sébré waihu'u pese bâ, aibâ isiptete nhorõwa u hã isibro te te tiwi duri da, a'â te te pawasisi õ ré hã. Te te pawasisi parip si, te te tiwi robduri waihu'u pese di, aibâ isiptete nhorõwa hawimhã.

28 — Tô sena wa za aima rowasu'u za'ra wa'wa, ãne: 'Re ihâimana u'âsi mono te te da'ãma 're a'madâ'â mono õ di za, uburé dawasédé, da te 're i'manharĩ za'ra mono zé hã, duré da te ãma 're iwasété za'ra mono zé hã. 29 Tane nherẽ, 'Re ihâimana u'âsi mono Pẽ'ẽzani ãma da te 're wasété za'ra mono wamhã, te te dama 're apari waihu'u mono õ di za. Te za te te da'ãma 're a'madâ'â u'âsi. Ta hã dawasédé isi'utõrĩ'õ.

30 Ãne ma tô Zezusi hã tãma rowasu'u za'ra, te te tãma nharĩ za'ra wa, wa'uburé ré ihâimana na hã.

31 Taha pari, Zezusihi na duré ino norĩ hã ma tô itẽme aihutu. Rowi simasa wa, ma tô sô da'mazatõrĩ za'ra, da te tãma 'mairowasu'u da. 32 Da'ahâ uptabi na te imana wawi asimro ni. Tawamhã ni'wam norĩ hã te tãma rowasu'u za'ra, ãne:

— Ana duré ano norĩ hã te rowi aimasa. Te asô tirĩtĩ za'ra.

33 Tawamhã Zezusi hã te sadanharĩ za'ra, ãne:

— E 'wa hã ĩna bâ. Duré e 'wam norĩ hã ĩno norĩ.

34 Tawamhã ma tô ab'madâ, te te siwi i'uirĩ norĩ hã. Tahawa te ãne tinha:

— Ma'ãpé 'madâ'â za'ra wa'aba! Ãhãta te ĩna norĩ hã asimro, duré ĩno norĩ. 35 Ni'wa hã 'Re ihâimana u'âsi mono te te sima 're iwẽ za'ra mono zéb zarina te te 're ab'manharĩ mono wamhã, ta hã ĩsisãnawã, ta hã ĩhidiba, duré ta hã ĩna.