Zezusihi ubu isisaprĩzé, ẽtẽ 'rãihâ ãma
17
Tawamhã bâdâ imropâ na si'utõrĩ parimhã, Zezusi hã ẽtẽ 'rãihâ u ma tô te te siré simro Pedru, Tiagu duré Zuwã norĩ hã, hâiba pisutu. 2 Tame ma tô Zezusihi ubu hã sisaprĩ, isõ'a za'ra. I'ubu hã ma tô rowa'a, bâtâ ro'o ne. Duré i'uza zama, hâ zarob'a uptabi di, bâtâ ro'o ne. 3 Tame ma tô awa'awi pesere sihâi'ré zahuré isõ'a za'ra, Mozési norĩ hã, Eliasihi me. Ta norĩ hã te Zezusihi ma, robzanhamri zahuré. 4 Tawamhã Pedru hã ma tô tinha, Zezusihi ma, ãne:— Wanhib'apito, irowẽ, ãme wahâimana za'ra wamhã. Asima wẽ wamhã, si'ubdatõ wa za 'ri, romhâ 'manharĩ na. Misi za ate da hã, duré Mozésihi te da hã, duré Eliasihi te da hã.
5 Tawamhã Pedru hã zahadu te te tãma nharĩ ré, ma tô hâiwa nhirõno irã uptabi hã upsibi za'ra. Ta hawi ma tô damreme hã ãne tinha:
— Ã hã ĩ'ra, ĩma isawi uptabi. Te ãma ĩsima 're irowẽ za'ẽtẽ mono. Ma'ãpé 're wapari pese za'ra wa'aba mono!
6 Tawamhã Zezusihi siré 're inomro mono norĩ, ãne hã te te wapari za'ra wamhã, ma tô tipahi pese za'ra. Hi'rãtitõ ma tãma rere, dumana na. 7 Tawamhã Zezusi hã ma tô itẽme ai'ré za'ra. Ma tô upi za'ra. Ãne te tãma nharĩ za'ra:
— Aiwahutu za'ra wa'aba. Aipahi za'ra wa'aba tõ.
8 Tawamhã oto 'rãiwahutu za'ra wa, te te rob'madâ'â za'ra wamhã, ni'wai õ di oto. Zezusihi si ma tô siwi 'madâ.
9 Tawamhã ẽtẽ 'rãihâ hawi te te si'ra za'ra ré hã, Zezusi hã ma tô sadawa uwati pese za'ra, ãne:
— Ni'wai ma rowasu'u za'ra wa'aba tõ, i'madâ'â za'ra wa'aba zém na hã, Ti'ai ãma Dasiré Ipodo, Imama apâ te te ihâiwa'utuzéb u.
10 Tawamhã isiré 're inomro mono norĩ hã ma tô ãne siwi sadanha:
— E marĩ wa, te bété 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã te te 're rowasu'u za'ra i'ru zahi na hã, Elias hã imorĩ'rata na za we imorĩ na hã.
11 Tawamhã Zezusi hã ma ãma sada'âbâ za'ra:
— Tô sena, te za Elias hã wei mo, te te robza'ra pese da. 12 Tane nherẽ, wa za tô sena ãne aima waihu'u za'ra wa'wa: Elias hã ma tô we timorĩ pa. Tane nherẽ, da te dasiwi waihu'u õ di. Tahawa, dasima iwẽ na ma tô tãma rob'manharĩ wasété za'ra ni. Tane te za duré tãma rob'manharĩ wasété za'ra ni, Ti'ai ãma Dasiré Ipoto ma hã.
13 Tawamhã isiré 're inomro mono norĩ hã ma tô siwi sadaihu'u, Zuwã Batistaha na te te inharĩ na hã.
Zezusi hã ai'repudu, wa'uburé ré hã te te ipesezé
14 Tawamhã da'ahâ uptabi na idahâimana za'ra norĩ u apâ si'aba'réi wamhã, ma tô aibâ hã sina rotété Zezusihi u. Hi'rãtitõ ma tô ipapara aime. 15 Ãne ma tô Zezusihi ma, tinha:
— Apito, ma'ãpé ĩ'ra ãma aipẽ'ẽzé na. Ta hã te za 're sitete. Te te duré 're robzépata za'ẽtẽ. Nimahã na hã te 're waptã'ã unhama wa, âi bâ zama. 16 Tahawa, wa tô aré ãwisi, asiré 're inomro mono norĩ u. Tane nherẽ, te te siwi pese waihu'u õ di.
17 Tawamhã Zezusi hã ma tô tinha, ãne:
— E niha i'aiwasété uptabi za'ra wa'wa, duré 'Re ihâimana u'âsi mono asina 're i'umnhasi za'ra wa'aba mono õ! E mahã bâtâ u ai'rata 're ĩnhamra u'âsi aba mono da bâ. E mahã bâtâ u te duré 're asapari ze za'ra wa'aba mono da bâ. Ma'ãpé we ĩma saprõni aba, ai'repudu hã.
18 Tawamhã Zezusi hã mreme tete na ma tô wa'uburé ma tinha. Tahawa ma tô awa'awi pesere watobro. Ai'repudu hã ma tô oto tipese.
19 Tawamhã isiré 're inomro mono norĩ hã ma tô hâiba pisutu Zezusihi u sina rotété za'ra. Ãne ma tô siwi sadanha:
— E niha bâ, wa te bété wasiwi mei waihu'u õ di, wa'uburé hã.
20 Tawamhã Zezusi hã ma tô sada'âbâ za'ra, ãne:
— 'Re ihâimana u'âsi mono umnhasizé hã surure wa, ate za'ra wa'wa hã. Tô sena, wa za aima waihu'u za'ra wa'wa, ãne: 'Re ihâimana u'âsi mono umnhasizé hã romnhamare mostarda isisi ne, surure nherẽ, aima hâimana za'ra wa'aba 'wa'âhã, ẽtẽ ma nharĩ aba wamhã aré, ãne: “Ã hawi õwa aimorĩ”, asadawa zarina wa'aba te aré mo. Marĩ ipire hã aré aima hâimana za'ra wa'aba õ di. 21 [Tane nherẽ, ãne hã wa'uburé hã, te za rowaptẽrẽ u'âsi na si, da te 're sani za'ra, duré dasai ãna a'â da te 're irowaptẽrẽ za'ra mono na si.]
Zezusi hã maparane ãma isiwasu'uzé, za idâ'âzém na, duré apâ za ihâiwa'utuzém na hã
22 Tawamhã nimahã bâtâ na isiré 're inomro mono norĩ hã ma tô si'rã'õtõ, Galiléia ãma. Tawamhã Zezusi hã ma tõ tãma siwasu'u za'ra, ãne:
— Ti'ai ãma Dasiré Ipodo hã te za dasima hâiba nhomri za'ra ni za. 23 Tawamhã te za dasiwi wĩrĩ ni. Tane nherẽ, si'ubdatõ bâdâ ãma si'utõrĩ õ ré te za apâ Imama hã hâiwa'utu.
Tawamhã ãne hã te te wapari za'ra wamhã, isiré 're inomro mono norĩ wi ma tô tirobzei'õ pese za'ra.
'Re ihâimana u'âsi mono nhorõwa 'ri 'rãihâ 'madâ'âzéb da, rob'uiprazé da te tãma 're i'arĩ za'ra mono zé
24 Tawamhã Zezusi hã duré isiré 're inomro mono norĩ me, Cafarnau na 'ri nho'õmo nhisi u sihutu wamhã, 'Re ihâimana u'âsi mono nhorõwa ma rob'uiprazé arĩ ubumroi'wa norĩ hã ma tô Pedruhu u sina rotété za'ra. Ãne ma tô siwi sadanha:
— E asib'apito za'ra wa'wa hã rowahutuzé 'madâ'âzéb da, rob'uiprazé arĩ hã te te 're wa'âbâ mono õ di.
25 — Te te 're wa'âbâ. — Ãne ma Pedru hã sada'âbâ za'ra.
Tawamhã Pedru hã ma tô ãzé 'ri para u, Zezusihi zarina. Tane nherẽ, timreme te te wazere wana ré, ma tô Zezusi hã timreme na sõzâ. Ãne te sadanha:
— Simau, e niha aima hã. Ti'ai wa'õtõ nho'õmo 're, danhib'apito norĩ ma hã, e 'wam norĩ hã te za rob'uiprazé arĩ hã te te tãma 're wa'âbâ za'ra. E i'ra norĩ, e aimawi a'uwẽ norĩ hã.
26 Tawamhã Pedru hã ma ãma sada'â, ãne:
— Aimawi a'uwẽ norĩ.
Tawamhã Zezusi hã ma duré ãma sada'â, ãne:
— Tane tô. Tane wamhã, i'ra norĩ hã te te 're wa'âbâ za'ra mono õ di. 27 Tane nherẽ, dawa'rãmi wahâimana õ di za. Tahawa, ma'ãpé aimorĩ isõ'ui u, tepe zô me da, imramizé azo hã. Iré me na, za imorĩ'rata na te te aiwi i'mapraba ré hã. Isadawa 'remhã te za isõpẽ, rob'uiprazé isapotore hã. Tahawa, ma'ãpé sô aimorĩ, ĩte duré ate rob'uiprazé arĩ hã ãma wa'âbâ da, rob'uiprazé arĩ ubumroi'wa norĩ ma hã.